O Le Togiola a le Faaola: Faavae o le Kerisiano Moni
Mai se saunoaga, “O Le Togiola,” na tuuina atu i le semina mo peresitene fou o misiona i le Nofoaga Autu o Aoaoga Mo Faifeautalai i Provo i le aso 24 o Iuni, 2008.
O le a tatou toetutu uma lava ma avea ma ni tagata ola pea ona o le taulaga togiola a Iesu Keriso.
Ketesemane,saunia e J. Kirk Richards
Sa fesiligia le Perofeta o Iosefa Samita (1805–44), “O a ni mataupu faavae autu o la outou tapuaiga?” Na ia tali mai, “O mataupu faavae autu o lo matou talitonuga o le molimau a le au Aposetolo ma Perofeta, e faatatau ia Iesu Keriso, e faapea na maliu o Ia, ma tanumia, ma toetu mai i le aso tolu, ma afio a’e i le lagi; ma o isi mea uma e faatatau i la matou talitonuga ua na o ni faaopoopoga i ai.”1
Ou te fia tuuina atu foi la‘u molimau e uiga i le saunoaga a le Perofeta o Iosefa. O le totonugalemu o mea uma matou te talitonu i ai o lo matou Faaola ma Lana taulaga togiola—“le faamaulalo o le Atua” (1 Nifae 11:16) lea na auina mai ai e le Tama Lona Alo i le lalolagi e faataunuu le Togiola. O le faamoemoega autu mo le soifua o Iesu Keriso o le faamaea o le taulaga togiola. O le Togiola o le faavae o le Kerisiano moni.
Aisea e avea ai le Togiola a le Faaola o le totonugalemu o le mataupu faavae o le talalelei i le Ekalesia ma i o tatou olaga?
Mataupu Faavae o le Faatuatua 1:3
O loo taua i le mataupu faavae o le faatuatua lona tolu, “Matou te talitonu e ala i le Togiola a Keriso, e mafai ai ona faaolaina tagata uma, e ala i le usiusitai i tulafono ma sauniga o le Talalelei.”
“Faaolaina” i lenei tusiga e faatatau i le tikeri aupito maualuga o le mamalu i le malo selesitila. E maua e tagata uma e o mai i le lalolagi le toetu, ae ina ia maua le ola e faavavau, o faamanuiaga atoatoa o le alualu i luma e faavavau, e tatau i tagata taitoatasi ona usiusitai i tulafono, maua sauniga, ma osia feagaiga o le talalelei.
Aisea e mafai ai e Iesu Keriso, ma ua na o Ia lava, ona togiola mo agasala a le lalolagi? Na Ia ausia uma lava mea e manaomia.
Na Alofa le Atua ia te Ia ma Talitonuina o Ia
Na soifua mai Iesu i ni matua Faalelagi i se muai olaga. O Ia o le Ulumatua na Fanaua a lo tatou Tama Faalelagi. Na filifilia o Ia talu mai lava le amataga. Sa usiusitai o Ia i le finagalo o Lona Tama. E masani ona talanoa mai tusitusiga paia i le olioli o le Tama Faalelagi i Lona Alo.
Ua tatou faitau i le Mataio, “Faauta foi o le siufofoga mai le lagi, ua faapea mai, O lo‘u Atalii pele lena, ua ou fiafia lava ia te ia” (Mataio 3:17).
Ua tusia e Luka, “Ma sa oo mai o le siufofoga mai le ao, ua faapea mai, O lou atalii pele lena: ia outou faalogo ia te ia” (Luka 9:35).
Ma i le malumalu i le laueleele o Nuumau ina ua mavae le Toetu o le Faaola, na faalogoina e tagata le siufofoga o le Tama: “Faauta i lou atalii pele, o le ua ou fiafia lava i ai” (3 Nifae 11:7).
E faapitoa lava le ootia o lou loto ina ua ou faitau e faapea ao mafatia Iesu i le faatoaga o Ketesemane, o le Tama, i Lona alofa tele ma le mutimutivale mo Lona Alo Pele e Toatasi na Fanaua, na auina atu se agelu e faamafanafana ma faamalosi ia te Ia (tagai i le Luka 22:43).
Sa Faaaoga e Iesu Lona Faitalia e Usitai Ai
Faauta i le Tagata, saunia e J. Kirk Richards
Sa i ai ia Iesu le naunau e tuuina atu Lona soifua mo i tatou.
I le Fono sili i le Lagi, o Lusifelo, “le atalii o le taeao” (Isaia 14:12; MF&F 76: 26–27), na fai atu:
“Faauta, o aʼu lenei, auina atu aʼu, o le a avea aʼu mo ou atalii, ma o le a ou laveaiina tagata uma, ina ia leai se agaga e toatasi e se ese, ma e moni lava o le a ou faia lena mea; o le mea lea, ia tuu mai ia te au le mamalu.
“Ae, faauta, o loʼu Atalii Pele, o lē o laʼu Pele ma laʼu Filifilia mai le amataga, na fai mai ia te aʼu—Le Tamā e, ia faia lou finagalo, ma e a oe pea le mamalu e faavavau” (Mose 4:1–2; tagai foi i le Aperaamo 3:27).
Ona o le alofa maoae o le Atalii mo Lona Tama ma mo i tatou taitoatasi, na ia fetalai atu ai, “Auina atu au.” Ina ua Ia fetalai “auina atu au”, sa Ia faaaogaina Lona faitalia.
“E pei ona silafia au e le Tama, ma ou iloa le Tama: Ou te tuuina atu foi lou ola e sui ai mamoe. …
“O le mea lea e alofa mai ai le Tama ia te au, aua ou te tuuina atu lou ola, ina ia ou toe au mai ai.
“E leai se tasi na te aveeseina ia te au, a e peitai au, ou te tuuina atu e au lava. O ia te au le pule e tuuina atu, o ia te au foi le pule e toe au mai ai. Ua ou maua lena poloaiga mai lou Tama” (Ioane 10:15, 17–18).
Pe ana finagalo i ai le Faaola, semanu e mafai e lekeona o agelu ona aveeseina o Ia mai le satauro ma ave sao atu i le aiga i Lona Tama. Ae sa Ia faaaogaina Lona faitalia e ositaulagaina o Ia lava mo i tatou, e faauma Lana misiona i le olaga nei, ma tumau seia oo i le iuga, ma faamaeaina le taulaga togiola.
Na finagalo Iesu e afio mai i le lalolagi, ma na agavaa o Ia. Ma ina ua Ia afio mai, sa Ia fetalai mai, “Aua ou te le’i alu ifo mai le lagi e fai lo’u lava loto, ao le finagalo o Le ua auina mai a’u” (Ioane 6:38).
Sa Muai Faauuina Iesu.
Na aoao mai Peteru faapea o Iesu “na silafia lava e ia anamua ae lei faavaeina le lalolagi” (tagai i le 1 Peteru 1:19–21).
O perofeta i tisipenisione uma lava na muai tau maia le afio mai o Iesu Keriso, ma po o le a Lana misiona o le a i ai. E ala i le faatuatua tele, sa faaalia ai ia Enoka se faaaliga ofoofogia o le fanau mai, maliu, Afio ae, ma le Afio Mai Faalua o le Faaola:
“Ma faauta, sa vaai Enoka i le aso o le afio mai o le Atalii o le Tagata, i le tino lava; ma sa olioli lona agaga, ua fai mai: Ua sii i luga le Amiotonu, ma ua fasia le Tamai Mamoe mai le faavaega o le lalolagi; ma ua ou i ai i le loto o le Tamā e ala i le faatuatua, ma faauta, ua faatasi Siona ma aʼu. …
“Ma sa fetalai mai le Alii ia Enoka: Vaai, ma sa vaai o ia ma vaai atu i le Atalii o le Tagata ua sii aʼe i luga o le satauro, e tusa ma le tu a tagata;
“Ma sa ia faalogoina se siufofoga leotele; ma sa tapunia le lagi; ma sa aue foafoaga uma a le Atua; ma sa oi le lalolagi; ma sa mavaevae papa; ma sa tutulai mai le au paia, ma sa faapaleina i le aao taumatau o le Atalii o le Tagata, i palealii o le mamalu. …
“Ma sa vaaia e Enoka le Atalii o le Tagata ua afio aʼe i le Tamā. …
“Ma sa oo ina vaai Enoka i le aso o le afio mai o le Atalii o le Tagata, i aso e gata ai, e afio i luga o le lalolagi i le amiotonu i le va o le afe tausaga” (Mose 7:47, 55–56, 59, 65).
Pe a ma le 75 tausaga ae lei fanau mai Keriso, na molimau mai Amoleka: “Faauta, ou te fai atu ia te outou, ua ou iloa o le a afio mai Keriso i totonu o le fanauga a tagata, e ave i ona luga solitulafono a ona tagata; ma o le a ia togiola mo agasala a le lalolagi; ona ua fetalai mai ai le Alii le Atua” (Alema 34:8).
Na i ai ia Iesu ni Agavaa Tulaga Ese
O Fea Ua Latou Aveina I Ai O Ia?, saunia e J. Kirk Richards
Ua na o Iesu Keriso lava e mafai ona faia le taulaga togiola—na fanau mai i se tina faaletino, o Maria, ma sa ou maua le mana o le ola mai Lona Tama (tagai i le Ioane 5:26). Ona o lenei mana o le ola, sa Ia manumalo i le oti, na faaleaogaina ai le mana o le tuugamau, ma avea ai o Ia ma o tatou Faaola ma le Puluvaga ma le Matai o le Toetu—o le auala lea e mafai ai ona tuuina mai ia i tatou uma lava le faaolataga ma le tino ola pea. O le a tatou toetutu mai ma avea ma tino ola pea ona o le taulaga togiola a Iesu Keriso.
Na Togiola ma le Finagalo i ai Iesu mo le Uluai Agasala
O loo faapea mai le mataupu o le faatuatua lona lua, “Matou te talitonu o le a faasalaina tagata ona o a latou lava agasala, ae lē ona o le solitulafono a Atamu.”
E ala mai i le faaaogaina o la tatou faitalia, tatou te filifili ai e faatino lo tatou faatuatua. Faatasi ai ma le filiga, e mafai ona tatou salamo; a aunoa ma le Togiola, tatou te le mafaia.
Ua aoaoina i tatou i le Mose, “O lea na oo mai ai le tala i totonu o le lautele o le nuu, e faapea ua togiola le Alo o le Atua mo le uluai sala, lea e lē mafai ai ona tali o agasala a matua i luga o ulu o fanau,” (Mose 6:54).
Ua tuuina mai ia i tatou se aoaoga maoae i le 2 Nifae:
“Ona e pei ona oo mai le oti i tagata uma, e faataunuu ai le fuafuaga alofa mutimutivale a le Foafoa Silisiliese, e tatau ona i ai o se mana o le toetutu, ma e tatau ona oo mai le toetu i le tagata ona o le paʼū; ma na oo mai le paʼū ona o le solitulafono; ma talu ai ona ua pauu tagata o lea ua vavae ese ai i latou mai luma o le Alii.
O le mea lea, e ao ina i ai se togiola aoao lē gata—vagana o se togiola aoao lē gata e lē mafai e lenei tino pala ona ofu i le tino lē pala. O le mea lea, o le faasalaga muamua na oo mai i le tagata o le a tatau ona tumau pea i se umi e lē gata. Ma afai e faapea, po ua taoto i lalo lenei tino ia pala ma nuti i lona tinā o le eleele, e lē toetu mai” (2 Nifae 9:6–7).
Ua Na o Iesu le Tagata Atoatoa
I le Mataupu Faavae ma Feagaiga, ua fetalai mai le Faaola: “Le Tama e, faauta i mafatiaga ma le oti o le na le faia e ia se agasala, o le na e fiafia tele i ai; faauta i le toto o lou Atalii na faamaligiina, le toto o ia o le na e tuu atu ina ia faamamaluina oe” (MF&F 45:4).
Ua na o Iesu le tagata sa atoatoa, e aunoa ma se agasala. O le taulaga i le Feagaiga Tuai o se taulaga i le toto—ma e faasino atu i luma i le taulaga a lo tatou Alii ma le Faaola i luga o le satauro ina ia faataunuu ai le taulaga togiola. Pe a faia taulaga i le toto i totonu o malumalu anamua, sa faataulagaina e ositaulaga se tamai mamoe mama, e atoatoa i soo se itu. E masani lava ona taua le Faaola i tusitusiga paia “o le Tamai Mamoe a le Atua” ona o Lona mama aiai (tagai, mo se faataitaiga, Ioane 1:29, 36; 1 Nifae 12:6; 14:10; MF&F 88:106).
Sa aoao mai Peteru ua togiolaina i tatou “o le toto taua o Keriso, pei o lo le tamai mamoe e le pona lava e leai foi sona leaga” (1 Peteru 1:19).
Na Aveese e Iesu Keriso Agasala a le Lalolagi
O fuaiupu nei ua faamanino mai ai faapea na totogi e le Faaola le tau mo a tatou agasala e ala i Lana Togiola:
“O i tatou uma, e pei o mamoe, ua se ese; ua tatou taitasi ma liliu atu le tagata i lona lava ala; ma ua faafafa e le Alii i ona luga amioletonu a i tatou uma” (Mosaea 14:6).
“A ua faaalitino mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea. …
“Aua afai, ua lelei i tatou ma le Atua i le maliu o lona Alo, ina o fai i tatou mona fili, e matua faaolaina lava i tatou i lona soifua.
“Ae le gata i lea, ae ua tatou mitamita foi i le Atua ona o lo tatou Alii o Iesu Keriso, o ia ua tatou maua mai ai nei le leleiga. …
“Aua faapei ona avea ma agasala o le toatele ona o le le anaana o le tagata e toatasi ua faapea foi ona avea ma amiotonu ona o le anaana o le toatasi” (Roma 5:8, 10–11, 19).
“Ona taunuu ai lea o le upu a le perofeta o Isaia, ua faapea mai, o ia lava na na aveina o tatou vaivai, ma na tauave o tatou mai” (Mataio 8:17).
“Peitai ua le taofia le avea o le Atua ma Atua, ma e maua e le alofa mutimutivale le aia i le tagata ua salamo, ma e oo mai le alofa mutimutivale ona o le togiola; ma ua aumai e le togiola le toetutu mai o e ua oti; ma o le toetutu mai o e ua oti ua toe aumai ai tagata i luma o le Atua; ma faapea ona toefuatai ai o i latou i ona luma, e faamasinoina e tusa ma a latou galuega, e tusa ma le tulafono ma le faamasinotonu. …
Ma e faapea ona faataunuu e le Atua ona faamoemoega tetele ma faavavau, ia sa saunia mai le faavaega o le lalolagi. Ma e faapea ona oo mai o le olataga ma le togiolaina o tagata, ma lo latou faafanoga ma lo latou pagatia foi” (Alema 42:23, 26).
Sa Tumau Iesu e oo i le Iuga
Aso Faanoanoa o Kolokota,saunia e J. Kirk Richards
Na onosaia e Iesu Keriso tofotofoga, mafatiaga, ositaulaga, ma puapuaga o Ketesemane, faapea foi ma le atuatuvale o Kolokota i luga o le satauro. Ma, mulimuli ane, sa Ia faapea mai, “Ua taunuu” (Ioane 19:30). Sa ia faamaeaina Lana galuega i le olaga nei ma tumau e oo i le iuga, o lea na faamaeaina ai le taulaga togiola.
Sa Ia faapea atu i le Faatoaga, “Lo’u Tama e, afai e mafai, ia ave ese lenei ipu ia te au; ae aua le faia lo’u loto, ao lou finagalo” (Mataio 26:39).
Ua aoaoina i tatou i le Mataupu Faavae ma Feagaiga:
“O le mafatia lea na oo ai ia te a’u lava, o le Atua lava lea, o le ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga—ma manao ai ia Ou le inuina le ipu oona, ma ma’e’e—
“E ui i lea, ia i ai i le Tama le viiga, ma sa ou inu ma faauma ai a’u tapenapenaga mo le fanauga a tagata” (MF&F 19:18–19).
Sa fetalai atu Iesu i lona Tama, “Ua ou tuu atu le viiga ia te oe i le lalolagi: ua ou faaumaina le galuega na e tuuina mai ia te au ou te faia” (Ioane 17:4).
Ona oo lea, i luga o le satauro, “Ua talia le vineta e Iesu ona fetalai ane lea o ia, Ua taunuu: ua faagaugau lona ao, ona tuuina atu lea o lona agaga” (Ioane 19:30).
