Malamalama I Lou Faamanuiaga Faapeteriaka
E alala tusitala i Ilinoi, ISA, ma Niu Ioka, ISA, i le faasologa lena.
O le faailoaina o vaega o lou faamanuiaga e mafai ona fesoasoani e te maua ai le taitaiga i lou olaga.
Man in maze © Digital Vision Vections/Getty Images
Ua tumu le olaga i vai e le masani ai: O fea e tatau ona ou alu ai i le aoga? O le a le mea e tatau ona ou suesueina? Pe e tatau ona ou alu i se misiona? O ai e tatau ona ou faaipoipo i ai? Afai e tuuina atu ia te oe se faafanua patino e taialaina oe i filifiliga o le olaga, mata o le a e mulimuli i ai?
Ua tuuina mai e le Tama Faalelagi ma Iesu Keriso ia i tatou se faafanua faapena—faamanuiaga faapeteriaka—e aumaia ia i tatou le taitaiga i o tatou olaga. E ui ina ua tuuina mai ia i tatou le meaalofa o le faitalia e fai ai filifiliga i lo tatou lava loto fuatiaifo, o faamanuiaga faapeteriaka e mafai ona faasusuluina le malamalama po o a auala o le a aumaia ai le fiafia sili.
Ae o le na ona i ai o se faafanua e le lava lea. E tatau ona tatou suesue, malamalama, ma faaaoga le uiga i totonu o le faafanua. E faapena foi, ao amata ona e malamalama i le gagana o loo faaaoga i lou faamanuiaga faapeteriaka—o lau lava taiala patino i le olaga—o le a mafai ona e iloaina po o ai oe i fofoga o le Atua ma po o ai o le a avea ai oe.
Iloa Lou Tupuaga
O le mea muamua ma le sili ona taua, o lou faamanuiaga faapeteriaka e tautino mai ai lou tupuaga, po o le ituaiga patino o ituaiga e sefululua o Iakopo (o le na mulimuli ane faaigoa ia Isaraelu) lea e te sau ai. E ui e le o i tatou uma o ni suli moni o Iakopo, ua aoao mai tusitusiga paia ia i tatou o tagata o le Ekalesia e vaetamaina i le aiga o Isaraelu: “Ona o le toatele e taliaina lenei talalelei o le a taua i lou igoa, ma o le a faitauina o au fanau, ma o le a tutu ae ma faamanuia ia te oe lo latou tamā” (Aperaamo 2:10).
Ua faapea mai Shelisa Schroeppel o Iuta, ISA, “O le iloaina o au e mai le aiga o Iakopo e fesoasoani ia te au ia malamalama ai i lou faamoemoega i lenei olaga ma le mafuaaga ua valaauina ai au i ni valaauga i le Ekalesia.”
O lou faamanuiaga faapeteriaka e mafai ona faamatalaina foi soo se faamanuiaga e fesootai ma lau ituaiga faapitoa. Mo se faataitaiga, o le toatele o tagata o le Ekalesia e mai le ituaiga o Efaraima, le ituaiga e i ai le tiutetauave tupito e faasalalau atu le savali o le talalelei toefuataiina i le lalolagi (tagai i le Teuteronome 33:13–17; MF&F 133:26–34).
Maua Fautuaga Patino
Pe a faaaogaina lelei, e fesoasoani se faafanua i se tagata malaga ia aua nei leiloa. E faapena foi, i lenei malaga faaletino, o lou faamanuiaga faapeteriaka e mafai ona ofoina atu fautuaga ma taitaiga i lou olaga. O lou faamanuiaga faapeteriaka e le na ona tau atu ia te oe le mea e fai, ae e mafai ona ofoina atu le malamalama patino po o fea auala—pe afai e tuliloaina i le faatuatua—e mafai ona fesoasoani e te iloa ai pe ua e faaogatusa lou olaga ma le finagalo o le Tama Faalelagi. A o e suesue i lou faamanuiaga faapeteriaka ma saili atu e ola i se ala lea e valaaulia ai le Agaga o le Alii, e mafai ona e maua le saogalemu, olioli, ma le taitaiga.
