O Tusi ua Galo, Molimau ua Manatuaina
E alala le tusitala i Cagayan, Filipaina.
O mata uma sa ia te au. Pe mafai ona ou puipuia le Ekalesia i lau molimau faigofie?
I se tasi tausaga, sa ou faia ai se sini e faaleleia lau aoaoga faaleagaga. Ou te aumaia ni tusi o le Ekalesia, tamaitusi, tusi lesona, ma tusitusiga paia i soo se mea, e aofia ai le aoga, a o ou matelaina mo afioga a le Atua. Ae o au taumafaiga na faagesegese ina ua ou pisi e suesue mo se suega puupuu o le a faia.
I se tasi aso na taitai atu ai e lo matou faiaoga se talanoaga lea na ia fesili mai ai i tamaiti aoga uma lava i totonu o le potu e le Katoliko e tutu i luga. Sa na o a’u le Au Paia o Aso e Gata Ai i le vasega. E toaono foi isi tamaiti aoga na tutu i luga.
Ona fesiligia lea o i matou: O le a le lotu e te auai? O ai na amataina? Na faapefea ona faatulagaina la outou Ekalesia?
O au le tagata mulimuli na tali. Sa ou popole i le iloaina ou te le i aumaia aʼu tusi o le Ekalesia, ae sa ou taumafai e manatua mea na ou suesueina. Na oo mai se fuaiupu o le Tusi Paia i lou mafaufau:
“Ia e faatuatua ia Ieova ma lou loto atoa; ae aua le faalagolago i lou lava atamai.
“Ia e manatua o ia i ou ala uma, ona faatonuina ai lea e ia lava ou ala.” (Faataoto 3:5–6).
Sa ou tu i luma o le vasega ma le lototoa, ma ua galo ou popolega. “Na ou faaapea atu o a’u o se tagata O Le Ekalesia a Iesu Keriso o le Au Paia o Aso e Gata Ai. Sa ou faasoa atu le tala i se tama talavou, o Iosefa Samita, lea na vaai i le Atua. Sa ou lagonaina le mu o lou loto, ma sa tafe ifo loimata mai ou mata. Sa ou faasoa atu na faatulagaina le Ekalesia i le aso 6 o Aperila, 1830, ma na ou molimau atu na valaauina se perofeta a le Atua ma na toefuatai mai le perisitua. Na ou molimau atu, na ou iloa o nei mea uma lava e moni.
O le tele o itula o suesuega o le talalelei sa matua aoga lava. Na fesoasoani ia te au e puipui ai lou faatuatua ma faasoa atu le talalelei. Sa ou mitamita ina ua, mavae ni nai vaiaso, ae auai mai au uo e toafa o lau vasega i le lotu.
Sa aoao mai e lena aafiaga ia te au le taua o se molimau. I le taimi muamua sa ou manatunatu pe aisea na le uunaia ai au e le Alii e aumai au tusi i lena aso. Semanu e fesoasoani ia te au e tali atu atoatoa fesili na fai mai. Ona ou iloaina lea e le tau manaomia lo tatou taulotoina o mea uma e uiga i le Ekalesia pe faalagolago i mau fesootai—e tatau ona tatou suesue, ola ai, ma faasoa atu le talalelei, ae faalagolago i le Agaga Paia. Atonu e lei i ai ni au tusi, ae sa i ai lau molimau.