2022
Faamalologa mai Manu’a Tau Mafutaga
Aokuso 2022

“Faamalologa mai Manu’a Tau Mafutaga,” Liahona, Aok. 2022.

Faamalologa mai Manu’a Tau Mafutaga

Saunia e le Aufaigaluega mo Auaunaga mo Aiga

Afai ua faamanualia i tatou i mafutaga, e mafai ona tatou maua le malosi e faamuamua ai le Atua.

fafine o loo uuina se ata o se fatu

Ata na tusia e Elise Whele

“O loo faananau fua mai le agaga i totonu o i tatou taitoatasi mo le alofa faaleaiga ia tumau e faavavau,” na aoao mai ai Peresitene Russell M. Nelson.1 O le manao mo lenei sootaga e faavavau i isi ua mauaa i o tatou agaga, ae o nisi taimi ona o le tiga o mafutaga tatou te le mautinoa ai pe e mafai lava ona tatou maua nei sootaga e faavavau, e aofia ai le faaipoipoga faaselesitila. I mafutaga maloloina, e mafai ona tatou maua le lotomatala ma le vaivai. Peitai, ua tatou ola i se lalolagi pa’ū, ma o mafutaga e le o taimi uma e maloloina ai. O i latou ua maua ni manua loloto faalelagona ma faaleagaga i mafutaga, e tusa lava pe ua leva, e masani ona mafaufau pe mafai ona latou vaivai ma lotomatala e toe faasoa atu lo latou alofa i se isi tagata.

Na iloa e Cassie lenei mea i le mavae ai o le tausaga talu ona tafafao faamasani ma Brian. Ae paga lea, sa faasaunoa Brian. E leʻi iloa e Cassie le tele o le aafiaga ia te ia seia oʻo ina ia tuua le mafutaga. Talu mai lena taimi, ua lagona e Cassie le atuatuvale, ua le mafai ona faatuatuaina ona lava manatu ma ua le mafai ona faatuatuaina isi e lagolagoina o ia. E masani ona ia faaaogaina auala e puipuia ai e aloese ai mai le toe aafia i tiga ma pulea lagona e pei o isi e feita ia te ia pe o le a tuua o ia. O nisi taimi na te tuleia ese isi ma le le iloa pe avea foi ma se tagata faamalie gatā i mafutaga. O nei puipuiga e faigata ai ia te ia ona maua pe lagona le vavalalata i isi. Ina ua uma ona talanoa ma e pele ma se tagata faufautua, sa iloa e Cassie lona manu’a ma lona manaomia o le faamaloloina—ma e mafai foi ona faamaloloina i le aluga o taimi.

Pe na e oo i se mafutaga e pei o Cassie po o se isi ituaiga o manu’a tau mafutaga, o loo i ai le faamoemoe. E mafai ona e maua le faamalologa ma maua le olioli e sau mai le atinaeina o ni mafutaga faatuatuaina a o e suesueina ni nai laasaga. Muamua, ia e iloa le manu’a tau mafutaga i lou olaga. Lona lua, liliu atu i le Tama Faalelagi ma Iesu Keriso mo le faamalologa. Lona tolu, aoao e atiina ae ni sootaga maloloina ma oe lava ma isi, e aofia ai le setiina o tuaoi talafeagai.

1. Iloa Manu’a Tau Mafutaga

Pe a matua faamanualia i tatou ma tatou le talitonu e mafai ona tatou faatuatuaina i tatou lava ma isi, e amata ona tatou vaai i mafutaga e matautia nai lo o se nofoaga e aoao ai, tuputupu ae ai, ma ausia ai o tatou gafatia atoatoa. O manu’a loloto e mafai ona tupu mai i le sauaina ma le faalataina.

O lesauaina o le faileagaina po o le tuulafoaiina o isi. Ua aoao mai le Ekalesia “e le mafai ona taliaina sauaga o soo se ituaiga.”2 O se tasi ua sauaina e masani ona lagona le fefe, faaseseina, po o le faamata’uina, ma atonu na te lagonaina le leai o se taofiofi. O ituaiga eseese o sauaga e ono aofia ai le:

  • Faalelagona: o lagona faaseseina po o le tuuitiitia o lagona o le taua o le tagata lava ia.

  • Mea Tautupe: taofiofi po o le puleaina o tupe.

