“Dili Ba ang Pagkamasulondon Mopadulong sa mga Panalangin?,” Liahona, Peb. 2023.
Mga Young Adult
Dili Ba ang Pagkamasulondon Mopadulong sa mga Panalangin?
Ang mga panalangin sa Ginoo wala gituyo alang sa temporal nga indulhensiya, kini gituyo alang sa espirituhanong paglambo.
Sa taas nga panahon sa akong kinabuhi, ako nagtuo nga kon ako masulundon sa mga sugo sa Dios, ako angayan sa bisan unsa ug sa tanang panalangin nga akong pangayoon. Hunahunaa ang akong kahikurat sa dihang, human naningkamot nga mopuyo og kinabuhi nga masulondon sa hapit 30 ka tuig, nakita nako ang adiksiyon ug cancer nga mihulga sa akong pamilya; ang akong amahan nawagtangan og trabaho sa pagkuyanap sa pandemya; ang akong igsoong babaye gitakboyan og makamatay nga sakit; ug pipila ka makapausab sa kinabuhi nga mga panghitabo nga wala nako damgoha nga akong masinati.
Ako migugol og daghang panahon sa tinuoray nga pag-ampo, naningkamot sa pagsabot nganong kini nga mga butang nahitabo. Akong gibati nga ako nakaangkon og mga panalangin. Nganong mora man hinoon og ang mga tawo nga wala maghimo og mga paningkamot nga magmasulondon aduna may nindot kaayo nga mga kinabuhi nga wala ang matang sa mga pagsulay nga akong giatubang? Gikan sa akong limitado nga panglantaw, ang akong mga sirkumstansiya makapalibog, makapasagmuyo, ug dili makatarunganon.
Pagsabot sa mga Pamaagi sa Ginoo
Lisod gayod ang pag-angkon og lapad nga panglantaw taliwala sa mga pagsulay, apan sa paglingi, akong makita nga ang mga pamaagi sa Ginoo sa pagkatinuod dili ang atong mga pamaagi (tan-awa sa Isaias 55:8). Isip may kataposan nga mga nilalang niining mortal nga kahimtang, ang uban kanato ganahan nga mabulahan dayon, magmalipayon bisan wala maghago, ug kanunay nga haruhay.
Apan ang Langitnong Amahan ganahan og mas maayo alang kanato. Sa Iyang walay kataposan nga kaalam, Siya nakasabot kon unsa ang gikinahanglan sa matag usa sa Iyang mga anak aron makaangkon og walay kataposang kalipay, malungtarong kalipay, ug balaanong kahupayan.
Bisan pa niana, kita dili kanunay nga gihatagan sa mga panalangin nga atong gipangayo tungod kay kini dili para sa atong walay kataposang kaayohan. Si Elder D. Todd Christofferson sa Korum sa Napulog Duha ka Apostoles mitudlo: “Ang uban wala makasabot sa mga saad sa Dios sa pagsabot nga ang pagkamasulondon ngadto Kaniya mosangpot og piho nga mga sangpotanan sa gipiho nga panahon. Sila tingali maghunahuna, ‘Kon ako makugihong moserbisyo og full-time nga misyon, ang Dios mopanalangin nako og malipayon nga kaminyoon ug mga anak,’ o ‘Kon ako maglikay nga maghimo og buluhaton sa eskwelahan atol sa Igpapahulay, ang Dios mopanalangin nako og taas nga mga grado.’ … Kon ang kinabuhi dili mahitabo niining paagiha o sumala sa gidahom gayod nga eskedyul, sila mobati nga gibudhian sa Dios. Apan ang mga butang dili awtomatik nga mahitabo. Kita kinahanglan nga dili maghunahuna sa plano sa Dios nga sama sa cosmic vending machine diin kita (1) mopili sa gitinguha nga panalangin, (2) mosuksok sa gikinahanglan nga gidaghanon sa maayong mga buhat, ug (3) ang gi-order moabot dayon.”1
Ang Ginoo miingon nga “sanglit kamo maghupot sa akong mga sugo kamo mouswag sa yuta” (2 Nephi 4:4). Ang kataposang kabulahan nga giandam sa Langitnong Amahan alang sa Iyang mga anak mao ang “pagka-imortal ug kinabuhi nga dayon” (Moises 1:39). Ug tungod sa Iyang bug-os nga gugma alang kanato, Siya midapit kanato sa paggamit sa atong kagawasan sa paghimo og mga pagpili nga mosangpot niana nga punto. Apan wala gayod sa kasulatan ang nag-ingon nga Siya mohatag kanato kon unsa gayod ang atong gipangayo. Siya mas labaw kaayo nga nakahibalo kon unsa ang labing maayo alang kanato. Mao nga nadawat man nato o wala ang mga panalangin nga atong gilaoman, kita gihangyo sa pagsalig nga kini alang sa atong kaayohan (tan-awa sa Doktrina ug mga Pakigsaad 122:7).
