Mga Young Adult
“Duol ngadto kang Kristo”—Unsaon Gayod Nato Kana sa Pagbuhat?
Kanunay kitang giawhag sa pagtinguha kang Kristo ug sa pagdapit sa Iyang gahom nganhi sa atong kinabuhi, apan wala ako masayod kanunay kon unsaon sa pagdawat sa hingpit niana nga imbitasyon.
Look to God and Live [Hangad ngadto sa Dios ug Magpakabuhi], ni Dan Wilson, sa maayong kabubut-on sa Havenlight
Lisod karon nga panahon sa yuta. Samtang dunay daghang maayo sa palibot nato, usahay makaplagan nako ang akong kaugalingon nga nahimong mahadlokon ug gikapoy. Ang pag-atubang sa kabangis sa kalibotan ug sa mga katalagman nga ingon og anaa sa matag dapit, sa tinuod lang, makapaluya.
Maayo gani, napanalanginan kita nga masayod nga ang Manluluwas mahimong usa ka tinubdan sa kahupayan atol sa malisod kaayo nga mga panahon. Tingali mao kini ang usa ka rason nga ang mga kasulatan nagbalik-balik sa pagdapit kanato nga “moduol [ngadto kang Kristo]” (3 Nephi 9:14), “[magpa]duol [ngadto Kaniya]” (Doktrina ug mga Pakigsaad 88:63), ug “[mo]sunod [Kaniya]” (Lucas 18:22). Kanunay usab kitang makadawat niini nga mga imbitasyon atol sa kinatibuk-ang komperensiya ug sa simbahan.
Samtang kanunay kong naningkamot sa pagdawat niini nga mga imbitasyon, usahay naghunahuna ko kon unsa gayod ang buot ipasabot sa pagduol ngadto kang Kristo. Unsaon nako pagdapit ug paggamit sa Iyang matubsanon, makaayo, ug makaabag nga gahom? Tinuoray ba kong nakakonektar gayod Kaniya? Duna bay sekreto nga pormula? Apan samtang namalandong ko sa pipila sa akong nangagi nga mga kasinatian, nakat-onan nako nga adunay sundanan nga makatabang kanako—ug sa matag usa kanato—nga moduol ngadto kang Kristo.
Pilia nga Motuo Kaniya
“Nagtuo akong Kristo; Sandigan.”
Kini ang akong paborito nga linya gikan sa akong paborito nga himno, “Nagtuo Ako Kang Kristo” (Mga Himno, nu. 78). Makahilak ko sa matag higayon nga madungog nako kini! Gisulat gani nako ang mga pulong diha sa usa ka sticky note sa akong lamesa aron makita nako kini kada adlaw.
Gisulat nako kini nga mga pulong sa awit atol sa usa ka lisod kaayo nga panahon sa akong kinabuhi sa dihang nag-atubang ko og daghang mga hagit, tungod kay mipahinumdom kini kanako sa duha ka butang nga: (1) ang Manluluwas tinuod, ug (2) tungod Kaniya, wala koy angayng kahadlokan. Ganahan kaayo ko sa gahom niining yano nga mga kamatuoran. Ug sa ilang kayano, akong nakita nga ang pagduol ngadto kang Kristo mahimong yano usab.
Si Presidente Russell M. Nelson mitudlo:
“Pilia nga motuo kang Jesukristo. …
“Ang hugot nga pagtuo diha kang Jesukristo mao ang kinadak-ang gahom nga atong magamit niini nga kinabuhi.”1
Kining gamhanan nga mensahe nagpahinumdom kanako nga kasagaran atong gihimong komplikado kaayo kining sukaranan nga baroganan sa ebanghelyo. Madagma kita ug makahimo og mga sayop samtang maningkamot kita nga makahibalo kon unsaon sa pagtinguha Kaniya kon ang hugot nga pagtuo mosangpot gayod ngadto sa usa ka pagpili: ang pagpili nga motuo Kaniya.
