O se Alalaupapa i le Faamoemoe ma le Faamalologa
Faatasi ai ma le fesoasoani talafeagai, e mafai e i latou ua afaina i le faatautala i feusuaiga ona maua le faamalologa latou te matuai manaomia lava.
Ata na tusia e Cristina Bernazzani
Vaai faalemafaufau o loo e tu i le tausiusiuga o se pupu ma e te manao e oo atu i le isi itu o se vanu loloto, lea ua tau mai ia te oe o loo faatalitali mai ai le fiafiaga sili mo oe. A o e saili mo se auala e sopoia ai, ua e iloa se faaputuga o sapalai lea, afai e tuu faatasi i le ala sao, o le a latou fausia ai se alalaupapa e sopoia ai le vanu.
Afai e te le iloa pe faapefea ona fausia le alalaupapa, o le a le aoga le sapalai ma o le a e lagonaina le loto vaivai ma le leai o se faamoemoe. Ae afai e te maua le fesoasoani mai se tagata ua i ai le poto masani i le fausiaina o alalaupapa, e mafai ona faateleina ai lou poto ma lou malamalama ma e mafai ona ausia faatasi ai le galuega.
I le aluga o le 18 tausaga ua mavae, o lau galuega o le saunia lea o ni meafaigaluega ma le taitaiga e fesoasoani ai i tagata e sopoia le vanu o le puapuaga faalelagona po o le faalemafaufau. Mai tagata uma lava na ou fautuaina, e leai ni isi tagata na o mai ua matuai manunua lava nai lo i latou na afaina i le faatautala i feusuaiga. Ua ou vaaia le aafiaga mamafa o lenei lui i le gafatia o le tagata e tumau ai i le iuga.
Ae ui i lea, sa ou oo foi ina iloa le faamalologa tumau mai o tatou tauiviga ma puapuaga e mafai ona maua e ala i lo tatou Faaola. O Lona alofa e siitia ai tagata i fafo mai le pouliuli i le malamalama.
Aisea e Tupu Mai ai i le Faatautala i Feusuaiga Lea Ituaiga o Manua?
O e na sauaina ua tau maia ia te au se olaga e tumu i le atuatuvale, masalosalo patino, ma isi lagona loloto o le tiga. Na fesoasoani Peresitene Gordon B. Hinckley (1910–2008) ia i tatou e malamalama ai pe aisea e tupu mai ai i le faatautala i feusuaiga lea ituaiga o tiga loloto:
“O loo i ai le faiga leaga, ma matuia o le faatautala i feusuaiga. E faigata ona malamalama i ai. O se faifai lea i le faaaloalo lea e tatau ona i ai i alii ma tamaitai uma. O se tetee lea i mea na e paia ma faalelagi. E faataumaoi i olaga o fanau. O se faiga faataumaoi ma e tatau i ai le faasalaga e sili ona ogaoga.
“O le maasiasi i soo se alii po o se tamaitai e faatautala i se tamaitiiti i feusuaiga. I le faia o lena mea, o le tagata faatautala e le gata ua faia se ituaiga e aupito sili ona ogaoga o manua. Ae tu foi o ia ua tausalaina i luma o le Alii.”1
O le mana o le foafoaina o se mana paia ma le faalelagi ua tuuina mai e lo tatou Tama oi le Lagi i Ana fanau. Na aoao mai e Elder David A. Bednar o le Korama a Aposetolo e Toasefululua le faagasologa o le toefanauina: “O le mana o le foafoaina o fanau e matuai taua faaleagaga. … O lo tatou Tama Faalelagi ma Lona Alo o tufuga ia ma ua faamatuu mai ia i tatou taitoatasi se vaega o lo La’ua mana foafoa.”2 E leitioa, la, o le solia lea o lenei mana paia o le “agavaa mo le faasalaga sili ona matuia” ma e mafua ai le “ituaiga aupito ogaoga o manua.”
