E Susulu Fetu
E alala le tusitala i Colorado, ISA.
“E manaia le i ai iinei faatasi ma outou i le Peraimeri” (Children‘s Songbook, 254).
Sa pipii mau Fetu i ona lavalava. Sa lagona pea le le masani e ofu se ofu talaloa i le lotu. I lana lotu tuai o teineiti sa ofuvae po o ofuvae pupuu i le Aso Sa. Ae le faapena i lana lotu fou. Faatoa uma ona papatisoina o ia ma lona tina i totonu O Le Ekalesia a Iesu Keriso o le Au Paia o Aso e Gata Ai.
Sa mapuea Fetu a o tilotilo i le faaata. Sa fiafia o ia e alu i le lotu mo le uluai taimi o se sui aloaia o le lotu, ae sa popole foi o ia. O le taimi muamua, sa la nonofo ma tina i le taimi atoa i le lotu. Ae o le taimi lenei ua alu o ia i le Peraimeri.
Sa emoemo mata o Fetu i lona ata. Ae faapefea pe afai sa le fetaui o ia iina? Ae faapefea pe a le fiafia isi tamaiti ia te ia?
“Fetu? Ua e sauni?” O le valaau lea a Tina.
Sa savali atu fetu i le fogafale i lalo. “Pe o ou aulelei?” na ia fesili ai.
Na ataata atu Tina. Ua e aulelei a.
Sa faanonou atu foliga o Fetu. “E tatau ona e faia lena tala. O oe o lou tina.”
“E sa’o oe. E tatau ona ou faia lena tala. Aua e moni.”
Sa ataata laitiiti Fetu. Na masani lava ona i ai se ala e faia e lona tina na te maua ai se lagona e sili atu. Ae sa i ai pea lagona popole i lona manava. Ae faapefea pe afai e leai se tasi o isi tamaiti e fia talanoa ia te ia? Sa i ai ni ana uo i le aoga, ae sa le o ni tagata o lana lotu fou. Sa ia moomoo maimau pe ana i ai se uo se tasi la te o faatasi i le lotu.
“Faatoa ou manatuaina se mea e tatau ona ou faia,” sa ia fai atu ia Tina.
Sa ia toe tamoe i le falealuga ma tootuli i autafa o lona moega. “Tama Faalelagi pele e, faamolemole fesoasoani mai ia te au e faia ni uo. Ou te talitonu e moni mea na aoao mai e faifeautalai, ae ou te fefe.”
Sa tootuli pea Fetu i ona tulivae ma faalogo. Ina ua mavae sina taimi, sa ia lagonaina se lagona matagofie, ma le filemu, ma sa ia le toe popole tele.
Sa nonofo Fetu ma Tina i le lotu i talaane o se aiga faatasi ma teineiti e toatolu. Na faailoa mai e matua i laua lava ma amata ona talanoa ma tina ao lei amataina le sauniga. Na fesoasoani Fetu i teineiti i le valiina o se ata o Iesu.
Na agai atu Epikopo Andrews ia i latou. “Sister Cunningham! Fetu! “E ese le lelei o le vaai atu ia te oulua i le aso” Na ia tuu atu ia i laua taitasi se ataata alofa ma se faatalofa. Na galo ia fetu le lelei tele o tagata uma i le lotu. Atonu o le a ia maua lava se uo.
Ina ua mavae le sauniga faamanatuga sa alu loa Fetu i le Peraimeri. Sa ia vaai atu i isi tamaiti ma le popole ao ia nofo i lalo. Sa latou talanoa i le tasi ma le isi ma na foliga mai e lei matauina o ia. Na tau pe le fatu o Fetu. O le a tuuatoatasi pea lava o ia.
Ae savali mai loa i totonu o le potu se teineitiiti e tupulaga ma Fetu. “E foliga popole foi o ia,” na mafaufau ai Fetu. “E mafai ona ou alu e talanoa ia te ia.”
Sa ia manava loloa, ona savali atu lea i le teine. “Talofa, o lou igoa o Fetu. Ou te fou. E te fia nofo i ou tafatafa ? Sa to e Fetu lona sela. Pe o le a manao le teine e avea ma ana uo?
Sa liua le gutu o le teineitiiti i se afa-ataata. “O au o Sera. Ou te fou foi. Faatoa siitia mai lou aiga iinei mai Ontario.”
“Na ma papatiso ma lou tina i le lua vaiaso talu ai,” o le tala lea a Fetu. “Ou te le mautinoa po o le a lau mea e tatau ona fai.”
Sa faateleina le ataata a Sera. “O le a ta fuafuaina faatasi.”
Sa nonofo faatasi Fetu ma Sera ma le la vasega. O nisi taimi e tepa atu ai Fetu ia Sera ma ataata. Sa ataata atu foi Sera. Sa lagona e Fetu le to’a ma le fiafia. Sa ia iloaina ua tali mai le Tama Faalelagi i lana tatalo ma fesoasoani ia te ia ia mauaina se uo.
Na fesili atu le faiaoga ia Fetu ma Sera e faailoa mai i laua lava.
Na tu i luga Fetu. “O lou igoa o Fetu Cunningham. O maua ma lou tina na papatiso i le lua vaiaso talu ai.” Sa malolo o ia, ma sa i ai se ataata i ona foliga a o ia tilotilo atu i lana uo fou. “Ma o lau uo lenei o Sera.”