O Le Toetu o Iesu Keriso ma Upumoni e uiga i le Tino
Na aoaoina i tatou e Iesu Keriso e ala i Lona Toetu, i upumoni taua e uiga i le tino.
Faamatalaga mai le Toma Masalosalo, saunia e Carl Heinrich Bloch
Vaaiga i tua atu © janniwet/iStock/Getty Images
“Ona fetalai ane lea o ia, Ua taunuu: ua faagaugau lona ao, ona tuuina atu lea o lona agaga” (Ioane 19:30). I lena taimi, na tuua ai e le agaga o Iesu Keriso lona tino—o se tino na onosaia mafatiaga ina ia mafai ona Ia Togiola mo agasala a tagata uma ma fesoasoani ia i latou i o latou vaivaiga (tagai i le Alema 7:12–13). O lena tino, ua avea nei o se ipu gaogao, na aveese mai le satauro, na aui i ie, ma na iu lava ina tuuina atu i se tuugamau. I le aso lona tolu, o tamaitai na agai atu i le tuugamau sa i ai iina e faauma sauniuniga mo le tanuina o lena tino.
Ae ua leai se tino.
O le mauaina o le tuugamau avanoa ua na o se amataga. O Maria le Makatala, le au Aposetolo, ma le tele o isi na molimauina mulimuli ane se mea faavavega: o le tino toetu, atoatoa o Iesu Keriso, i se tulaga moni ma le foliga faaletagata.
Na faamautinoaina e le Faaola ua malamalama atoatoa i latou o e na vaaitino ia te Ia ina ua mavae Lona Toetu i le ituaiga tino sa ia te Ia. Sa ia valaaulia le au Aposetolo, mo se faataitaiga, e fetagofi i lona tino ina ia mafai ona faamautinoa atu ia te i latou lava o Ia sa faaletino ae le o se agaga (tagai Luka 24:36–40).1 Sa Ia taumafa faatasi ma i latou (tagai i le Luka 24:42–43).
A o faataunuuina e le au Aposetolo lo latou tiute e talai atu le talalelei a Iesu Keriso, sa latou feagai ma le tetee ma sauaga, o nisi o na mea na oo mai ona o lo latou aoaoina atu faapea ua toetu Iesu Keriso ma o se taunuuga o le a toetutu tagata uma (tagai i le Galuega 4:1–3).
I le taimi nei, o loo totonugalemu pea le Toetu o Iesu Keriso i le savali o loo folafolaina atu i le lalolagi e Lana Ekalesia e pei ona sa i ai muamua. E pei ona saunoa le Perofeta o Iosefa Samita, “O mataupu faavae autu o lo tatou talitonuga o le molimau a le au Aposetolo ma Perofeta, e faatatau ia Iesu Keriso, lea na Ia maliu, ma tanumia, ma toetu mai i le aso tolu, ma afio a’e i le lagi; ma o isi mea uma e faatatau i lo tatou talitonuga ua na o ni faaopoopoga i ai.”2
O le Toetu e fesoasoani e tali ai fesili autu e uiga i le natura o le Atua, lo tatou natura ma la tatou sootaga ma le Atua, le faamoemoega o lenei olaga, ma le faamoemoe o loo ia i tatou ia Iesu Keriso. O ni nai upumoni nei na faamamafaina mai i le Toetu o Iesu Keriso.
O Loo i le Tama Faalelagi se Tino Faamamaluina
O Le Uluai Faaaliga Vaaia, saunia e Gary L. Kapp
O le manatu faapea e i ai se tino tagata o le Atua e mautinoa lava e maua i le Tusi Paia,3 e faapena foi i le mafaufau masani, ae o le tele o manatu faalelotu ma aga faafilosofia faalelotu ua teena ae lagolago se Atua “e leai ni tino, itutino, po o lagona faamamai,”4 talu mai lena taimi, i lenei vaaiga, o le tino (ma le elemene i lona tulaga lautele) e leaga pe le moni, ae o le agaga, mafaufau, po o ni manatu oni mea moni ia o se atua po o le meamoni.
E mamalu ma faigofie ma feteenai, i lea taimi, le faaaliga o le natura o le Atua e ala mai i Lona Alo, o Iesu Keriso.
I le taimi o Lana galuega, na fetalai atu ai le Faaola, “O le ua vaai mai ia te au, ua vaai o ia i le Tama” (Ioane 14:9). O lenei mea na sili atu ona moni ina ua mavae Lona Toetu ma se tino atoatoa, ma ola pea, lea na faailoa mai ai e “ua i le Tama se tino o aano ma ivi e mafai ona pai i ai e pei o le tagata; ua faapea foi le Alo” (MF&F 130:22).
