![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F16%2F6b%2F166bc80e048a7b36960f6be89db2af811cf595d2%2F166bc80e048a7b36960f6be89db2af811cf595d2.jpeg/full/!250,/0/default)
Usa ka Kaugmaon nga Napuno sa Paglaom
Tibuok Kalibotan nga Debosyonal alang sa mga Young Adult
Dominggo, Enero 8, 2023
Elder Jeffrey R. Holland: Among minahal nga batan-ong mga higala bisan asa! Unsa ka dako nga pribilihiyo ni Sister Holland ug kanako nga ikauban kamo karong gabhiona. Bisan tuod kami napadangat sa kadaghanan kaninyo sa tibuok kalibotan pinaagi sa kaayohan sa modernong teknolohiya, kami nalipay nga adunay personal nga naminaw dinhi sa unibersidad ug sa institute of religion niini, diin si Pat ug ako nagsugod sa among edukasyon sa kolehiyo, nag-date, ug nagminyo.
Karon, nagpaabot ko kon aduna bay manlimbawot ang balahibo sa dihang ako militok sa pulong nga kaminyoon. Ayaw og kataranta. Kami dili maghisgot og kaminyoon karong gabhiona. Pipila kaninyo naminyo na, ug dili kami gusto nga ang mga dili minyo mokalit og biya dinhi nga lawak. Apan ako naghisgot sa among young adult nga sinugdanan ug sa romantiko nga mga sinugdanan kay naghunahuna ko kon kini nahitabo kanamo sa usa ka gabii nga sama ani, wala ta kahibalo kon mahitabo pod kini ninyo, kinsay nasayod? Basin mosalir kini sa uban.
Bitaw, daghan kaninyo sisters ang nagsulti kanamo nga adunay pipila ka lalaki nga kinahanglan ig-on, kon dili sa pana ni Kupido, tingali hapakon sa gamay nga racket sa pickleball. Kon adunay bisan kinsa nga batan-ong babaye diha nga naglingkod tapad sa usa ka batan-ong lalaki nga mohaom niini nga paghulagway, si Elder ug Sister Holland mohatag kaninyo og pagtugot sa pagsiko kaniya diha sa gusok karon dayon—hinaya lang igo nga mopahayag og gugma, apan klaroha gayod aron masabtan ang punto. Malipay kami kon kana nga pagsiko mosalir kaninyo sama sa nahitabo kanamo, gawas lang nga diha sa among sitwasyon akong siko kadto ug kang Sister Holland nga gusok.
Karong umaabot nga Hunyo, 60 ka tuig na ang molabay nga si Pat ug ako naminyo diha sa St. George Temple, usa ka kilometro lang gikan niining kampus sa unibersidad. Ang unom ka dekada nga panag-uban naghatag kanamo og usa ka maayong higayon nga manamilit sa usa ka panahon nga lisod alang sa kadaghanan ug masulub-on alang sa pipila. Anam-anam kita nga nakagawas gikan sa pandemya sa COVID-19, apan kini nga hampak nga halos sama sa gihulagway diha sa biblia usa gihapon ka tinuod kaayo nga isyu diha sa daghang mga bahin sa kalibotan, tungod kay adunay kasagaran gihapon nga anaa sa 1,700 nga gitaho nga mga kamatayon gumikan niini nga sakit matag adlaw.1 Kini nga hampak adunay seryoso nga epekto, dili lamang sa pisikal nga kahimsog apan usab sa sosyal, politikal, ug ekonomikanhong kinabuhi sa halos tanan sa planeta, sa usa ka paagi o sa lain.
Usa ka lahi nga matang sa hampak mao ang nahitabo gihapon sa sidlakang Uropa, diin minilyon ka mga tawo, lakip na ang mga miyembro sa Simbahan, ang nalaglag, nawad-an og pinuy-anan, o mihatag sa ilang kinabuhi mismo sa usa ka panagbangi nga wala nila gipangayo ug dili angayan. Mga semana lang ang milabay samtang anaa sa usa ka buluhaton didto sa Uropa, si Sister Holland ug ako nakighimamat sa pipila niadtong mga refugee nga Ukrainian. Kami mikatawa ug mihilak uban niadtong kinsa mibiya sa tanan ug milayas nga tapot lang sa lawas ang nadala. Among gibati ang samang emosyon ug kasubo alang sa atong matinud-anong mga miyembro sulod sa Russia nga inosente usab nga naapektohan niini nga panagbangi. Dugang pa niini nga mga trahedya, diha sa daghang mga dapit sa tibuok kalibotan, atong makita ang dinaghang pagpamusil—lakip na ang trahedya sa milabay nga semana lang dinhi sa habagatang bahin sa Utah––imoral nga sulod sa kalingawan, ug politikanhong kalihokan diin ang sukaranang mga baroganan sama sa kaligdong, pagkamabination, ug pagkamatinud-anon daw nakalimtan na.