Ua faapea mai Gabriel Paredes o Lima, Peru, “O nisi o fautuaga sa tuuina mai ia te au i lou faamanuiaga na faatoa mafai ona ou faaaogaina atoatoa i lou aiga ina ua uma ona faamauina i lou toalua.
“Talu ai nei na matou mafaufau ai i mea e mafai ona matou faia e faamalolosia ma atiina ae ai lo matou aiga fou. Na taliina ia ma fesili e ala mai i lou faamanuiaga faapeteriaka. I lena faamanuiaga ua fautuaina ai au e faamuamua le faaaloalo, faapalepale, ma le alofa i lou aiga, aua o nisi nei o faavae taua o le talalelei a Iesu Keriso.
“A o ma taulai atu i lenei mea, na ma mafaia ma lou toalua ona foia faafitauli. O loo i ai pea luitau faavaitaimi o se aiga, ae o loo ma fiafia. Sa ou lagonaina sa pei ua faamanatu mai e le Alii ia te au pe faapefea ona mafai ona ou maua le aiga lea na ia folafola mai ia te au. Ou te iloa e fetalai mai le Alii e ala mai i faamanuiaga faapeteriaka ma o le fautuaga o loo i totonu e tatau ona faaaogaina i o tatou olaga.”
Faalogo i Apoapoaiga
E le makaina mai e se faafanua tulaga lamatia uma i luga o le ala, ae o le mea e lelei ai, o faamanuiaga faapeteriaka e tele lava ina tuuina mai ni lapataiga e puipuia ai i tatou i o tatou olaga. O nisi o nei apoapoaiga e fesoasoani e puipuia i tatou mai faatosinaga a Satani; o isi e mafai ona faamalamalamaina i tatou i le auala e mafai ona tatou faatoilaloina ai le tagata natura i totonu o i tatou.
Mo Caitlin Carr o Iuta, o nisi o lapataiga i lona faamanuiaga faapeteriaka sa le vave ona manino mai, ae o le suesueina mulimuli ane o lona faamanuiaga sa aumai ai ni malamalamaaga fou.
“Ina ua maua lou faamanuiaga faapeteriaka, na lapataiina au e uiga i tagata o le a taumafai e taitaiese au mai le upu moni i tala matagofie. Ou te lei mafaufau tele i ai; sa ou maua se talitonuga maumaututu i aoaoga faavae sa ou aoaoina.
“Ae ui i lea, i le tausaga na sosoo ai sa ou feagai ma ni manatu ma filosofia ia, i le taimi muamua, na foliga mai sa mauaa i le tonu ma le alofa ae leai. O nei savali na foliga mai na oo mai i soo se mea: i ala o faasalalauga, aoga, e oo lava i uo mamae. E ui lava sa ou iloa o nei filosofia sa feteenai ma le fuafuaga a le Atua, sa oo ina ou manao e lagolago uma nei manatu fou faalelalolagi ma le Ekalesia. E lei umi ae ou iloaina faapea ‘e leai se na te mafaia ona auauna i alii e toalua’ (Mataio 6:24) ma e le tatau ona ou faalagolago i le poto o tagata. Na foia e le Tama Faalelagi ou masalosaloga i tusitusiga paia, ma tuuina mai le filemu i lou mafaufau ma lou loto. O se taunuuga, na faamalosia lau molimau ma ua sili atu ona ou mausali i le puipuia o mea ou te iloa e moni.”
Atiina ae Meaalofa ma Taleni
O lou faamanuiaga faapeteriaka e mafai foi ona taua ai meaalofa faaleagaga ma taleni ia ua tuuina mai e le Alii ia te oe e fausia ai Lona malo. Afai o lou faamanuiaga o loo taua ai se taleni e fou ia te oe, e mafai ona mafua mai ona e te lei mauaina le avanoa e iloa ai pe atiae ai lenei taleni. E ala i le saili ma le filiga ma le fesoasoani a le Alii, e mafai ona e maua le tomai e faaaoga ai lenei taleni ma le tele o isi.
