Seia Tatou Toe Feiloai
O Le Mana o le Atua
Mai se lauga i le sauniga perisitua aoao ua faaulutalaina “O Le Mataupu o le Perisitua,” Liahona, Iulai 1982, 51; mataitusi tetele ua faalaugatasia.
O le faatuatua o le mana ma o le mana o le perisitua.
O Le Nuu o Siona ua Liuaina, saunia e Del Parson.
Ua avea le Atua ma Atua aua ua ia te Ia le faatuatua atoa, ma le mana atoa, ma le perisitua atoa. O le soifuaga ua Ia soifua ai ua taua o le ola e faavavau.
Ma o le tulaga lea tatou te avea ai e faapei o Ia o le tulaga lea tatou te maua ai Lona faatuatua, maua ai Lona mana, ma faaaoga ai Lana perisitua. Ma pe a tatou avea e faapei o Ia i le tulaga atoatoa ma le faamaoni, ona tatou maua foi lea o le ola e faavavau.
O le faatuatua ma le perisitua e o faatasi. O le faatuatua o le mana ma o le mana o le perisitua. A uma ona tatou mauaina le faatuatua, tatou te maua le perisitua. Ona, tatou tuputupu ae lea i le faatuatua, e ala i le mauaina o le perisitua, mauaina o le mana atoa, tatou te avea ai e faapei o lo tatou Alii.
O lo tatou taimi iinei i le olaga nei ua vaetofia e avea ma se taimi o le vaavaaiga ma o le suega. O lo tatou avanoa aʼo i ai iinei e faaatoatoa ai lo tatou faatuatua ma tuputupu ae ai i le mana o le perisitua. …
Na sili atu le tele o mea na faia e le perisitua paia e faaatoatoa ai tagata i ona po o Enoka, nai lo soo se isi lava taimi. Na taua i lena taimi o le faatulagaga a Enoka (tagai i le MF&F 76:57), o le mana lea na liua ai o ia ma lona nuu. Ma sa liua i latou aua na latou faatuatua ma faaaogaina le mana o le perisitua.
Ma o Enoka lea na faia ai e le Alii se feagaiga e faavavau e faapea o i latou uma o e maua le perisitua o le a maua le mana, e ala i le faatuatua, e pulea ai ma faafoe mea uma i le lalolagi, e tetee atu i autau a atunuu, ma tu atu i le mamalu ma le faaeaga i luma o le Alii.
O Mekisateko o se tagata o lea faatuatua, “ma sa faia e lona nuu le amiotonu, ma sa maua ai le lagi, ma sa saili i le aai o Enoka” (Faaliliuga a Iosefa Samita, Kenese 14:34). …
O le a, la, le aoaoga faavae o le perisitua? Ma e faapefea ona tatou ola ai o ni auauna a le Alii?
O lenei aoaoga faavae e faapea o le Atua lo tatou Tama, o se tamalii faamamaluina, e atoatoa ma ua faaeaina o le ua i ai le malosi uma, le mana uma, ma le pule uma, e silafia mea uma ma e le iu Ona uiga auaumama uma, ma o loo soifua i le iunite o le aiga.
Ma e olioli lo tatou Tama Faavavau i lenei tulaga maualuga o le mamalu ma le atoatoa ma le mana ona e atoatoa Lona faatuatua ma o Lana perisitua e le faatapulaaina.
E faapea o le perisitua lena o le igoa tonu lava lena o le mana o le Atua, ma afai tatou te fia faapei o Ia, e tatau ona tatou maua ma faaaoga Lana perisitua po o le mana e pei ona Ia faaaogaina. …
Ua tatou maua le mana, e ala i le faatuatua, e pulea ma faafoe ai mea uma lava, faaletino ma le faaleagaga; e faia ai vavega ma faaatoatoa ai olaga; e tutu ai i luma o le afioaga o le Atua ma avea e faapei o Ia, aua ua tatou maua Lona faatuatua, Ona tulaga atoatoa, ma Lona mana, pe i se isi faaupuga, le atoatoa o Lona perisitua.
O lenei, la, o le aoaoga faavae o le perisitua, e sili atu nai so se isi lava mea ma e leai se isi lava mea e mafai ona sili atu nai lo le perisitua. O le mana lenei e mafai ona tatou maua e ala i le faatuatua ma le amiotonu…
E moni lava e i ai le mana i le perisitua—o se mana lea tatou te sailia ia maua e faaaogaina, o se mana lea tatou te tatalo ma le naunautai ina ia i ai i o tatou luga ma luga o a tatou fanau e faavavau.