Na’o Tusiga Faatekinolosi
O Folafolaga e 15 o le Filemu mai Perofeta Anamua ma Soifua
Ua folafola mai e le Alii le filemu ia i latou o e mulimuli ia te Ia. Tagai i le tele o valaaulia ua tuuina mai e fesoasoani tatou te maua ai le filemu sili i o tatou olaga e ala ia Iesu Keriso.
I nei aso faigata e gata ai, o upu o le viiga “O Fea Lo’u Filemu?” e ono taia ai o tatou loto. Atonu tatou te mafaufau foi po o fea e mafai ona tatou liliu atu i ai mo le filemu, maua le toafilemu, ma lagonaina le faaatoatoa o o tatou loto ua manu’a. E tuuina mai e le viiga se tali mo le fesili, “O ai, o ai e mafai ona malamalama? Ia, e silafia.”1 O le filemu e maua ia Iesu Keriso.
Na saunoa perofeta ma aposetolo i aso anamua ma aso e gata ai e uiga i le filemu e mafai ona tatou maua ia Keriso, e tusa lava po o a o tatou tulaga faalelalolagi. O le tele o nei faamatalaga ua faaalia ai le faatinoga e manaomia i la tatou vaega (tagai i fasifuaitau o loo mata tetele) e maua ai le filemu, ma ua latou faamanatu mai ai ia i tatou o le filemu moni e na o lo tatou Tama Faalelagi ma Lona Alo, o Iesu Keriso e oo mai ai. A o e iloiloina i latou, talosia ia taiala oe e le Agaga ia iloa pe mafai faapefea ona e maua le filemu o loo e sailia.
-
Peresitene Ioane Teila (1808–1887): “O le filemu o le meaalofa lea a le Atua. E te manao i le filemu? Alu i le Atua. E te manao i le filemu i totonu o o outou aiga? Alu i le Atua. E te manao e tumu le filemu i luga o o outou aiga? Afai e te manao i ai, ola i lau tapuaiga, ma o le a mau ma tumau ia te oe le filemu o le Atua, aua o iina e sau ai le filemu, ma [e le] mau ai i se isi lava mea. … Pau le mea tatou te faia o le ola lea i la tatou tapuaiga, ia usiusitai i le fautuaga a lo tatou Peresitene, ia lotomaualalo ma faamaoni ma ia le faaeaina i lo tatou lava malosi, ae ole atu i le poto o le Atua ma vaai ia tatou maua le filemu faatasi ma le Atua, faatasi ma o tatou aiga, ma le tasi ma le isi, ina ia nofotupu le filemu i o tatou loto ma i o tatou nuu. … O le filemu o se mea e manaomia; o le meaalofa a le Atua, ma o le meaalofa silisili e mafai e le Atua ona faaee mai i luga o tagata soifua. O le a se mea e sili atu ona manaomia nai lo le filemu? … O ona faatosinaga mālū e faatoafilemu ai le enaū o le tausiga, soloia ai mata o le faanoanoa, ma tuliesea ai faalavelave mai le loto; ma ia tuu atu ia oo i ai tagata uma, ma o le a tuliesea ai le faanoanoa mai le lalolagi, ma faia ai lenei lalolagi o se parataiso. Ae o le filemu o le meaalofa a le Atua.”2
-
Peresitene Iosefa F. Samita (1838–1918): “E na o le tasi lava le mea e mafai ona aumaia le filemu i le lalolagi. O le vaetamaina o le talalelei a Iesu Keriso, malamalama tonu i ai, usitaia ma faatinoina e taitai ma tagata foi.… Mo le tele o tausaga ua talitonu ai e na o le sauniuniga lava mo taua e maua ai le filemu. … O le filemu e na o le saunia mo le filemu e oo mai ai, e ala i le aoaoina o tagata i le amiotonu ma le faamasinotonu, ma le filifilia o taitai o e faaaloalo i le finagalo amiotonu o tagata.… E le mafai lava ona oo mai i le lalolagi lena agaga o le filemu ma le alofa lea e tatau ona i ai, seia oo ina maua e tagata le upumoni a le Atua ma le savali a le Atua ia te i latou, ma faailoa atu lona mana ma le pule ua paia, ma e lei maua lava i le poto o tagata.”3
-
Peresitene Howard W. Hunter (1907–1995):“O le filemu o loo momoo i ai le lalolagi o se taimi e le toe i ai se fevataua’i; peitai e le o iloa e tagata o le filemu o se tulaga faatoa oo mai i le tagata, i tulaga ma tuutuuga ua faatuina e le Atua, ae le o se isi lava ala. … A tatou taumafai e fesoasoani ia i latou e faatiga mai ia i tatou, a tatou tatalo mo i latou e faaaogaina ma le le amiotonu i tatou, e mafai ona matagofie o tatou olaga. E mafai ona tatou maua le filemu pe a tatou lotogatasi ma le Agaga, faapea foi le tasi ma le isi a o tatou auauna atu i le Alii ma tausi ana poloaiga.”4
-
Peresitene Thomas S. Monson (1927–2018): “A tatou auai atu i le malumalu, e mafai ona oo mai ia te i tatou se maualuga o le faaleagaga ma se lagona o le filemu lea e sili mamao atu nai lo se isi lava lagona e mafai ona oo mai i le loto o le tagata. … I o tatou olaga o le a i ai o tatou faaosoosoga; o le a i ai o tatou tofotofoga ma luitau. A tatou o i le malumalu, a tatou manatua a tatou feagaiga tatou te osia iina, o le a sili ona tatou mafaia ona faatoilalo na faaosoosoga ma onosaia o tatou tofotofoga. O totonu o le malumalu e mafai ona tatou maua ai le filemu.”5