Ug, siyempre, adunay daghang uban pang mga isyu sa kultura ug sosyal nga nagsamok kanato. Apan wala kami moanhi karong gabhiona aron sa pagpaguol ninyo sa mga problema sa kalibotan. Sa pagkatinuod, kami mianhi alang sa sukwahi gayod nga rason! Giila namo ang masabtan nga negatibo nga pagbati ug kawalay kasegurohan nga nagpalibot sa inyong henerasyon. Ug pasayloa kami nga ang among henerasyon wala makasulbad niini nga mga problema nga inyong giatubang karon. Apan kami nagtawag kaninyo ug sa tanang batan-ong Santos sa Ulahing mga Adlaw nga mag-una diha sa moral nga espirituhanong puwersa nga makasulbad niining mga problema, nga makapabali sa sulog sa kahadlok ug pagkanegatibo ug kabalaka nga naglibot kanato. Unsa ka importante alang kaninyo sa pag-ampo nga dili lang nga ang Ginoo mopatigbabaw labaw sa tanan diha sa inyong kinabuhi,2 sama sa gisulti ni Presidente Russell M. Nelson, apan usab sa pag-ampo nga ang mga hiyas sa inyong kinabuhi mopatigbabaw sa uban nga dili pa kaayo segurado. Kon isip indibidwal nga mga disipulo ni Ginoong Jesukristo kitang tanan mas mahigugmaon ug malinawon ug mabination, kon kitang tanan maningkamot sa pagtuman sa mga sugo sa Dios kutob sa atong mahimo, nan kita adunay rason nga mobati og pagsalig mahitungod sa kahimtang sa kalibotan ug sa atong kaugalingon. Maglakaw ngadto sa umaabot niini nga paagi, napuno sa kalinaw ug diosnon nga saad, kita mahimong adunay makapahingangha nga epekto gayod sa kalibotan. Si Abraham Lincoln sa makausa miingon nga misulay siya sa pag-ibot og sagbot ug pagtanom og bulak puli niini sa matag higayon nga anaa siya. Kon kitang tanan mobuhat niana, ang atong moral ug espirituwal nga mga disyerto mahimong tinuod nga mga tanaman sa dili madugay.3
Kamo nga anaa diha sa Germany karong gabhiona—diin daghan kaayong Kristohanong pagkamaabiabihon ang gipakita ngadto sa mga bakwit nga taga-Ukraine nga among nahimamat—makaila sa panultihon nga gipahinungod kang Johann Goethe nga “kon ang matag usa mosilhig diha sa atubangan sa iyang kaugalingong pultahan, ang tibuok kalibotan sa dili madugay mahinlo.”
Busa, sa pag-ila sa mga hagit ug gusto nga motanyag og paagi sa pagtubag niini, si Sister Holland ug ako nag-anhi karong gabhiona sama sa giingon ni Apostol Pedro nga kita kinahanglan: “andam … kanunay sa [paghatag] … sa hinungdan sa paglaom nga anaa [kanato].”4 Kita maghisgot mahitungod sa paglaom, uban sa deklarasyon nga kinahanglan dili gayod nato kini wagtangon o ang igsoon niini nga mga hiyas: hugot nga pagtuo ug gugmang putli. Kami nakaamgo nga adunay daghang mga paagi sa pagpasabot niining suod nga nalambigit nga mga baroganan, ug kamo makadungog kanamo nga magtanyag sa pipila sa among mga kahulogan karong gabhiona. Madungog usab ninyo kami nga mopahayag uban ni Moroni nga ang paglaom mahinungdanon kon kita “makadawat [sa] kabilin … nga giandam [sa Dios alang kanato].”5 Buot namong angkonon ninyo kana nga kabilin isip mga anak nga lalaki ug mga babaye sa usa ka hari. Sa pagbuhat niana, kita kinahanglan makaamgo nga ang paglaom dili lamang ang mensahe ug paagi sa natural nga malaomon; kini mao ang pribilihiyo sa tanan kinsa nagtuo.6 Isip usa ka tumutuo nga hingpit nga napuno sa paglaom (ug hugot nga pagtuo ug gugma nga putli), gibati pag-ayo ni Sister Holland ang kaimportante niining tibuok kalibotan nga kongregasyon karong gabhiona ug unsa ang inyong tahas sa umaabot nga mga adlaw. Nahibalo siya nga kamo ang grupo nga among pasahan sa baton ug mobati nga kini importante nga kamo molihok ug modawat sa inyong kapalaran. Sister Holland.
Sister Patricia T. Holland: Ako mibati kaayo kaninyo. Kamo ang labing kusgan nga henerasyon sa mga young adult nga nailhan sa tibuok kalibotan sukad. Gihigugma ko kamo tungod niana. Si Elder Holland ug ako mapasalamaton kaayo nga kamo nagtuman sa inyong mga pakigsaad ug kamo naningkamot nga mobuhat sa unsay matarong. Ug tungod kay daghan kaayo kamo, kamo makaangkon niana nga gahom nga gihisgotan ni Elder Holland. Akong nakita ang inyong kahayag dinhi niini nga lawak. Hayag kaayo kini. Nakapahunahuna kini kanako niadtong ang Manluluwas mipakita ngadto sa mga Nephite. Siya miingon, “Ipakita ninyo ang inyong kahayag aron kini moiwag sa kalibotan. Tan-awa Ako mao ang kahayag diin kamo mopakita.”7 Sama ninyo, kami batan-on pod kaniadto, apan karon tigulang na mi. Kon hinumdoman nako ang kagahapon sa akong kinabuhi, ug kon mahimo nakong puy-an og balik ang uban niini, usa ka butang ang himoon nako nga lahi—lahi kaayo: himoon kining mas sayon! Para nako ang tanang butang mas maayo kon kini mas sayon—atong pagkaon, atong panapot, atong mga gamit, ug atong mga eskedyul. Ang akong gimahayan pag-ayo sa akong pagkabatan-on mao nga wala nako makita ang yano nga katahom sa ebanghelyo; akong gihimo na hinuon ang ebanghelyo nga komplekado kaayo. Mibati ko nga kini hasol kaayo, lisod kaayo, ug gani usahay misteryoso kaayo. Para nako bisan kon young adult pa ako, mora og gikinahanglan nako nga mokatkat og bungtod sa pagkamatarong, molatas og nagdilaab nga hudno sa paglunsay, ug mosulbad sa tanang doktrinal nga kontrobersiya nga nahibaloan sa katawhan kon gusto gayod nako nga madawat sa atubangan sa Dios.
