Saunia mo se Malaga Fou
E alala le tusitala i Parana, Pasila.
E pei o Nifae na folau atu i se lalolagi e le mailoa, sa ou manaomia le faaaogaina o le faatuatua i le Alii e uiga i le amataina o se aiga.
Atapue © Getty Images
I vaiaso ao lumanai lau faaipoipoga ma le faamauga i le malumalu, sa amata ona fai si ou popole teisi e uiga i mea uma e tatau ona ou faia ao lei amataina lou aiga fou. E ui lava i le olioli tele o le taimi lena, sa ou lagona le popole e uiga i le faia o la ma faatulagaga fou, o le faavasegaina lelei o a ma tupe, mauaina o se nofoaga e teu ai a ma meatotino, ma ou tiutetauave fou uma lava o se ava. Sa ou manao ina ia mautinoa sa ma amataina le ma faaipoipoga i le ala sao e ala i le faia o se avanoa i a ma gaoioiga mo mea e taua e pei o le tausia o poloaiga ma le faaaluina o taimi faatasi o se tane ma se ava e ui lava i le pisi o o ma olaga.
A o latalata atu i le aso o le faaipoipoga, sa ou tei i se faasologa o miti taufaafefe e aofia ai soo se ituaiga o faafitauli e mafai ona aafia ai se aiga. Ona ou te sau mai se aiga alolofa ae puapuagatia, e faamatauina i finauga matuia faifai pea ma loto nutimomoia, na sili atu ona aafia au i miti leaga nai lo le tulaga sa tatau ai. O lea i se tasi po, ina ua mavae ni nai isi po faapena, sa ou ala ae i luga ua afuafu tetele ma filifili loa e mulimuli i le fautuaga na tuuina mai e Sister Neill F. Marriott, le Fesoasoani Lua i le au Peresitene Aoao o Tamaitai Talavou, na tuuina mai i lana lauga “Gauai Atu o Tatou Loto i le Atua” (Liahona, Nov. 2015, 30–32). Sa ou moeiini ma tatalo, “Tama Faalelagi pele e, o le a se mea e mafai ona ou faia e aveesea ai nei mea leaga mai lou aiga?”
O le tali na taia ai au i se saoasaoa ma se malosi e peiseai na tatala mai e se tagata se faitotoa i lou mafaufau ma tuu i ai le manatu. Na uunaia au e le leo itiiti, ma le filemu, “Tau lava o le faia o mea e tatau ona e faia. Ia faamaoni i laasaga taitasi.” Na musumusu mai e le Agaga ni fautuaga faapitoa, ma sa ou lagonaina afai ou te faia ia mea, o le a lelei mea uma.”
Sa ou ataata, ma lagonaina se mafanafana ua faatumulia ai lou fatafata. Na vave lava ona galo atu popolega uma lava, aua na ou iloa e moni. Sa ou lagonaina le Agaga Paia muamua, ae e lei malosi muamua e pei ona ou i ai i lena po. Sa ou lagonaina le alofa o lo tatou Tama Faalelagi ma lo tatou Faaola ua siomia ai au, ma sa ou iloaina o le mafanafana ma le faaolataga o lo matou aiga na taua tele ia i Laua e pei ona i ai ia te au.
I le avea ai ma se faamautinoaga faaopoopo, na oo mai i lou mafaufau se tala mai tusitusiga paia—le taimi na faatonuina ai e le Alii Nifae e fau se vaa: “Ma sa oo ina fetalai mai le Alii ia te aʼu, faimai: Ia e fausia se vaa, e tusa ma le ala o le a ou faaali atu ia te oe, ina ia mafai ona ou ave o ou tagata i tala atu o nei vai” (1 Nifae 17:8; faaopoopo le faamamafa).
Na i ai Nifae ma lona aiga i le vao mo ni tausaga, ma onosaia o soo se ituaiga o puapuaga. Sa ono mafai ona ia lagonaina le fefe i le amataina o se malaga i le sami ma tuuina atu i lona fefe ia sili atu le malosi nai lo lona faatuatua. Ae na te lei faia. Na ia taliaina ma usiusitai i faatonuga a le Atua. Na i ai lona faatuatua o le a faataunuuina Ana folafolaga. E lei tauina atu e le Alii ia Nifae faapea o le a le tulai mai ni afa pe o le le taia e galu le vaa. Ae sa Ia tau atu ia Nifae faapea afai na te mulimuli i Ana taitaiga, o le a mafai ona ia taitaia lona aiga ma le saogalemu i luga o le vasa i le nuu folafolaina.
Sa ou iloaina sa ou malaga foi i se vao mo le tele o tausaga, ae o lenei ua ou i luma o le sami, ua saunia mo se malaga fou: faaipoipoga. Ua valaauina au—ma ou te manatu o le tulaga lava lena mo aiga uma o le Au Paia o Aso e Gata Ai—e fausia se vaa i le mulimuli i faatonuga a le Atua.
O le taimi lava na ma faaipoipo ai ma lou toalua, sa oo mai ai faafitauli. Na ou mai, ma na ma tauivi e faapaleni a ma fegalegaleaiga tautupe ma faatinoina uiga masani lelei uma na ma filifili e mulimuli ai.
Ae o le fautuaga na ou maua i lena po sa tumau pea i lou loto. Na ma taumafai i aso taitasi e aoao ma faapelepele le upu a le Atua i o ma loto, i le mulimuli i faataitaiga lelei a o ma taitai pele—e aofia ai Keriso—ma faaleleia atili a maua lava amioga. Sa ou mauaina se molimau e malosi atu o le tatalo ma tofo moni lava i le alofa o le Tama mo i maua. Sa amata ona sili atu lou talitonuina nai lo le fefe. Na ma iloaina ua avea faigata na ma feagai ma laasaga i le faaleleia atili. I le taimi nei ua foliga mai lo ma aiga e pei o se vaega itiiti o le lagi.
O loo ma i ai pea i le amataga o la ma malaga, ae o le faaipoipo ma amataina se aiga o le filifiliga sili ona lelei ua ou faia. E faatumulia lou loto i le olioli pe a ou mafaufau e uiga i le sauniga o le malumalu na ma mauaina ma iloaina na faamauina e ala i le pule a le Atua. O le tele lava ona ou malamalama i le taua o le aiga i le fuafuaga a le Tama Faalelagi ma le paia o le feagaiga sa ma osia, o le tele foi lea ona ou manao e fesoasoani i isi aiga ia maua foi lea lava sauniga.
Sa ou aoaoina faapea tatou te le manaomia le popole e uiga i le mea o le a tupu, aua “ua le foaiina mai e le Atua ia te i tatou le Agaga e matau ai; ae o le Agaga e faamalosi ai, ma alofa ai, ma mafaufau tonu ai” (2 Timoteo 1:7). E na ona manaomia lava ona tatou usiusitai, mulimuli i faatonuga na tuuina mai i tusitusiga paia ma upu a perofeta o aso nei, ma ole atu i le tatalo mo faatonuga e sili atu ona patino. Afai tatou te faia nei mea, o le a mafai ona tatou sopoia ai le vasa o nei aso e gata ai i le mautinoa faapea e tusa lava po o le a le ituaiga o faalavelave na taia ai i tatou, o le a saogalemu pea e pele ia i tatou.