Malamalama i le Tiga
Ata na tusia e © nuvolanevicata/iStock/Getty Images
O le faatautala faalefeusuaiga o soo se fesootaiga lea e leai se maliega o i ai e aofia ai uiga e fepaiai ai po o le le fepaiai lea e faaaoga ai se tagata mo le faamalieina i feusuaiga o se isi tagata. O le tele lava o taimi, o e afaina i le faatautala i feusuaiga e tuua ma le fenumiai le mafaufau faapea foi ma lagona o le le agavaa ma le maasiasi, lea e mafai ona toetoe lava a mamafa tele e taulimaina. O le tiga ma le pagatia e aafia ai e ua afaina e masani ona sili ona leaga ona o faaupuga a isi e mafua mai i le malamalama sese i le faatautala i feusuaiga ma ona aafiaga. O nisi tagata na aafia ua tuuaʼia i le pepelo po o le tuuaia o le sauaina i se isi itu ona o lo latou faatamala. O isi ua taitaiina sese e talitonu faapea e ao ina latou salamo, e peiseai ua latou agasala ona ua sauaina.
E toatele tagata sa ou galue i ai na aafia i le faatautala i feusuaiga a o laiti pe talavou ua tau atu ia i latou “ia onosai i ai,” “tuu lena mea i le taimi ua tuanai,” po o le “na o le faamagalo a ma faagalo.” O nei ituaiga o faamatalaga—ae maise lava pe a sau mai i uo mamae, tagata o le aiga, po o taitai o le Ekalesia—e mafai ona taitai atu ai le ua sauaina i le faateleina o le faalilolilo ma le maasiasi nai lo le faamalologa ma le filemu. E tutusa lava ma se manua matuia faaletino po o le siama, o nei manua faalelagona e le faigofie ona mou ese pe a le amanaiaina. Nai lo lena, o le fenumiai lena e amata i le taimi o le sauaina e faatupulaia, ma faatasi ai ma le taunuuga o lagona tiga, o le mafaufau o se tasi atonu e suia, e iu lava ina taitai atu i le atiina ae o amioga le lelei. E le o se mea fou i e na sauaina le le iloaina o le mea na tupu ia i latou o se faatautala, ae peitai e mafai ona latou atiina ae ni amioga le lelei ma ni lagona o le tiga
O Hana (ua suia le igoa) na aafia i le faatautala i feusuaiga i lona laitiiti. E faapei o isi tagata na afaina, sa ia ola ae ma le lagona faapea o ia o se tagata leaga ma e leai se aoga. Sa ia faaaluina le tele o lona olaga e taumafai ai ia lava le auauna atu i isi e aveese ai ona lagona o le le “lelei tele” mo le Tama Faalelagi pe soo se isi tagata e alofa ai. I ana sootaga, sa fefe o ia afai e iloa moni o ia e soo se tasi, o le a latou manatu sa leaga tele o ia e pei ona ia talitonu ai. Sa ia oo i se fefe tele i le teenaina lea na mafua ai le fefe e taumafai ni mea fou i le olaga po o le faia oni galuega faigofie e pei o le valaau i se tasi i le telefoni. Sa faamanuiaina o ia i se taleni mo le faatufugaga ae sa ia tuua ona o le fefe i le le mafai ona ia taulimaina ni faitioga.
Mo le silia ma le 50 tausaga o ona lagona o le leai o se faamoemoe, leai se malosi, fefe, ita, fenumiai, maasiasi, tuuatoatasi, ma le faaesea na taialaina ai o ia i ana faaiuga i aso taitasi.
Suia o le Tiga i le Filemu
Na puapuagatia le Faaola i “tiga ma mafatiaga ma faaosoosoga o ituaiga eseese uma.” Sa Ia faia lenei mea ina ia mafai ona Ia “silafia e tusa ai ma la le tino le ala e fesoasoani ai i ona tagata” (Alema 7:11–12). O Lona puapuagatia sa le gata mo a tatou agasala ae faapea foi mo lo tatou faamalologa ina ua mafua lo tatou puapuaga ona o agasala a se isi tagata.
Pe ana fai e i ai o Ia iinei i le taimi nei, ou te vaai faalemafaufau faapea o le a tagi le Faaola ma faamanuia i latou o e ua sauaina i feusuaiga, e pei ona Ia tutulu faatasi ma faamanuiaina sa Nifae (tagai i le 3 Nifae 17). E ui e le o i ai o Ia iinei faaletino, e mafai e Lona Agaga ona faatasi ma i tatou, ma ua Ia saunia se ala mo i tatou e faamaloloina ai, e lagonaina ai le filemu, ma faamagalo atu ai.