Dili na kinahanglang isulti, ang akong panghunahuna kaniadto sobra pa kaayo sa gibati nga mabuhat sa usa ka batang babaye nga gikan sa habagatang Utah. Sama kadto sa usa ka tawo nga nag-ingon: “Ang rason nganong ang mga tawo dili mopasakop kaninyong mga Kristiyano tungod kay gilukdo ninyo ang inyong relihiyon nga daw labad sa ulo, daw korona nga mga tunok.” Usa ra ka tawo ang kinahanglan mopas-an niana nga koronang mga tunok, ug Iya kining gihimo aron kita magpuyo sa kamaya, kabuhong, ug kalinaw—dili kasagmuyo. Ang ebanghelyo wala gayod himoa nga usa ka bungtod nga dili makatkat niadtong gamayng batang babaye. Siya gusto nga siya—ug ang tanan dinhi sa kalibotan—kanunayng puno sa paglaom. Gusto Siya nga kita mahibalo nga ang ebanghelyo matahom ang pagkasayon ug yano ang pagkatahom.
Apan palihog ayaw saypa og pagsabot. Sa paghisgot bahin sa paglaom, wala ko mag-ingon nga si Kristo kinahanglang mohatag sa tanan nga atong gusto o nga Siya ang makig-away para kanato. Ang atong paglaom angay nga molabaw kay sa kang Pinocchio nga “kon mangandoy ka ngadto sa bitoon”8 kon kini sama sa paglaom nga gitudlo sa Manluluwas. Akong batan-ong mga kaigsoonan, usa kini ka gasa, Iyang gasa ngari kanato ug sa tibuok tawhanong pamilya. Ug ilhon gayod nato kini isip kahayag nga misanag sa ngitngit kaayo nga kalibotan. Sama sa gisulti sa usa ka tigsulat, “Walay hingpit nga magmasulob-on [gawas] niadtong nagpakabuhi nga walay paglaom.”9
Ang katam-is sa mas sayon naglakip sa pagdiskobre niini nga gasa sa paglaom nga dili mo kinahanglang mangita niini; dili mo kinahanglang maggukod niini; dili kamo momugna ug dili kamo makamugna niini. Sama kaayo diha sa wanang sa grasya, dili ninyo kini maangkon pinaagi sa pagsalig lang sa inyong kaugalingong kusog o sa ubang tawo. Walay sekreto nga mga pormula o mahika nga mga orasyon sa pag-angkon niini. Dili kini moabot pinaagi sa mga ehersisyo nga pagginhawa og lawom (bisan importante man kini) o sa pagbasa og laing libro kon unsaon pagkaplag og kalipay.
Sa pagkatinuod, ang atong tahas nga buhaton importante apan gamay ra kaayo; anaa sa ang Dios mas dako nga bahin sa buhat. Ang atong bahin mao ang pagduol ngadto Kaniya diha sa pagkamapainubsanon ug kayano, unya dili kita mabalaka ug dili mahadlok.10 Nganong yano kaayo? Kay sa likod sa tanan nga gitudlo ni Kristo—sa matag kasulatan, sugilanon, ug sambingay—mao ang saad nga uban sa Dios “ang tanan mahimo.”11 ang panaad nga ang gahom sa Dios makapawala sa tanang luha.12 Atong pasagdahan ang personal nga kasagmuyo ug mangita og kapahulayan diha sa Ginoo.13 Mao nga kita moduol Kaniya uban sa kaaghop ug mapainubsanong kasingkasing14 aron sa pagdawat sa mga panalangin nga moabot tungod sa Iyang walay hunong nga gugma. Ang atong pagsalig himoon nga sama sa usa ka gamayng bata, o sa gamay nga nating karnero, nga kita mao gayod diha sa Iyang dakong panon.
Ang atong mga kasingkasing kanunay gayod nga dili mahimutang hangtod nga kini mopahulay diha sa Dios.
Kining panawagan nga mahimong maaghop ug mapainubsanon sa kasingkasing—usa sa pipila ka mga paghulagway nga gihatag sa Ginoo bahin sa Iyang kaugalingon—nga Siya maaghop ug mapainubsanon sa kasingkasing—kini usa ka panawagan kanatong tanan isip Iyang mga disipulo. Kon mahimo nato ang pagpakabuhi sa ingon niana nga paagi, miingon Siya, makakaplag kita og kapahulayan sa atong mga kalag ug kita makadiskobre nga sayon ang Iyang yugo, ug gaan ang Iyang ipapas-an.15 Akong nakita og balik-balik kining panawagan sa pagkamaaghop ug pagkamapainubsanon samtang gibasa nako ang mga kasulatan. (Tungod tingali kay balik-balik ko kining gikinahanglan.)
Segurado ako nga sukad walay butang nga adunay dako kaayo nga espirituhanong sangpotanan nga nahimo ni bisan kinsa nga dili malaomon ug mapainubsanon. Kini nga matang sa panghunahuna mao ang among gilaoman kaninyo karong gabhiona––nga inyo kining makat-onan samtang bata pa kamo. Gusto namong mahibaloan ninyo sa tibuok namong kasingkasing nga ang Dios maoy inyong Amahan, nga Siya “[mi]amuma [kaninyo] sukad sa inyong pagkatawo,”16 nga Siya adunay mga plano alang kaninyo, mga plano alang sa “kaugmaon nga adunay paglaom.”17
Tugoti ko sa pagpakigbahin kaninyo og duha ka kasulatan nga akong ganahan sa Daang Tugon nga naggamit og pipila niana gayod nga pulong. Miingon si Isaias:
“Pamati kanako, O balay ni Jacob, ug kamong tanan … nga nahibilin sa akong katawhan, ang Israel, giamuma ko kamo sukad sa inyong pagkatawo: …
“… Bisan pa hangtod sa inyong pagkatigulang, … pas-anon ko kamo hangtod nga ubanon na kamo: Ako ang nagbuhat ug ako ang mopas-an; … ako ang modala ug ako ang moluwas [ninyo].”18
Ug misulat si Jeremias:
“Kay sa tinuod ako lamang ang nasayod sa akong mga laraw alang kaninyo, miingon ang Ginoo, sa paghimo kaninyong mauswagon inay maalaot, sa paghatag kaninyog kaugmaon nga inyong gipangandoy.