Ang personal nga pagpadayag nga moserbisyo og misyon mao ang usa sa labing klaro nga tubag sa pag-ampo nga akong nadawat. Moangkon ko, ako wala batia og kahinam kabahin sa pagbiya sa akong pamilya og 18 ka bulan, apan dili nako ikalimod ang tubag nga akong nadawat. Mao nga, ako masulondon nga mituman sa tawag.
Adunay nindot nga mga bahin sa akong misyon, apan ako usab nakasinati og daghan nga mga hagit nga misulay sa akong hugot nga pagtuo ug maoy hinungdan aron ako mangutana ngano kaha nga ako giaghat nga moserbisyo og misyon! Hinoon, kon ako molingi og balik karon, ako tinud-anay nga makaingon nga ang lisod nga mga kasinatian sa akong misyon nakapalig-on nako sa daghang pamaagi, ug kini miandam kanako sa pagdawat og mga panalangin sa kaulahian.
Usahay ang atong pagkamasulondon mogiya kanato ngadto sa usa ka kalayo sa magtutunaw (tan-awa sa Malaquias 3:2), ug kana dili gayod usa ka komportable nga kasinatian. Apan kon kita motugot niana nga kalayo sa pag-usab kanato, gikan sa nahimo nga mga abo moabot ang bag-ong pagtubo ug katahom (tan-awa sa Isaias 61:3).
Pagdawat sa Kabubut-on sa Dios
Ang tinuod nga pagkakabig ngadto ni Kristo naglakip sa pagkaadunay hingpit nga pagsalig nga Siya ug ang Langitnong Amahan gusto nato nga makaangkon sa unsay labing maayo alang kanato sa walay kataposan nga panglantaw. Kon kita tibuok kasingkasing nga motuo niana, kita tinud-anay nga motapos sa atong mga pag-ampo og “Ang imong pagbuot ang matuman, O Ginoo, ug dili ang amo” (Doktrina ug mga Pakigsaad 109:44). Uban niini nga pasalig sa paghimo sama sa gitudlo ni Presidente Russell M. Nelson ug sa “pagtugot sa Dios nga mopatigbabaw sa atong kinabuhi,”2 kita nakasabot nga dili nato makuha ang tanang butang nga atong gusto o gihunahuna nga angay para nato. Kita mahimong kontento ug magmalipayon uban sa mga panalangin nga moabot kanato pinaagi sa pagkamasulondon sa mga sugo sa Dios nga dili itandi ang atong kaugalingon sa giunsa nato pagsabot ang kinabuhi sa ubang tawo ug giunsa sila pagpanalangin sa Dios.
Ang panglantaw ni Abraham nakatugot niya nga makaangkon og hugot nga pagtuo.
Abraham, pinaagi ni Robert T. Barrett
Usa ka maanindot nga ehemplo niining tinuod nga pagkakabig mao ang propeta nga si Abraham. Ang Ginoo miingon kaniya nga “tan-awa ang langit ug ipha ang mga bituon kon makaihap ka ba: ug siya misulti ngadto kaniya, Makabaton kag mga kaliwat nga sama kadaghan niana” (Genesis 15:5). Mao nga tingali nakapakurat ni Abraham sa dihang, sa iyang katigulangon, ang Ginoo misugo Kaniya sa pagpatay ni Isaac, ang anak nga giingon sa Dios nga Iyang gamiton aron sa pagtuman sa Iyang pakigsaad (tan-awa sa Genesis 17:19). Si Abraham tingali natingala ngano nga ang Dios misugo kaniya sa paghalad sa anak nga lalaki nga maoy mosunod kaniya sa linya sa pakigsaad. Apan si Abraham wala gayod mangutana sa Ginoo, miila nga ang Ginoo nakahibalo sa kataposan gikan sa sinugdanan ug misalig nga ang Iyang saad matuman.