  • Faaletino: o le faaaogaina o faiga faamalosi po o le faamata’u.

  • Tau Feusuaiga: fai faamalosi o feusuaiga.

  • Faaleagaga: o le faatinoina o le pule malosi po o le pule i talitonuga faaleagaga po o talitonuga faalelotu a se isi tagata (tagai i le Mataupu Faavae ma Feagaiga 121:36–37).

O lefaalataina o se gaoioiga po o se mamanu o amioga e solia ai le faatuatuaina ma mafua ai ona tatou le talitonu i isi, ia i tatou lava, ma e oo lava i le Atua. E mafai ona tuua ai i tatou e lagona le faaitiitia, gaogao, faanoanoa, lotovaivai, “le lava,” po o le faaleagaina. E mafai ona aofia ai le:

  • Tuulafoaiina: teenaina faalelagona po o le faaletino.

  • Folafolaga ua le tausia: mamanu o folafolaga le tausia, e aofia ai feagaiga.

  • Le faamaoni: faifai pea le ta’ufaatauvaaina o le isi paaga i se tulaga faalilolilo pe faalauaitele.

  • Tete’a: faamutaina o se feagaiga o se faaipoipoga, lea e masani ona iu ai i miti lē taunuu ma faalavelave tau faasinomaga, aemaise lava pe a lagona e se tasi o le paaga ua leai se malosiaga.

  • Le faamaoni i le va faaleulugalii: fesootaiga faalelagona po o le faaletino le talafeagai ma se isi paaga.

  • Le sa’o]: fai ma masani le taufaasese o isi, e taitaiina ai i latou ia le toe iloa po o a mea e talitonu ma lē talitonu ai mai ia te oe.

2. Liliu atu i le Tama Faalelagi ma Iesu Keriso mo le Faamalologa

E ala i le fuafuaga a le Tama Faalelagi, ua i ai ia Iesu Keriso le mana e faamalolo ai manu’a uma, e tusa lava po o le a le loloto. O le faagasologa o le faamaloloina e faigata ma ono umi se taimi. I lo tatou tiga, tatou te ono feita foi i le Tama Faalelagi. E ui atonu tatou te le fia liliu atu ia te Ia, ae ua Ia auina mai Lona Alo, o Iesu Keriso, le Fomai Sili. E ala i le Togiola a le Faaola, e mafai ai ona faamaloloina i tatou i le aluga o taimi.

O nisi taimi atonu tatou te talitonu tatou te manaomia vave se mapusaga, ae o le faamalologa o se faagasologa. Na faasoa mai Elaine S. Marshall, PhD,: “O le faamaloloina o tigā. … O le faamalologa e faatoa amata lava pe a tatou feagai ma le tiga i lona malosi atoa ona tuputupu ae ai lea ma le malosi atoa o o tatou agaga. Mo taui uma o le aoaoina ma le tuputupu ae, o sina vaega o le tiga o le tau lava lea.”3

Pe a tatou maua le faamalologa e ala ia Iesu Keriso, tatou te tuputupu ae, fausia mafutaga maloloina, ma saili le lagolago mai isi, e aofia ai le fesoasoani faapolofesa.

A o tatou saili e maua le faamalologa, tatou te manaomia lo tatou Tama i le Lagi. Na aoao mai Elder Richard G. Scott (1928–2015) o le Korama a Aposetolo e Toasefululua, “O le auala sili ona tuusao ma masani ona sili ona mamana [e maua ai le fesoasoani a le Faaola] e ala lea i tatalo faamaualalo, ma faatuatuaina i lou Tama i le Lagi, lea e tali atu e ala i le Agaga Paia i lou agaga.”4

I le tatalo, e mafai ona tatou faailoa atu ma le faamaoni ma le lotomaualalo o tatou tiga ma aafiaga ua i ai i o tatou mafaufauga, lagona, ma amioga. A o e tatalo, vaavaai mo le mana faamafanafana ma le faamalamalamaina e auina mai e le Tama Faalelagi e ala i le Agaga Paia. Atonu e le alu ese le tiga, ae e mafai ona e lagonaina le mafanafana ma le faamalosia.