“Unya [kon] mosangpit ug moduol kamo ug … mag-ampo kanako, tubagon ko kamo.”19
Ako mopamatuod kaninyo, akong batan-ong mga kaigsoonan, nga kini ang kamatuoran nga miabot gikan sa personal nga kasinatian nga ang atong Langitnong Amahan mohimo sa Iyang bahin sa pagtuman niini nga mga saad. Naa ra kanato sa pagtuo lamang, sa yano nga pagtuo, nga mas mahisama sa gamayng bata pinaagi sa atong kaaghop ug ilabi na sa atong pagpasalamat kon makadawat kita sa Iyang mga gasa. Gusto ba mo og talagsaon gayod nga tuig karong tuiga? Gusto ba mo og kaugmaon nga puno sa paglaom? Motuo ba mo nga adunay mga panalangin nga giandam alang kaninyo? Igo ba ang inyong nakita nga kamaayo sa Dios aron molaom ug molambo? Ang sukwahi niini mao nga mahimo kini pinaagi sa pagluhod, sa pagduko, gani tingali pinaagi sa pagyukbo sa tiilan sa Dios. Kanang sama ka matam-is nga kayano! Pagluhod, pagduko, pagyukbo [diha] sa “trono sa [grasya].”20
Mipasabot si Elder Holland nga makaplagan ninyo kining bililhong gasa sa paglaom nga gisumpay sa duha ka laing mga gasa sa Dios—kana pinaagi sa hugot nga pagtuo ug gugmang putli. Palihog ayaw buhata ang sama sa akong gihimo sa batan-on pa ko: nga himoon kining mga hiyas nga labihan ka dako ug komplikado kaayo nga kita masagmuyo sa atong paningkamot sa pagsabot niini. Hatagi og bili ang kasayon niini.
Itanyag ko kaninyo kining usa ka sayon nga han-ay. Ang hugot nga pagtuo mao ang lig-on nga pagsalig nga adunay Dios, ang paglaom mao ang pagsalig nga Siya motabang kanato, ug ang gugmang putli mao ang Iyang gugma ug katakos nga mapakita pinaagi kanato aron sa pagpanalangin sa uban.
Ako nakakat-on bahin sa gugmang putli nga walay usa nato ang adunay enerhiya, panahon, mga kapanguhaan, o kusog sa paghimo sa tanan nga gustong buhaton sa atong kasingkasing. Dili nato mahimo kining tanan; ang atong kasingkasing molapaw gayod sa atong kapasidad. Pagkaanindot gayod nga ang gahom sa Dios nga naglihok pinaagi kanato makapalambo sa atong gamay nga impluwensya, makapadaghan sa limitado natong mga paningkamot ug mohimo ngadto sa uban sa butang nga dili nato mahimo nga kita ra.
Kining yano nga paagi alang sa tulo ka dagkong isyu sa doktrina mipanalangin sa akong kinabuhi. Unta nakita dayon nako kini sa paagi nga dili kaayo mahulgaon sa mas dali nga panahon. Ako mituo gayod nga gituyo sa Dios nga himoong yano ang ingon niining mga kamatuoran sa ebanghelyo nga masabtan bisan sa gamayng bata. Tugoti kong usbon kini. Ang hugot nga pagtuo mao ang lig-on nga pagsalig nga adunay Dios. Ang paglaom mao ang pagsalig nga Siya motabang kanato. Ug ang gugmang putli mao ang Iyang gugma nga mapakita pinaagi kanato.
Samtang ako naghisgot mahitungod sa mga gasa sa Dios, modugang ko og usa pa ka gasa nga nagdugang sa atong paglaom niining bag-ong tuig. Ang nagsanag nga hugot nga pagtuo, paglaom, ug gugmang putli mao ang dili matukib nga katahom—ug dili matukib nga kasayon—gasa sa Kahayag ni Kristo. Kini nga kahayag, nga kaparehas kaayo sa paglaom, usa ka gasa nga gihatag ngadto sa matag lalaki, babaye, ug bata kinsa natawo o matawo dinhi sa mortalidad. Kini nasilsil na dinhi sa atong kinaiyahan. Kabahin kini sa atoa gayong mga kalag.
Usa sa paborito nakong mga tudling sa kasulatan naglakip niini nga pagtulon-an: “Ug ang Espiritu naghatag og kahayag ngadto sa matag tawo nga mianhi nganhi sa kalibotan; ug ang Espiritu naglamdag sa matag tawo pinaagi sa kalibotan.”21
Kana nga kahayag usa sa sukaranang mga rason alang sa paglaom sa atong kinabuhi. Makadasig kaayo, makahinam kaayo, ug malaomon gayod kaayo nga aduna sa sulod kanato ang mosulti nga dili lang kay adunay eksaktong paagi sa paglahotay sa komplikadong kinabuhi, apan mosulti usab nato nga makaplagan nato kanang eksaktong paagi kon kita “maaghop ug mapainubsanon sa kasingkasing.”22 Sama sa gisulti ni Presidente Nelson sa tibuok Simbahan niadtong usang semana lang, “Ang kalibotan nagkinahanglan sa kahayag ni Jesukristo. Ug ang kalibotan nagkinahanglan [kaayo] sa inyong [matahom nga] kahayag.”23
Akong talagsaon nga batan-ong mga higala, ang labing bug-os nakong pag-ampo karon—akong panghinaot—nga kamong tanan, mga young adult sa tibuok kalibotan makadawat niini nga panawagan isip inyong personal nga pangalagad, nga iyong dawaton kining paglaom nga gihisgotan sa Manluluwas ug dalhon kini nga sama sa sulo niadtong mibati nga kini nga kalibotan ngitngit kaayo ug lisod kaayo nga dapit. May laing paagi bang makaawhag ko nga unta makita ninyo nga ang pagdala niini nga kahayag mao ang inyong pagpangalagad sa ulahing mga adlaw? Palihog, palihog sabta nga kini mao ang labing importante nga butang nga akong gibati nga isulti kaninyo karong gabhiona. Ang akong labing dako nga kahadlok mao nga dili nako kini masulti og tarong nga aron kamo motuo gayod kanako. Kinahanglan dad-on ninyo kining kahayag sa paagi nga ang tanang kangitngit sa kalibotan dili gayod makapalong niini.
