Digital Lamang
Hugot nga Pagtuo diha ni Jesukristo—Bag-ong mga Mensahe gikan sa mga Propeta ug Apostoles
Tan-awa kon unsa ang bag-ohay lang nga gitudlo sa mga buhing propeta diha sa social media mahitungod sa hugot nga pagtuo kang Jesukristo.
One by One [Tagsa-tagsa], ni Walter Rane
“Ang hugot nga pagtuo kang Jesukristo mao ang pundasyon sa tanan nga tinuohan ug agianan sa balaang gahom,” nagtudlo si Presidente Russell M. Nelson.1 Siya mipadayon sa pag-ingon:
“Ang tanan nga maayo sa kinabuhi—ang matag potensyal nga panalangin nga may mahangtorong kahulogan—magsugod sa hugot nga pagtuo. Ang pagtugot nga ang Dios mopatigbabaw sa atong kinabuhi magsugod sa hugot nga pagtuo nga Siya andam nga mogiya kanato. Ang tinuod nga paghinulsol magsugod sa hugot nga pagtuo nga si Jesukristo adunay gahom sa paglimpyo, pag-ayo, ug paglig-on kanato.
“‘Kamo dili molimod sa gahom sa Dios,’ si propeta Moroni mipahayag, ‘kay siya nagbuhat pinaagi sa gahom, sumala sa hugot nga pagtuo sa mga katawhan’ [Moroni 10:7]. Ang atong hugot nga pagtuo mao ang moabli sa gahom sa Dios diha sa atong kinabuhi.”2
Unsaon nato sa pagpausbaw sa atong hugot nga pagtuo diha sa Langitnong Amahan ug ni Jesukristo, ug unsa ang mga panalangin ang moabot sa atong kinabuhi kon kita mobuhat sa ingon? Kining bag-ong mga pagtulon-an gikan sa mga propeta ug apostoles nakahatag og pipila ka mga panabot.
Tinuod nga Kalinaw Nga Molabaw pa sa Tanang Salabotan
“Sa milabay nga tuig, kitang tanan nagsagubang sa makapaukyab ug wala damha nga mga panghitabo.
“Taliwala sa samang ka walay kasiguroan, adunay usa lamang ka paagi nga mobati og kalinaw—ang tinuod nga kalinaw nga labaw pa sa tanang salabotan. Kana nga kalinaw makaplagan diha sa hugot nga pagtuo ngadto ni Ginoong Jesukristo.”
Presidente Russell M. Nelson, Facebook, Mar. 28, 2021, facebook.com/russell.m.nelson.
Ang Yawe sa Pagdawat og mga Pagpadayag
“Atong mabasa diha sa Basahon ni Mormon nga ang karaan nga propeta nga si Nephi nagtudlo kanato nga ang hugot nga pagtuo diha kang Jesukristo mao ang yawe sa pagdawat og mga pagpadayag sa kamatuoran ug mao ang yawe nga makabaton og pagsalig nga kita nagsunod sa direksyon sa Manluluwas.
“Ang pagdungog niana nga tingog magagikan sa atong hugot nga pagtuo diha Kaniya. Uban sa igong hugot nga pagtuo, mangayo kita og direksyon sa tuyo nga moadto ug mobuhat bisan unsa ang Iyang isugo. Kita makaugmad og hugot nga pagtuo aron masayod nga bisan unsa ang Iyang isugo mopanalangin sa uban, ug kita mamahimong putli sa maong proseso tungod sa Iyang gugma alang kanato.”
Presidente Henry B. Eyring, Facebook, Nob. 17, 2021, facebook.com/henry.b.eyring.
Ang inyong Relasyon ngadto sa Langitnong Amahan ug ni Jesukristo
“Ako kanunayng mosulti sa mga young adult nga sila bililhon. Gibalik-balik ko kining mensahe sa kanunay tungod kay ako nasayod nga kini tinuod. Ako mopasalig kaninyo nga kamo hilabihan gayod ka bililhon ngadto sa inyong Langitnong Amahan ug ngadto ni Ginoong Jesukristo.
