Mga Baroganan sa Pagpangalagad

Kita Makakaplag og Inadlaw-adlaw nga mga Pamaagi sa Paghigugma, Pagpaambit, ug Pagdapit

Ang pagpangalagad mahimong kabahin sa kon kinsa kita, dili kay usa lang ka dugang butang nga buhaton.

Si Carl (mga ngalan giusab) bag-o lang gitahasan sa pagpangalagad ngadto ni Gus. Naningkamot sa pagpangita og pipila ka butang nga komon, nasayran ni Carl nga parehas og interest ni Gus diha sa pagsulat. Busa si Carl midapit kaniya sa pagpakigkita ngadto sa usa ka lokal nga pundok sa manunulat. Sa kataposan, walay usa nila nga adunay panahon alang sa grupo, apan ang imbitasyon misangpot ngadto sa usa ka talagsaong panag-istoryahanay, nga misangpot ngadto sa dungan nga pagpaniudto sa matag pipila ka semana—nga nakatabang sa pagporma og panaghigalaay nga kasandigan ni Gus sa dihang sa kaulahian nagkinahanglan siya og tabang.

Kon mangalagad, si Carl ug ang iyang asawa, si Julie, mangita og balanse tali sa pormal ug dili pormal nga pagpangalagad. Adunay mga higayon nga sila mainampoon nga magplano og butang nga gituyo aron sa pagsuporta sa paglambo sa uban subay sa dalan sa pakigsaad. Apan sila usab naningkamot sa paghimo sa pagpangalagad nga usa ka normal ug natural nga bahin sa ilang inadlaw-adlaw nga kinabuhi.

Sa dihang gidawat ni Julie ang usa ka tahas sa paggahin og usa ka buntag sa pagserbisyo diha sa planta sa pagproseso og pagkaon nga gipadagan sa Simbahan, mihukom siya sa pagdapit ni Shawna sa pagkuyog kaniya. Si Shawna nakaadto lang sa simbahan og pipila ka higayon sa mga tuig sukad nga siya mibalhin ngadto sa kasilinganan. Si Julie ug Shawna adunay talagsaong panahon nga mag-uban sa pagserbisyo sa planta. Wala magdugay human niana, si Julie ug Carl nagplano og usa ka dula sa gabii alang sa gabii sa panimalay [home evening]. Mihukom sila sa pagdapit sa pamilya ni Shawna sa pag-apil kanila. Tungod kay si Julie naghunahuna sa pagpaapil ni Shawna niining mga kalihokan nga iya nang giplano daan, ang duha nakapalambo og mas lawom nga relasyon. Sa kadugayan, sa dihang si Shawna nagsagubang og mga hagit, nagpakitabang siya sa bana ni Julie, si Carl, alang sa usa ka panalangin sa pagkapari.

Ang makahuloganong pagpangalagad mahitabo kon kita mangita og yano nga mga paagi sa pagpakita sa atong gugma, mopaambit sa atong hugot nga pagtuo ni Jesukristo, ug modapit sa uban sa pagduol ngadto Kaniya ug moapil kanato—bisan diha sa mga butang nga atong buhaton sa bisan unsang paagi.

Gilitratohan ni Monica Georgina Alvarado Zarate

Tipik sa Atong Inadlaw-adlaw nga Pagpakabuhi

Ang propeta nga si Zacarias mitabang sa iyang mga tawo sa pagkaplag og mga paagi sa kada adlaw aron ilakip ang paghunahuna kabahin sa Ginoo ngadto sa ilang kinabuhi. Ubos sa iyang liderato, ang mga tawo misulat sa mga pulong “Pagkabalaan kang Jehova” diha sa mga butang nga ilang makita sa normal nga dagan sa ilang adlaw, sama sa mga panaksan ug mga kampanilya sa kabayo, aron sa pagpahinumdom kanila sa paghunahuna Kaniya (tan-awa sa Zacarias 14:20–21).

Ang mga propeta karon nag-awhag usab kanato sa pagkaplag og natural nga mga paagi aron ikanunay ang Dios diha sa atubangan sa atong kinabuhi ug sa paghigugma, pagpaambit, ug pagdapit sa samang natural nga sumbanan. Kon magkakomportable ug natural ang atong mahigugmaong mga pagdapit, mas magkakomportable kita sa paghatag sa atong gugma ug mga pagdapit, ug mas magkakomportable ang uban nga modawat niini.

Mga Baroganan nga Hunahunaon

Ang pagpangalagad mao ang butang nga makabenepisyo gikan sa mainampoon nga pagplano. Samtang kini nahimong kabahin kon si kinsa kita, ang pagpangalagad mahimo usab nga ingon ka yano sama sa paghunahuna sa pagpaapil sa uban diha sa mga butang nga tingali atoa nang gihimo. Pananglitan:

• Ang inyong telepono andam na aron padalhan og mensahe ang usa ka higala. Paggahin og 10 ka segundo sa pagsusi sa tawo kinsa imong pangalagaran.

• Miresulta nga magluto ka og mas daghang pagkaon kay sa imong giplano. Manghatod og pipila ngadto sa tawo nga tingali nagkinahanglan niini.

• Aduna kay nagustohan diha sa imong pagtuon sa kasulatan karong buntag. Ipaambit kini sa usa ka higala.

• Ang imong pamilya moadto sa usa parke alang sa gabii sa pamilya. Dapita ang imong mga silingan nga mouban kaninyo.

• Gidapit ka nga mamulong sa miting sa sakramento. Pagdapit og usa ka kauban sa trabaho sa pag-adto aron maminaw kanimo.

Unsa ang Atong Mabuhat?

Usaon nimo sa paggamit ang usa ka butang nga imo nang gibuhat karong semanaha aron motabang ug ilakip ang uban?

Pagdiskobre pa og Dugang

• Basaha ang tambag ni Presidente Dallin H. Oaks alang sa paghimong yano sa mga butang ug kon sa unsang paagi ang yanong mga butang makapahinabo og dagkong mga butang (“Gamay ug Yano nga mga Butang,” Liahona, Mayo 2018, 89–92).

• Basaha ang kabahin sa unsang paagi nga kita makatabang diha sa normal ug natural nga mga paagi sa “Pagpangalagad ngadto sa Tanan” ni Elder Richard Neitzel Holzapfel (Liahona, Dis. 2020, 18–23).