Kining yano apan gamhanan nga pamaagi sa pag-atubang sa dagko ug komplikadong mga isyu mousab sa dagan sa nagkahugno, nagkangitngit nga kalibotan. Palihog pagbaton og hugot nga pagtuo sa Dios, molaom nga Siya motabang kaninyo, ug makadawat sa gugmang putli nga makapahimo Kaniya nga mapakita pinaagi kaninyo sa pagpatuman sa unsay kamo lamang ang makahimo.
Samtang kamo modawat niini nga hagit ug magsugod nining bag-ong tuig, human nga inyong matan-aw ang sulod sa inyong kaugalingon, ako magpakiluoy kaninyo sa pagtan-aw sa ibabaw. Ang mga mata nga nagtan-aw kaninyo iya sa mapinanggaong Amahan sa Langit kinsa makahatag, ug mohatag diha ninyo sa tanang butang nga inyong gipangandoy alang sa pagkamatarong. Dili ninyo makuha kining mga panalangin pinaagi sa paggukod niini. Palihog hunong sa pagdagan hangtod nga makutasan ka na. Hilom, ug kalma lang. Ipasayon kini. Magmaaghop ug magmapainubsanon sa kasingkasing, ug mag-ampo. Ako mopamatuod nga moabot ang mga milagro kon kita maghinay-hinay, kon kita mokalma, ug kon kita moluhod. Ang tanan nga anaa sa Amahan mainyoha ra ugma damlag.24 Pagkamalaomon niini nga paagi sa pag-atubang sa inyong umaabot. Ako nahigugma kaayo kaninyo, ako midayeg kaninyo ug ako mag-ampo kanunay alang kaninyo. Sa ngalan ni Jesukristo, amen.
Elder Holland: Salamat, Sister Holland, dili lamang sa pagtudlo sa ebanghelyo apan sa pagsunod niini ug pagkahimong napuno uban sa paglaom ni Kristo nga anaa kanimo. Sa among labing lisod nga mga panahon—ug sa unom ka dekada nga kaminyoon, kamo mahimong adunay pipila ka malisod nga mga adlaw—si Sister Holland nagpuyo sama sa iyang gitudlo. Siya kanunay nga nahimong usa ka tumutuo. Siya kanunay nga misalig sa mahangtoron nga kahayag sulod sa iyang kalag. Siya kanunay nga nagpuyo uban sa kasegurohan nga ang Dios maminaw sa among mga pag-ampo ug mopakita kanamo sa dalan bisan kon ang gabii ingon og ngitngit gayod. Sa usa ka kalibotan nga usahay ingon og sobra ra kaayo ngadto sa usa ka batan-on nga magtiayon, ang mga kamatuoran ug ang mga saad sa ebanghelyo mao ang tanan nga among mahuptan, apan igo ra kana tungod kay ania kami karong gabhiona, nga nakadawat og mas daghang panalangin sa among dul-an sa 60 ka tuig nga kaminyoon kay sa among mapangandoy sukad nga posible. Mao nga sama sa gisulti ug nabuhat niining matahom nga babaye, palihog padayon sa paglaom, pag-ampo kanunay, ug pagmatinuohon.
Modugang ko sa tambag ni Sister Holland sa pagdasig gikan sa kasulatan nga malipayong atubangon ang umaabot kutob sa mahimo. Makausa ang usa ka tawo misulat nga sa tanang pag-awhag nga gitanyag ni Kristo kanato diha sa mga kasulatan, sa tanang paglaom nga balik-balik Niyang gitanyag kanato, ang balik-balik natong mapakyas sa pagdawat mao ang pag-awhag nga “[m]agmadasigon.”25 Palihog mahimo ba nga mosalig kita ni Kristo sa Iyang pulong? Mahimo ba nga sulayan lang nato kini? Hinaot nga hangopon nato kana nga malipayon, puno sa paglaom nga imbitasyon niining gabhiona samtang kita mokuha og laing kahigayonan sa pagsugod sa bag-ong tuig ug himoon ang atong kinabuhi kon unsa gayod ang gusto nato nga mahimo kini.
Sama sa tanan Niyang imbitasyon kanato, si Kristo mipuyo niini sa wala pa Siya mitudlo niini. Bisan pa sa mga kabug-at nga Iyang gipas-an, Siya madasigon, positibo, ug Siya mitabang sa uban nga mamahimong ingon, lakip, modugang ko, sa mga propeta sa Dios. Gikan sa kinahiladman sa Bilanggoan sa Liberty—ug sa kinahiladman sa kasub-anan nga iyang nasinati didto—ang kataposang tambag ni Propeta Joseph Smith ngadto sa mga Santos nga anaa sa gawas nga nag-ampo alang sa iyang kalingkawasan mao ang “magmalipayon sa pagbuhat sa tanan nga mga butang nga ubos sa atong gahom; ug unya kita magmalinawon, uban ang labing dako nga kasegurohan, nga makasaksi sa kaluwasan sa Dios, ug sa iyang mga bukton nga ipadayag.”26 Ug walay usa nga mas positibo, mas masaligon, mas napuno sa paglaom kay ni Presidente Russell Marion Nelson, ang atong buhi nga propeta, kinsa mipalanog sa tambag ni Joseph sa dihang siya miingon kanato bag-ohay lang: “Walay espirituhanong mga panalangin nga ihikaw sa mga matarong. … Ang Ginoo gusto nga kita … [m]aglantaw sa umaabot ‘uban sa malipayon nga pagpaabot’ [Mga Pagtulon-an sa Mga Presidente sa Simbahan: Joseph Smith (2007), 622].”27 Madasigon ang mga propeta tungod kay tinuod sila nga mga disipulo ni Jesukristo, ug kana mao ang labing dako nga tinubdan sa tanang pagkamasaligon. Madasigon ang mga propeta tungod kay nasayod sila sa plano; nasayod sila kinsa ang makadaog sa kataposan.
