Na’o Tusiga Faatekinolosi: Autalavou Matutua
Malamalama i Lo’u Faamoemoega o se Tamaitai i le Ekalesia
O le sailia o tali e fesoasoani ia te a’u e faaauau ai pea ona aoao atili e uiga i lo’u tiutetauave o se tamaitai.
Atapue na faaalia e le au faataitai
I ni nai tausaga ua mavae, sa matou talanoaina ai ma a’u uo i le kolisi ia tiutetauave o itupa i le lalolagi, ma sa vave ona liliu i se talanoaga e uiga i matafaioi o itupa i totonu o le talalelei. Sa ou aoaoina e toatele uso i le talalelei e faigata ona iloa po o a tiutetauave o tamaitai i le malo o le Atua.
Ina ua uma lena talanoaga, sa amata foi ona ou mafaufau: O le a la’u matafaioi i le Ekalesia? O le a se mea e mafai ona ou saofaga ai?
E masani ona ou tauivi ma fesili faapenei, ma e ui e le o ia te a’u tali uma, e ala i le sailia o le upumoni, ua ou maua ni malamalamaaga ua fesoasoani ou te malamalama atili ai i lo’u faamoemoega i le talalelei a Iesu Keriso.
1. E alofa lo tatou Tama Faalelagi i Lana fanau uma.
A o amata ona ou tatalo mo faaaliga e uiga i la’u matafaioi o se tamaitai, sa ou le fiafia ona sa ou le lagonaina sa ou mauaina ni tali. Ae i se taimi a o ou iai i ni tauiviga patino, sa oo mai se manatu i lo’u mafaufau: O le Atua lenei o loo ou talanoa i ai. Pe ou te manatu moni ea Na te le malamalama ia te a’u? Pe ou te manatu moni lava e sili atu le alofa o lo’u Tama Faalelagi i nisi o Ana fanau nai lo isi?
E masani ona faamanatu mai ia te a’u e alofa le Atua i Ana fanau uma, alii ma tamaitai. Ma ou te talitonu o loo i ai se vaega mo a’u e faia ai lena mea e matagofie ma e taua e pei o soo se isi lava tagata. O loo ta’u mai i le Tusi a Mamona, “[O le Alii] e le teena e ia se tasi e sau ia te ia, uliuli pe paepae, e pologa pe saoloto, o tane ma fafine; … ua tutusa tagata uma i le Atua” (2 Nifae 26:33).
O nei upumoni na fesoasoani ia te a’u e toe faatotonugalemu ai lo’u faatuatua. Ma sa ou iloa afai ou te iloaina e alofa atoatoa le Atua ia te a’u ma o Lana uunaiga atoa i tua atu o Lana fuafuaga o le alofa, o le a mafai ona ou malamalama atili i lo’u faamoemoega paia.
2. O le taitaiga faaperofeta e fesoasoani tatou te iloa manino atili ai.
O nai tausaga ua mavae ua aumaia ai le tele o suiga i lalo o le taitaiga a perofeta ma aposetolo ua toe faamautuina ai le taua o tamaitai i le talalelei a Iesu Keriso. Ua i ai i tamaitai ni avanoa faateleina e auauna atu ai i malumalu ma molimauina sauniga, ma ua faateleina le faalauteleina o o latou leo i tusi lesona a le Ekalesia, o anomea, ma polokalama e pei o le polokalama fou a Tamaiti ma le Autalavou.
E toatele taitai o le Ekalesia ua aoao mai foi e uiga i le taua o tamaitai. Mo se faataitaiga, i le konafesi aoao ia Oketopa 2019, na saunoa ai Peresitene Russell M. Nelson: “O’u tuafafine pele, o lo outou tomai e iloatino ai le mea moni mai mea sese, ia avea ma leoleo o le ola mama a sosaiete, e taua tele i nei aso e gata ai. Ma e matou te faalagolago atu ia te outou e aoao isi ia faia lena mea e tasi. Se’i o’u matua faamanino atua le mea lenei: afai e le toe i ai i le lalolagi le amiomama ma le amiotonu o ona tamaitai, o le a lē toe foi lava le lalolagi i se lelei.”1
E ala i le mafaufau loloto i savali talu ai nei mai o tatou taitai mo tuafafine i le talalelei, ua ou iloa ai le ala tatou te maua ai le malamalama sili atu e uiga i lo tatou faamoemoega.
3. Tatou te maua atoa le mana o le perisitua e ala i lo tatou usiusitai.
Ina ua faauuina lo’u tuagane laitiiti o se toeaina, sa ta’u atu ia te ia o le mana o le perisitua e oo mai e ala i le usiusitai i poloaiga a le Atua. A o ou faalogoina na upu, na taia ai a’u i se iloa lea na lava lona malosi na faapea ona ou taumole ai ma pupula o’u mata: E moni foi lena mataupu faavae mo a’u, sa ou mafaufau ai. E ui lava e le faauuina a’u i se tofi o le perisitua, e mafai lava ona ou ola agavaa i taimi uma ia maua le mana o le perisitua i lo’u olaga.
