Digital Lamang: Mga Young Adult
Unsay Gitudlo Kanako sa usa ka Proyekto sa Paggansilyo mahitungod sa Pagpalig-on og Usab sa Akong Pagpamatuod
Ang usa ka kalingawan atol sa pandemya nakatabang kanako nga makasabot sa proseso sa pagpalambo ug pagpalig-on sa akong hugot nga pagtuo.
Nangukay ko sa karaan, abogon nga sudlanan, naggunit og ginansilyo nga anghel. Gigansilyo nako ang ulo ug lawas sa anghel, apan nagkinahanglan ko og dalag nga linubid [yarn] aron sa pagkompleto sa silaw [halo] ug sa mga pako, ug dili ko segurado kon aduna ko niini.
Nakat-on ko nga mogansilyo niadtong 11 anyos ko, apan dayon wala ko mogansilyo og mga usa ka dekada. Panahon lang sa pandemya nga ang paggansilyo nahimong usa ka kalingawan pag-usab, ug nahimo kong mapangandoyon; naningkamot ko sa pagkompleto og tibuok nga pundok sa mga piraso sa Pagkatawo ni Jesukristo sa dili pa ang Pasko.
Sa dihang hapit na ko moundang, nakabantay ko og usa ka piraso sa dalag nga taela. Gibira nako ang materyal, nakaugkat og dako nga habol nga dunay mga badlis-badlis [stripe] nga dili pareho ang gidak-on. Kini adunay lapad kaayo nga mga badlis-adlis nga wala magkauyon ang mga kolor: kahil, rosas, bughaw, ug dalag nga gihiusa og gansilyo sa sundanan nga sobra ra ka hayag.
Lainlain ang gidak-on sa mga stripe. Ang mga tahi luag ug dili pareho. Apan ang habol nakapahiyom gihapon kanako samtang nailhan nako kini gikan sa akong sayo nga mga tuig sa paggansilyo. Ang akong pokus ug kadasig dugay nang nawala sa wala pa nakompleto ang proyekto, ug kini nadan-ok niining tumpi sa wala mahuman nga mga proyekto sulod sa daghang tuig, wala gigamit ug wala nakit-an.
Akong gipunit ang luag, wala mahigot nga tumoy sa habol ug gibira. Ang habol wala gayod masirado og tahi, mao nga akong matangkas og tagsa-tagsa ang pipila ka tahi pinaagi sa kalit nga pagbira.
Nagduhaduha ko sa wala pa nako kini lahosa sa pagtangkas. Ang habol karaan na ug hayag ra kaayo, apan kini nakapaguol kanako nga maghunahuna nga akong gibadbad ang tanan nga gipaningkamotan og maayo sa paghimo sa akong gagmay nga mga tudlo sa pagkabata. Apan, akong naamgohan, ang paggansilyo niini nga habol niadtong tanang milabay nga katuigan mipabilin sa materyal sa dapit diin gikinahanglan nako kini, karon anaa ug andam nga magamit alang niining mas maayo nga katuyoan.
Busa, akong gitangkas. Gisigehan nako og bira hangtod ang linubid nagpundok diha sa usa ka gubot nga tumpi sa akong paa, ug dayon nagsugod ko sa paggansilyo. Ang akong mas hanas nga mga kamot miusab sa bakikaw, binata nga mga tahi sa akong habol ngadto sa detalyado kaayong pagkadesinyo nga mga pako sa anghel.
Samtang nagtrabaho ko, misantop ang usa ka talagsaon nga hunahuna:
Ang akong pagpamatuod sama niining gamay nga anghel.
Pagpalig-on og Usab sa Akong Hugot nga Pagtuo
Samtang ang hunahuna nakapahiyom kanako sa sinugdanan, dihang mas dugay kong naghunahuna mahitungod niini, mas nakaamgo ko nga tinuod kini. Ang akong pagpamatuod, sama sa akong gamay nga habol, sa sinugdanan usa ka yano, binata nga pagkahimo. Dayon miabot ang mga hagit sa lisod nga mga pagsulay, dihang misulay sa akong hugot nga pagtuo ang pipila ka butang. Ang luag, bakikaw nga mga tahi nga miporma sa basehan sa akong pagpamatuod mabati nga daw kini gibinat.