Sama sa nindot kaayo nga gisulti ni Sister Holland, ang abilidad nga makita ang kalibotan sa positibo nga paagi lain pa nga gasa gikan sa Dios. “Ang mga tawo”—ug mahimong modugang ko og kababayen-an ug kabataan—“naingon, nga unta sila makabaton og hingpit nga kalipay,”28 ang mga kasulatan nagsulti kanato. Mao kana nganong kini usa ka “laraw sa kalipay.”29 Isip resulta niana nga plano ug sa Pag-ula ni Kristo nga mao ang labing importante nga bahin niini, kita mahimong magmalaomon bisan unsa pa kangitngit ang ubang mga adlaw.
Ang kahalangdon sa ehemplo sa Manluluwas niini nga butang angayan sa atong balaan nga pagtahod samtang kita moatubang og bag-ong tuig, usa ka tuig nga tingali adunay pipila ka hagit alang kanato. Hunahunaa kini. Giunsa kaha ni Jesus sa pagpamulong og kadasig taliwala sa tanan nga kasakit nga Iyang giatubang paingon ngadto sa Paglansang? Bisan pa sa masulub-on nga kahimtang nga tingali nagpatigbabaw diha sa Kataposang Panihapon, si Kristo nagpahinumdom gihapon sa Iyang mga disipulo sa rason,ug sa ilang katungdanan, nga “[m]agmadasigon.”30 Naghunahuna ko, uban sa kasakit nga umaabot Kaniya, kon giunsa Niya nga positibo kaayo nga namulong ug nagpaabot sa Iyang kaigsoonan nga madasigong molantaw niining tanan. Segurado, kini nga pagpakita sa Iyang hugot nga pagtuo, sa Iyang paglaom ug gugma nga putli, miabot tungod Siya nasayod sa kataposan sa istorya. Siya nasayod nga ang pagkamatarong magpatigbabaw sa dihang makompleto na ang kataposan nga mga asoy. Siya nasayod nga ang kahayag kanunay nga mobuntog sa kangitngit sa kahangtoran ug sa kahangtoran ug sa kahangtoran. Siya nasayod nga ang Iyang Amahan sa Langit dili gayod mohatag og sugo nga dili usab mohatag og paagi sa pagtuman niini.31 Ang usa ka kadaogan makapalipay sa tanan, ug si Kristo mao ang magmadaogon sa Iyang dako nga sangka batok sa kamatayon ug sa impyerno. Karon, usa kana ka lawom nga teyolohiya karong gabhiona, apan kana mao ang unsay ilang gikalipay. Ang madaogon nga Kristo mao ang tinubdan sa atong paglaom niini nga bag-ong tuig ug sa matag tuig—sa kahangtoran.
Tungod sa mga makabalda sa kinabuhi ug sa mga tintasyon ni Lucifer, ang pagpabilin nga malaomon ug madasigon ugma o sa sunod bulan o sa sunod tuig mahimong lisod. Bisan pa man, kana mao gayod ang punto ni Sister Holland sa paghangyo og pagpayano ug sa usa ka malig-on nga pagtutok sa mga sukaranan sa usa ka Santos sa Ulahing mga Adlaw nga kinabuhi. Usahay boluntaryo kitang nagpabilin nga nakatutok niini, ug usahay ang kinabuhi mao ang mohimo niini alang kanato, apan sa bisan asang kahimtang, kon atong natukod ang atong mga pagpamatuod diha sa mga sukaranan sa ebanghelyo, kita makakuha og ingon ka daghan nga kaayohan gikan sa atong mahagiton nga mga kasinatian sama sa kasamtangang nakuha sa usa ka tinahod nako nga higala gikan sa iyaha. Siya, iyang asawa, ug iyang anak nga babaye—ug ako nagtuo nga sila naminaw karong gabhiona—silang tanan nakasinati og nagkadaiya nga hagit sa panglawas karon gayod—seryoso kaayo nga mga hagit, ako modugang. Aduna silay daghang rason nga mopahayag og dakong kasagmuyo ug maghunahuna kon unsay nahimo nga kaayohan alang kanila sa ilang paglaom o sa ilang hugot nga pagtuo o sa ilang gugma nga putli. Apan tungod sa determinado nga pagkadisipulo sa mga panahon sa kalipay o kaguol, sila nagpatigbabaw.
Sa usa ka bag-ohay nga email (nga akong ipaambit kaninyo nga adunay pagtugot niya), ang akong higala misulat:
“Sa miaging pipila ka bulan ang akong kalibotan nahimong gamay kaayo: [sa gidak-on sa] ospital nga [mga higdaanan] ug mga lawak alang sa masakiton. Ang [pagkaayo sa akong asawa human sa iyang kidney transplant] napamatud-an nga lisod, ug siya migahin sa miaging bulan … sulod ug gawas sa ospital. Isip resulta, ako ‘mibiya’ gikan sa kadaghanan sa kalibotan [palibot kanako].” Hunahunaa ang pulong nga kayano.