Mo le toatele o e ua tiga, o le manatu faapea o le tiga latou te tauaveina e mafai ona suia i le filemu e toeitiiti lava a le mafai ona talitonuina. E masani lava o manua o le ua sauaina e le iloaina ma le amanaiaina e isi mo ni tausaga. O le tiga ua natia e foliga ataata, o se naunautaiga e fesoasoani i isi, ma ola ai i le olaga e pei e leai se mea na sese, ae e i ai pea lava pea iina le tiga.
Sei o tatou faatusatusa le faagasologa o le faamalologa faalelagona i le tausia ma le taulimaina o se manua faaletino. Pe a faapea na gau lou vae, ao e laitiiti. Nai lo le alu i le fomai e togafiti ai, e te tauetuetu solo seia oo ina aluese le tiga loloto, ae o loo i ai pea sina tiga i laa taitasi e te faia. I tausaga mulimuli ane ua e manao ia aluese le tiga, ona e alu lea i se fomai. E tatau ona toe seti ai e le fomai le ponaivi, faamama ese soo se afuaga lea ua faatupulaia, aveese, ma auina atu oe e fai ni togafitiga faamalositino e faamalosia ai lou vae.
O le faagasologa o le faamalologa mai le sauaina e tutusa, lea e tatau ai ona muai iloaina e le tagata na sauaina e moni le tiga ma e mafai ona fai i ai se mea. E aofia i le faagasologa le faailoaina o le mea na tupu ma le faatagaina o lagona o le tiga, fefe, ma le faanoanoa ia lagonaina, taliaina, ma faamaonia. E masani lava ona aoga le galulue faatasi ma se tagata poto masani i lenei faagasologa o le faamalologa. (Siaki i lou taitai perisitua ina ia iloa ai pe o maua le Tautua a le AAG mo aiga i la outou eria.)
Pe na mauaina se fesoasoani faapolofesa e le ua sauaina pe leai, e sili atu le tatalo, suesue i le soifuaga o le Faaola ma Lana Togiola, ma asiasi atu e le aunoa ma se taitai perisitua. E mafai ona Ia fesoasoani ia faamama avega ma maua musumusuga e fesoasoani i le ua sauaina ia malamalama i lo latou taua Faalelagi ma le sootaga ma le Tama oi le Lagi ma le Faaola. E pei ona aoao mai talu ai nei Sister Carole M. Stephens, le Fesoasoani Muamua i le Au Peresitene Aoao o le Aualofa: “Atonu e umi le faagasologa mo le faamaloloina. O le a manaomia ai lou saili atu ma le agaga tatalo i le taitaiga ma le fesoasoani talafeagai, e aofia ai le fefautuaai ma alii ua faauuina ma le tatau i le perisitua. A o e aoao e talanoa ma le loto matala, seti ni tapulaa talafeagai, ma masalo ia saili atu i ni fautuaga faapolofesa. O le faatumauina o se soifua maloloina faaleagaga i le faagasologa atoa e taua tele!”3
Mo Hana, o lona olaga na oo ina leai se toa lelei o lea na ia sailia ai le fesoasoani. Sa ia iloaina mai lana molimau e mafai ona ia lagonaina le filemu ma le faamalieina i le olaga ae lei lagonaina i latou i se tulaga faifai pea. E ala i le tatalo ma le talanoa i lona epikopo, sa taialaina o ia i le fefautuaaiina, lea sa mafai ai ona ia maua ni mea faigaluega na ia manaomia ina ia aumaia ai le mea moni i fafo mai le pouliuli ma faasoa atu le avega matautia sa ia tauaveina na o ia. O le faia o lena mea, sa mafai ai ona ia faamatuu ese atu le tiga ma maua ai le filemu sa folafola mai e le Faaola (tagai i le Ioane 14:27). Faatasi ai ma lenei filemu ma le mafanafana na oo mai ai le manao ma le tomai e faamagalo.
