Digital Lamang: Mga Young Adult
Unsa kaha Kon Ako Walay Dapit sa Plano sa Langitnong Amahan?
Kanunay kong mangutana sa akong kaugalingon niini nga pangutana, apan nakaamgo ko nga ang tanan adunay dapit sa gingharian sa Dios.
Litrato pinaagi sa Unsplash
Niadtong dili pa ko minyo ug nagtambong sa akong YSA nga ward, kadaghanan sa akong mga higala ug ako nag-atubang og daghang hagit samtang naningkamot kami alang sa mga panalangin sa mahangtoron nga kaminyoon ug pamilya nga among nakat-onan mahitungod sa ebanghelyo ni Jesukristo. Ang pipila niini nga mga higala dili pa minyo dugay na kay sa gusto nila, ang uban naminyo na apan kalit nga nabiyuda/biyudo o nagbuwag, ug ang uban nag-atubang og seryoso nga mga hagit sa panglawas nga nakapameligro sa ilang mga kahigayonan nga maminyo o makaangkon og ilang kaugalingong mga anak.
Sa nagkalain-laing paagi, nanlimbasog kami nga ipabilin ang among hugot nga pagtuo bisan sa nawala nga paglaom ug napusgay nga mga damgo.
Sa sinugdanan, pag-uli nako gikan sa akong misyon, malaomon ako nga maminyo dayon. Bag-ohay lang kong midawat nga nakasinati ako og pagkaibog sa managsama og sekso ug mihukom nga magpabilin gayod ko nga matinud-anon diha sa dalan sa pakigsaad ug magmalaomon mahitungod sa akong kaugmaon diha sa ebanghelyo kay sa moundang. Apan ang pakig-date sa mga babaye usa gihapon ka hagit. Ug sa dihang ang mga tuig human sa akong misyon nagpadayon, ang akong paglaom nga maminyo nagkahanap ug gani mibati nga daw imposible.
Ako adunay pagpamatuod sa doktrina nga gitudlo diha sa pamahayag sa pamilya,1 apan usahay sakit kadto basahon tungod kay ang maanindot nga mahangtoron nga pamilya nga gihulagway niini daw dili gayod posible alang kanako.
Naghunahuna ko kon hain ang akong mga higala ug ako nahaom diha sa plano sa Langitnong Amahan.
Ang Ginoo Nakaila Kanato
Usa ka gabii samtang nabug-atan sa akong mga pagsulay, ako nagdamgo. Diha sa damgo, mibati ko og hilabihan nga pagbati sa gugma. Nagdamgo ko nga ang Dios midapit kanako sa pagpangayo Kaniya og pagkaon, ug nagdamgo ko nga mihigda ko ug mibangon nga anaa na ang pagkaon nga milagrosong gihatag. Klaro kaayo ang damgo nga pagmata nako, hapit ko natingala nga walay pagkaon nga nagpaabot kanako sa tiilan sa akong higdaanan. Ang damgo nagbilin kanako og usa ka bug-os nga kombiksiyon nga ang Dios mipakaon ug mopadayon sa pagpakaon kanako.
Ang damgo nagpabilin kanako sa tibuok adlaw, ug ako adunay hanap nga panumdoman sa istorya sa usa ka gikapoy nga propeta diha sa Daang Tugon kinsa natulog ug mimata nga adunay pagkaon nga gihatag sa usa ka anghel, apan dili ko makahinumdom kinsa kadto siya. Gusto kong mangita sa istorya diha sa akong mga kasulatan nianang gabhiona, apan mibati ko sa pag-aghat sa pag-abli sa Ensign ug mibasa-basa lang una niini. Sa akong pag-abli sa magasin, nakabantay ko og usa ka nindot nga painting sa sulod sa luyo nga hapin.
Ang painting mao ang An Angel Came to Elijah [Usa ka Anghel Miadto kang Elias], ni Walter Rane, ug kini nagpakita sa mao gayod nga istorya sa Daang Tugon nga kanunay nakong gipaningoha sa paghinumdom.
Nakalitan ko. Unsa ang mga posibilidad?
Ang istorya nga akong gipangita makita diha sa 1 Mga Hari 19. Ang propeta Elias gikapoy gikan sa kanunay nga paglayas. Andam na siyang moundang ug mihangyo sa Ginoo nga mamatay na unta siya ug dayon mihigda ubos sa kahoy nga enebro [juniper] aron matulog (tan-awa sa bersikulo 4). Nakamata siya nga nakakita og tubig ug init nga pan, nga iyang gikaon, ug dayon natulog og balik. Dayon, sa ikaduhang higayon, usa ka anghel mipukaw kaniya ug miingon, “Bangon ug kaon; kay tingali unyag dili ka makaagwanta sa panaw” (bersikulo 7). Ug sa dihang siya mikaon, siya dayon “nabaskog ug nakalahutay sa iyang panaw sulod sa kwarenta ka adlaw [ug kwarenta ka gabii]” (bersikulo 8).