Sa faapea ona faaali mai ai le natura faaletino o le Tama Faalelagi. E pei ona faamalamalama mulimuli ane e Iosefa Samita, “O se mea e aunoa ma se tino po o ni vaega e leai se mea. E leai lava se isi Atua i le lagi ua na o le Atua e i ai aano ma ivi.”5
Na taua faapea e Elder Jeffrey R. Holland o le Korama a Aposetolo e Toasefululua: “Afai e le manaomia le i ai o se tino ma e le manao i ai le Atua, aisea la na togiolaina ai e le Togiola o tagata Lona tino mai le mana o le oti ma le tuugamau, ma ua faamaonia ai o le a le toe tuueseeseina lava Lona tino mai Lona agaga i le olaga nei po o le faavavau? Soo se tasi e teenaina le manatu faapea e i ai se tino o le Atua, ua na teenaina foi le Keriso faitino ma toetu.“6
O le Tama Faalelagi e i ai Mana-Silisiliese, Malamalama-Atoatoa, ma le Agalelei-Uma
O uiga auaumama silisili o le Tama Faalelagi ua faaalia foi i le mea moni lava o le Toetu o Iesu Keriso. E pei ona saunoa mai Elder D. Todd Christofferson o le Korama a Aposetolo e Toasefululua, “Ona o le moni o le Toetu o Keriso, o masalosaloga la e uiga i le mana silisiliese, malamalama atoatoa, ma le agalelei o le Atua le Tama—o le sa tuuina mai Lona Alo e Toatasi na Fanaua mo le togiolaina o le lalolagi—ua le moni ia”7
Ua faamaonia le mana, malamalama, ma le agalelei o le Atua i le Toetu o Iesu Keriso, lea e tuu maia le faamaoniga o le poto ma le alofa i le fuafuaga a le Tama Faalelagi ma Lona (ma Lona Alo) tomai e fai ai.
O i Tatou o Fanau a le Atua.
E pei ona aoao mai e le Tusi Paia ia i tatou, na faia i tatou “i le faatusa o le Atua … tane ma le fafine” (Kenese 1:27). O le Toetu o Iesu Keriso na toe faamalosia ai lenei upumoni. O le mea moni, i le itula tonu lava o Lona Toetu, na faamamafaina ai e Iesu Keriso la tatou sootaga ma le Tama Faalelagi, ma faapea atu, “Ou te alu ae i lou Tama, ma lo outou Tama; o loʼu Atua, ma lo outou Atua ”(Ioane 20:17; faaopoopo le faamamafa).
Na faaali mai e le Faaola faapea o le Atua ma le tagata e le matuai eseese lava le tasi ma le isi i o laua tulaga autu. O le tulaga autu o o tatou tino e tutusa lava ma o tatou agaga,8 ma o o tatou agaga na foafoaina i le faatusa o le Atua aua o le natura lena o le mafutaga faalematua-tamaitiiti.
O se Tino o se Meaalofa o le Malosi ma le Mamalu
Ata na saunia e David Stoker
E ala mai i Lona Toetu, na faaalia ai e le Faaola ia i tatou faapea o se ola faaletino, ua faaofuina i le tino o se vaega taua lea o le tagata e faavavau o le Atua ma Ana fanau. E pei ona faaalia e le Alii ia Iosefa Samita, “O elemene ua faavavau, ma o le agaga ma le elemene, ua soofaatasi e lē matuuʼeseeseina, e mauaina se atoatoaga o le olioli” (MF&F 93:33). O lenei sootaga e le mavavaeeseina e fusia faatasi elemene faaleagaga ma faaletino ina ia tasi le tino ola pea, e le pala, faamamaluina ma atoatoa—pau lea o le ituaiga tino e mafai ona mauaina le atoatoaga o le olioli lea o loo i ai i le Atua.
I se eseesega, ina ua mavae le mauaina o se tino faaletino ma ua tuueseina lea mai ai e ulu atu i le lalolagi o agaga, “sa [vaai] e ua maliliu i le … umi o le tuuesea o o latou agaga mai i o latou tino, o se pologa.” (MF&F 138:50; tagai foi MF&F 45:17).