Ug sa kataposan, adunay pagpalig-on og usab. Sa dihang andam na ko nga mohimo og kausaban sa akong kinabuhi, misugod sa pagsalig sa Manluluwas, ug mitugot sa akong pagpamatuod nga molambo ug mausab, kini naporma ngadto sa butang nga mas matahom pa gayod, butang nga mas importante ug mahinungdanon kaysa unsay akong nahimo isip usa ka bata.
Si Elder Bruce C. Hafen nga Emeritus General Authority Seventy mipasabot niini nga konsepto sa dihang iyang gihulagway ang unsay iyang gitawag nga “kayano labaw pa sa kakomplikado”1—nga mao gayod ang ideya nga kon kita maningkamot latas sa lisod nga mga pangutana sa atong kinabuhi, makadawat kita og bag-o, mas lig-on nga matang sa kayano. Siya mipasabot nga “anaa ang atong mga panahon sa pagduhaduha aron sa pagtudlo kanato, dili sa pagsilot kanato. … Ang pagpili nga magmatinud-anon ug tugotan ang espirituhanon nga paglambo kon kita makasinati og mga pagsulay motugot kanato nga mas makakat-on pinaagi sa Espiritu kay sa normal nga mata ug mga dalunggan.”2
Dihang mas dugay kong naghunahuna mahitungod niini, mas nakaamgo ko nga dili lang ang akong pagpamatuod, apan ang akong kinabuhi ang misunod niini nga sundanan. Wala kini mahitabo sa usa lang ka higayon, apan sa hinay-hinay, anam-anam, nausab ko. Pinaagi kang Kristo, nausab ko. Pinaagi kang Kristo, malamposon akong nakalahutay sa kalisdanan ug nahimong bag-o.
Pagkaila ni Kristo isip Atong Manunubos
Kining proyekto sa paggansilyo nagsugod lang nga kalingawan atol sa kuwarentena apan sa kataposan nahimo nga hingpit nga pahinumdom sa impluwensiya ni Kristo ug sa pagsaulog sa bag-o nga kinabuhi. Tungod kay mao kana ang unsay gitanyag ni Kristo kanato: usa ka kahigayonan nga mahimong bag-o gayod. Atong gisaulog ang masuso sa Betlehem tungod kay nakahibalo kita nga kana nga masuso midako nga nahimong usa ka tawo kinsa makatanyag kanato sa kahigayonan nga molambo ug mag-usab ug mahimong mamaayo.
Sama sa giingon ni Presidente Thomas S. Monson (1927–2018): “Kon kamo ug ako mosunod ni Jesus, atong madiskobrihan nga Siya labaw pa sa gamayng bata sa Bethlehem, labaw pa sa anak sa panday, labaw pa sa labing bantogan nga magtutudlo. Kita makaila Kaniya nga mao ang Anak sa Dios, ang atong Manluluwas ug Manunubos.”3
Samtang ang pagkatawo ni Kristo usa ka milagroso ug talagsaon nga panghitabo, ang akong pagsaulog sa Pasko nahimong mas mahinungdanon ug napalambo pinaagi sa tukmang paghinumdom kon nganong ang mga balita sa anghel nagdala og ingon ka “dakong kalipay” (Lucas 2:10). Sama sa gipanagna usab sa anghel, “Manganak [si Maria og] batang lalaki ug nganli siyag Jesus kay luwason niya ang iyang katawhan gikan sa ilang kasal-anan” (Mateo 1:21).
Samtang kita magsaulog sa pagkatawo ni Kristo, kita usab makahinumdom sa paglaom sa bag-o nga kinabuhi ug sa mga ikaduhang kahigayonan nga Siya naghatag kanato. Ang Pasko usa ka maanindot nga panahon sa mga tradisyon ug pagpanghatag, ug mahimo usab kining usa ka panahon sa pagpalig-on, o gani sa pag-ugmad og usab, sa atong mga pagpamatuod. Kita makatugot sa Ginoo, uban sa Iyang kahanas ug kaalam, sa paghimo kanato ngadto sa usa ka butang nga mas maayo kay sa atong mahanduraw.