“E mafai faapefea ona ou iloaina o loo faafofoga mai le Atua i au tatalo?”

O le tatalo o se faamanuiaga sili, ma ua folafolaina mai ia i tatou faapea e faafofoga mai pea le Tama Faalelagi, ae e masani lava ona manaomia ai ni galuega e iloa Ana tali.¹

Mafaufau e uiga i lenei mea: a le o le faafofoga mai o le Atua ia te oe po o le Na te le faafofoga mai. Afai Na te le faia, ia o le mea moni lava e leai se uiga i le tatalo. Ae afai Na te faia (ma Na te faia!), e tatau ona tatou fuafuaina pe faapefea ona matuai talanoa atu ia te Ia i le tatalo, iloaina tali, ma ia agai i luma ma le faamaoni.

Pe a tatou lagonaina Na te le o faafofoga mai, atonu e tatau ona tatou aafia i se tuputupu ae faaletagata lava ia. Atonu e te faia ia te oe lava ni nai fesili: Pe o ou mama? Pe o lelei ou faamoemoega? Pe o ou naunau e fai mea e finagalo ai o Ia?² Afai o le tali i nei mea taitasi o le ioe, e mafai ona e faatuatuaina faapea o “le Alii lou Atua o le a … tuuina mai ia te oe tali i au tatalo” (MF&F 112:10). Ia manatua, o nisi taimi e oo mai ai tali i ni auala maaleale pe e lei mafaufauina.

Afai na e tali atu leai i nisi o na fesili, e le o tuai lava! Faia ni suiga manaomia i lou olaga ina ia mafai ona e maua le Agaga. Ia naunau e faatino musumusuga e te mauaina.

Ma aua nei galo e maua uma e tagata taitoatasi ni tali eseese. Tatalo ina ia aoaoina oe e le Agaga Paia pe faapefea ona e mafai ona iloa tali. Atonu o le a le faigofie ona iloaina tali i le taimi muamua, ae e pei lava o soo se isi lava tomai: o le faataitai e atoatoa ai. Ia faatuatua ma talitonu faapea o le Tama Faalelagi e faafofoga mai i taimi uma lava.

Faalogo i le Agaga

Taumafai e faalogo i le Agaga Paia. E faalogoina e tagata le Agaga Paia i ni auala eseese, atonu o loo e faalogologo mo se leo filemu, ma le itiiti ae oo mai le uunaiga o se lagona. Ou te iloa o le Agaga Paia o le a tau atu ia te oe mea uma e tatau ona e iloaina—tau lava o lou faalogo.

Elise G., 13 tausaga, Alberta, Kanata

O tali i le Ekalesia

O se tasi taimi sa ou maua se masalosalo tele lava pe alu i se tafaoga faamasani ma se tagata le lotu. I se tasi Aso Sa i le sauniga faamanatuga, na tuuina mai ai e se tamaitai se lauga lea na foliga mai na tuu sao lava mai ia te au. O le taimi lena, sa ou maua ai se faamautinoaga ua tali mai le Alii i lau tatalo. O le taimi muamua, sa ou le mautonu ai e uiga i le mea e fai, ae sa faamafanafanaina au e le Agaga Paia, lea na faatumulia lou loto i le olioli ma le lototoa. E tali mai le Atua ia i tatou e ala i lagona, mafaufauga, o tusitusiga paia, ma e oo lava i failauga i le lotu!

Karen V., 19 tausaga, Minas Gerais, Pasila

Manatua Pe O Ai Oe

Ou te iloa e faafofoga le Atua ia i tatou ona o le tatalo e maua ai se lagona o le filemu, toomaga, ma le alofa i totonu o lou loto. Ou te vaai faapea Na te faasaolotoina au mai mea matautia mai lea aso i lea aso ma e Na te puipuia lou aiga, ma ou te lagonaina le alofagia e ia. Ae ou te lei alu i le aoga, ou te faia lava i taimi uma le autu a tamaitai talavou; e fesoasoani ou te manatua ai o au o se afafine o le Tama Faalelagi, o le e alofa mai ia te au.

Nicol M., 19 tausaga, Lima, Peru

Saili I Ai

Sa ou manatunatu i se taimi pe mafai ona faafofogaina e le Atua lau tatalo, ona ou lagonaina ai lea o le tali i lou loto. Sa ou faalogo i se tasi o molimau e uiga i le tatalo, ma na mafai ona ou lagonaina le Agaga Paia. O le isi au fautuaga o le fesili atu i ou matua, epikopo, po o isi tagata o lau uarota. E mafai foi lava ona e tatalo mo le fesoasoani i le autu lenei!

Joshua S., 13 tausaga, Oregon, ISA

O Le Tatalo a Se Tamaitiiti

Ou te iloa e faafofoga le Tama Faalelagi i au tatalo ona o upu nei i le pese a le Peraimeri “O le tatalo a le tamaitiiti” (Tusipese a Tamaiti, 12): “Le Tama e, o e i ai iina? Pe o lagona mai tatalo uma? Fai mai e mamao le lagi, ae ou te lagona le lata mai pe a tatalo.” Pe a ou manatua lena pese, ou te iloa o loo faafofoga mai o Ia aua ou te lagonana le Agaga ma Lona alofa e le iu mo au. A ou manatua e alofa o Ia ia te au, ou te lagonaina le mafanafana ma iloa Na te faafofogaina au tatalo.

Elaine B., 16 tausaga, North Carolina, ISA

Faalagolago ia te Ia.

E faafofoga mai i taimi uma le Tama Faalelagi i a tatou tatalo, ae o nisi taimi e foliga mai Na te le o taliina a tatou tatalo aua atonu Na te le tali mai ia i tatou i le ala po o le taimi tatou te mananao ia te Ia e tali mai ai. E tatau ona tatou naunau e gauai atu o tatou loto i Lona finagalo ma maua le faatuatua faapea Na te silafia le mea e sili mo i tatou. E alofa le Tama Faalelagi ia i tatou ma o le a taumafai i taimi uma e fesoasoani ia i tatou e aoao ma tuputupu ae a o Ia tali mai i a tatou tatalo.

Mosiah M., 17 tausaga, Iuta, ISA

Ole Atu ona Outou Maua ai Lea

E ala mai i tusitusiga paia, ua aoaoina i tatou o le a faafofogaina a tatou tatalo e le Atua ma o le a tali mai pe afai tatou te tatalo atu ia te Ia ma le faatuatua ma le loto faamaoni. O le a tatou lagonaina i o tatou loto le faamautinoaga e faafofoga mai o Ia ia i tatou, o se lagona o le filemu ma le toafimalie. Tatou te lagonaina foi o le a lelei mea uma pe a tatou mulimuli i le finagalo o le Tama. Pe a tatou masalosalo e faafofoga mai o Ia ia i tatou, e tatau ona tatou sailia le taitaiga i tusitusiga paia ona fesili atu lea pe moni mea o loo tatou faitauina.

Constanza L., 20 tausaga, Bío Bío, Chile

Tatalo ma le faamaoni.

A uma lau tatalo, e mafai ona e faalogo i lagona ma manaoga na e oo mai i lou loto. Atonu o se tasi o na lagona o le tali i lau tatalo. Pe a tatou tatalo ma se loto faamaoni ma le manatu moni i ai, e tali mai lo tatou Tama Faalelagi e tusa ai ma lo tatou faatuatua ia te Ia. E le tali mai o Ia e na ona faamalie ai lo tatou fiailoa.

Jean-Claude N., 16 tausaga, Kasaï-Central, Democratic Republic o Congo