“Ako nakaamgo nga adunay daghang pagpamugos sa kalibotan karon. Adunay daghang tingog sa kalibotan karon agi sa social media.
“Apan gusto nakong inyong masayran nga ang labing importanteng tingog, ang labing importanteng butang nga kinahanglan nga mahitabo sa inyong kinabuhi, mao ang pagkaplag og pipila ka hilom nga panahon diin kamo maghilom lang ug tinuod-anay nga masayod nga ang atong Langitnong Amahan nagmahal kaninyo, nga kamo ang Iyang anak nga lalaki o Iyang anak nga babaye, ug nga ang Ginoong Jesukristo mao ang inyong Manluluwas ug Manunubos.”
Presidente M. Russell Ballard, Facebook, Ene. 8, 2021, facebook.com/mrussell.ballard.
Ang Kinabuhi sa Manluluwas
“Ang Pagtuon sa kinabuhi sa atong Manluluwas mas makapaduol kanato ngadto Kaniya. … Dapiton ko kamo sa paggahin og panahon aron makaila sa Prinsipe sa Kalinaw—sa Iyang pagkatawo, kinabuhi, mensahe, ug pagkabanhaw. Kon magkadako ang atong makat-onan kabahin Niya ug mosunod sa Iyang ehemplo, mas malinawon ang atong pagbati diha sa mga panahon sa kasamok.”
Elder Jeffrey R. Holland, Facebook, Dis. 20, 2021, facebook.com/jeffreyr.holland.
Dugang Kalipay, Kamaya, ug Kalinaw
“Kita namalandong ug nagmaya sa tanang nabuhat sa Manluluwas alang kanato. Siya mihatag sa iyang kinabuhi isip usa ka puli nga Pag-ula, sa pagbuntog sa kamatayon ug paghatag og katubsanan alang sa tanang katawhan. Ako mosaad nga ang pagsunod sa Iyang kahayag ug ehemplo magdala kanato og dugang nga kalipay, kamaya, ug kalinaw niining kinabuhi kay sa bisan unsang butang.”
Elder Quentin L. Cook, Facebook, Abr. 17, 2022, facebook.com/quentin.lcook.
Ang Ehemplo sa Manluluwas
“Unsa ang atong makat-onan gikan sa kinabuhi sa Manluluwas nga makapalig-on sa atong hugot nga pagtuo?
“Gipakita ni Jesus kanato pinaagi sa Iyang pagkatawo nga ang bili sa usa ka kalag wala magdepende sa iyang mga sirkumstansiya o mga palibot. Siya, ang halangdon nga Tiglalang sa yuta, natawo diha sa kakabos, diha sa usa ka pasongan taliwala sa mga hayop, tungod kay walay luna alang Kaniya ug ni Jose ug ni Maria diha sa balay abotanan. Kita makabaton og hugot nga pagtuo diha Kaniya, nasayod nga kon si kinsa man kita ug bisan unsa pa ang atong mga kahimtang, Siya motan-aw diha sa atong kasingkasing, ug matag usa kanato adunay dakong bili diha Kaniya.
“Si Jesus mipakita kanato nga pinaagi sa Iyang kinabuhi ang matag kalag mahimong molambo ug mouswag. Ang gugma sa Amahan ug sa Anak mao ang pundasyon alang sa atong hingpit nga kalipay dinhi ug sa umaabot, apan ang atong Langitnong Amahan naglaom kanato nga magtukod diha niana nga pundasyon ug molambo sama ni Jesus. Kita mahimo usab nga molambo sa hinay-hinay uban sa Iyang tabang.
“Si Jesus mipakita kanato pinaagi sa Iyang pag-antos ug kamatayon nga ang gugma nangahulogan nga serbisyo ug sakripisyo. Samtang kita moserbisyo ug mangalagad sama sa Iyang gibuhat, kita makabaton og hingpit nga pagtuo diha sa Manluluwas. Siya mihalad sa Iyang kinabuhi alang kanato, ug karon Siya adunay tanang gahom sa pagpanalipod ug pagpanalangin kanato sama sa Iyang mga higala.
