“Faalagolago i le Atua ma Faamuamua o Ia,” Liahona, Aok. 2022.
Faalagolago i le Atua ma Faamuamua o Ia
O le lesona tupito o le tusi a Iopu o le mafai lea e i tatou taitoatasi ona filifili e ola i o tatou olaga ma faalagolago i le Atua ma Lana fuafuaga, e tusa lava po o le a.
Soo se mafatiaga “e mafai ona faaatoatoa e ala i le Togiola a Iesu Keriso.”
Keriso i Ketesemane, saunia e Heinrich Hofmann
Aisea e tutupu ai mea leaga i tagata lelei? Ou te masalo na oo lava ia Atamu ma Eva na la fesili ifo ia i laua lava i lenei fesili. Sa mautinoa lava na faia e Iopu. E toatele le au atamamai, au faitofā, ma le au failotu sa taumafai e tuuina mai ni tali.
O le tusi a Iopu o loo talanoaina ai le fesili ae lei taliina ai le aisea. Ua iloa e Iopu o le faalagolago i le Atua ae le o le faalagolago i lona lava atamai o le ala lea e taulima ai faigata i le olaga. O nei aoaoga e uunaia ai i tatou ia faamuamua le Atua ina ia tatou tumau i le iloa o le a lelei mea uma ma le faamoemoe e ui lava i luitau.
Agasala ma Puapuaga
O le malamalama i le tusi a Iopu e faafaigofieina pe a tatou mafaufau i lenei fasifuaitau: “O agasala uma e afua ai puapuaga, ae e le o puapuaga uma e mafua mai i le agasala.” Talu ai o amioga agasala uma e le o i ai ni taunuuga le lelei i le taimi lava lena mo le tagata sese (tagai Malaki 3:13–18), atonu e faaseseina i tatou ma talitonu sese e mafai ona tatou agasala ma le loto i ai ma e mafai ona aloese mai taunuuga. Latou te le mafai.
E ui o le salamo o se mea fiafia mo i tatou ma e aumaia ai le olioli i le Faaola ma lo tatou Tama Faalelagi, ae o a tatou agasala na mafua ai ona mafatia ae lei agasala le Faaola. Na Ia totogia le tau ina ia tatou le tumau i mafatiaga manaomia o se faasalaga pe a tatou salamo. Ae aua ne’i e sese ai: o agasala uma e mafua ai puapuaga.
Sa manatu Iopu ma ana uo o puapuaga uma na mafua mai i le agasala. O lena foi mea, e sese lava. O Iopu o se tagata lelei o lē na aveesea [ana] mea uma ma puapuagatia leaga faia ai. Ina ua “faamafanafana” o ia e ana uo, sa latou manatu atonu na matuia le agasala o Iopu ua mafua ai nei puapuaga.
Sa talitonu foi Iopu e na o le agasala lava na mafua ai le puapuagatia ma manao ai e faamaonia atu i ana uo ma i le Atua o lona “faasalaga” ua le tusa ai ma agasala sa ia faia. O lena faamaoniga, sa ia manatu ai, o le a taunuu i le mutaaga o ona mafatiaga.
Mulimuli ane, sa fetalai atu le Atua ia Iopu mai se asiosio. E lei puipuia e le Atua o Ia lava, faamalamalama mafatiaga o Iopu, pe tali atu i tautinoga a Iopu e uiga i lona mama. Ae, sa faitioina e le Atua ia talanoaga uumi a Iopu ma ana uo, ma faapea atu, “O ai ea lenei ua na faapouliuligia la’u pule i upu e le o i ai le poto?” (Iopu 38:2). Ina ia faamamafa atu lo latou valea, na tuuina atu ai e le Atua e le itiiti ifo ma le 66 fesili, ma poloaiina ai Iopu e tali i ai. Sa le mafaia e Iopu. (Tagai Iopu 38–42.)
Sa peiseai na fetalai atu ma le onosai ma le agalelei le Atua ia Iopu, “Afai e le mafai ona e tali atu e oo lava i se tasi o a‘u fesili e uiga i le lalolagi na ou foafoaina, pe mafai ea ona i ai ni tulafono e faavavau e te le malamalama i ai? Pe o i ai ni manatu na e faia e le taulia? Pe ua e malamalama i o‘u faamoemoega ma auala e aoga ai la’u fuafuaga o le faaolataga ma le faaeaga? Ma e mafai ona e muai vaai i lou taunuuga i le lumanai?”