3. Fausia ni Mafutaga Maloloina

E ui o le tiga e mafai ona faatapulaa ai lo tatou manao mo se mafutaga, “e tele ina tatou maua lo tatou ala e foi atu ai i le Atua e ala i sootaga [ma isi],” na aoao mai ai Elder Gerrit W. Gong o le Korama a Aposetolo e Toasefululua. Na ia faamanatu mai foi ia i tatou “tatou te fesoasoani ia i tatou lava e pei ona tatou fesoasoani le tasi i le isi.”5 E le gata i lea, ua aoao mai Peresitene Nelson e faapea “o le faaipoipoga faaselesitila e maua ai avanoa sili atu mo le fiafia nai lo se isi lava mafutaga.”6 A o e saili e atiina ae ni sootaga taua, o manatu nei e tolu e mafai ona fesoasoani:

Amata ia te Oe Lava

Amata i le aoao atili e uiga ia te oe lava. Faaalu se taimi e mafaufau ai ma aoao e faatuatuaina ou lava manatu ma lagona. A o e mautinoa atili ia te oe lava, o le a mafai ona e iloa isi e mafai ona e amata tatala atu iai. Na aoao mai Elder Dieter F. Uchtdorf o le Korama a Aposetolo e Toasefululua le auala e mafai ai ona tatou vaai manino ia i tatou lava: “Aoao e vaai ia te oe lava e pei ona silasila le Tama Faalelagi ia te oe—o Lona afafine po o se atalii faapelepele ua i ai ni gafatia paia.”7

Fausia i totonu o se Li’o o le Faatuatuaina

E mafai ona tatou aoao e faamalolo e ala i le fausiaina o le faatuatuaina o a tatou sootaga masani. A o tatou mauaina i latou e mafai ona taofiofia lo tatou vaivai ma agamalu i o tatou lagona, e mafai ona tatou aoao e fausia ni mafutaga maloloina i sina mea itiiti. Pe a tatou lagona e pei o loo faatiga se tasi ia i tatou, e mafai ona tatou setiina ni tuaoi talafeagai, e aofia ai le taumamao mai ia i latou pe a tatau ai ma, pe a saogalemu e fai, ta’u atu ia i latou e le talafeagai a latou amioga ma e tatou te tiga ai.

A o tatou saili e fausia ni sootaga maloloina i lea laasaga ma lea laasaga, e mafai ona tatou faaaogaina le manatu o se taulaiga o tuaoi e fesoasoani ia i tatou e iloa ma seti ni tuaoi talafeagai. I le pito i fafo o le taulaiga, e mafai ona tatou tuuina i ai tagata e taumamao mai ai i aafiaga faalelagona ma atonu, e faaletino. Atonu e aofia ai tagata ese po o i latou na faatigā mai iā i tatou. A o tatou agaʻi atu i le ogatotonu o le liʻo, atonu tatou te faatuatuaina isi i ni faamatalaga e le taufaaleaga, e pei o mea moni faigofie. I totonu o li’o pito i totonu, e mafai ona tatou filifili e faasoa nisi faamatalaga ma faateleina le faaletonu.

A o tatou saili e fausia le faatuatuaina, e mafai ona tatou faamoemoe e uiga i le auala tatou te lagona e fetaui ai se tasi i la tatou taulaiga o faafitauli i se taimi atofaina ma le tele o le faasoa atu ia i latou. Afai e faatiga se tasi ia i tatou, e mafai ona tatou aveesea o ia. A o tatou aoao le faatuatuaina o se tagata, e mafai ona tatou faalatalata atili atu iā te ia. O le faia o taumafaiga faapitoa e faataga ai le toatele o tagata i totonu o la tatou li’o faatuatuaina i le aluga o taimi e mafai ona fesoasoani tatou te tuputupu a’e ai ma faamalolo.

Mafaufau e Faaaoga Punaoa Faaopoopo

Manatua o le faamalologa mai faalavelave matuia e ono manaomia ai le fesoasoani faapolofesa mai ia i latou o loo lagolagoina ou tulaga faatauaina. “E tatau i tagata o le Ekalesia ona filifili ma le toto’a ni faufautua faapolofesa e faaaloalogia lelei o ē ua i ai laisene talafeagai. E tatau i faufautua ona faaaloalogia le faitalia, tulaga faatauaina, ma talitonuga o i latou o loo saili fesoasoani. O le faaaoga ai o nei tulaga faatauaina e talafeagai faaleaganuu i faufautuaga faapolofesa.”8 E mafai foi ona e maua faamatalaga faaopoopo i nei punaoa: