O Leo o Le Au Paia o Aso e Gata Ai
O Le Atotupe na Leiloa
Ata na tusia e Wilson J. Ong
Talu ai nei lava sa ou siitia atu ai i se fale fou ma talosagaina nisi o tagata o le Ekalesia e fesoasoani mai ia te au i se galuega faatino i lou fale. I le ogatotonu o le galuega faatino, sa ou tuua ai le fale e faatau ni mea na matou manaomia e faauma ai. Ina ua maea le galuega faatino, sa ou iloaina ai ua le o ia te au lau atotupe. Sa ou popole aua o loo i totonu o lau atotupe au pepa uma lava o faamatalaga faaletagata lava ia faatasi ai ma le tupe na faatoa ou mauaina mai i se tagata faatau i lena taeao. Sa ou toe foi atu i le mea na fai ai le faatauga ae sa le faamanuiaina. Sa ou alu i le fale ma saili e vaai pe na pau i se mea, ae ou te lei mauaina lava. Sa amata ona ou mafaufau i le avanoa o le a ou maua ina ia maua ai ni kopi fou o pepa uma o faamatalaga. Ae lei tuua lou fale, na fesili mai se uo, “Pe na e tatalo ea?”
Sa vave lava ona ou mafaufau, “Ioe ua uma ona ou tatalo!”
Ae o le mea moni lava, ou te lei tatalo ma le manatu moni i ai. Nai lo lena, sa ou manao e faamalosia lou loto i le Tama Faalelagi ma faia e pei o Lona tiute le fesoasoani mai ia ou maua lau atotupe. Ae sa ou manatuaina le mau i le Isaia 55:8: “Aua o ou manatu e le o outou manatu, o ou ala e le o outou ala, ua fetalai mai ai Ieova.”
I le aso Sa na ou alu ai i le lotu, ma na tau mai ia te au e se tagata sa matou faatasi i le aso ua mavae sa ia tatalo faatauanau i le Tama Faalelagi ina ia mafai ona ou maua lau atotupe. Sa ia fai mai sa ia lagonaina o le a ou mauaina. Mulimuli ane, a o ou nofo i lalo mo lau suesuega faaletagata lava ia, sa amata ona ou faitau i le Receiving Answers to Our Prayers na saunia e Elder Gene R. Cook, o se uso o le Fitugafulu malolo. O le itulau muamua o loo faamatala mai ai se tala ma se faafitauli e tutusa ma lou tulaga: na leiloa le atotupe a le atalii o Elder Cook, o lea na faapotopoto faatasi ai le aiga ma tatalo i le Alii ina ia latou mauaina.
Ina ua uma ona faitauina lena aafiaga, na ou faataitaiina le mea na ou aoaoina ma faapotopoto faatasi lou toalua ma lau fanau. Na matou faia se lio, ma na ofoina atu e tagata taitoatasi se tatalo, ao augani atu i le Alii e fesoasoani ia i matou ia mauaina le atotupe pe afai o lona finagalo lea.
Na ou molimauina muamua le mana o le tatalo, ae ina ua maea, a o ou tatalo na o au, sa ou fesili atu i le Tama Faalelagi e taliina la matou tatalo ina ia mafai ona faamalosia ai le faatuatua o lou toalua ma lau fanau.
O le aso na sosoo ai sa valaau mai ai se alii ia te au. Sa ia fai mai sa ia mauaina lau atotupe, e aofia ai ma le tupe. Sa ou tagi e pei o se tamaitiiti, aua sa taliina mai lau tatalo, ma sa faamalosia ai le faatuatua o lou aiga.
Ou te iloaina o le Tama Faalelagi, e tusa lava pe toatele naua le fanau e tausia, e tali mai lava ia i tatou taitoatasi e tusa ai ma Lana lava taimi ma i Lana lava ala.