“Pagkahimong usa ka Katawhan sa Zion,” Liahona, Peb. 2023.
Pagkahimong usa ka Katawhan sa Zion
Samtang kita makigdait sa uban gikan sa lainlaing mga kagikan, atong mahibaloan nga ang ilang halapad nga mga kasinatian ug kabilin mopalambo sa atong ward ug komunidad.
Mga litrato sa maayong kabubut-on sa mga tagsulat
Sa milabayng pipila ka katuigan, kami napanalanginan aron motabang sa pagserbisyo ug pagpaambit sa ebanghelyo ngadto sa daghang mikagiw nga mga African nga nagpuyo didto sa Spokane, Washington, USA. Sa wala pa moadto sa Estados Unidos, daghan nila ang nakakita sa makalilisang nga gubat, kagutom, ug mga pamilya nga gipugos sa pagbulag sa usag usa didto sa ilang kaugalingong mga nasod sa Rwanda, Burundi, Kenya, Uganda, Tanzania, ug Democratic Republic of the Congo.
Kami nahibalo nga dili tanang ward sa tibuok kalibotan adunay mga mikagiw sa ilang dapit, apan ang tanang ward ug mga branch adunay mga tawo nga gikan sa lainlaing mga kagikan, ug kitang tanan naningkamot sa pagpundok sa Israel ug sa pagtukod og Zion kon asa kita nagpuyo. Gusto namong ihulagway kon unsa kanang “gugma, pagpaambit, pagdapit”1 alang namo samtang nagpaambit kami og pipila ka mga kasinatian nga among nasinati niining milabayng katuigan. Kami nagtuo nga kini nga mga baroganan mahimong magamit sa mga ward sa tibuok kalibotan.
Pagserbisyo
Sama ni Ammon ug sa ubang mga anak nga lalaki ni Mosiah sa ilang misyon ngadto sa mga Lamanite, gusto namo nga ang among serbisyo naggikan sa kadasig sa pagtabang sa uban nga mobati sa gugma ni Kristo alang nila (tan-awa sa Mosiah 28:1–3; Alma 26:15). Sama sa gisulti kaniadto ni Elder Jeffery R. Holland sa Korum sa Napulog Duha ka Apostoles: “Ang mga pag-ampo tubagon … kadaghanan sa matag higayon … sa Dios nga mogamit sa ubang tawo. Nan, ako mag-ampo nga Siya mogamit kanato. Ako mag-ampo nga kita mahimong tubag sa mga pag-ampo sa katawhan.”2
Si Nyafuraha Mukushaka miabot didto sa Spokane niadtong Hunyo 2019 gikan sa Burundi. Wala madugay nakasugod siya og trabaho sa usa ka pabrika sa bildo [glass factory] kada alas 6:00 sa buntag matag adlaw. Ang buntag nga eskedyul sa bus mao ang hinungdan nga dili siya makaabot sa iyang trabaho sa saktong oras. Sulod sa upat ka bulan samtang nag-andam siya nga makakuha og lisensiya sa pagdrayb, ang mga miyembro sa Simbahan momata og alas 4:40 matag buntag, moadto sa iyang balay, ug dayon ihatod siya sa iyang trabahoan. Siya mipaambit niini nga kasinatian ngadto sa iyang mga ginikanan ug igsoon, nga miabot sa Spokane niadtong Agosto 2021. Ang iyang amahan, si Vincent, nainteresado sa gipahiuli nga ebanghelyo sa dihang iyang nahibaloan kon kinsa ang andam nga mohatag og ingon niana nga serbisyo ngadto sa iyang anak nga babaye. Si Vincent mipasakop sa Simbahan niadtong Nobyembre 2021.
Si Kayitesi Muhorakeye ug ang iyang anak nga babaye, si Divin, nga gikan pa sa Democratic Republic of the Congo nga miagi sa Rwanda, miabot sa Spokane niadtong Enero 2021 aron mangita og trabaho ug balay aron ang ilang pamilya nga may pito ka anak makabalhin gikan sa Texas. Ang mga miyembro sa Simbahan mitabang nila nga makakita ug makabalhin og balay. Upat ka sakop sa pamilya ang nagpamiyembro na sa Simbahan.