Sa higayon gayod nga si Abraham padulong na nga mopatay sa iyang anak, usa ka anghel ang mipahunong niya ug midayeg sa iyang kaandam nga mahimong masulondon (Tan-awa sa Genesis 22:11–12). Sa wala madugay ang anghel mikutlo sa Ginoo, nga nag-ingon: “Pagapadaghanon ko ang imong kaliwatan ingon sa mga bitoon sa langit, ug ingon sa balas nga atua sa baybayon sa dagat” (Genesis 22:17). Si Abraham adunay hugot nga pagtuo nga ang Ginoo mopanalangin niya, bisan kon kini dili sa pamaagi nga iyang unang gihunahuna.
Usa ka gamhanan kaayo nga pahinumdom gikan niini nga asoy mao nga kita makapili unsaon nato sa pagsabot sa mga gibuhat sa Ginoo; kita makapili nga maadunay hugot nga pagtuo. Si Abraham mahimo unta nga motan-aw sa sugo sa Ginoo sa pagpatay sa iyang anak nga lalaki isip dili gayod patas ug walay kalooy. Apan si Abraham mipili sa pagtan-aw niini sa lahi nga paagi—siya mipili sa pagpokus sa gahom, pagkamasaligan, ug kaayo sa Ginoo.
Pag-usab og Panglantaw
Ang pagpalambo og panglantaw nga sama ni Abraham dili sayon—kini magkinahanglan og panahon ug pagbansay. Usahay ako dili mohimo sa pagpalambo sa pagka mapainubsanon nga gikinahanglan aron sa paghatag sa akong kabubut-on ug pagsalig diha sa Ginoo. Ako nagpakita og espirituhanong mga sapot, nasuko nga wala nako makuha ang unsay akong gusto ug mibati og kapait nga ako padayon nga nakasinati og mga kalisdanan. Niini nga mga higayon, ako napakyas sa pagkakita nga “aron nga kita makaabot gikan sa asa kita ngadto sa asa ang Ginoo gusto nga kita moadto nagkinahanglan og daghan nga pag-inat, ug kana sa kinatibuk-an naghatag og kadili komportable ug sakit.”3
Kini wala magpasabot nga ang Ginoo ganahan nga kita mahimong miserable—ang kaatbang hinoon. Ang Ginoo gusto nga kita “unta makabaton og hingpit nga kalipay” (tan-awa sa 2 Nephi 2:25). Apan ang “unta” nagpasabot nga ang atong hingpit nga kalipay nagdepende sa atong pagpili. Kon kita gusto og tinuod, walay kataposang kalipay, atong pilion ang pagtan-aw sa mga panalangin sa bisan unsa nga porma ug panahon nga sila moabot. Kita mopili nga magpabiling masulondon, bisan kon kini dili dayon makahatag og mga resulta, tungod kay kita nahigugma ug misalig sa Langitnong Amahan. Ug kita mobuhat aron makasabot nga ang labing daghan nga mga panalangin anaa sa mga leksiyon nga atong gipili nga makat-onan gikan sa atong mga pagsulay, kay kato ang makapahiduol nato ngadto ni Kristo.
Ug dili ba ang pagpaduol ngadto sa Manluluwas ug mahimong sama Kaniya mao ang kinatibuk-ang punto niini nga kinabuhi?
Ako migugol og daghang oras sa pagpokus sa negatibong aspeto sa mga pagsulay ug ang pagkadismaya tungod kay wala makuha ang akong gihunahuna nga akong gusto. Aduna pa gihapon koy mga higayon sa pagpangutana ngano nga ang akong kinabuhi kasagaran mora og mas lisod kay sa ubang daghang tawo. Ug usahay ako maghunahuna ngano, bisan pa sa akong makugihong pagsunod, ang gitinguha nga mga panalangin mora og nawala. Apan ako nakat-on sa pagtan-aw nga ang Ginoo kanunay nga nagpanalangin nako kon ako masulondon sa Iyang mga sugo (tan-awa sa Doktrina ug mga Pakigsaad 82:10; 130:20–21), bisan kon kadto nga mga panalangin dili kanunay nga moabot sa higayon gayod o paagi nga tingali akong gilaoman.
Sa matag higayon nga ang panalangin wala gihatag sa paagi o higayon nga atong gilaoman, kita adunay oportunidad nga mainampingong mosusi sa mga pamaagi nga kita adunay nakita nga ang Langitnong Amahan ug ang atong Manluluwas nagpakita diha sa atong kinabuhi, tungod kay Sila kanunay mihimo niini. Kon kita tinud-anay nga nakasabot niini nga kamatuoran, kita maadunay panglantaw ug kaisog nga sa mapainubsanong paagi moproklamar, “Ang Imong kabubut-on matuman.”