Digital Lamang
Pito ka Ideya aron Mahimong Mas Nahiusa ug Matinagdanon nga Komunidad sa mga Santos
Ang paglig-on sa atong mga kongregasyon magsugod diri kanato.
Litrato nga gibarogan og mga modelo
Diha sa usa ka Simbahan kansang mga miyembro nagkatap sa tibuok kalibotan, ang atong pagpamatuod sa Langitnong Amahan ug ni Ginoong Jesukristo naghiusa sa atong mga komunidad sa mga Santos sa Ulahing mga Adlaw. Kita nagtambayayong sa paningkamot aron mas mahisama sa atong Manluluwas, naghangop sa kamatuoran nga “kon kamo dili magkahiusa kamo dili ako” (Doktrina ug mga Pakigsaad 38:27).
Sa 4 Nephi atong mabasa ang mahitungod sa pag-uswag ug pagkapukan sa usa ka katilingban nga nakasentro kang Kristo. Walay panaglalis taliwala kanila, ug sila aduna sa “tanan nga mga butang nga alang kanilang tanan” (4 Nephi 1:3), ilang giatiman ang ilang mga kabos, ug nadasig tungod sa “gugma sa Dios” (4 Nephi 1:15) nga anaa diha sa ilang mga kasingkasing. Nagkahiusa sila (tan-awa sa 4 Nephi 1:17). Hinuon, sa paglabay sa panahon ilang gisalikway kini nga mga hiyas ug nagpasulabi sa ilang kaugalingon, nawala ang nahiusa nga katilingban nga sa makausa ilang naangkon.
Unsaon nato nga mouswag ngadto sa usa ka komunidad nga mas nakasentro ni Kristo sama sa ilang nabatonan kaniadto? Ang mosunod mao ang pito ka ideya nga makatabang kanato nga mahimong mas mahiusa isip mga anak sa Dios.
1. Ipaila ang Imong Kaugalingon Ngadto sa Dili Nimo Kaila
Isip ang Maayo nga Magbalantay, ang atong Manunubos nakaila kanato sa personal gayod ug “ang iyang kaugalingong mga karnero pagatawgon niya sa ngalan” (Juan 10:3). Makasunod kamo sa Iyang ehemplo pinaagi sa pagtinguha nga makaila ug makasabot sa usag usa. Kita makatabang usab sa uban nga mobati nga gihatagan sila og bili. Bisan unsa pa kadako o kagamay sa inyong branch, sa kanunay adunay usa ka tawo nga mas maila-ila nimo.
Ang pagpaila sa imong kaugalingon magpakita nga naghunahuna ka mahitungod sa imong mga kaigsoonan, bisan kon makighimamat ka sa usa ka tawo nga nagsimba sa unang higayon o makig-istorya sa usa nga karaan na nga miyembro kinsa talagsa ra nimo makaistorya. Kini magpakita og kamapasalamaton sa unsay gitawag ni Elder Randy D. Funk nga “ ilang kaandam nga moipon ngadto sa panon ug magpabilin diha sa panon.”1 Sa umaabot nga mga pakigsultihanay, hinumdomi ang ehemplo sa Manluluwas kon unsa ka gamhanan ug ka manggihunahunaon ang pagtawag sa usa ka tawo sa iyang ngalan.
2. Tutoki ang Atong Managsama nga Buhat—ang Buhat sa Kaluwasan ug Kahimayaan
Nagsulat ngadto sa mga Santos sa Corinto, si Apostol Pablo mihangyo nga “walay pagkabahin diha kaninyo. Paghiusa gayod kamo diha sa usa ka hunahuna ug tumong” (1 Mga Taga-Corinto 1:10). Usa ka paagi nga mahiusa sa hunahuna mao ang pagtinabangay alang sa managsama nga mga paningkamot aron makasulod og magpabilin diha sa dalan sa pakigsaad, bisan asa pa man sa kasamtangan ang matag usa kanato diha sa atong panaw. Ang imbitasyon sa pagsunod, pag-atiman, ug pagdapit, ug paghiusa diha sa buhat sa kaluwasan ug kahimayaan2 maghatag kanato og hiniusa nga mga kahigayonan isip mga magtutuman sa pakigsaad.