Ang mga paagi sa paghigugma ug pagtabang sa among mga kaigsoonan gikan sa Africa managlahi gayod ug mohaom ra sa eskedyul ni bisan kinsa nga andam nga motabang. Ang among mga higala nagkinahanglan og tabang sa pagkat-on og Iningles, pag-adto sa grocery store, pagpa-enrol sa mga bata sa eskwelahan, pagkat-on sa pagdrayb, pag-abli og account sa bangko, pagkat-on sa pagluto og American nga pagkaon, ug uban pa. Aktibo kami nga nangita og mga oportunidad imbes maghulat lang og usa ka tawo nga mangayo og tabang o maghulat hangtod nga komportable na nga motabang.
Sila si Brother Huber ug Henry Rashidi sa wala pa ang bunyag ni Henry. Ang mga miyembro ug mga misyonaryo sa ward nagtinabangay og maayo sa pagtudlo ug pagpakigdait.
Misyonaryo nga Buhat sa Personal ug sa Online nga Paagi
Samtang kining mga mikagiw nga Swahili og pinulongan misugod sa pag-adto sa simbahan, nagkinahanglan kami og mga misyonaryo nga makasulti og Swahili ug Iningles. Ang mga misyonaryo sa ward misugod sa pagkat-on og Swahili, apan walay lumad nga mamumulong, ang pagkat-on hinay kaayo. Niadtong Marso 2019, ang mga lider sa misyon sa Washington Spokane Mission misugat sa bag-ong mga misyonaryo gikan sa airport. Sa dihang ang presidente sa misyon ug ang iyang asawa miabiabi ni Elder Noel Cohen, ilang giingnan nga sa iyang rekomendasyon sa misyon nag-ingon nga makasulti siya og Swahili. “Unsa ka kamaayo mosulti og Swahili, Elder?” nangutana sila.
Si Elder Cohen mitubag nga Swahili ang iyang lumad nga pinulongan. Siya milalin ngadto sa Estados Unidos gikan sa Kenya sa milabayng tuig. Si Elder Cohen migahin dayon sa iyang tibuok nga misyon sa among ward, ug siya ug ang iyang daghang matinud-anon nga mga kompanyon walay kakapoy nga nagtrabaho sa paghigugma ug pagdapit sa daghan niining talagsaong mga mikagiw ug mga milalin aron sa pagkat-on mahitungod sa gipahiuli nga ebanghelyo. Mapasalamaton sa tabang sa mga miyembro sa ward, si Elder Cohen miingon, “Kami ang naghimo sa daghang pagtudlo, apan ang mga miyembro ang naghimo sa daghang pagpakigdait.” (Pagkat-on og dugang mahitungod sa kasinatian ni Elder Cohen diha sa pahina 25.)
Nakat-onan namo nga ang Ginoo mas nahibalo kaysa kanamo kon unsaon pagpundok sa Iyang mga anak. Kon kita mopadayon ug molihok uban sa nagkahiusa nga hugot nga pagtuo, ang Espiritu Santo modasig ug mogiya kanato, sa kasagaran diha sa mga paagi nga lahi kaysa atong gilaoman.
Sa dihang ang COVID-19 miigo sa tingpamulak sa 2020, kaming tanan nabalaka kon unsaon sa pagpadayon sa buhat. Ang mga mikagiw nga African hilabihan ka makatilingbanon ug matinagdanon nga mga tawo, busa ang paglain [isolation] lisod alang nila. Wala nay dagkong grupo nga magpundok diha sa mga panimalay sa mga miyembro ug sa African nga mga higala usab. Niadtong Mayo 2020, nagpahigayon kami og pagpuasa sa ward ug nag-ampo nga ang Langitnong Amahan mopanalangin sa mga kinabuhi sa among African nga mga higala sa temporal ug sa espirituhanong paagi ug motabang nila sa pagduol ngadto kang Kristo.
