E Mafai Faapefea Ona ou Suesue i Lou Mafaufau ma Lou Loto?
Saili po o le a se mea e mafai ona e faia pe a i ai ni au fesili.
O le a se mea e tatau ona e faia pe a i ai sau fesili e uiga i se aoaoga faavae, talafaasolopito, po o le faaletagata lava ia? E faapefea ona e maua se tali? Ua folafola mai e le Alii, “O le a ou tau atu ia te oe i lou mafaufau ma lou loto, e ala i le Agaga Paia” (MF&F 8:2). E faapefea ona e faaaogaina lou mafaufau ma le loto e iloa ai musumusuga? O ni nai manatu nei.
Mafaufau
Suesue, Tatalo, Faalogo
Na saunoa mai Elder Robert D. Hales o le Korama a Aposetolo e Toasefululua, pe a tatou faia “ni filifiliga taua o le olaga … , e faamoemoe le Tama Faalelagi ia i tatou e faaaoga lo tatou faitalia, suesue le tulaga i o tatou mafaufau e tusa ai ma mataupu faavae o le talalelei, ma aumaia se faaiuga ia te Ia i le tatalo” (“O le Agaga Paia,” Liahona, Me 2016, 105).
E tutusa lava ma soo se fesili. A o e suesue, tatalo ma le faamaoni e uiga i tali e te maua i luga o le ala. O le a tuu atu e le Agaga Paia ia te oe ni uunaiga—pe i manatu, o upu i lou mafaufau, po o isi faamanatu o le tagata lava ia—e taiala ai oe i nisi o tali e te manaomia.
Faaaoga Punaoa
Suesue i tusitusiga paia, e aofia ai le Taiala i Tusitusiga Paia ma isi fesoasoani e suesue ai. E mafai foi ona e sailia isi punaoa a le AAG e pei o lauga o konafesi aoao, o Gospel Topics i le LDS.org, mekasini a le Ekalesia, le Joseph Smith Paper Project, ma isi. (Tagai i le itulau e 54 mo se lisi o punaoa aoga a le Ekalesia.)
Talanoa i Ai
Aua le fefe e fesili atu mo se fesoasoani. Sa faamalosiau mai Elder Ronald A. Rasband o le Korama a Aposetolo e Toasefululua, “O le a tuuina atu ia te oe se lui. … E tatau ona e mafaufau i se tasi [e mafai ona fesoasoani ia te oe e sue ni tali]—se uo faatuatuaina, se matua po o ni matua, matua o matua, faiaoga, au epikopo, [po o] faufautua… —ma e tatau ona e mauaina tali o nei fesili “ (Face to Face broadcast, Ian. 20, 2016). Faataitai i ai! Talanoa i se tasi e te faatuatuaina e uiga i au fesili ma sue faatasi tali.
Fatu
Suesue, Tatalo, Faalogo
O laasaga taua nei mo le manatunatu loloto i ai i lou mafaufau faapea foi ma lou loto. Na saunoa Peresitene Dieter F. Uchtdorf, Fesoasoani Lua i le Au Peresitene Sili, “Afai e te manao e iloa upumoni faaleagaga, e tatau ona e faaaogaina meafaigaluega sao. E le mafai ona e mauaina se malamalamaaga o upumoni faaleagaga i meafaigaluega e le mafai ona maua ai” (“Mauaina o se Molimau o le Malamalama ma le Upumoni,” Liahona, Nov. 2014, 22). O le Agaga Paia o le meafaigaluega lea tatou te iloa ai mea faaleagaga. O lea pe a e tatalo ma faalogo i le Agaga, o le a e mafai ona maua ni tali i se taimi.
Ia Onosai
Na faamatalaina foi e Peresitene Uchtdorf, “O le faateleina o le liliu atu o o tatou loto ma mafaufau i le Atua, o le faateleina foi lena o le malamalama faalelagi e oo mai i o tatou agaga. … E faasolosolo malie, o mea na muamua foliga mai e puaoa, pogisa, ma mamao ese e oo ina manino, malamalama, ma tatou masani ai” (“Mauaina o se Molimau i le Malamalama ma le Upumoni,” 22). O le saili mo ni tali e mafai ona avea ma se faagasologa umi. Ae afai e te naunau e faalogo mo tali, e tusa lava pe alu ai le taimi, o le a e mauaina.
Faataitai le Faailoaina o Uunaiga
O le tele ona e faailoaina uunaiga ma naunau e faatino pe a musumusu mai le Agaga i lou loto, o le faigofie foi lea ona iloa uunaiga faaopoopo i le lumanai. E mafai ona e “lagona ai ua sao” po o le oo i se “pogisa o le mafaufau” pe afai e sese (tagai i le MF&F 9:8–9). Atonu e te lagonaina foi se faamanatu malu, se lagona o le filemu, po o isi lagona e patino lava ia te oe. E silafia e le Alii oe, ma Na te silafia le auala o le a e malamalama ai i le Agaga. O le a Ia tuuina atu ia te oe le taitaiga alofa lea e tulaga ese ia te oe. O lea ia faaauau pea le faalogo ma faaauau pea le faataitaia.