Siya mipadayon: “Wala gayod ako ganahi sa ideya nga ang Ginoo mohatag kanato og mga pagsulay, apan nagtuo ako nga Siya makagamit niini alang sa Iyang mga katuyoan. Usa ka butang nga ingon og importante kanako sa miaging pipila ka semana mao ang kon unsa ka … importante ug tinuod ang kasingkasing sa ebanghelyo [sukwahi sa kadaghanan gayod nga mahimong wala gikinahanglan]. Ang kasinatian sa gugma alang sa uban; ang kasinatian nga gihigugma ug giserbisyohan sa uban; ang hilom nga presensya sa tingog sa Dios samtang kamo naglingkod nga gikapoy [dapit] sa [higdaanan] sa usa ka nasakit nga bata o sa lawak sa ospital sa asawa [nga masakiton kaayo] sa lawom nga kagabhion [ug makadungog sa balaanon nga pulongan], ‘Kalinaw nganha sa imong kalag, akong anak.’
“Nabasa nako ang Basahon ni Mormon ug ang mga Ebanghelyo ug nabati [nako] ang gugma sa Dios. Labaw pa sa suporta gikan sa Simbahan [ug labaw sa lisod sabton] nga teyolohiya, [ang mga butang] nga makatabang kanato nga mohimo og hinay ug lisod nga pag-uswag ngadto sa Dios … mao ang katinuod sa hugot nga pagtuo, … pagpamatuod, [paglaom, ug gugma].”
Siya mitapos: “Wala na ko makatambong og mga panagtigom alang sa sakramento sulod sa daghang semana, apan akong nakita ang daghan kaayong maayo nga mga tawo kinsa nagmatinuoron ngadto sa ilang … mga pakigsaad sa pagserbisyo sa akong pamilya. … Gipanalanginan ko og daghan kaayo, ug gihigugma nako ang Ginoo, [gihigugma nako] ang ebanghelyo, [gihigugma nako] ang Pagpahiuli, ug ang Simbahan.”32
Kana nga nindot kaayo nga pagpamatuod sa paglaom ug paglahutay nga gipahayag taliwala sa lisod kaayo nga panahon nakatandog kanako. Ug kinahanglan kita mahibalo nga sa usa ka punto, ang atong mga paglaom ug ang atong lig-on nga mga pagtuo mahimong masulayan ug malunsay gayod diha sa susamang lisod kaayo nga pagsulay sa personal nga pag-antos usab. Akong matahom nga batan-ong mga higala, ang wala masulayi nga hugot nga pagtuo dili gayod hugot nga pagtuo. Kita moingon nga kita natukod diha sa bato ni Kristo. Nan, kita kinahanglan gayod, tungod ang kinabuhi adunay mga bagyo ug mga unos, ug ang usa ka balason nga pundasyon dili gayod makagunit kon mohuyop ang hangin, ug mobundak ang ulan, ug moabot ang mga baha.33
Usa ka kataposan nga komentaryo samtang kita mopadayon ngadto sa pagtapos niini nga sibya sa maanindot nga bag-ong tuig, lakip ang usa ka bag-o nga tuig sa institute. Ang uban kaninyo dinha tingali nabalaka mahitungod sa mga butang nga mas seryoso kay sa unsa nga kurso ang kuhaon sa eskwelahan o unsa nga propesyonal nga panarbaho ang tinguhaon. Ang uban kaninyo tingali nanglimbasog sa kabug-at sa pagbati nga sad-an—ug walay butang nga makadaot kaayo ug makapakunhod sa atong paglaom ug magdala og mas dakong pagkahimulag gikan sa Dios kay sa gidala sa kalapasan. Si Sister Holland ug ako mahunahunaon nga wala mipili nga himoon kini nga usa ka pakigpulong mahitungod sa sala o kalapasan, apan kami mahimong iresponsable nga dili maghisgot sa unsay gisulti sa Ginoo nga among obligasyon sa pagtudlo.
Kanunay nga adunay dako nga panginahanglan alang sa napuno sa paglaom nga baroganan ug binuhatan sa paghinulsol. Kon kita nakalapas, kita nasayod gayod kon nganong ang atong kalayo sa paglaom mag-awop-awop ug nganong usahay kini ingon og napalong. Sa ingon niana nga kondisyon, kita kinahanglan mag-usab, o ang atong paglaom alang sa usa ka madasigon nga kaugmaon malaglag. Kana nga kandila permanenteng napalong. Mao kana ngano nga kitang tanan adunay panginahanglan sa paghinulsol. Kitang tanan! Kada adlaw, si Presidente Nelson misulti.34
Mao nga hangyoon ko kamo karong gabhiona nga sulbaron dayon ang kabug-at sa kalapasan, sugod karong taknaa, ang sala nga mao ang kinadak-an nga kaaway sa paglaom ug kalipay nga akong nahibaloan sa tibuok kalibotan. Dangop ngadto sa Ginoo uban sa inyong pagkumpisal, ug dangop ngadto sa bishop kon ang inyong sala nagkinahanglan niini. Apan usba ang bisan unsa nga sayop, dako o gamay. Ang paghinulsol mao ang paagi nga kita makakuha og bag-o nga pagsugod; kini ang paagi nga kita makabaton og gibayaw nga kaugmaon. Ang kinabuhi lisod na daan nga wala pa magkarga og putos sa mga kasaypanan diha sa inyong luyo—tibuok adlaw, matag adlaw, tibuok gabii, matag gabii. Idiskarga kana. Ilisi ang kabalaka og kalinaw. Ilisi ang kaguol ngadto sa kalipay. Si Kristo mihatag sa Iyang kinabuhi mismo aron nga kamo mahimong gawasnon sa pagbuhat niana.
