Digital Lamang: Mga Young Adult
Ako Naabuso—Unsaon man Nako Pagpasaylo?
Gidala-dala nako ang grabe nga kasuko ug kayugot sulod sa daghang tuig, apan ang ebanghelyo ni Jesukristo mitabang kanako sa pagkaplag og paglaom.
Niadtong gamay pa kaayo ko, miantos ko og lain-laing pag-abuso ug pagdagmal gikan sa usa ka sakop sa akong pamilya ug lain pa nga tawo gawas sa akong pamilya. Tungod niana nga pag-abuso, midako ko nga may kahadlok, pagdumot, ug daghang kayugot sa akong kasingkasing. Sa pipila ka higayon nagtuo ko nga ako ang hinungdan sa unsay nahitabo kanako, ug mibati ko nga sad-an. Daw mibati ko nga ang kinahugawan nga binuhat sa kalibotan. Ug gidala-dala nako kadto nga mga pagbati sa pagdako nako.
Bisan pa man, ang tanan nausab sa dihang nag-edad ko og 20 ug ang mga misyonaryo nanuktok sa akong pultahan aron mopakigbahin og espesyal nga mensahe ngari kanako—usa ka mensahe nga puno sa hugot nga pagtuo, gugma, ug paglaom. Ila kong giingnan mahitungod sa ebanghelyo ni Jesukristo.
Samtang naminaw ko nila, nabati nako ang kalinaw ug kakalma sa akong kasingkasing nga dugay nang nawala sa akong kinabuhi. Sa pagkatinuod nabati gayod nako nga ang Langitnong Amahan ug si Jesukristo tinud-anay nga nahigugma kanako ug nga ang akong bili wala mawala bisan sa tanang nakong nasinati. Mao na ba kaha kini ang paagi nga sa kataposan mahimong gawasnon sa pagbati nga sad-an ug kaulaw nga akong gidala-dala sa tibuok nakong kinabuhi?
Pagkat-on sa Makaayo nga Gahom sa Manluluwas
Ang mga misyonaryo mipadayon sa pagbisita ug pagtudlo kanako, ug duha lamang ka bulan human niadto ako nabunyagan. Wala pa gayod ako sukad nalipay og maayo sa tibuok nakong kinabuhi. Samtang nagpadayon ko sa pagkat-on og dugang, ang mga baroganan ug mga pagtulon-an sa ebanghelyo mipakita kanako unsaon nako (posible man diay kini!) pagkaplag sa kalig-on sa pag-abante sa unahan uban sa kalinaw, pasaylo, ug pagtapos sa panagbangi nga akong gidala-dala dugay na kaayo sa akong kasingkasing.1
Espesyal akong nahupay sa mga pulong ni Elder Patrick Kearon sa Seventy atol sa kinatibuk-ang komperensiya sa dihang namulong siya bahin sa pag-abuso. Mitudlo siya:
“Ang inyong bili wala gitino niining makalilisang nga mga butang nga nabuhat nganha kaninyo. Kamo, sa mahimayaon nga kamatuoran, gihatagan og bili pinaagi sa inyong anaa na nga mahangtoron nga pagkatawo isip usa ka anak nga lalaki o anak nga babaye sa Dios …
“Uban sa gituyhad nga mga bukton, ang Manluluwas nagtanyag sa gasa sa pagkaayo ngadto kaninyo. Uban sa kaisog, pailob, ug matinud-anon nga pagtutok Kaniya, sa dili madugay kamo hingpit nga makadawat niini nga gasa. Mahimo ninyong buhian ang inyong kasakit ug ibilin kini diha sa Iyang tiilan.”2
Nasayod na ako karon nga dili ako sad-an sa unsay nahitabo kanako—biktima ako sa bangis nga mga buhat sa uban.