-
Peresitene Russell M. Nelson: “Ou te faamanuia ia te outou ina ia faatumulia i le filemu o le Alii o Iesu Keriso. O Lona filemu e le mafai ona malamalama atoa i ai le tagata soifua. Ou te faamanuia ia te outou i se mana’o faateleina ma le gafatia e usitai ai i tulafono a le Atua. Ou te folafola atu a outou faia, o le a lilofia outou i faamanuiaga, e aofia ai le lototele sili atu, faateleina o faaaliga faaletagata lava ia, o le fealofani sili atu i totonu o o outou aiga, ma le olioli e ui i le lotolotoi ai o le lē mautonu.”6
-
Peresitene M. Russell Ballard, Sui Peresitene o le Korama a Aposetolo e Toasefululua: “O le filemu e faavavau ua folafola mai e Iesu o se filemu i totonu, e fanau mai i le faatuatua, e taula i le molimau, faafaileleina i le alofa, ma faaalia e ala i le usiusitai faifai pea ma le salamo. O se filemu o le agaga lea e atagia mai i le loto ma le agaga. … O le filemu—filemu moni—i le agaga atoa i le totonugalemu o lou tagata—e faatoa oo mai e ala mai i le faatuatua i le Alii o Iesu Keriso.”7
-
Elder Quentin L. Cook o le Korama a Aposetolo e Toasefululua: “Tatou te faamoemoe ma le naunautai ma tatalo mo le filemu lautele, ae o a tatou matafaioi o ni tagata taitoatasi ma aiga, tatou te ausia ai le ituaiga o filemu o le taui folafolaina o le amiotonu. O lea filemu o se meaalofa folafolaina o le misiona ma le taulaga togiola a le Faaola. … O le faalotomaualaloina o i tatou lava i luma o le Atua, tatalo e le aunoa, salamo i agasala, ulu atu i vai o le papatisoga ma se loto momomo ma se agaga salamo, ma avea ma soo moni o Iesu Keriso o ni faataitaiga maoae ia o le amiotonu lea e tauia i le filemu tumau.”8
-
Salamo 29:1–2, 11: “Avatu ia Ieova le mamalu ma le malosi. Tuu atu i le Alii le mamalu ona o lona suafa, tapuai i le Alii i le matagofie o le paia. … O le a tuu atu e le Alii le malosi i ona tagata; o le a faamanuiaina e le Alii lona nuu i le filemu.”
-
Salamo 119:165: “Ua tele le filemu o e naunau i lau tulafono: e leai foi se mea e tausuai ai i latou.”
-
Faataoto 16:3, 7: “Tuuina atu au galuega i le Alii, ona faatumauina ai lea o ou manatu. … Pe a fiafia le Alii i ala o se tagata, na te faia ia filemu ona fili faatasi ma ia.”
-
Isaia 32:17: “O le mea e tupu i le amiotonu o le manuia lea; e tupu mai foi i le amiotonu le filemu ma le saogalemu e faavavau.”
-
1 Korinito 14:33: “O le Atua e le o le pule o le fememeai, ae o le filemu.”
-
Filipi 4:1, 2, 4, 6–7: “Ia tumau i le Alii. … Ia tutusa le mafaufau i le Alii. … Olioli ia Ieova e le aunoa:ou te toe fai atu foi, Ia fiafia. … I mea uma e ala i le tatalo ma aioi atu ma le faafetai ia faailoa atu a outou talosaga i le Atua. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.”
-
1 Nifae 20:18: “E, pe a na e faafofoga mai i a’u poloaiga—ona avea ai lea o lou filemu e pei o se vaitafe.”
-
Mataupu Faavae ma Feagaiga 59:23: “Ae ia iloa o ia o lē e faia galuega o le amiotonu o le a maua lona taui, o le filemu lea i le lalolagi lenei ma le ola e faavavau i le lalolagi a sau.” (Tagai i le vaega o totoe o le Vaega 59 mo le tele o auala e mafai ona tatou faia ai “galuega o le amiotonu.”)
“O loo i ai le filemu ia Keriso.”9
I le silia ma le afe o tausaga, mai lava a o lei soifua mai Keriso i le taimi nei a o tatou faatalitali mo Lona afio mai faalua, o folafolaga uma o le filemu na tuuina mai e perofeta ma aposetolo filifilia a le Faaola na fetalai e uiga ia te Ia. E ui o le a aofia pea i le olaga ia tofotofoga ma luitau, ae e mafai ona faamanuiaina i tatou i le filemu e faavavau i totonu o o tatou loto i le lotolotoi o o tatou tofotofoga pe a liliu atu o tatou loto ma mafaufau ia Keriso ma mulimuli i Ana poloaiga i le amiotonu. O lenei folafolaga sili o le filemu ua lagolagoina ai soo o Keriso i le talafaasolopito atoa, ma e mafai foi ona lagolagoina i tatou, pe afai tatou te faatagaina. “O Iesu Keriso [ua] tutusa lava ananafi, ma i le aso, ma le faavavau” (Eperu 13:8), ma o folafolaga uma o le filemu ua Ia tuuina mai ia i tatou, pe ua tasi le tausaga talu ai po o le afe tausaga ua mavae, ua moni i aso nei.