Ua silafia e le Atua i Lona atamai o se vaega taua o lo tatou aafiaga i le olaga nei o le le iloaina lea o mea uma. E i ai se mea e uiga i le faatuatuaina o Ia lea e mafai ai ona tatou alualu i luma e avea faapei o Ia.
Sa lei malamalama muamua Iopu i nei mea. Ae e le na’o ia. Ua faamanatu mai e le Atua ia i tatou:
“Aua o o’u manatu e le o outou manatu, o o’u ala e le o outou ala, ua fetalai mai ai Ieova.
“Aua e pei ona sili ona maualuga o le lagi i le lalolagi, ua faapea ona sili ona maualuga o o’u ala i o outou ala, ma o’u manatu e sili i o outou manatu” (Isaia 55:8–9).
Sa taofimau e Iopu le savali a le Atua. Na ia faailoa atu ma le lotomaulalo na te leʻi malamalama, ma na ia salamō i le tuuaia o ona mafatiaga i le agasala (tagai Iopu 42:3, 6). Sa iloa e Iopu o mafatiaga uma e le o se faasalaga faalelagi. Ona o ona puapuaga sa lei mafua mai i le agasala, o le galuega a Iopu o le faalagolago lea i le Atua. Po o le a lava, sa manaomia ona manatua e Iopu e “alofa le Atua i ana fanau” e ui ina sa “le iloa e Iopu le uiga o mea uma” (1 Nifae 11:17).
Tumau i le Faatuatua
E pei o Iopu, e manaomia ona tatou faalagolago i lo tatou Tama Faalelagi ma Iesu Keriso ma tumau faamaoni i tulaga uma. O le tele lava o le moni o i Laua i o tatou olaga, o le tele foi lena o lo tatou faatuatuaina o i Laua. O le tele o lo tatou faia o lena mea, o le tele foi lea o lo tatou taulai atu i le fuafuaga o le faaolataga ma le faaeaga a le Tama Faalelagi. O le tele lava o le tumau o lena vaaiga e faavavau i le taulaiga, o le faigofie foi lea ona faamuamua le Atua ma faaitiitia ai tulaga i o tatou olaga.1 E pei ona ta‘ua e Peresitene Russell M. Nelson, “Faatasi ai ma le vaaiga faaselesitila, o tofotofoga e le mafai ona suia e mafai ona onosaia.”2
Faatasi ai ma nei malamalamaaga i le mafaufau, sa uunaia ai i tatou e le Tupu o Peniamina “Ia talitonu i le Atua; ia talitonu o loo soifua o ia, ma o ia na foafoaina mea uma, i le lagi ma le lalolagi; ia talitonu ua ia te ia le poto uma, ma le mana uma, i le lagi ma le lalolagi; ia talitonu e lē mafai e le tagata ona malamalama i mea uma e mafai ona malamalama i ai le Alii” (Mosaea 4:9).
Na aoao mai ma le matagofie e Peresitene Polika Iaga (1801–77) e faapea, o tulaga i o tatou olaga e le fuafuaina ai la tatou vaaiga. Na ia saunoa mai: “Tuu atu se tagata i le falepuipui ma saisai o ia i filifili ona tuu atu lea ia faatumulia o ia i le mafanafana ma le mamalu o le faavavau, ma o lena falepuipui o se maota lea ia te ia. O lenei foi, ia tuu atu i se tagata ia nofo i luga o se nofoalii ma le mana ma le puleaga i le lalolagi lenei, e pulea lona faitau miliona ma le faitau miliona, ma a aunoa ma lena filemu e tafe mai le Alii o Au, e aunoa ma lena faamalieina ma le olioli lea e sau mai le lagi, o lona maota o se falepuipui, o lona ola o se avega ia te ia; e nofo o ia i le fefe, ma le mata‘u, ma le faanoanoa. Ae a faatumulia se tagata i le filemu ma le mana o le Atua, e sa‘o mea uma ia te ia.”3
Ona o lona faalagolago i le Atua, sa aoaoina ai e Iopu e faapea “pe a tofotofoina au e [le Atua], ou te sao atu ai e pei o le auro” (Iopu 23:10). O le a faamamaina Iopu i aafiaga na ia maua. O le iloaina e le o puapuaga uma e mafua mai i le agasala ma e mafai ona faatuatuaina le Atua, o le tala lea a Liae:
“Ma o lenei, Iakopo, … o lou laitiiti sa e mafatia ai i puapuaga ma le faanoanoa tele. …
“E ui i lea, … ua e iloa le silisiliese o le Atua; ma o le a ia faapaiaina ou puapuaga mo ou manuia” (2 Nifae 2:1–2).