Mapasalamaton kaayo ko sa makaayo nga gahom ni Jesukristo. Ang pagkat-on mahitungod Kaniya ug pagpaningkamot sa pagsunod Kaniya nakatabang kanako sa pag-abante sa unahan uban sa kahibalo nga Siya miantos alang kanako ug nakasabot sa tanan nga akong naagian. Ang pagkahibalo nga nag-inusarang gipas-an Niya ang akong mga kabudlay aron dili na nako kini pas-anon pa usa ka katingalahan nga pagkaamgo alang kanako ug nakapalawm sa akong hugot nga pagtuo diha Kaniya.
Pulihan ang Kalagot sa Kalinaw
Apan ang akong kaugalingon nga kasamok mahitungod sa akong pag-abuso dili lamang ang mao ra nga bahin kanako nga nagkinahanglan og pag-ayo. Akong nakat-onan nga si Jesukristo, pinaagi sa gahom sa Iyang Pag-ula, dili lang molimpyo kanato sa atong mga sala apan usab mohupay kanato ug motabang kanato sa pag-abante sa unahan, mouswag, ug mopasaylo niadtong nakapasakit kanato og hilabihan.
Ang pagpasaylo lisod kaayo, ug usahay kini daw imposible. Mao kini nahitabo kanako sa dugay na nga panahon. Apan samtang mitutok ako aron maulian gikan sa mga sangpotanan sa pag-abuso, akong naamgohan nga makahimo ako sa pagpasaylo sa hinay-hinay tungod kay gikinahanglan kini alang sa hingpit nga pagkaayo.
Si Presidente Russell M. Nelson bag-ohay lang nga mitudlo kanato mahitungod sa pagtapos sa mga panagbangi sa atong mga kinabuhi. Miingon siya: “Kon ang kapasayloan sa karon ingon og imposible, pangayo og gahom pinaagi sa maulaong dugo ni Jesukristo sa pagtabang kaninyo. Kon kini inyong buhaton, mosaad ko og personal nga kalinaw ug usa ka kusog nga espirituhanong paglambo.”3
Aron magawasnon ang akong kalag gikan sa kalagot ug kayugot, nagsalig ko sa Manluluwas sa pagtabang kanako nga makapasaylo gayod ug buhian ang panagbangi sa akong kasingkasing. Taas kadto nga proseso, apan sa akong pagpalihok sa akong hugot nga pagtuo, nabati gayod nako ang mapasaligon nga gugma ug kalinaw sa Manluluwas nga mipuli niadtong negatibong mga emosyon nga akong gidala-dala sa dugay na kaayong panahon. Sa kataposan nakaamgo ra gayod ko nga bisan og ang milabay na dili mapapas o mausab, kini mahimong madawat ug mabuntog, ug kana nakatabang kanako sa pagbati og hilabihan nga paglaom alang sa umaabot.
Si Kristo Nagauban Kanato
Bisan pa sa unsay akong gituohan niadtong bata pa ko, ang Ginoo nag-uban gayod kanato sa tanang butang. Siya nahigugma kanato sa walay kinutobang paghigugma. Nawad-an gayod ako og paglaom mahitungod sa mga panghitabo sa akong kinabuhi, apan Siya mipakita kanako kon sa unsang paagi Siya makatabang kanato sa paghimo sa atong kinagrabehan nga pag-antos ngadto sa maanindot nga hugot nga pagtuo ug kalig-on.
Gihigugma ko kini nga ebanghelyo ug walay pagduda mahitungod sa dalan nga akong gisubay isip usa ka disipulo ni Jesukristo. Ako nasayod sa akong kasingkasing nga si Jesukristo ug akong Langitnong Amahan nahigugma kanako—ug sa matag usa kanato. Sila andam kanunay sa pagtabang kanato sa pagbuhat sa unsay daw imposible, ilabi na kon ang imposible naglakip sa pagpasaylo sa morag dili gayod mapasaylo. Pagmalig-on, lahutay, pagbaton og hugot nga pagtuo, ug kamo mapanalanginan gayod.
Ako nasayod nga ako napanalanginan gayod.