Sa akong dugang pa nga katingala, sa samang isyu sa magasin, dihay usa ka makapadasig sa pagtuo nga artikulo mahitungod sa pagkaibog sa managsama og sekso.2
Natingala gyod ko sa pag-amuma kanako sa Ginoo. Ang Espiritu Santo mikompirma nga kining makapadasig nga mga pulong gikan sa uban hingpit gayod sa panahon ug para gayod kanako. Dili nako malimod nga ang Dios mahunahunaon gayod kanako ug mohatag sa akong mga gikinahanglan kon mopadayon ko sa pagsunod Kaniya.
Ang Pagsunod ni Jesukristo Mao ang Paagi
Sama ni Elias, usahay mobati ko nga ang akong panaw hilabihan kaayo nga antoson. Apan mibati ko nga gihigugma gayod ug nasabtan sa Ginoo nianang higayona. Nasayod ko nga nakasabot Siya sa akong mga kahimtang ug nga ang akong pag-antos may kahulogan Kaniya. Ug kon ako moambit sa espiritwal nga pagkaon nga Siya lang ang makahatag, makadawat ko og kalig-on sa pagpadayon sa akong panaw.
Akong nakat-onan pinaagi sa mga pagsulay ug espiritwal nga mga kasinatian nga ang daghang hagit ug mga babag sa kinabuhi dili makapugong kanato sa pag-angkon og luna sa plano sa Langitnong Amahan.
Akong nakat-onan nga ang pagpuyo pinaagi sa hugot nga pagtuo diha ni Jesukristo mao ang kataposang plano sa kinabuhi! Kon kita maglakaw pinaagi sa hugot nga pagtuo ug maghupot sa atong mga pakigsaad, bisan unsa pa ang atong personal o sitwasyon sa pamilya, kita moabante sa unahan diha sa Iyang plano.
Naglakaw uban ni Kristo
Sama kanako ug sa kadaghanan sa akong mga higala sa akong YSA nga ward nga nanlimbasog usahay sa pag-angkon og hugot nga pagtuo sa umaabot, nasayod ko og daghang tawo karon kinsa anaa sa talagsaon nga mga kahimtang nga nakapahimo kanila sa pagbati nga wala sila mahisakop sa plano sa Dios sa kaluwasan. Apan samtang ang akong mga higala ug ako mipalawom sa among debosyon sa ebanghelyo ug nagsalig sa Manluluwas sa among mga plano sa among kinabuhi, mibati kami ug misaksi sa Iyang gugma, paggiya, ug mga milagro.
Sa giingon ni Pablo diha sa 2 Mga Taga-Corinto 5:7, “Kay nagkinabuhi man kita pinaagi sa pagtuo, ug dili pinaagi sa atong makita.” Bisan unsa pa ang mga kasagmuyo, wala matuman nga mga gipaabot, o mga pakigbisog nga moabot kanato, kon maglakaw kita uban sa hugot nga pagtuo ug nagmahal sa atong mga pakigsaad, wala lang kita nahaom sa hingpit diha sa Iyang plano alang sa Iyang mga anak, apan kita usab “giliyokan sa kahangtoran sa mga bukton sa iyang gugma” (2 Nephi 1:15).
Bisan pa og kita matinguhaon nga moapil sa pagsunod ni Kristo ug mobuhat sa Iyang buhat (tan-awa sa Doktrina ug mga Pakigsaad 58:27), ang Iyang plano wala gituyo aron kita magmabalak-on sa bisan unsang higayon nga ang atong kinabuhi wala matuman sumala sa atong giplano. Hinuon, gusto niya nga mosalig kita Kaniya, maghimo og mga pakigsaad uban Kaniya, mogiya sa usag usa balik ngadto Kaniya, ug mosinati og hingpit nga kalipay ug paglambo pinaagi sa atong talagsaon nga mga kasinatian sa mortalidad.
Kana mao ang unod sa plano sa Dios: ang pagdala kanato sa dalan sa pakigsaad ug sa paghangop sa matag usa kanato balik ngadto sa Iyang mahigugmaong mga bukton. Ug sa atong pagsunod Kaniya, ato gayod nga makita nga ang matag usa kanato adunay luna diha sa Iyang plano.