E oo lava i o tatou tino faaletino o se vaega taua o le fuafuaga a le Tama Faalelagi ma o ni meaalofa paia. Pe a o mai o tatou agaga o le muai olaga i lenei lalolagi, e “faaopoopoina i luga” o i latou (Aperaamo 3:26) ma se tino. E pei ona aoao mai le Perofeta o Iosefa Samita: “Ua tatou o mai i lenei lalolagi ina ia tatou maua ni tino ma tuuina atu ma le mama i luma o le Atua i le malo selesitila. O le mataupu faavae sili o le fiafia e aofia ai le i ai o se tino. O le tiapolo e leai se tino, o lona faasalaga lena.”9
E pei ona aoao mai Elder David A. Bednar o le Korama a Aposetolo e Toasefululua: “O o tatou tino faitino ua mafai ai ona tatou maua se poto masani lautele, loloto, ma le maoae lea e le mafai ona maua i lo tatou i ai i le muai olaga. O le mea lea, o a tatou sootaga ma isi tagata, o lo tatou malosi e iloa ai ma faatino e tusa ai ma le upumoni, ma lo tatou tomai e usitai ai i mataupu faavae ma sauniga o le talalelei a Iesu Keriso e faateleina e ala i o tatou tino faaletino. E pei ona tatou aoaoina i le olaga faitino, tatou te iloaina le agamalu, alofa, agalelei, faanoanoa, le fiafia, tiga e oo lava i luitau o tapulaa faaletino o ni auala ia e saunia ai i tatou mo le faavavau. I se faaupuga faigofie, e i ai lesona e ao ona tatou aoaoina ma aafiaga e tatau ona tatou mauaina, e pei ona faamatala mai i tusitusiga paia, e ‘ tusa ma la le tino’ (1 Nifae 19:6; Alema 7:12–13).”10
E faaopoopo atu i mea na aoao mai e le Perofeta o Iosefa Samita, “O tagata uma e fai tino e i ai le mana ia i latou o e leai ni tino.”11 E mafai ona faaosoosoina e Satani i tatou, ae e le mafai ona ia faamalosia i tatou. “E le mafai e Satani ona maileia i tatou i ana faatosinaga sei vagana ua tatou ioe i o tatou lava loto ma gauai atu i ai.”12
Mulimuli ane, o le meaalofa o se tino atoatoa, ma toetu e fesoasoani ia aveesea ai i tatou mai le mana o Satani e faavavau. Ana faapea e leai se Toetu, “o le a pulea o tatou agaga … e le tiapolo, e le toetutu mai. Ma po ua avea o tatou agaga e pei o ia, ma avea i tatou ma ni tiapolo, o agelu a le tiapolo, ua tapunia i fafo mai luma o lo tatou Atua, ma mau faatasi ma le tamā o pepelo, i le pagatia, e pei o ia lava” (2 Nifae 9:8–9).
O le Agaga ma le Tino e Le Oni Fili
E ui e eseese i laua, e le auai le agaga ma le tino i ni mea moni taua eseese ma faafeagai e lua. E pei ona aoaoina e Iosefa Samita, “E leai se mea e faapea e le tino. O le agaga atoa o se mea e tino, ae ua sili atu ona lelei pe mamā, ma e na o mata e sili ona mamā e mafai ona vaai i ai” (MF&F 131:7–8).
Faamatalaga mai O Keriso ua Faaali Atu i le Itulagi i Sisifo, saunia e Arnold Friberg
I lona tulaga faamamaluina, ma toetu ua tuuina mai ai e Iesu Keriso le atoatoa o le tuufaatasiga o le agaga ma le tino, ma faapupula mai ai mo i tatou “o le agaga ma le tino, o le tagata lea” (MF&F 88:15). I lenei olaga tatou te taumafai ia “mafaufau-faaleagaga” nai lo “le mafaufau faaletino” (2 Nifae 9:39), ia “[tuu] ese le tagata natura” (Mosaea 3:19), ma ia “pulea [o tatou] tuinanau uma” (Alema 38:12). Ae e le faapea ai la, o le agaga ma le tino o ni fili. E pei ona faaali mai e Iesu Keriso, o le tino e le tatau ona inosia ma faamaualugaina ae ia pulea lelei ma suia.
O le Ola i se Tino Faitino e i ai se Faamoemoega Aoga
O le manatu faapea o lenei olaga o se suega e sili atu ona sao pe a tatou mafaufau i mea ua tatou iloa e uiga i o tatou olaga i le muai olaga ma le mavae ai o le oti. Sa tatou nonofo o ni agaga ae lei o mai i le lalolagi, ma e finagalo le Tama Faalelagi mo i tatou ina ia avea faapei o Ia ma ola faavavau ai ma ni tino faitino faavavau. O nei upumoni e faapea o lo tatou taimi o le tofotofoga i nei tino faaletino e le faafuaseia ae e i ai se uiga ma se faamoemoega moni.