Kon maghunahuna ko bahin sa pagduol ngadto sa Manluluwas, kanunay kong mamalandong sa babaye nga walay undang ang pagdugo (tan-awa sa Marcos 5:25–34). Literal siyang miduol Kaniya uban sa hugot nga pagtuo, nagtuo sa tibuok niyang kasingkasing nga Siya makaayo kaniya kon siya makahikap lang sa Iyang mga sinina. Ug tinuod gayod, sa dihang siya mihikap Kaniya, nakasinati siya dihadiha dayon sa milagro sa pagkaayo.
Siyempre, dili tanan sa atong mga problema ang dihadiha dayon nga mawala kon kita modangop ngadto sa Manluluwas. Apan sama sa nasinati niini nga babaye, ang pagbaton ug hugot nga pagtuo nga Siya tinuod, nga Siya andam nga misakripisyo sa Iyang kinabuhi alang kanato, ug nga Siya andam nga mosuporta kanato makapadasig kanato nga moduol ngadto Kaniya ug magsugod nga mobati sa Iyang makaabag nga gahom diha sa atong kinabuhi.
Padayon sa Pagtinguha Kaniya
Apan dili kini usa ka pagpili nga himoon lang nato kausa—kita kinahanglan nga magpadayon sa pagtinguha Kaniya aron kita makagamit sa Iyang grasya ug makaabag nga gahom sa tibuok natong kinabuhi. Si Presidente Russell M. Nelson mitudlo sa importansiya sa pagkamakanunayon niini nga mga paningkamot: “Walay lain nga makabukas sa kalangitan sama sa kombinasyon sa nagtubo nga kaputli, hingpit nga kamasulundon, sinserong [pagpangita], inadlaw nga pagbasa sa mga pulong ni Kristo diha sa Basahon ni Mormon, ug regular nga panahon nga ipasalig alang sa buhat sa templo ug family history.”2
Makapadayon usab kita sa pagtinguha Kaniya pinaagi sa pagdapit sa Espiritu sa atong kinabuhi. Pinaagi sa gasa sa Espiritu Santo, mahimong dunay sakop sa Dios nga Kapangulohan nga mouban kanato ug mas hingpit nga mokonektar kanato ngadto sa Langitnong Amahan ug sa Manluluwas. Unsa kana kanindot? Sama sa gitudlo ni Presidente Nelson, “Ang labing importante nga kamatuoran nga saksihan sa Espiritu Santo kaninyo mao nga si Jesus mao ang Kristo, ang Anak sa buhing Dios.”3
Ang mga makabalda sa kalibotan mohimong sayon sa pagkalimot sa kamahinungdanon sa ginagmay nga mga aksiyon nga makapaduol kanato ngadto sa Manluluwas. Apan nakabantay ko og dakong kalainan sa akong kinabuhi tali kon ako “[n]aggahin og panahon alang sa Ginoo”4 kada adlaw ug kon ako wala.
Bisan unsa pa man nga mga kasamok ang tingali akong atubangon, kon ako makanunayong mag-ampo, mosunod sa mga pag-aghat, mogahin og panahon sa pagbasa sa mga kasulatan, motabang sa akong mga katigulangan nga mohimo og mga pakigsaad diha sa templo, ug maghinulsol sa akong mga sala, ako sa kinatibuk-an mobati og kalipay, kaisog, pagsalig, ug sa kataposan, kahilwasan sa akong kinabuhi. Mabati usab nako ang Espiritu, nga motabang kanako nga mobati nga konektado kang Kristo.
Ilha ang Iyang Gahom
Bag-ohay lang nakong gisiksik ang usa ka journal nga naa nako sa pipila na ka tuig aron sa pagpamalandong sa mga panahon nga ako misalig sa Manluluwas. Nabasa nako ang mahitungod sa kawalay paglaom nga akong nabati samtang nasaksihan nako ang pagkaadik diha sa pamilya, nasinati ang kawalay trabaho, nagsugakod sa mga panahon sa kawalay kasegurohan ug pag-inusara, ug nanglimbasog sa akong pisikal ug mental nga kahimsog. Nabasa nako ang mahitungod sa pipila sa kinalisoran nga mga higayon sa akong kinabuhi, sa dihang mibati ako og kawalay paglaom tungod sa mga hagit nga akong nasinati.