Ingon nga mao na ang naandan sa tibuok Simbahan, ang among mga misyonaryo misugod sa pagtudlo sa online nga paagi. Nagsugod sila og Facebook page mahitungod sa Simbahan diha sa pinulongan nga Swahili.
Ang among ward mission leader nianang higayona, si Brian McCann, miingon, “Samtang nagpuasa kita aron tabangan sa Ginoo ang Swahili nga misyonaryo nga buhat, sa atong mga hunahuna nagtuo kita nga nagpasabot kini nga Swahili nga misyonaryo nga buhat diha sa Spokane. Apan gipakita gayod sa Ginoo kanato ang paggamit sa teknolohiya atol sa COVID-19, ug sa kalit lang ang mga elder nagpakita nga nag-ingon, ‘Nagtudlo kami niini nga tawo sa Norway ug niini nga tawo sa Uganda ug niini nga tawo sa Kenya.’”
Si Sifa, usa ka mikagiw nga African nga nagpuyo sa Norway, nakakita sa Facebook page ug misugod sa pagtambong sa mga leksiyon sa sayo kaayo sa buntag, sa oras sa Spokane. Si Sifa mikontak sa iyang lokal nga mga misyonaryo, ug inubanan sa tabang sa mga misyonaryo sa Spokane, siya nakakat-on mahitungod sa gipahiuli nga ebanghelyo. Siya ug ang iyang anak nga lalaki nabunyagan didto sa Norway niadtong Disyembre 2020. Si Sifa adunay nakaila nga mga tawo sa Uganda sa iyang panahon isip mikagiw didto, ug wala madugay gitudloan namo ang 20 ka tawo diha sa Ugandan nga puy-anan sa mga mikagiw.
Panaghigala ug Pag-abiabi sa Uban
Usa sa among kanhi nga mga ward mission leader naghimo og slogan nga dili malimtan sa mga miyembro sa ward: “Kami ang labing mahigalaon nga mga tawo sa Simbahan.”
Niadtong 2019 nagpahigayon kami og gabii alang sa African nga kultura aron makakat-on pa og dugang mahitungod sa among African nga mga higala ug sa ilang mga interes. Si Kimberly McCann miingon, “Aduna kami pipila ka piniritong manok, ug nagdala sila og pagkaon nga nagpakita sa ilang kultura. Sila nanganta ug nanayaw, ug makalingaw kaayo kadto.”
Si Brian McCann miingon: “Siguro si bisan kinsa nga mogahin og panahon sa atong African nga mga higala makaamgo kon unsa sila ka buotan ug mabination. Ug ganahan kaayo ka nga makauban og ingon niana. Dili unta namo matagamtaman ang nindot nga mga bulan ug katuigan sa pagpakighigala ug pagpakigsandurot ug pagpakigdait kon naghulat lang kami hangtod nga sila mabunyagan. Gusto namo nga mahimong kabahin sa ilang kinabuhi karon. Daghan kaayo sila og matudlo kanamo mahitungod sa Kristohanon nga mga kinaiya.”
Tingali labaw sa tanan, ang mga tawo nagkinahanglan nga mobati nga sila nakakaplag og pamilya dinhi taliwala sa atong kongregasyon sa mga Santos. Ang pipila ka miyembro sa ward nagsugod sa pagkat-on og Swahili aron mas masuod ug mas makasabot sa among African nga mga higala. Ang mga miyembro sa ward ug ang among African nga mga higala nagsugod sa pagdapit sa usag usa sa ilang mga panimalay. Importante kaayo kini sa daghang mikagiw nga nabulag sa ilang mga pamilya o nawad-an og mga sakop sa pamilya tungod sa gubat.
Pananglitan, si Nshimiyana Adolphe nawad-an sa iyang mga ginikanan tungod sa kagubot didto sa Democratic Republic of the Congo ug nailo sa edad nga sayis. Miabot siya isip usa ka mikagiw sa Spokane 20 ka tuig na ang milabay niadtong Agosto 2021. Samtang nagsaulog sa Pasko isip bag-ong kinabig didto sa panimalay sa miyembro, miingon siya, “Mao kini ang labing unang higayon sa akong kinabuhi nga mibati ko nga kabahin sa usa ka pamilya.”