E pei ona faamatalaina e Elder Christofferson: “E ala i a tatou filifiliga tatou te faaali atu ai i le Atua (ma i tatou lava) la tatou tautinoga ma le mana e ola ai i Lana tulafono faaselesitila a o tatou i ai i fafo mai o Lona afioaga, ma i se tino faaletino ma ona mana uma, manaoga, ma naunauga. Pe mafai ea ona tatou faafoeina le tino faaletino ina ia avea o se meafaigaluega ae le o se pule o o tatou agaga? Pe mafai ea ona faatuatuaina i tatou i le olaga nei ma le faavavau i mana faaleatua, e aofia ai le mana e foafoa ai le ola? Pe o le a tatou taitoatasi ma faatoilaloina le leaga? O i latou sa faia o le a “faaopoopoina i luga o o latou ulu le mamalu e faavavau ma faavavau’ [Aperaamo 3:26]—o se itu taua o lena mamalu o le tino toetu, tino ola pea, ma le mamalu.”13
O o tatou aafiaga i o tatou tino o i ai nei, e aofia ai a tatou fegalegaleaiga ma le tasi ma le isi, e taua aua o se faatusa o mea o le a oo mai. E pei ona aoaoina e Iosefa Samita, “Ma o lea lava mafutaga ua i ai ia te i tatou iinei o le a i ai ia te i tatou iina, ae o le a nao na faatasia ma le mamalu e faavavau, o se mamalu e lē o ia i tatou i le taimi nei” (MF&F 130:2).
Tatou te Maua le Faamoemoe ia Iesu Keriso.
O Maria e Toatolu i le Tuugamau, na saunia e William-Adolphe Bouguereau, Superstock.com
Talu mai lava le vaaiga o le tuugamau avanoa, ua aumaia e le Toetu o Iesu Keriso le faamoemoe ona ua tatou iloaina i Lona Toetu lo tatou lava faamoemoe, lea “o a [tatou] mea uma na maumau o le a toe mauaina e [i tatou] … , pe a [tatou] faaauau i le faatuatua.”14
O uluai Aposetolo a le Faaola na mafai ona tuuina atu se molimau lototoa o Lona Toetu ona sa latou vaai ma pai i Lona tino. Ae sa i ai se mea e sili atu ai nai lo o lena. E pei lava ona faamalolo e Iesu Keriso ni le atoatoa faaletino ina ia mafai ona Ia faaalia le mana e faamagalo ai agasala (tagai i le Luka 5:23–25), Lona Toetu—le faamaoniga moni o Lona mana e faatoilalo ai le oti faaletino—na avea ma faamautinoaga mo ona soo o Lona mana ina ia faatoilaloina le oti faaleagaga. O folafolaga na Ia tuuina mai i Ana aoaoga —o le faamagaloga o agasala, o le filemu i lenei olaga, o le ola e faavavau i le malo o le Tama—na avea ma aafiaga moni ma lo latou faatuatua e le maluelue.
“Afai foi ua le toe faatuina Keriso, ua faaleaoga [lo outou] faatuatua” (1 Korinito 15:17). Ae ona sa Ia toetu mai le oti, e mafai ona tatou “faamoemoe, e ala i le togiola a Keriso ma le mana o lona toetu, ia faatutu mai outou i le ola faavavau, ma o le pogai ona o lo outou faatuatua ia te ia e tusa ma le folafolaga” (Moronae 7:41).
I le taimi o Lona soifuaga faaletino, na valaaulia ai e Iesu Keriso tagata e mulimuli ia te Ia. Ina ua mavae Lona maliu ma le Toetu, na sili atu ona manino mai le taunuuga. Afai o i tatou, e ala i le usiusitai i tulafono ma sauniga o le talalelei, ona atiina ae se “agaga selesitila” i totonu o i tatou, e mafai ona tatou “maua le tino lava lea e tasi sa avea o se tino natura” ma “faaolaina e se vaega o le mamalu selesitila [ma] outou maua i lena taimi lea lava mamalu e tasi, o se atoatoaga lava.” (MF&F 88: 28–29). Ua Ia faaalia mai le ala. O Ia o le Ala. E ala mai i Lona mana—e ala i Lana Togiola ma le Toetu—e mafai ona maua lenei atoatoaga selesitila, lea e aofia ai se atoatoaga o le olioli i se tino toetu.