Digital Lamang
Pagtugot sa Kahayag sa Anak nga Mosidlak pinaagi Kanato
Samtang kita magtinguha sa pagdawat ug pagpaambit sa kahayag ni Kristo, kita makakita og tumang kalipay diha sa atong mga kinabuhi.
Sa usa ka sayo nga kabuntagon sa Lunes, usa ka grupo sa andam nga mga boluntaryo ang nagpundok aron motabang sa paglimpyo sa Mount Timpanogos Utah Temple. Ang mga tahas gihatag, ug samtang ang pipila ka boluntaryo ug ako misunod sa gi-asayn namo nga tigdumala, kami dali nga nakaamgo nga iya kaming gigiyahan paingon ngadto sa celestial nga lawak.
Sa dihang misulod kami sa lawak, amo dayon nga nabantayan nga ang dako, naghagdan-hagdan nga chandelier nga kasagaran habog nga gibitay ibabaw sa atong mga ulo gipaubos duol sa salog. Ang among responsibilidad mao ang paglimpyo niini. Kini dili gamay nga gimbuhaton, tungod kay ang chandelier gilangkoban sa liboan ka indibidwal nga mga kristal! Ang matag tawo gihatagan og puti nga mga gwantes, ug kami gipakita unsaon pagtangtang sa abog pinaagi sa mainampingon nga pagtrapo sa matag kristal nga tinagsa taliwala sa among gigwantesan nga mga tudlo. Ang delikado nga proseso dako kaayo nga trabahoon, apan kami madasigon nga nagtrabaho.
Pipila ka oras human niana, ang bag-ong gilimpyohan nga chandelier hayag kaayo nga misidlak! Human midayeg sa kanindot niini, kami nagsugod sa paglimpyo sa mas gagmay nga mga chandelier diha sa celestial nga lawak.
Kalit lang usa ka makapahingangha nga butang ang nahitabo! Ang adlaw sa kabuntagon misubang ibabaw sa silangan nga bungtod, ug ang sanag nga mga silaw niini direkta nga misidlak lahos sa dagko nga lingin nga bintana diha sa celestial nga lawak sa hingpit nga anggulo aron sa pagdan-ag sa halangdon nga chandelier. Ang matag sinaw nga kristal miamag sa sanag sa adlaw, ug dili maihap nga prismo sa kahayag ang dihadiha dayon nagkatag bisan asa! Masilakon nga mga bangaw ang nagkatag sa salog, kisame, kasangkapan, mga bungbong, ug sa mga tawo, ug ang uban nga mga gilak nagsayaw-sayaw gani sa hangin! Kami nanakop og mga bangaw sa among mga kamot! Makapahingangha kaayo kadto!
Ako kanunay nga namalandong niana nga dili makalimtan nga kasinatian ug ako mas klaro nga nakasabot nga ang kahayag nakapahimo sa tanang kalainan! Sama sa mga kristal, kon kita makadawat sa kahayag sa Anak ug mopakita niini sa gawas, ang Iyang kahayag mapadako, ug ang makalipay nga mga epekto makapakurat!
Atol sa Iyang mortal nga pangalagad ug usab human sa Iyang Pagkabanhaw, ang Manluluwas mipahayag nga Siya mao ang Kahayag sa Kalibotan (tan-awa sa Juan 8:12; 3 Nephi 15:9; 3 Nephi 18:24). Siya midapit sa Iyang mga disipulo nga “pasigaa ninyo ang inyong kahayag sa atubangan sa mga tawo aron makita nila ang inyong mga maayong buhat ug dayegon nila ang inyong Amahan nga anaa sa langit” (Mateo 5:16; tan-awa usab sa 3 Nephi 12:16).
Isip mga disipulo ni Jesukristo, matag usa kanato tingali mangutana sa atong mga kaugalingon, “Unsaon nako nga mas mapadan-ag ang kahayag sa Anak pinaagi kanako?”
Kita tingali mokonsiderar sa pagsugod og tubag niini nga pangutana pinaagi sa pagkahimong mas mapasalamaton sa abunda nga mga paagi nga si Jesukristo mipakigbahin sa Iyang kahayag diha kanato. Tan-awa ang palibot! Ang Iyang kahayag anaa bisan asa! Kita makakita niini diha sa kaanindot sa nagsidlak nga lusok sa ulan ug sa milagro sa usa ka bulawanon nga pagsubang sa adlaw. Kita makabati niini sa mga higayon sa kalisod kon kita moila sa Iyang maloloy-on nga kamot nga nakapahimo nato nga mapas-an ang atong mga palas-anon ug mosaka ibabaw sa kangitngit sa kasakit o kahadlok. Kita mohangop niini samtang atong maamgohan nga matag ginhawa nato ug ang matag adlaw diri sa kalibotan usa ka kahigayonan nga mahimong mas sama Kaniya:
“Ang kahayag ug ang kinabuhi sa kalibotan, usa ka kahayag nga nagdan-ag sa kangitngit ug ang kangitngit wala makasabot niini;
“Kinsa nahigugma sa kalibotan nga siya mihatag sa iyang kaugalingon nga kinabuhi, nga kutob sa motuo mahimo nga mga anak sa Dios” (Doktrina ug mga Pakigsaad 34:2–3).
Kon kita “mopuyo sa pagkamapasalamaton matag adlaw” (Alma 34:38) alang sa kahayag nga atong nadawat, ang atong kagustohan sa pagpaambit sa Iyang kahayag ngadto sa uban madungagan.
Samtang ang atong tinguha sa pagdawat ug pagpaambit sa kahayag molambo, kita makahangyo sa Langitnong Amahan nga motabang kanato nga molihok sa ginagmay ug makahuloganon nga mga paagi aron ang kahayag sa Anak mapasanag pinaagi kanato. Tingali ang Espiritu moaghat kanato nga mohatag og tinuoray nga pahiyom aron mapanindot ang adlaw sa usa ka tawo, mag-ampo para sa usa ka estranghero nga nanginahanglan, magbinuotan sa atong hunahuna kabahin sa usa ka silingan, o maminaw gayod sa usa ka bata. Samtang kita motuman sa mga pag-aghat nga piho gayod nga gihatag alang nato, dugang nga personal nga pagpadayag ang moabot. Tingali kita maaghat nga mopili nga mahimong mas malipayon; mopadala og mensahe aron madasig ang usa ka higala; sultihan ang usa ka sakop sa pamilya og, “Ako nahigugma kanimo”; tinud-anay nga mopasaylo; o mangayo og pasaylo alang sa walay paghunahuna nga linihokan. Sa bisan unsa nga talagsaon nga mga paagi kita gigiyahan sa pagpakita sa kahayag sa Anak, ang atong mga buhat sa kamabination ug gugma makadala og dako nga kalipay nganha kanato ug sa uban—ug uban sa tabang sa Ginoo, ang tinipon nga mga epekto makapatingala!
Ako mas klaro nga nakasabot nga ang kahayag ang nakapahimo sa tanang kalainan. Ako mas hingpit nga nakaamgo niini nga halawom nga kamatuoran: “Kana nga gikan sa Dios mao ang kahayag; ug siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtod sa hingpit nga adlaw” (Doktrina ug mga Pakigsaad 50:24).
Uban sa mapainubsanon nga pagpasalamat, ako mapasalamaton nga mohalad og pasalamat ngadto sa Amahan alang sa Iyang Pinalangga nga Anak ug sa pagtugot kanato nga motabang Niya nga pahayagon ang kalibotan!