Si Moses Lwakihugo, gikan sa Democratic Republic of the Congo, nawad-an sa iyang amahan tungod sa gubat niadtong 1997. Si Moses nagpuyo sa kampo sa mga mikagiw sobra sa 10 ka tuig. Karon usa na ka lider sa pagkapari sa grupo sa Swahili sa among ward, siya miingon, “Aduna koy nabantayan nga lahi mahitungod sa mga miyembro sa Simbahan. Gisunod gayod nila ang unsay ilang gitudlo. Sa ubang mga simbahan nga akong giapilan, walay mibisita nako. Niini nga ward, ang mga tawo miduaw ug nagdala og pagkaon sa dihang ang akong pamilya nagkasakit. Wala pa ko sukad makakita og simbahan nga puno gayod sa gugma.”
Samtang si Moses nagkat-on mahitungod sa gipahiuli nga ebanghelyo, gitawagan niya ang iyang bayaw, si Maroyi, aron sultihan mahitungod sa Simbahan. Si Maroyi, nga nagpuyo sa puy-anan sa mga mikagiw sa Burundi, miingon, “Nagkinahanglan kami niini nga simbahan dinhi sa Burundi.” Wala madugay si Moses misugod sa pagtudlo sa iyang igsoong babaye ug sa iyang bayaw pinaagi sa telepono uban sa mga misyonaryo. Ang igsoong babaye ug ang bayaw ni Moses nabunyagan, uban sa laing walo pa sa Burundi, sa samang adlaw nga gibunyagan si Moses sa Spokane. Ang grupo sa Burundi midaghan og maayo nga nagkinahanglan na sila og laing building aron masulod ang tanang tawo nga mosimba matag Dominggo.
Ang kamot sa Ginoo naggiya niini nga buhat, ug ang kasinatian ni Vumilia Tambwe naghulagway niana. Anaa siya sa balay niadtong Septyembre 2016 sa dihang ang duha ka sister nga mga misyonaryo nanuktok sa iyang pultahan. Si Vumilia milalin sa Estados Unidos lima ka tuig na ang milabay gikan sa Democratic Republic of the Congo nga miagi sa Kenya. Mabination siya nga nakig-istorya sa mga sister apan dili interesado sa ilang mensahe.
Nianang gabhiona, ang mga sister miadto sa balay sa usa ka miyembro nga pamilya alang sa panihapon nga bag-ohay lang nga nagpapuyo og mga mikagiw. Tungod kay managlahi og pinulongan, ang pamilya nga mikagiw ug ang pamilya nga nagpapuyo dili magkaistoryahanay sa usag usa. Ang mikagiw nga pamilya adunay mga libagha [rashes] sa ilang tibuok lawas, ug ang pamilya nga nagpapuyo wala masayod unsaon pagtabang nila. Sa dihang gisultihan nila ang sister nga mga misyonaryo mahitungod sa problema, ang mga sister misulti sa miyembro nga pamilya nga aduna silay nakaila nga babaye nga ginganlan og Vumilia nga makasulti og Swahili ug Iningles. Ang mga misyonaryo mibalik aron mangayo niya og tabang. Nasayran ni Vumilia nga ang hinungdan sa mga libagha kay nasaypan og gamit sa pamilya ang pangbalbas nga cream nagtuo nga lotion kini.
Ang nagpapuyo nga pamilya ug si Vumilia nahimong suod nga managhigala, ug nagsaulog sila og citizenship party alang ni Vumilia niadtong Enero 2017. Si Vumilia misugod sa iyang panaw paingon sa pagkahimong miyembro sa Ang Simbahan ni Jesukristo sa mga Santos sa Ulahing mga Adlaw tungod sa tinuoray nga panaghigala nga iyang nasinati sa mga miyembro sa Simbahan.
