“Pag-abuso, Pagsagop—ug Pagkaayo,” Liahona, Ene. 2023.
Mga Young Adult
Abuso, Pagsagop—ug Pagkaayo
Ang akong pamilya abusado ug haguka [unstable], apan pinaagi ni Kristo, Ako karon nakaangkon og paglaom alang sa akong umaabot nga pamilya.
Litrato nga giposingan sa modelo
Nagdako ko sa haguka nga palibot. Ang akong tinuod nga mga ginikanan miabuso ug gipasagdan ko, ug ako nakasinati og daghang malisod nga mga hagit. Ako nakigbisog sa kahadlok, mga problema sa lawas, pagkadaot, ug panagsa nga depresyon nga nagbilanggo kanako sulod sa katuigan.
Ang akong tinuod nga mga ginikanan nasilyo sa templo, apan wala madugay human ako mabunyagi pag-edad og otso, misugod sila sa pagpalayo sa Simbahan. Ug sa nagpadayon ang ilang pagplayo gikan sa ilang mga pakigsaad, mas migrabe ang among sitwasyon.
Sa edad nga 14, ako nahimong tig-atiman sa akong autistic nga igsoong lalaki ug sa akong inahan. Ako nahisalaag ug wala nay kontrol. Gikasilagan ko ang akong kaugalingon ug ang akong sitwasyon ug nagtuo nga ang akong kinabuhi dili na gayod mausab.
Apan dayon usa ka milagro nahitabo. Ang akong tinuod nga inahan nakaamgo nga siya dili na makaatiman kanako ug mitawag sa iyang igsoong lalaki sa Singapore aron mohangyo sa pagsagop kanako. Bitbit ang pinutos nga bagahe ug luhaan nga mga mata, misakay ko sa eroplano aron sugdan ang bag-ong kinabuhi—usa nga gawasnon gikan sa pag-abuso. Apan ang pagpahaom ngadto sa akong pamilya nga nagsagop ug sa bag-ong kultura lisod, ug ako nanglimbasog sa pagpadayon sa unahan.
Ang akong nagsagop nga mga ginikanan mibuhat sa tanan nilang mahimo sa pagtabang kanako. Nakigkita ko og usa ka therapist ug mga doktor. Misugod usab ko sa pagsimba pag-usab, apan ang pagkat-on kabahin sa Langitnong Amahan nga naghigugma kanako ug adunay usa ka katuyoan alang kanako lisod, tungod kay ako wala motuo niini human sa tanan nakong giantos.
Wala ako magmalipayon. Wala ko masayod unsaon sa pagkaayo gikan sa nangagi ug mibati gihapon og kawalay paglaom kabahin sa umaabot.
Pagtinguha sa Pagkaayo
Usa ka adlaw, ako namalandong kabahin ko unsa ka mubo ang kinabuhi. Dili ko gusto nga igahin ang akong kinabuhi sa pagkadili malipayon. Kinahanglan ko nga makat-on gikan sa akong mga pagsulay, gamiton ang mga baroganan sa ebanghelyo nga natudlo kanako, ug modapit ni Kristo ngadto sa akong kinabuhi.
Akong gihimo ang butang nga akong gituohan ug misugod sa pagluhod ug nangayo sa Langitnong amahan sa matag adlaw alang sa gahom sa pagpasaylo sa akong tinuod nga mga ginikanan, sa pag-usab sa akong kahadlok ngadto sa hugot nga pagtuo, sa pagkaplag og pagkaayo ug kalipay, ug sa pag-ila sa gugma diha sa akong kinabuhi. Miadto ko sa institute ug misugod sa pagtuon sa mga kasulatan ug migamit sa mga kamatuoran sa ebanghelyo diha sa akong kinabuhi.
Tinud-anay ko nga nangita sa gahom ni Jesukristo sa pagkaayo ug sa Iyang Pag-ula. Ug paglabay sa panahon, ang akong kinabuhi misugod sa pagkausab. Samtang nagmapailubon ko, nadawat nako ang pagtambal pinaagi sa theraphy ug pinaagi sa tambal, ug mipuno sa akong kinabuhi sa Espiritu sa matag adlaw, ako misugod sa pagkaayo: mibati ko nga dili na kaayo magpahilayo ug mas sama na sa akong kaugalingon. Mibati ko nga luwas. Miserbisyo ko sa uban. Mihigugma ko, mipasaylo, ug midawat sa akong kaugalingon. Mitukod ko og himsog, mahigugmaong mga relasyon. Misugod ko sa pagbati sa gugma sa Langitnong Amahan alang kanako. Ug sa unang higayon sa akong kinabuhi, mibati ko og tinuod nga kalipay.
Si Kristo Nagtanyag og Paglaom alang sa Atong Kaugmaon
Ako dili makausab sa akong nangagi, apan sama sa giingon diha sa Doktrina ug mga Pakigsaad 122:7, “Kining tanan nga mga butang makahatag [kanako] og kasinatian, ug alang sa [akong] kaayohan.” Ako nasayod nga ang Manluluwas mipaluyo kanako latas sa akong mga panglimbasog. Bisan pa man niini, ako milambo og maayo tungod sa akong tinguha sa pag-usab ug tungod kay akong gipadayon ang pagdangop ngadto Kaniya.
Kon kamo anaa sa usa ka lisod nga kahimtang sa pamilya sayri nga kamo adunay usa ka Amahan sa Langit kinsa nakaila kaninyo ug nahigugma kaninyo ug mobukas sa mga pultahan ngadto sa hayag nga kaugmaon. Sa wala pa gisagop, akong gisultihan ang akong kaugalingon nga ang akong kahimtang dili na gayod mausab, ug nga ako dili na maminyo o makabaton og mga anak tungod kay ako nahadlok nga sila mag-antos sama kanako. Apan akong nakat-onan nga bisan unsa pa ang mga panglimbasog nga atong masinati diha sa atong mga pamilya, kon kita magtinguha ni Kristo, kita makapalig-on sa atong umaabot nga mga panimalay ug mahangturong mga pamilya uban sa paglaom, mga kamatuoran sa ebanghelyo, ug gugma.
Sama sa gitudlo ni Elder Clark G. Gilbert sa Seventy: “Kitang tanan … nagsugod kita sa nagkalain-laing dapit nga may nagkalain-laing pagtuga sa kinabuhi. Ang pipila natawo nga may maayong mga hunonganan, puno sa oportunidad. Ang uban … [n]ag-atubang og mga kahimtang nga mahagiton. … Dayon kita nagpadayon subay sa pagsaka-kanaog sa personal nga paglambo. Ang atong kaugmaon pagatinoon og gamay ra pinaagi sa atong pagsugod ug labaw kaayo diha pinaagi sa atong pagsaka-kanaog. Si Jesukristo nagtan-aw sa balaanong potensyal sa walay pagsapayan diin kita nagsugod. … Buhaton Niya ang tanan nga Siya makahimo sa pagtabang kanato sa pagpaduol sa atong mga pagsaka-kanaog ngadto sa langit.”1
Bisan unsa pa man ang inyong kahimtang, adunay paglaom ug pagkaayo nga makaplagan diha ni Jesukristo! Siya mag-uban kaninyo, ug Siya mogiya kaninyo ngadto sa kalinaw ug kalipay kon kamo magtinguha Kaniya—kanunay.