O le atiina ae o au taleni e fesoasoani ia te oe e iloa ai mea e tulaga ese e te saofaga ai i le galuega a le Alii. E mafaufau loloto Johanna Blackwell o Kalefonia, ISA, i meaalofa ma taleni i lana faamanuiaga pe a ia lagonaina le faaosoosoina e faatusatusa o ia lava ma isi: “A o ou faitauina upu i lou faamanuiaga faapeteriaka, ou te manatua ai ua faamanuiaina au i meaalofa sa ou manaomia patino lava e manumalo ai i tofotofoga ma auai i le faanatinatiina o le galuega a le Alii.
“Sa tau mai e lou faamanuiaga ia te au lou mafaia ona alofa, faamagalo atu, ma maua le lototele e miomio faatasi ai ma i latou o loo siomia au. A o ou faataitaia nei meaalofa, ua faamanuiaina au e le Alii i se manao faateleina e fetaiai ma fesootai ma tagata ma aganuu fou. O le taunuuga, ua faatupulaia lau molimau o i tatou o fanau uma a se Tama Faalelagi alofa, ma ua mafai ai ona ou auauna atu i isi a o tatou sailia taitasi ina ia avea atili faapei o Keriso.”
Mauaina o Faamanuiaga Folafolaina
O le mea mulimuli, o a tatou faamanuiaga faapeteriaka e faaalia faamanuiaga folafolaina a le Tama Faalelagi ia i tatou pe afai tatou te tumau i le faatuatua ia te Ia. E leai se faamaoniga i le taimi e faataunuuina ai nei folafolaga, ae e mafai ona tatou iloa, afai lava tatou te ola ma usiusitai i le talalelei, o le a faataunuuina, pe i le olaga nei po o le isi.
E faalagolago Sergio Gutierrez o Nevada, ISA, i se folafolaga i lona faamanuiaga faapeteriaka i soo se taimi lava na te lagona ai le popole e uiga i fuafuaga o lana galuega i le lumanai: “I nisi taimi ou te lagonaina ai le popole i le le mautonu o lou lumanai, ae o loo i ai se folafolaga i lou faamanuiaga faapeteriaka lea e aumaia ai pea i lou mafaufau le filemu. O lenei folafolaga e fesoasoani mai ou te iloa ai faapea afai ou te galue malosi lava ma tumau i le faatuatua, o le a ou maua punaoa e manaomia e mafai ai ona tausia lou aiga ma fausia le Ekalesia. Ou te le o iloa tonu lava le ala o matata ou te fia sailia, ae o le i ai o lenei folafolaga ou te maua ai le faatuatua ma le mautinoa.”
Pe afai e te mafaufau i se taimi pe o le a le finagalo o le Tama Faalelagi mo oe, e le o tuua na o oe. Na malamalama le Alii o le a e feagai ma le tele o auala eseese e mafai ona e tulimataia i lou olaga, o lea ua ia tuuina mai ai ia te oe se faafanua patino ina ia e tausia ai lou olaga ia ogatasi ma Lana talalelei. E le mafai e faamanuiaga faapeteriaka ona faia a tatou faaiuga mo i tatou, ae e mafai ona latou taitai atu i tatou i a tatou lava faaaliga faaletagata lava ia. E ala i a tatou faamanuiaga faapeteriaka, ua faaalia ai ia i tatou pe faapefea ona tatou fetaui i le fuafuaga a le Alii e faapotopoto mai Isaraelu e ala i le aoaoina o a tatou lava ituaiga; ua tuuina mai ia i tatou fautuaga patino, aoaiga, ma folafolaga; ma ua aoaoina i tatou e uiga i meaalofa faapitoa ma taleni ua tuuina mai e le Tama Faalelagi ia i tatou e auauna atu ai ia te Ia. Afai lava e te taumafai e ola e tusa ai ma nei elemene uma o lou lava faamanuiaga faapeteriaka, e mafai ona e iloa o au faaiuga e faapea ua i ai i le finagalo o le Alii mo lou olaga.