“A tofotofoina a’u e [le Atua],” na aoaoina e Iopu, “Ou te sao atu ai e pei o le auro.”
Aua Tou Te Matatau
E tusa lava pe tatou te puapuagatia, e mafai e le Atua ona fesoasoani ia i tatou i o tatou faigata. Sa Ia fetalai mai ia i tatou: “Aua e te fefe: aua ou te ia te oe: aua le fetepatepai; aua o au o lou Atua: ou te faamalosia oe; e moni ou te fesoasoani ia te oe; e moni ou te taofia oe i lou lima taumatau e i ai le amiotonu” (Isaia 41:10). O le a Ia le tuua lava i tatou e oo lava i le feagai ai ma luitau lofituina. Sa Ia saunoa:
“A e sopoia atu le vai, ou te ia te oe; a e sopoia atu vaitafe, e le lofia ai oe: a e savali i totonu o le afi, e le mu ai oe; e le susunuina foi oe i le mumu o le afi.
“Aua o A‘u o Ieova lou Atua” (Isaia 43:2–3).
A o tatou iloaina nei faamanuiaga, o le a faateleina lo tatou faalagolago i le Atua. O le a tatou iloa ai soo se puapuaga “e mafai ona faaatoatoa e ala i le Togiola a Iesu Keriso.”4 I le isi itu, o le tele o lo tatou “faaitiitia i le le talitonu, ma o ese mai le ala sa‘o, ma ua latou le iloa le Atua o le e tatau ona tatou faalagolago i ai” (Mamona 9:20), o le tele foi lea o le tetele o tulaga i o tatou olaga. A tatou le toe faalagolago i le Atua, tatou te popole ma gauai atu i le le fiafia ma le faanoanoa.
Na manumalo Iesu Keriso i le lalolagi. Ona o Ia, e mafai ai ona tatou maua le filemu i lenei lalolagi ma “ia lototetele” (Ioane 16:33). O le molimau a Iopu i le Faaola e musuia ai le faitau afe o tausaga talu ona ia tautala atu i ai. Sa ia alaga:
“Aua ua ou iloa, o loo soifua le na te togiolaina a’u; o aso amuli foi e tulai mai ai o ia i luga o le eleele:
“E ui lava foi ina faaumatia lenei tino pe a mavae atu lo’u pa’u, a e ou te iloa atu le Atua i lo’u tino” (Iopu 19:25–26).
E fiafia Iesu Keriso e toefuatai mai mea e le mafai ona tatou toefuataiina, faamalolo manu‘a e le mafai ona tatou faamaloloina, faaleleia mea anagata,5 ma tauia soo se mea le talafeagai ua tatou onosaia. O le mea moni, afai tatou te faatagaina o Ia, o le a Ia faapaiaina o tatou mafatiaga mo lo tatou manuia ma faapaiaina ia i tatou o tatou mafatiaga sili ona loloto.6 O le a le na ona Ia faafilemuina o i tatou ma toefuatai mai le mea na leiloa (tagai Iopu 42:10, 12–13), ae o le a Ia faaaogaina o tatou tofotofoga mo lo tatou manuia.
Ua i ai i le Faaola le mana e faasa‘o ai mea uma ma faananau ia faia. E fiafia o Ia e faamalolo tumau e oo lava i loto nutimomoia (tagai Salamo 147:3). O le lesona tupito o le tusi a Iopu o le mafai e i tatou taitoatasi ona filifili e ola i o tatou olaga e faalagolago i le Atua ma Lana fuafuaga, e tusa lava po o le a.