Makapukos kita niining upat ka balaanong gisangon nga mga responsibilidad aron matubag ang mga panginahanglan sa atong lokal nga yunit ug mga komunidad. Isip usa ka branch, ward, stake, o misyon, ang mga miyembro ug mga lider mahimong magtinambagay aron mas masabtan kon unsaon sa pagpangalagad sa usag usa diha sa managsama nga kawsa. Ang pagtambayayong diha niining managsama nga kawsa makahiusa kanato sa talagsaon kaayo nga mga paagi.
3. Likayi ang Pagpasiugda o Pagpakatap og mga Tabi-tabi
Ang mga tabi-tabi, o makapasakit nga mga libak nga tingali tinuod o dili tinuod, makapasiugda og negatibo nga pagtan-aw sa uban ug makaguba sa atong pagkasuod. Ayaw tuhoi ang makadaot nga mga tabi-tabi, kay ang pagbuhat sa ingon makamugna og mga liki diha sa pundasyon sa atong mga komunidad sa Simbahan. Bisan kon ang tabi-tabi tinuod, likayi ang pagpakatap o pagpasiugda niini. Walay tawo nga perpekto, ug walay tawo nga wala manginahanglan sa tabang sa Dios, busa ayaw pag-una-una sa paglabay sa imong bato (tan-awa sa Juan 8:7).
Kon ang usa ka miyembro sa ward o branch mangihanglan og pagkorihir, ang mga lider makigtambag kaniya sa pribado nga paagi. Si Kristo mimando, “kon ang imong igsoon makasala kanimo, adtoa siya ug pakit-a siya sa iyang sayop. Apan himoa kini nga kamo rang duha” (Mateo 18:15).
4. Pangalagad inubanan sa Pahiyom
Si Elder Adrián Ochoa sa Seventy miingon nga ang Ginoo “gusto nga kamo mahimong kabahin sa Iyang mahinungdanong buhat. Ang plano sa kalipay mahimong mas tinuod nganha ninyo kon kamo motabang sa uban sa pagsunod niini.”3 Ang atong mga tahas sa pagpangalagad maoy usa ka paagi nga kita magmaya sa pagbuhat niini.
Bisan kon ikaw kanunay nga nangalagad o kinahanglan nga masayod kon unsa ang imong tahas sa pagpangalagad, kanunay kita nga makahangyo sa Espiritu aron masayod kon unsa ang gusto sa Dios nga atong buhaton aron makaserbisyo sa uban diha sa Iyang ngalan. Samtang kita magtinguha sa pagsunod sa ehemplo sa Manluluwas sa pagpangalagad ngadto sa usa, kita makasinati sa kamaya ug kanindot sa ebanghelyo ni Jesukristo diha sa pagmugna og matinagdanon nga komunidad.
5. Paninguha nga Mas Makasabot sa Usag Usa
Kitang tanan adunay lain-lain nga mga personalidad og mga kinaiya. Ug kitang tanan gikinahanglan diha sa lawas ni Kristo (tan-awa sa 1 Mga Taga-Corinto 12:12–31). Kita mahimong maninguha nga makasabot ug mas mohatag og bili sa matag tawo. Samtang kita maningkamot nga mas makaila sa usag usa, atong makita nga mas makasuporta kita sa mga panginahanglan sa usag usa.
Sama pananglit, ang usa ka kinaiya nga magkalahi taliwala kanato mao ang tali sa mga introvert [hilomon] ug mga extrovert [mahigalaon]. Ang ubang mga tawo, kasagaran nga nailhan nga mga “extrovert,” komportable kaayo sa dinagko nga mga grupo og mga buluhaton nga nanginahanglan sa ilang pagpakig-inter-aksiyon sa mga tawo nga dili nila kaila. Ang uban, gitawag nga mga “introvert” sa kasagaran mas ganahan sa mga sitwasyon nga motugot kanila sa pagpakig-inter-aksiyon sa ginagmay nga mga grupo sa mga tawo kinsa mas masuod nila. Kining duha adunay mga kalidad nga mahinungdanon sa buhat sa Ginoo. Ang Simbahan mopahigayon og daghang mga oportunidad nga usahay mas natural ngadto sa mga mahigalaon, sama sa pagpakigpulong sa simbahan, paghimo og misyonaryo nga buhat, o pagtambong sa mga kalihokan kuyog sa uban nga dili kaayo nila kaila. Samtang kita magtinguha sa paglig-on sa atong komunidad, kita makamatikod sa mga panginahanglan sa mga introvert ug mohimo og mga lakang aron tabangan sila nga moapil nga komportable diha sa buhat sa kaluwasan ug kahimayaan sa paagi nga mapahiangay sa ilang mga kalig-on ug mga kinaiya sa pagkahilomon.