Apan samtang namalandong ako niini nga mga kasinatian, nakahilak ko samtang gipakita sa Espiritu kanako kon sa unsang paagi si Kristo mihupay ug migiya kanako latas sa akong mga hagit—ug nagpadayon pa gihapon! Bisan pa man sa mga pagsulay sa akong kinabuhi, nakakaplag ko og daghang kalipay. Nasinati nako ang makaayo nga tambal sa kapasayloan, nakasaksi og mga milagro, ug nakakat-on kon unsaon nga magpabilin nga adunay paglaom kada adlaw—ug ako nasayod nga kining tanan tungod sa akong Manluluwas, si Jesukristo. Siya sa tinud-anay motabang kanato sa pagbuntog sa imposible.
Usahay tingali maghulat kita og dako kaayo nga ebidensiya sa Manluluwas sa atong kinabuhi. Apan samtang mohimo kita og ginagmay nga mga paningkamot nga molihok uban sa dili hingpit nga pagtuo, mohimo og usa ka lakang sa matag higayon diha sa Iyang direksiyon, mahimong makita nato nga Siya nagpanalangin kanato og kalipay, kalig-on, ug sustento—nga Siya kanunayng nag-uban kanato. Ug samtang atong ilhon ang Iyang gahom dinhi sa atong kinabuhi, atong makita nga kita sa pagkatinuod nagpaduol ngadto kang Kristo.
Si Elder Michael John U. Teh sa Seventy mitudlo, “Ang nagtubo nga pagsabot nga ang Pag-ula ni Jesukristo nga magamit nato sa personal ug indibidwal nga paagi makatabang nato nga makaila Kaniya.”5 Ug tinuod kini! Ang pagpamalandong sa ebidensiya sa makaayo ug makaabag nga gahom ug hingpit nga gugma sa Manluluwas sa akong kinabuhi nakatabang kanako sa pagpalawom sa akong pasalamat alang sa ug sa debosyon nga mamahimong mas sama Kaniya.
Litrato pinaagi ni Catherine Frost
Dawata ang Imbitasyon
Ang imbitasyon nga “[mo]duol ngadto kang Kristo” tinuod gayod nga yano sama nga kini madungog. Alang kanako, magsugod kini sa pagpili nga motuo Kaniya ug sa Iyang Pag-ula, magpadayon sa pagtinguha Kaniya sa ginagmay nga mga paagi aron magpabilin ang Iyang Espiritu kanako, ug mangita og ebidensiya sa Iyang gahom sa akong kinabuhi.
Dapiton ko kamo—ilabi na atol niining panahon sa Pasko—sa pagdiskobre kon sa unsang paagi ang pagduol ngadto kang Kristo personal nga makatabang kaninyo. Samtang mainampoon kamong mamalandong, ang Espiritu “mopakita nganha kaninyo sa tanan nga mga butang nga kinahanglan inyong buhaton” (2 Nephi 32:5).
Ang Manluluwas kanunay gayod nga mapailobon nga naghulat kanato nga mosunod Kaniya. Ug kon atong buhaton, Siya motabang kanato nga mamahimong labaw pa kay sa kon unsa kita karon.
Oo, ang kalibotan nagkaanam og kasamok, ug ang umaabot mahimong makahadlok ug walay kasegurohan. Apan si Presidente Nelson mipahinumdom usab kanato sa unsay segurado: “Kon ang inyong espirituwal nga pundasyon natukod nga lig-on diha ni Jesukristo kamo dili kinahanglan nga mahadlok.”6
Ug tinud-anay akong nagtuo niana sa tibuok nakong kasingkasing.