O Leo o Le Au Paia o Aso e Gata Ai
Uma!
Ata na tusia e Allen Garns
I le taimi o au faatalanoaga o se epikopo i se tasi o aoauli o le Aso Sa, sa ou maua ai le fiafia i le nonofo ai i lalo ma se uo lelei e talanoa e uiga i nisi o luitau sa feagai ma ia. Ina ua uma ona faalogo atu i ona popolega mo ni nai minute, sa ou lagona o le mea e tatau ona ia faia e le aunoa o le faitauina o tusitusiga paia. Sa faamanatu mai ai foi ia te au, o lana epikopo, sa tatau foi ona ou faaauau pea lou suesueina o tusitusiga paia, o se mea lea sa ou tauivi lava e fai. O lea sa ou fautua atu ai ia avea maua ma “paaga e tali atu i le isi” i le taumafai ia sili atu le suesue pea lava pea.
I aso uma lava pe a uma ona ma faitauina a ma tusitusiga paia, ma te tesi atu le tasi i le isi le upu Uma! I le iloaina faapea sa faatalitali mai se isi tagata e faalogo pe na faamaeaina e le isi lana faitauga mo le aso sa o se uunaiga tele lea mo i maua uma. Afai e galo i se tasi o i maua, o le mauaina o se tesi sa avea o se faamanatu. Afai e lei tesi mai le isi tagata, sa faamanatu atu pea ia te ia. Sa ma tuuina atu i le tasi ma le isi e tauaveina lenei lui e aunoa ma le faia o le isi tagata e lagonaina le tausalaina.
Sa ma amataina le lui i le ono masina talu ai nei, ma ou te le manatuaina se aso na ma misia ai le faitauina o a ma tusitusiga paia. O lenei uso sa tu i luga i le taimi o le sauniga anapogi ma molimau i le lua masina talu ai ma faasoa mai lana molimau i le aafiaga lelei o le suesue i tusitusiga paia i aso uma ia te ia ma lona aiga.
Ou te faafetai mo lenei uso ma lana faauo, faapea foi ma ana tesi i aso taitasi. Ua ou vaai i auala e mafai ai e tekinolosi, pe a faaaogaina tatau, ona faamalosia o tatou olaga. Ou te matuai faafetai lava foi mo tusitusiga paia ma le auala ua latou molimau mai ai ia Keriso. Ou te iloa o le taulaga togiola a le Faaola ua mafai ai mo i tatou taitoatasi ona toe foi atu e mau faatasi ma Ia i se aso.