Laing mga paagi nga kita makatinguha nga mas makasabot ug makasuporta sa usag usa maglakip sa pagkasensitibo sa mga background sa pamilya, ekonomiya, mga panginahanglan sa kahimsog sa panglawas, mga interes, ug kon asa nang dapita ang matag tawo diha sa dalan sa pakigsaad. Sa pagpangandam alang sa tanang matang sa mga kalihokan, mga klase, mga miting, ug mga inter-aksiyon, kita mahimong maghunahuna kanunay kon unsaon pagtabang sa matag usa aron mobati nga giapil ug makita kon unsa sila ka kinahanglanon diha sa buhat sa Ginoo. Tinuod usab kini diha sa pamaagi sa pagduol sa mga miyembro nga adunay lainlaing mga interes ug mga background.
6. Mopasaylo ug Magtinguha og Kapasayloan
Ang Bag-ong Tugon naghisgot mahitungod sa daghang mga milagroso nga pagpang-ayo ug balaanong mga tawag sa pagkadisipulo. Usa kini ka tukma sa tanang panahon nga saksi sa atong abilidad sa pag-usab. Ang matinagdanon ug nakasentro ni Kristo nga kongregasyon dili kompleto kon wala ang doktrina sa pagpasaylo. Importante nga kon kita nakabuhat og sayop ngadto sa uban ug kon sila nakabuhat og sala ngari kanato, kitang tanan makapasig-uli pinaagi sa atong Manunubos (tan-awa sa 2 Mga Taga-Corinto 5:18).
Si Presidente Russell M. Nelson nag-awhag kanato nga “magbansay sa pagpaubos, kaisog, ug kalig-on nga gikinahanglan sa pagpasaylo ug sa pagtinguha og kapasayloan.”4 Samtang ang pagpasaylo sa uban tingali dili sayon, kini makapalambo sa atong kapasidad sa paghigugma. Samtang ang pagtinguha og kapasayloan gikan sa uban tingali dili lalim, kini makalig-on sa atong abilidad sa paghinulsol.
Ang pagpakita og kapuangod ngadto sa mga pagkulang ug mga sayop sa uban makapalapad sa gilay-on sa maabot sa gugma sa Dios pinaagi kanato. Ang kapasayloan mopaduol sa atong grupo sa mga Santos sa Ulahing mga Adlaw ngadto kang Kristo ug motugot kanato aron ang atong “mga kasingkasing [m]abugkos diha sa pagkahiusa ug diha sa gugma sa usag usa” (Mosiah 18:21).
7. Pagmugma og Komunidad nga adunay Kagawasan sa Relihiyon Taliwala sa Tanang Relihiyon ug Tinuhoan
Ang pagmugna og mas nahiusa ug matinagdanong relihiyoso nga komunidad molapas pa sa mga utlanan sa atong kaugalingong relihiyon. Samtang ang mga miyembro sa Simbahan nagtanyag og tibuok kalibotan nga serbisyo gikan sa Argentina ngadto sa Zimbabwe, kita mahimong mohigugma sa matag tawo, bisan kon unsa pa ang ilang relihiyoso nga mga tinuhoan.
Si Ronald A. Rasband sa Kurom sa Napulog Duha ka Apostoles nagtudlo: “Isip usa ka simbahan, kita miapil sa ubang mga relihiyon nga nagpanalipod sa mga tawo sa tanang relihiyon ug tinuohan ug sa ilang katungod nga ipahayag ang ilang mga lig-on nga pagtuo. Kini wala magpasabot nga atong gidawat ang ilang mga gituohan, ni sila sa atong mga gituohan, apan kita adunay mas daghan nga komon kay sa niadtong kinsa nagtinguha sa pagpahilom kanato.”5
Pakig-istorya sa uban kon nganong ganahan sila sa ilang mga tinuohan, ug mopakigbahin kanila kon nganong ganahan mo sa inyong mga gituohan. Tan-awa kon unsay inyong mabuhat nga magkatambayayong aron mapalig-on ang inyong komunidad. Ang pagpakighigala niadtong dili kauban sa atong pagtuo makamugna og dili mapakgang nga pagkahiusa nga makahimuot sa Dios, kay kitang “tanan usa ra diha kang Kristo Jesus” (tan-awa sa Mga Taga-Galacia 3:28).