Laing ehemplo bahin sa tabang sa Ginoo niini nga buhat nahitabo sa wala pa ang Thanksgiving niadtong 2018. Si Diann Ross mibati nga giaghat nga moadto sa grocery store. Samtang anaa didto, iyang nabantayan nga ang African nga pamilya naglisod sa ATM machine. Ang Rusimuka ug Lwakihugo nga mga pamilya bag-ohay lang nga milalin gikan sa kampo sa mga mikagiw sa Burundi. Si Sister Ross mitabang sa mga pamilya sa ilang mga grocery ug midapit nila og panihapon alang sa Thanksgiving. Ang mga Ross, mga Lwakihugo, ug mga Rusimuka wala madugay nahimong suod nga mga higala.
Magdungan sa Pagsimba
Samtang ang pormal nga mga panagpundok sa Simbahan nahibalik na atol sa COVID-19 nga pandemya, ang balaod sa Washington State mitugot nga 25 ka porsiyento lamang sa kapasidad sa building ang mahimong magpundok. Nagpasabot kini nga ang among ward magpahigayon og upat ka panagtigom alang sa sakramento aron makaapil ang tanang miyembro. Nakahukom kami nga mopahigayon og usa niining upat ka panagtigom alang sa sakramento sa Swahili.
Niadtong Septyembre 2020, kami ug ang pipila ka laing mga magtiayon gitawag sa pagserbisyo isip pangserbisyo nga mga misyonaryo nga magtrabaho uban sa mga mikagiw nga mga African nga Swahili ang pinulongan diha sa Spokane. Ang among misyon mao ang pagpasiugda og usa ka pagbati sa paghigugma, pagdawat, ug pagpakighigala sa mikagiw nga mga African ug sa pagtabang niini nga mga higala nga maapil sa komunidad.
Niadtong Enero 2021, ang mga lider sa stake opisyal nga miporma og usa ka grupo sa Swahili uban sa tulo ka nabunyagan nga mga miyembro ug daghan pa nga nanambong. Ang panagtigom alang sa sakramento gihubad sa Iningles ug Swahili, ug kami makighiusa sa mga klase sa kabatan-onan ug sa Primary kauban sa ward diin kami gibutang. Ang tanan niining mga kaigsoonan, gikan man sa kampo sa mga mikagiw o sa laing bahin sa Africa, adunay makahuloganon, importante nga mga istorya nga ikapaambit. Ang mga panagtigom alang sa sakramento naghatag og bililhong oportunidad nga makapaminaw kon sa unsang paagi nga ang hugot nga pagtuo nakatabang sa atong African nga mga higala nga mabuntog ang dagkong kalisdanan. Ang among mga higala gikan sa Africa miabot uban sa abunda nga kabilin, ug ang ilang gugma sa musika ug sa pagkanta nahimong ingon ka maanindot nga bahin sa panagtigom alang sa sakramento.
Among nakita ang ingon ka dalaygon nga mga ehemplo sa kaisog ug pagkadaling makabangon sa pag-atubang sa kalisdanan. Among nakita ang pagpasaylo, gugma, ug grasya ug kanunayng nagdayeg sa mga ehemplo sa ilang hugot nga pagtuo diha ni Jesukristo. Daghan sa mga mikagiw nga gikan sa Africa ang nagsalig sa ilang hugot nga pagtuo sa pagbuntog sa mga pagsulay. Samtang naningkamot kami sa pagkat-on sa ilang pinulongan ug sa pagtabang nila sa paglawig sa kinabuhi diha sa usa ka bag-ong nasod, ang tinuod nga panaghigalaay naporma.
Tingali ang labing mahinungdanong leksiyon nga makat-onan natong tanan mao ang kalapad sa pamilya. Sa pagkatinuod ang panag-igsoonay nagpasabot nga ang mga tawo nga moabot sa atong ward dili na makakaplag sa ilang kaugalingon nga “mga langyaw ug mga dumuloong, kondili mga katagi-lungsod sa mga balaan ug mga sakop sa panimalay sa Dios” (Mga Taga-Efeso 2:19).