Digital Lamang

Pagkaplag og Kalipay sa Pag-indeks Dihang Lisod Basahon ang mga Rekord

Ni Daniel Wade McCombs 

Ang tagsulat nagpuyo sa Utah, USA.

Dihang mibati ko nga dili nako mabasa ang sinulatan nga anaa sa karaan nga mga rekord, ang usa ka leksiyon gikan sa kasaysayan sa Simbahan nakatabang nako nga magpadayon.

Wala pa ako sukad mahimong mapasaligon kaayo sa pag-indeks. Ganahan kaayo ko sa buhat sa templo ug nakasulay na sa paggamit sa FamilySearch.org aron sa pagpangita og mga ngalan sa mga sakop sa pamilya aron dad-on sa templo. Nagtuo ko nga ang Ginoo midasig sa mga pag-uswag sa teknolohiya aron sa pagpadayon ug pagpadali sa Iyang buhat. Nasayod ko nga ang pag-indeks adunay mahinungdanong kalabotan sa paghimo nga ang mapangita nga mga rekord dali ra nga mapalgan. Apan ang akong mga paningkamot sa pag-indeks dili pa gihapon makanunayon ug hinay.

Dayon miabot ang COVID-19 ug ang pagsirado sa mga templo. Sa kinatibuk-ang komperensiya niadtong Abril 2020, si Presidente Nelson miingon: “Samtang ang pagsimba sa templo dili pa posible karon, ako modapit ninyo nga dugangan ang inyong pag-apil sa family history, lakip ang family history research ug pag-indeks. Ako mosaad nga kon inyong dugangan ang inyong panahon sa buhat sa templo ug sa family history mouswag ug molambo ang inyong abilidad sa pagpaminaw Kaniya.”¹ Pagkahuman gayod mahatag kini nga imbitasyon, na-quarantine ko tungod sa pagkapaduol ngadto sa usa ka tawo nga adunay COVID-19. Nakahukom ko nga gamiton kadto nga panahon aron mosulay na usab sa pag-indeks.

Sa sinugdanan ang akong kasinatian sama ra sa una—hinay ug makasagmuyo. Dili ko dali makasabot sa sinulatan sa ubang mga tawo o sa pagkahan-ay sa lain-laing mga porma. Dayon nakahinumdom ko kon unsay akong nakat-onan diha sa Mga Santos, volume 1, dihang si Joseph Smith naghubad sa Basahon ni Mormon: “Kinahanglang magmapaubsanon siya ug mopakita og hugot nga pagtuo samtang iyang tun-an ang mga sinulat.”² Sa samang higayon, si Oliver Cowdery wala makahimo sa paghubad, usa ka rason niini tungod kay siya “wala maghunahuna gawas sa pagpangutana” (Doktrina ug mga Pakigsaad 9:7). Dili ko gusto nga makahimo ko sa sama nga sayop nga nahimo ni Oliver, busa akong gidugangan ang akong kadasig ug pagkamapasaligon.

Mga Sugyot alang sa Pag-indeks

Ang pagbasa sa mga rekord mahimong malisod, ilabi na sa imong pagsugod sa pag-indeks. Sulayi kini nga mga ideya aron mapasayon kini:

• Magsugod pinaagi sa pag-ampo alang sa balaanong tabang aron makabasa sa mga rekord.

• Magpadayon sa usa lamang ka proyekto (pundok sa mga rekord). Kon magkadaghan ang imong matrabaho sulod sa sama nga proyekto, mas mahimong pamilyar ang mga sinulatan, ug mas dali kining basahon.

• Mangita og mga tabang sa pagsabot sa mga sinulatan sulod sa sama nga proyekto. Makita nimo kini pinaagi sa pag-klik sa “Mga Instruksiyon sa Proyekto” > “Kinatibuk-ang mga Giya sa Pag-indeks” > “Tabang sa Pagsabot sa mga Sinulatan.”

Sukad niadtong panahona, imbis nga molikay o mopalayo sa lisod nga mga proyekto sa pag-indeks, akong gikahinam ang oportunidad sa pagpakigtinabangay sa Ginoo sa pag-indeks og mga ngalan aron kadtong kinsa mitaliwan na mahimong mas mapaduol ngadto sa pagdawat sa mga ordinansa diha sa templo. Samtang akong gihunahuna pag-ayo ang mga detalye sa mga rekord nga anaa sa akong atubangan, mas nabati nako ang dugang nga pasensiya diha sa akong pagkaporsigido nga makasabot sa mga rekord, ug makamatikod ko sa tabang sa Ginoo diha sa akong kaalam kon moabot kini. Akong nabati ang katumanan sa saad ni Presidente Nelson—Nag-uswag ang akong abilidad sa pagpaminaw sa Ginoo.

Mapasalamaton ko sa kahigayonan sa pag-apil sa buhat sa kaluwasan ug kahimayaan! Ang pag-indeks usa ka maanindot kaayo nga kahigayonan sa pagsundog ni Propeta Joseph Smith diha sa pagkugi aron makasabot sa butang nga dili unta nato masabtan apan mahimong klaro pinaagi sa gasa ug gahom sa Dios.

Pagdiskobre pa og Dugang

• Pangita og kahigayonan sa pag-indeks.

• Pagbasa mahitungod sa mga kasinatian sa pipila ka pamilya diha sa “Indexing is Vital.”

• Pangita og mga tubag sa napulo ka komon nga mga pangutana mahitungod sa pag-indeks diha sa “FamilySearch Indexing: Easier Than Ever.”

Mubo nga mga Sulat

1. Russell M. Nelson, “Paminaw Kaniya,” Liahona, Mayo 2020, 90.

2. Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 46; tan-awa usab sa “Ang Tanan Nawala,” Liahona, Hulyo 2018, 13–17.