Na aoao mai Tuafafine Reyna I. Aburto, Fesoasoani Lua i le Au Peresitene Aoao o le Aualofa:
“E maua e tamaitai uma le mana o le perisitua a o ia auai i sauniga o le perisitua ma tausia feagaiga e faatatau i ai. …
“E tofu tamaitai taitoatasi ma le mana o le perisitua e tusa ai ma ana feagaiga ma lana amiotonu patino.”2
I se faaupuga faigofie, o le perisitua o le mana o le Atua ma e avanoa mo tagata uma o e tausia a latou feagaiga ma mulimuli i poloaiga. A o tatou ola agavaa e tuuina mai e le Atua ia i tatou Lona mana e faatoilalo ai faigata. Mana e iloatino ai le upumoni. Mana e fai ai mea lelei. Mana e iu ai ina avea e faapei o o tatou matua faalelagi ma nonofo faatasi ma i Laua. O nei faamanuiaga uma e mafai ona fai mo i tatou pe a tatou mulimuli ia Iesu Keriso.
4. E i ai sa tatou faatosinaga tulaga ese.
Sa aoao mai Peresitene Nelson: “O’u tuafafine pele, po o le a lava lou valaauga, po o a lava ou tulaga, e manaomia ou manatu, o lou silafia, ma au musumusuga. Matou te manaomia oe e te saunoa mai i aufono a uarota ma siteki. … Ua ia te outou tuafafine ni gafatia iloga ma uunaiga faapitoa ua outou mauaina o ni meaalofa mai le Atua.”3
Sa ou ola ae i se aiga toatele, ma sa ou talitonu i taimi uma o le tulaga faatina o le a avea ma a’u saofaga silisili i le fausiaina o le malo o le Alii. Peitai, sa ma aoaoina talu ai nei ma lo’u toalua e faapea, o o ma avanoa e faaopoopo ai le ma fanau i lo ma aiga i lenei olaga e laiti. O la maua faigamalaga e le mafai ona fanauina ni fanau sa matuai tiga lava, ae o le le mautonu i togafitiga ma avega faalelagona o le faia o faaiuga faigata ua faapitoa lava le lofituina o le agaga. E i ai taimi ou te mafaufau ai, O le a la’u faatosinaga ma la’u matafaioi pe afai e le mafai ona avea a’u ma se tina i le ala na ou fuafuaina?
I le taimi o lenei malaga, sa ou faafetai mo isi tamaitai faamaoni i lo’u olaga, o o latou aafiaga ua ese foi ona taunuuga nai lo le mea sa latou fuafuaina. Ma e ala i a latou faataitaiga, o le savali a le Tama Faalelagi ia te a’u o le savali lenei: “Aua le faatali. Aua e te taumatematea pe mafai pe sa tatau ona e faia ni mea se tele atu pe filifilia foi se tulaga e ese. Ia e iai i le mea o loo e iai nei, Faaaoga avanoa e alofa ma auauna atu ai ia i latou o siomiaina oe.”
A o ou mulimuli i le valaaulia a Peresitene Nelson e suesue pe faapefea ona faatatau le mana o le perisitua i tamaitai,,4 sa ou tau atu i se isi aoaoga mai ia te ia e masani ona ou maua ai le mafanafana: “Ina ia fesoasoani i se isi tagata ia ausia le gafatia faaselesitila o se tasi lea o vaega o le misiona paia a tamaitai.”5
E tusa lava pe i ai sa’u fanau i lenei olaga, ua ou faataunuuina la’u misiona paia o se tamaitai i soo se taimi ou te fesoasoani ai i soo se fanau a le Atua ia alualu i luma agai i lo latou gafatia faaselesitila. E i ai sa’u faatosinaga tulaga ese a o ou tausia a’u feagaiga e “faanoanoa faatasi ma e e faanoanoa” ma “faamafanafana atu ia te i latou o e e manaomia le faamafanafanaga” (Mosaea 18:9). O le a i ai—ma ua i ai i taimi uma lava—avanoa e auauna atu ai ma alolofa ia i latou o siomia a’u.
O lo’u malamalama i la’u matafaioi o se tamaitai i le Ekalesia a Iesu Keriso o loo faaauau pea ona tuputupu ae. E lei atoatoa, ae ona o vaaiga ua uma ona ou mauaina e uiga i lo’u faamoemoega ma le faatosinaga, ou te talitonu o lo’u faamoemoega e—ma o le a—matagofie, tāua, ma e le mafuatia le tāua i fofoga o le Atua ma i o’u mata.