O Le Manaomia o le Faamagalo
O le manatu o le faamagalo atu e masani ona faigata mo tagata na aafia i le sauaina ona faalogo i ai, ma e tele lava ina malamalama sese i ai. Afai latou te manatu o le faamagalo atu o le tuuina atu lea o le tagata faasaua ia saoloto po o le faapea atu o le mea sa latou faia e le o toe afaina, o le a le lagonaina e le na sauaina le faamaoniaina. A o poloaiina i tatou e faamagalo atu (tagai i le MF&F 64:10), i tulaga ia e loloto ai le afaina, o le faamalologa e masani lava e tatau ona amata a o lei mafai e le ua sauaina ona faamagalo atoatoa le tagata faasaua.
Atonu o i latou o loo mafatia i le tiga na mafua mai le faatautala e mauaina le mafanafana i le fautuaga lenei mai le Tusi a Mamona: “O au o Iakopo, ou te fia tautala atu ia te outou o e e loto mama. Ia outou tepa taulai atu i le Atua ma le mausali o le mafaufau, ma tatalo atu ia te ia ma le faatuatua tele, ma o le a ia faamafanafanaina outou i o outou puapuaga, ma o le a ia aioia a outou tagi, ma auina ifo faasalaga i luga o i latou o e latou te saili lo outou faafanoga” (Iakopo 3:1). O le manaomia o le faamasinoga tonu ma le aia tatau e toe totogi ai e mafai ona tuuina atu i le Alii ina ia mafai ona Ia suitulaga ai lo tatou tiga i le filemu.
Na iu lava ina iloaina e Hana e mafai ona ia liliuina le manaomia o le faamasinoga tonu i le Faaola ma maua se lagona o le filemu i lona olaga na te lei oo lava i ai muamua. Talu ai nei, na fefe o ia e auai atu i faatasiga faaleaiga lea o le a i ai le tagata faasaua. O lenei, ona o lona naunau e feagai ai ma faigata o manua faalelagona i lona agai atu i le faamalologa, e le o toe fefe o ia i le i ai faatasi ma ia (o le na faatautala ia te ia) ma ua oo ina i ai le agaalofa mo ia i tausaga o lona toeaina.
Saoloto Mai Avega e le Manaomia
Na taua e Elder Richard G. Scott (1928–2015) o le Korama a Aposetolo e Toasefululua faapea “o le faamalologa atoa o le a oo mai e ala i lou faatuatua ia Iesu Keriso ma Lona mana ma le matafaioi, e ala i Lana Togiola, e faamaloloina ai manua o le sauaina fua ae le tatau ai. …
“E alofa o Ia ia te oe. Na Ia ofoina mai Lona soifua, ina ia faasaolotoina oe mai avega e le tatau ai. O le a fesoasoani o Ia ia te oe e faataunuuina. Ou te iloa o loo ia te Ia le mana e faamalolo ai oe.”4
Sa manao Satani ia saisaitia tagata e le tiga ma le mafatiaga ona o loo pagatia o ia (tagai i le 2 Nifae 2:27). Faatasi ai ma le fesoasoani a lo tatou Faaola, o Iesu Keriso, faatoa mafai moni lava ona suia le tiga i le filemu, pe a mafai ona tuuina atu ai e le Faaola, ma mafai ai ona tatou ola i le olioli. “Na pa’ū Atamu ina ia i ai tagata; ma ua i ai tagata ina ia latou maua le olioli” [2 Nifae 2:25.] O le ola i le olioli o le a faatagaina taimi o tofotofoga ia sili atu le gafataulimaina ma mafai ai ona tatou aoao ma tuputupu ae ma avea atili e faapei o lo tatou Tama oi le Lagi.
Ua faalotomaualaloina au e ala i le faamanuiaga na ou maua i lou olaga e saofafai faatasi ma i latou o e ua faaleagaina e le faatautala, ma vaai i le vavega o le faamalologa lea e oo moni mai lava e ala mai i le Faaola. Afai o e mafatia, faamolemole liliu atu ma le agaga tatalo mo se fesoasoani. E te le tau tauaveina le avega mamafa na o oe. Ou te iloa e Na te faamaloloina, aua ua ou molimauina i le tele o taimi e le mafaitaulia.