“Ako mohatag kaninyo sa akong sigurado nga pagsaksi nga ang Pagkabanhaw ni Jesukristo tinuod. Kamo mahimong mabuhi nga adunay hingpit nga paglaom diha ni Kristo alang sa tabang nga inyong gikinahanglan karon ug sa kinabuhing dayon nga moabot.”
Elder D. Todd Christofferson, Facebook, Mar. 16, 2021, facebook.com/dtodd.christofferson.
Unsa Ang Hugot nga Pagtuo
“Atol sa usa ka debosyonal alang sa mga French nga mga young adult, si Kathy ug ako mipaambit sa among mga hunahuna ug mga pagbati kabahin sa baroganan sa pagtuo. Si Apostol Pablo miingon, ‘Ang kahulogan sa pagtuo mao nga may kasigurohan kita sa mga butang nga atong gilaoman nga dili makita’ [Mga Hebreohanon 11:1]. Butang. Ebidensiya. Mao kini ang hugot nga pagtuo. Mao kini ang tinuohan. Tinuod kini. Kabahin kini sa atong kahiladman.
“Akong giawhag kining mga young adults sa pagtuo niining unom ka importanteng mga butang:
“1. Motuo sa Dios.
“2. Motuo nga ikaw ang anak nga babaye o anak nga lalaki sa Dios ug nga Siya personal nga nakaila kanimo ug hingpit nga naghigugma kanimo.
“3. Motuo nga ikaw makaistorya ngadto sa imong Langitnong Amahan ug Siya mopadala sa Iyang Espiritu diha kanimo.
“4. Motuo nga ang gingharian sa Dios nagkatap sa tibuok kalibotan ug nga matag usa kanato mao ang importanteng bahin sa pag-andam alang sa Ikaduha nga Pag-anhi sa Manluluwas.
“5. Motuo nga ang uban kinsa imong kaila mohangop sa ebanghelyo ni Jesukristo.
“6. Motuo nga si Jesukristo mao ang Manluluwas sa kalibotan.
“Isip inyong higala ug isig ka disipulo, nga walay laing kadasig gawas sa akong gugma ug pagtahod alang kaninyo, ako mopasalig kaninyo nga ang inyong hugot nga pagtuo diha ni Jesukristo dili makawang. Kamo makakita Kaniya pag-usab. Ang tanan sa kalibotan masayod nga Siya mao ang Anak sa Dios. Ako nakaila na Kaniya ug mibati sa Iyang presensiya. Ako mosaksi nga may kasigurohan nga Siya buhi, nga Siya nabanhaw, ug ang Iyang gugma alang kanato molabaw pa sa mahulagway.”
Elder Neil L. Andersen, Peb. 21, 2021, facebook.com/neill.andersen.
Laing Gahom
“Sa atong paghimo og usa ka determinado nga paningkamot, ang atong hugot nga pagtuo diha ni Jesukristo molambo. Ug kon kini molambo, kita makadawat sa langitnong mga gasa, gahom, ug abilidad sa pagbuhat sa unsay dili nato mahimo kon wala kini. Sa atong pagpalig-on sa atong hugot nga pagtuo, sa kalit lang adunay lain nga gahom: ang gahom ni Kristo ug sa Iyang Pag-ula. Magsugod kamo sa pagbati sa Iyang pagtugot, sa Iyang gugma, ug sa Iyang grasya.”
Elder Neil L. Andersen, Peb. 13, 2022, facebook.com/neill.andersen.
Koneksiyon ngadto sa Dios
“Ang koneksiyon maghatag og kahulogan sa kinabuhi.
“Ang koneksiyon ngadto sa Dios, pamilya, ug sa usag usa (mao ang akong gitawag og pakigsaad sa pagkasakop) maghatag og labing talagsaon, labing malumo, kinaladman nga kahulogan sa atong kinabuhi.”
Elder Gerrit W. Gong, Facebook, Mar. 3, 2022, facebook.com/gerritw.gong.