Digital Lamang: Mga Young Adult
Sa Dihang Walay Gibating Hingpit nga Kalipay sa Akong Kinabuhi, Midangop Ako sa Ebanghelyo
Akong gibati nga usa ka butang nawala sa akong kasingkasing––hangtod nadiskobrehan nako ang tinuod, walay kataposang kalipay nga nagagikan sa ebanghelyo ni Jesukristo.
Lain kadto nga mingaw, walay timik, ug laay nga adlaw. Sulod sa kataposang gamay nga higayon, ang tanan mao ra gihapon, ug bisan tuod naninguha akong malipay, misamot ang akong kalaay ug ka dili mahimutang. Taliwala kini sa COVID-19 nga pandemya ug ang akong nasod nag-lockdown, busa tanan kami giawhag sa pagpabilin sa balay hangtod sa umaabot nga pahibalo.
Kada adlaw nga ako mitan-aw sa akong kaugalingon sa salamin, nakita ko ang ka haw-ang diha niini. Kini naingon tingali tungod kay ako dili makahimamat sa akong mga higala o tungod kay ako dili makatrabaho o makasuporta sa akong pamilya niana nga panahon. Bag-o pa lamang akong migradwar sa kolehiyo ug gustong mahimong magtutudlo, apan kinahanglan akong mopasar og eksamin nga giuswag tungod sa pandemya.
Gibati nako ang kawalay kalipay, sama og may usa ka butang ang nawala sa akong kasingkasing, apan dili ako hingpit makahibalo kon unsa kini o gani kon unsaon ko sa pagpangita niini.
Pakighimamat sa mga Misyonaryo
Usa ka gabii, ang akong ig-agaw nagpakli-pakli og usa ka libro. Kini itomon nga asul ug giulohan og “Ang Aklat ni Mormon.” Siya bag-ohay nga miadto uban sa iyang higala sa gitawag og “family home evening” ug kanunay nga makig-istorya sa mga misyonaryo diha sa telepono pipila ka gabii sa usa ka semana sukad. Niining gabhiona gayod, siya nakigsulti diha sa telepono samtang nagpakli-pakli sa basahon sa dihang sa kalit gipangutana ko niya kon ako makatabang ba kaniya og tubag sa usa ka pangutana gikan sa usa sa mga misyonaryo.
“Seryoso ka?” Naghunahuna ko. “Ikaw ang gipangutana, busa nganong kinahanglan kong motabang?”
Apan misugot ako ug nangutana kaniya kon unsa ang pangutana. Ug siya miingon, “Ano daw layunin mo sa buhay?” (“Unsa sa imong hunahuna ang katuyoan mo sa kinabuhi?”)
Misugod ang akong kasingksing sa pagkubakuba og kusog sa dihang nadungog ko ang pangutana.
“Mao kini! Kini mao ang akong gipangita. Kini mao ang nawala sa akong kasingkasing,” naghunahuna ako.
Gitutokan nako ang akong ig-agaw, nagpahiyom, ug gihulaman ang telepono sa pagtubag sa pangutana sa misyonaryo. Akong gisultihan siya nga ako mituo nga ang katuyoan sa kinabuhi mao ang mahimong malipayon, malingaw sa kinabuhi, ug sa pagserbisyo sa uban ug magmaloloy-on ngadto kanila. Ug miuyon siya!
Siya ug ang iyang kompanyon nangutana usab kon sila makatudlo ba sa akong ig-agaw ug kanako og dugang pa sa ebanghelyo, ug mitando kami. Ang akong pamilya gitudloan sa mga misyonaryo sa dihang ako bata pa. Ang akong inahan usa ka miyembro apan nahimong dili aktibo sulod sa kasagaran sa akong kinabuhi, apan human sa pakigsinultihanay diha sa telepono, buot akong mokat-on og dugang pa.
Sa matag higayon ang mga misyonaryo mipakigbahin og usa ka butang mahitungod sa ebanghelyo, mibati ako og kalipay sa akong kasingkasing, ilabi na sa pagkat-on mahitungod sa plano sa kaluwasan ug ang mga saad sa Langitnong Amahan ug sa Manluluwas. Wala madugay misimba kami, ug ang mga miyembro miabiabi kanamo uban sa mainiton nilang mga kasingkasing ug matinabangong mga kamot.
Mabati nako sa akong kasingkasing nga ako nagpili sa hustong dalan. Ug human sa pipila ka bulan, nabunyagan ako sa usa ka suod nga higala kinsa mitabang kanako sa pagpadayon sa unahan diha sa ebanghelyo.
Ang Tinubdan sa Tinuod nga Kalipay
Ang paghimo og daghang kausaban sa akong kinabuhi human magpasakop sa Simbahan malisod. Ug ang akong kinabuhi dili sayon o malipayon sa tanang panahon. Apan samtang ako dihay bag-ong mga oportunidad sa pagserbisyo ug paglig-on sa akong pagpamatuod, miabot ako sa kahibalo uban ang kasigurohan nga ang walay kataposang kalipay sa pagkatinuod makaplagan dinhi sa ebanghelyo.
Bation nako ang kalipay diha sa akong kasingkasing sa matag panahon nga ako magbasa sa mga kasulatan, maminaw og balaang inspirasyon gikan sa atong mga propeta ug mga apostoles, ug nagsaksi sa mga pagpamatuod sa mga miyembro nga naglibot kanako. Akong nakaplagan ang akong tubag ngadto sa pangutana nga gipangutana niadtong mga misyonaryo diha sa telepono: ang katuyoan sa kinabuhi mao ang mahimong mas maayong tawo alang sa Dios, alang sa akong kaugalingon, ug alang sa akong pamilya, tanan samtang naningkamot sa pagbalik ngadto Kaniya. Ug kini nga kahibalo nagdala kanako sa eksakto nga kalipay nga akong gipangita. Ang pagpadayon sa pagserbisyo sa mga tawo ug pagdala sa akong pamilya ngadto sa simbahan mao karon ang akong prayoridad, tungod kay ako gusto kanila nga mosinati og tinuod nga hingpit nga kalipay.
Gitudlo ni Presidente Russell M. Nelson: “Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi.”1
Ako usab magpamatuod nga ang tinuod nga hingpit nga kalipay makaplagan lamang diha sa pagsunod ni Jesukristo. Matag oportunidad nga ako aduna diha sa ebanghelyo ni Jesukristo mipuno sa akong kalag og hingpit nga kalipay, ilabi na nga ako mitugot niini nga mga kasinatian sa pagtabang kanako nga motubo nga mas maduol ngadto Kaniya.
Sa wala pa ang COVID-19 nga pandemya, ako malipayon sa akong kinabuhi. Apan ang tinuod nga hingpit nga kalipay nga dala sa ebanghelyo lahi gikan sa kalipay. Bisan diha sa pandemya, ang ebanghelyo nagdala kanako og kalinaw ug nagpakita kanako sa katuyoan sa kinabuhi, diin nagtabang kanako sa pagpadayon sa unahan uban ang hugot nga pagtuo ug paglaom.
Akong nakaplagan sa kataposan ang akong nawala nga piraso. Ako nagkinahanglan sa hingpit nga kalipay nga dala sa pagsunod ni Jesukristo ngari sa akong kasingkasing ug sa akong kinabuhi, ingon nga gikinahanglan kanatong tanan.