Dayon kamo makabuhat sa gihangyo ni Nephi nga buhaton natong tanan. Sa unsay iyang panamilit nga mensahe sa wala pa gayod iyang kamatayon, kini nga anak nga lalaki kinsa nakakita og daghan kaayong panagbangi ug panagbingkil misulti sa unsay gusto ug gipaningkamotan ni Sister Holland ug nako nga isulti karong gabhiona:
“Mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaom, ug usa ka gugma sa Dios ug sa tanan nga mga tawo.”35
“Usa ka hingpit nga kahayag sa paglaom,” gumikan sa gugma sa Dios ug sa tanan nga mga tawo––mao kana ang among gusto alang kaninyo sa bag-ong tuig. Nag-uban nianang hayag nga paglaom mao ang dili ikalimod nga hunghong nga ang Dios nahigugma kaninyo, nga si Kristo mao ang inyong Manlalaban, nga ang ebanghelyo tinuod. Ang kahayag niini mopahinumdom kaninyo nga sa ebanghelyo kanunay nga adunay––matag adlaw, matag takna––usa ka bag-o nga kahigayonan, usa ka bag-o nga kinabuhi, usa ka bag-o nga tuig. Pagkadako nga milagro! Pagkanindot nga gasa! Ug tungod sa gasa ni Kristo, ang labing maayo nga mga butang sa kinabuhi kay maatoa kon kita lig-on nga magpadayon nga motuo ug magpadayon sa pagpaningkamot ug magpadayon sa paglaom.
Nakahinumdom ba kamo niadtong mga kondisyon sa tibuok kalibotan nga akong gihisgotan sa atong pagsugod? Nan, atubanga kini ug atubanga ang inyong personal nga mga hagit nga nasayod nga uban sa hugot nga pagtuo, magmalamposon ang mga butang sa kataposan. Ayaw dawata ang kalibotan alang sa daw unsay makita kini. Ipadan-ag ang kahayag sa inyong paglaom niini, ug himoa kini kon unsa kini kinahanglan nga mahimo. Mahimo niana nga kahayag nga kamo giawhag ni Sister Holland nga kamo mahimo, usa ka kahayag nga dili gayod mapalong, ang kahayag sa Manluluwas sa kalibotan.
Magbilin ako og apostolikanhon nga panalangin diha sa matag usa kaninyo karong gabhiona alang niining bag-o nga tuig kabahin sa mga butang nga akong nahibaloan uban sa kasegurohan ug sa mga butang nga kanunay ninyong kinahanglanon. Ako mobuhat sa ingon tungod sa akong gugma alang kaninyo, sa gugma sa Ginoo alang kaninyo, sa gugma sa Unang Kapangulohan ug sa Korum sa Napulog Duha alang kaninyo. Sa gugma sa tanan! Ug sa inyong pagtambong dinhi karong gabhiona. Ako mopanalangin kaninyo nga ang yano apan talagsaon nga gahom nga tiunay diha sa mga baroganan sa kaluwasan, sama sa hugot nga pagtuo ug paglaom ug gugma nga putli, mahimong kanunay nga makita ug epektibo diha sa inyong kinabuhi. Ako mopanalangin kaninyo nga mahibalo, sama nga ako nahibalo gayod, nga ang ebanghelyo ni Jesukristo bililhon sa personal nga paagi, walay kataposan nga malaomon, ug tinuod sa kahangtoran. Ako magpamatuod uban sa apostolikanhon nga awtoridad nga kini mao, ug sa ingon, mao ang bugtong nga dili mapakyas nga tubag sa daghang hagit sa kinabuhi, kaninyo ug kanako, ug ang bugtong nga paagi nga mahimaya diha sa kahalangdon sa kahangtoran.
Ako mopanalangin ni bisan kinsa kaninyo kinsa tingali nakasinati niining mga panahona og “krisis sa hugot nga pagtuo.” Ang tinuod nga hugot nga pagtuo, makapausab sa kinabuhi nga hugot nga pagtuo, hugot nga pagtuo sama kang Abraham, kanunay nga anaa sa krisis. Mao kana ang paagi nga inyong mahibaloan kon hugot nga pagtuo ba gayod kini. Ako mosaad kaninyo nga ang dugang nga hugot nga pagtuo magpasabot og menos nga krisis hangtod sa kataposan ang Dios moingon: “Maayo! Buotan ka ug matinumanon nga sulugoon.”36
Ako mopanalangin sa matag usa kaninyo nga mahibalo nga Ang Simbahan ni Jesukristo sa mga Santos sa Ulahing mga Adlaw mao gayod kana: ang Simbahan ni Jesukristo. Ug nga pinaagi lamang sa mga ordinansa ug mga kahigayonan nga gihatag niini nga ang usa ka tawo hingpit nga “mahingkod sama sa kahingkod ni Kristo.”37 Ako mopanalangin sa matag usa kaninyo, sa indibidwal nga paagi ug pinaagi sa ngalan, sa matag gasa nga inyong gikinahanglan alang niini nga tinguha, ug ako mopanalangin kaninyo, mangamuyo kaninyo, nga mapailobon nga molahutay samtang ang inyong Amahan sa Langit, sa Iyang kaalam, mangita sa labing maayo nga paagi nga makanunayon nga makahatag kaninyo sa unsay inyong gipangayo apan dili mapakyas sa paghatag kaninyo sa unsay inyong gikinahanglan. Sa balaan nga gugma sa Dios, sa mahangtoron nga paglaban sa Manluluwas alang kanato, ug sa makanunayon nga paghupay sa Espiritu Santo, sa gahom sa balaan nga pagkapari, ug sa propetikanhon nga tradisyon nga kasamtangang gihulagway diha ni Presidente Russell M. Nelson, sa kabalaan sa Basahon ni Mormon, ug sa “hingpit nga kahayag sa paglaom” nga gihatag niini nga ebanghelyo, ako mopamatuod og maligdong ug sagrado ug personal nga saksi sa akong kinabuhi. Ako mobuhat sa ingon sa ngalan Niya kinsa mao ang tinubdan sa akong tanang paglaom, gani ang ngalan sa Ginoo nga si Jesukristo, amen.