Na afio mai Iesu i le lalolagi, ma tausia lona paia, ina ia mafai ai ona Ia faatino le taulaga togiola, ma tumau ai e oo i le iuga.
Manatua o Ia e Ala i le Faamanatuga
I le asō tatou te manatua le taulaga togiola a le Faaola i faatusa o le falaoa ma le vai—o faatusa o Lona tino ma le toto—e pei ona sa faia i le Talisuaga Mulimuli a le Alii faatasi ma Ana Aposetolo.
“Ona tago ai lea o ia i le areto, ua faafetai, ua tofitofi, ma avatu ia te i latou, ua faapea atu, O lo’u tino lenei, ua foaiina atu mo outou; tou te faia le mea nei e fai ma faamanatuga ia te au.
“Sa faapea foi ona tago i le ipu, ina ua uma ona talisua, ua faapea atu, O lenei ipu o le feagaiga fou lea i lo’u toto, ua faamaligiina mo outou” (Luka 22:19–20).
I le Ioane 11:25–26 tatou te faitau ai:
“O a’u nei o le toetu ma le ola: o lē faatuatua mai ia te a’u, e ui lava ina oti, a e ola lava ia:
“O tagata ola uma o e faatuatua mai ia te au e le oti lava e oo i le faavavau.”
Tatou te faitau foi: “O a’u le areto ola na alu ifo mai le lagi: pe a ai se tasi i lenei areto ona ola ai lea o ia e faavavau: o le areto foi ou te avatua, o lo’u tino lea, ou te avatua ma ola o le lalolagi” (Ioane 6:51).
“O le ola o le lalolagi” o lona uiga o le ola e faavavau.
E tatau ona tatou saunia i tatou lava ma o tatou aiga i vaiaso uma ina ia agavaa e aai ma feinu i le faamanatuga ma faafou a tatou feagaiga ma loto salamo.
E Alolofa Le Tama ma le Alo ia i Tatou
Aua le masalosalo, Toma,saunia e J. Kirk Richards
Na auina mai e le Tama Lona Alo i le lalolagi—le faamaualalo—e tuuina mai o Ia ina ia faasatauroina ma ia ui atu i mea uma sa tatau ona Ia uia. I le tusi a Ioane ua tatou faitau ai:
“Ua fetalai atu Iesu … , O A’u nei le ala, ma le upu moni, ma le ola: e le alu atu lava se tasi i le Tama, pe a le ui mai ia te au.
“Ana iloa e outou o a’u, po ua iloa foi e outou lo’u Tama: e amata nei foi ona iloa o ia e outou, tou te vaai foi ia te ia” (Ioane 14:6–7).
“O le alofa lava lenei, e le ona ua tatou alofa i le Atua, a ua alofa mai o ia ia te i tatou, ua na auina mai foi lona Alo o le togiola mo a tatou agasala” (1 Ioane 4:10).
Totogi o lona uiga o le faaleleia po o le faamalieina.
Faaiuga
O tagata taitoatasi e o mai i le lalolagi ma mauaina se tino faalelalolagi o le a toetu mai, ae e tatau ona tatou galulue ina ia maua le faamanuiaga o le faaeaga e ala i lo tatou faamaoni, lo tatou faitalia, lo tatou usiusitai, ma lo tatou salamo. O le alofa mutimutivale o le a maua i le faamasinoga tonu, ma faatagaina ai le salamo.
Ona ua tatou filifili e mulimuli ma talia Iesu Keriso o lo tatou Togiola, o le a tatou tauave Lona suafa i o tatou luga i le papatisoga. Tatou te tauave le tulafono o le usiusitai. Tatou te folafola atu o le a tatou manatua pea o Ia ma tausi i Ana poloaiga. Tatou te faafouina a tatou feagaiga pe a tatou aai ma feinu i le faamanatuga.
E ala i le faafouina o a tatou feagaiga, tatou te maua ai le folafolaga o le mauaina o Lona Agaga e faatasi ma i tatou i taimi uma. Afai tatou te faatagaina Lona Agaga e oo mai i o tatou olaga, ma taitaia o tatou olaga, e mafai ona tatou toe foi atu i le afioaga o le Tama Faalelagi ma lona Alo, o Iesu Keriso, o le La fuafuaga o le fiafia lea mo i tatou—le ata o le faaolataga.