O Leo o Le Au Paia o Aso e Gata Ai
Laveaiina i le Potu Pito i Luma
Ata na tusia e Allen Garns
E masani ona faigaluega lou toalua i aso Sa, ae tuua au e nafa ma le aveina o lau fanau tama e toafa i le lotu na o au. I se tasi aso Sa faapitoa i le taimi o le sauniga faamanatuga, na fefinauai ai lau fanau laiti e toalua. Pe a ou faia ia fiafia se tasi o tama i se tusi, e manao ai foi lona uso. Sa ou taumafai i meaai mama, meataalo, ma ata valivali, ae leai se mea na aoga. Sa lofituina au i lau fanau tama, o e na foliga mai e le mafai ona nofonofo filemu mo se itula e tasi.
Sa ou aumaia se tamai meataalo i fafo mai lau ato ma tuuina atu i lau tama e tasi-le-tausaga le matua. Sa vave ona ee leotele mai lau tolu-tausaga-le-matua, o Tyson, a o ia puna atu i luga o lona uso laitiiti, ma taumafai e fao mai le meataalo. Sa ou lagonaina le faalumaina a o ou siiina atu tamaiti laiti e toalua o loo feei, ma tauaimisa i le potu pito i luma.
Sa vave ona susu ou mata i loimata vevela. Aisea ua matuai faigata ai lenei mea? Sa ou faia le mea na finagalo le Tama Faalelagi ou te faia e ala i le aumaia o lou aiga i le lotu, e sao? Ae ua le mafai ona ou toe faia. Sa ou le lava ma maasiasi e tauivi ma lau fanau tama i sauniga faamanatuga i vaiaso taitasi. Ou te lei toe manao e toe sau.
Sa ou nofo ai faatasi ma nei manatu mo na o le 15 sekone, ae sau loa mai fafo se uso ou te tau le iloaina i totonu o le potu pito i luma ia te au. O lona igoa o Sister Beus. Sa masani lava ona nofo na o ia, ona o lona toalua na auauna atu i le au epikopo ma ua matutua lana fanau. Sa ia fai mai, “E te i ai lava na o oe iinei i taimi uma lava! E mafai ona ou iloa atu o loo e taumafai malosi lava. E mafai ona ma nonofo faatasi ma Tyson?” Sa le mafai ona ou mafaufau i se tali! Sa na ona lue atu o lou ulu a o ia toe taitai atu o ia i le lima, o lenei ua filemu ma fiafia, i totonu o le falesa.
Sa ou soloiese ou loimata, sii i luga lau pepe, ma savali atu ma le lotomaualalo i totonu o le falesa ina ia olioli ai i le vaega o totoe o le sauniga i le filemu.
O le Aso Sa na sosoo ai a o matou savavali atu i totonu o le sauniga faamanatuga, na sailia e Tyson lana uo fou. I le po e tatalo ai o ia, “Faafetai lava, Tama Faalelagi, mo Sister Beus. Ou te alofa tele ia te ia!”
Ua silia nei ma le tolu tausaga, ma o loo sailia pea e Tyson le falesa mo Sister Beus. O le tausaga ua mavae sa valaauina ai o ia e avea o se faiaoga o le Peraimeri ia Tyson. Sa avea o ia o se tamaitiiti sili ona fiafia.
Ou te matua faafetai lava mo Sister Beus ma lona naunautaiga ina ia alofa atu ma auauna atu i isi. Ou te iloa e mafai ona tatou faamanuiaina olaga o isi pe a tatou auauna atu e pei ona faia e le Faaola.