Ua Na’o Tusiga Faatekinolosi: Talavou Matutua

O Le Toe Foi Mai i le Ekalesia i Lima Faafeiloai

Saunia e Rachelle Wilson

Sa ou le toe alu i le lotu ae sa le i aveesea lo’u faatuatua i le mea na ou talitonu i ai. Ina ua ou toe foi mai, sa i ai iina la’u uarota mo a’u.

Faatasi ai ma tamailima ga’oa mai moa falai susua ma pateta falai atoatoa lelei ua tele le masima faatasi ai ma se vai susu lapo’a malulu i le taimi sa tatau ai ona fai le vasega o le numera, sa faailoa mai ai ia te a’u e se uo lelei lava se lotu fou ou te le i faalogo i ai muamua—O Le Ekalesia a Iesu Keriso o le Au Paia o Aso e Gata Ai. Ou te le i iloaina sa taialaina a’u faalelagi, i le feiloai atu i tagata ma le mauaina o ni aafiaga na fuafuaina ma le atoatoa e Tamā Faalelagi mo a’u.

Na atiina ae so’u talitonuga i le Atua i lo’u laitiiti, i lo’u ola ae ai o se Katoliko. Ae ina ua ou ulu atu i le kolisi, ou te manatua lelei lava lo’u mafaufau ai faapea ou te fia iloa atili. Sa ou manao i se sootaga e sili atu le felata’i ma le Atua. O lena manatu ma lo’u loto matala i le Alii na faatagaina ai la’u uo e faailoa mai ia te a’u le talalelei ma valaaulia a’u i le lotu.

Ina ua ou auai i Le Ekalesia a Iesu Keriso o le Au Paia o Aso e Gata Ai mo le taimi muamua, sa fai si o’u matamuli laitiiti, ae sa ou lagonaina le taliaina o a’u ma le fiafia ona sa ese le agalelei, valaaulia, ma le faamaoni o tagata uma. E ui ou te le i feiloai muamua lava i nei tagata, ae sa fai a’u e pei lava e aiga. Sa amata ona ou alu so’o, ma ina ua mavae se sailiiliga umi ma se faamanuiaga faaleperisitua sa suia ai lo’u olaga, sa ou auai loa i le Ekalesia. Ae ina ua mavae le atoa lelei o masina e lima o lo’u toaga ma aafia i gaoioiga a le Ekalesia, sa tofotofoina lo’u faatuatua. Sa taialaina a’u ou te toe foi i lo’u nuu.

I le toe foi ai i lo’u nuu, sa ou auai i la’u uarota fou ma na oo lava i le tuuina mai o ni valaauga. Sa ou taumafai e tumau pea lo’u toaga, ae o mea uma i le olaga sa ou lagona ua pei e faasagatau mai ia te a’u, na i’u lava i le faaitiitia o lo’u auai i le lotu.

Sa faaauau pea ona ou ui atu i se malaga lūgā ma lālō o le olaga ae sa lei aveesea ai lava lo’u faatuatua i le mea na ou talitonu i ai. Sa ou iloaina o le Ekalesia na umia le atoaga o le talalelei a Iesu Keriso ma mea uma sa ou manaomia i le olaga.

E i ai taimi sa ou auai ai i uarota eseese i na tausaga o lo’u lē toaga ma iloa ai le eseesega i le va o le faafeiloaia ma le lē amanaiaina. O le mea e lelei ai, na faafesootaia e faifeautalai le va ma auauna mai i o’u manaoga seia oo ina ou toe foi mai i le lotu. Sa matuai talisapaia lava a’u e la’u uarota i lo’u nuu. Sa ou lagona e pei ua taliaina/aofia ai i le taimi lava na ou la’a atu ai i faitotoa. Talu ai ona o na tagata loto faafeiloai, sa faaauau ai ona ou auai ma olioli i faamanuiaga uma o le talalelei.

Ou te talitonu e tatau ona e auai atu i le lotu mo oe lava ia ae le mo tagata. Ae e matua fesoasoani tele pe a talia ma le alofa oe. O le mea e laki ai, e i ai mea e mafai ona e faia ina ia lagona ai e oe ma isi le taliaina atili i le lotu.

O le auala e mafai ai ona e fesoasoani ia te oe lava ia ia lagona le taliaina:

Auai i le inisitituti, galuega auauna atu, ma gaoioiga a le Ekalesia. E ui ina taufaafefe i le taimi muamua, aemaise lava i le lē iloaina o se tasi, o lou taumafai e te faamasani i tagata o le a tatalaina ai faitotoa e feiloai ai i tagata fou ma faia ni faauooga mo le olaga atoa.
Siomia oe lava i tagata e tutusa o outou manatu. E taua tele lenei mea pe afai o oe o se tagata liliu mai po o se tasi ua toe foi mai. O le siomia o oe lava i tagata e tutusa o outou manatu o lona uiga e le gata o le a e le tau fetuutuunaia oe lava ae e mafai foi ona e aoao mai ni mea se tele mai ia i latou ma maua ai le lagolagosua lelei.
Auai i le Malumalu. O le taumafai e auai i le malumalu o lona uiga o lou faia o filifiliga e ogatasi ma le finagalo o le Alii. O le a e iloa ai ua faamalosia oe i le usiusitai.
Manatua po o ai ma aisea. E mo ai o loo e faia ai lenei mea? O ai e taua le taulai atu i ai, ma aisea ua e i ai iinei? E mafai ona fesoasoani ai ia te oe e tuu tonu le vaaiga manino i le mea e aogā mo lou alualu i luma.

O le auala e mafai ona e fesoasoani ai i isi ia lagonaina le taliaina:

Faaali atu le alofa. Ia avea ma se uo moni. E eseese uma lava a tatou faigamalaga. O le faamasani atu i isi o le a fesoasoani e te maua ai le auala sili e lagolago ai i latou. O le valaauliaina o i latou i gaoioiga, faailoa atu i ai o mea o loo tutupu, ma le faailoa atu o i latou i tagata fou i le lotu o le a fesoasoani ia i latou e faia ni fesootaiga faapea ai ma ni uo fou.
Faalogo i uunaiga a le Agaga ma talitonu i le taimi a le Alii. Ou te matua talitonu lava e taitaia i tatou e le Tamā Faalelagi ma tuu tagata i o tatou ala ma le faamoemoe. O lou faia o le mea silisili i aso uma o le a faamanuiaina ai oe ma faatagaina oe e faamanuiaina isi.

E silafia moni lava i tatou e le Tamā Faalelagi ma e alofa ia i tatou taitoatasi. Ou te faamoemoe o le a mafai ona e lagonaina Lona alofa, ae ia mafai foi ona e vaai ia te oe lava—ma isi—e pei ona Ia faia. Ou te faamoemoe o le a e faasoa atu le alofa ua ia te Ia mo oe ma isi, ae maise lava o tagata asiasi, tagata fou liliu mai, ma i latou ua toe foi mai i le lotu. Ou te iloa ou te matua faafetai mo tagata uma taitoatasi o e na aapa mai ia te au, ma ua ou vaavaai nei mo ni avanoa e faia ai lea lava mea e tasi.