Fakakomipiuta Pē: Kakai Lalahi Kei Talavoú
Founga Kuo Tokoniʻi Ai Au ʻe he Akó—mo e Tuí—Ke u Fehangahangai mo e Taʻepaú
Hili ʻa e lavea hoku tuí (ACL), naʻe ʻikai ke u fakapapauʻi pe ʻe fēfē ʻa e kahaʻú, ka naʻe tataki au ʻe he aʻusia ko iá ki ha meʻa lahi ange ʻi he meʻa naʻá ku fakakaukau ki aí.
ʻOku ou manatuʻi ʻeku foki mai mei falemahaki ʻi he ʻaho ko iá. Naʻe tokoniʻi au ʻe heʻeku ongomātuʻá ki tuʻa mei he kaá, hū atu ki fale, pea ki hoku mohengá. ʻOku ou manatuʻi ʻeku tokotó, ongoʻi tuenoa pea ko e fuofua taimi ia ʻi heʻeku moʻuí.
Naʻá ku vaʻinga sipoti ʻi heʻeku tupu haké. Naʻá ku fakaʻamu ke u lele maile ʻi he ʻunivēsití ʻi ha ʻaho. Ka ʻi he fakaʻosinga ʻo e akoʻanga māʻolungá, naʻe lavea ai e konga kimuʻa hoku tuí (anterior cruciate ligament (ACL) —ko hono tuʻo uá ia. Naʻe fie maʻu heni ha ngaahi tafa pea mo ha fakaakeake taʻu ʻe taha ke fakaleleiʻi. Naʻe fai hoku fuofua tafá kimuʻa peá u ʻosi mei he akó, pea naʻe pau ke u nofo pē ʻi ʻapi kae kamata ʻa hoku ngaahi kaungāmeʻá ʻi ha konga foʻou ʻo ʻenau moʻuí ʻi heʻenau ako ʻi ha ngaahi kolisi foʻou, ngāue fakafaifekau, mo hiki ki ha ngaahi kolo fakalata. Kuo taʻepau ʻeni hoku kahaʻu naʻe paú.
Ko hono moʻoní, naʻá ku ʻiloʻi naʻe ʻikai makehe ʻa e ngaahi faingataʻa ko ʻení, ka kohokungaahi faingataʻa—pea naʻe ʻikai faingofua! Ko e meʻa naʻá ku fai ʻi he taimi pē ko iá ko e feinga ke maʻu ha ongo ʻoku fakapapau pea mo faʻu ha ngaahi palani ki hoku kahaʻú. Ka ʻi he lolotonga ʻo e feinga ke maʻu ʻa e fakapapau fakatāutahá pe malú, ko ha ngāue ʻoku kei hokohoko atu pē ʻi he ʻahó ni, kuó u ako ai ha ngaahi meʻa.
Faingamālie ʻi he Taimi ʻo e Taʻepaú
Naʻe talamai ʻe ha pīsope poto kiate au, “Ko e taha ʻo e ngaahi taumuʻa ʻo e ongoongoleleí ke ʻoua naʻa toʻo hotau ngaahi faingataʻaʻiá ka ke tokoniʻi kitautolu ke tau ikunaʻi nautolu.”
Kapau te tau feinga ke ako mei he taimi ʻo e taʻepaú, kae ʻikai fakaʻehiʻehi mei ai, ʻe lava ke tokoniʻi kitautolu ʻe heʻetau ngaahi aʻusiá ke tau ʻunu ke ofi ange ki he Fakamoʻuí. Kuo fokotuʻu mai foki ʻe he kau mataotao ki he ʻatamaí ko hono tali ʻa e siʻisiʻi ʻo e taimi taʻepaú ko e feituʻu lelei taha ia ki he tupulaki fakatāutahá1 Ka ko hono moʻoní, ʻoku tau fehangahangai mo e taimi ʻo e taʻepaú ʻaki ʻetau tali ia ʻi he tui.
Naʻe pehē ʻe he palesiteni fakamāmanilahi ʻo e BYU–Pathway Worldwide Palesiteni Palaieni K. ʻEsitoni: “Laka ki muʻa ʻi he tui. Kapau ʻoku ʻikai ke ke lava ʻo sio ki he solovaʻanga ki hoʻo ngaahi palopalemá ʻi he taimí ni, tui ʻe hoko mai ʻa e ngaahi solovaʻanga ko iá ʻi hoʻo laka ki muʻá ʻo kapau ʻokú ke fai ʻa e meʻa ʻoku finangalo ʻa e ʻOtuá ke ke faí.”2 ʻOku [tau] fakafeangainga lelei taha mo e taimi ʻo e taʻepaú ʻi he taimi ʻoku tau ngāue lotofalala aí, ako lolotonga ʻa e fonongá, falala ʻe tokoniʻi kitautolu ʻe he ʻOtuá ʻi heʻetau falala kiate Iá.
ʻE Lava ʻe he Akó ʻo ʻAi Hotau Kahaʻú ke Toe Pau Ange
Kuo fakahoko ʻe he akó ha fatongia mahuʻinga ʻi hono tokoniʻi au ke mahinoʻi ʻa e taimi ʻo e taʻepaú. Lolotonga ʻeku fakaakeake mei he tafá, naʻe kamata ke u toʻo ha ngaahi kalasi ʻinitaneti mei he ʻUnivēsiti Pilikihami ʻIongí –ʻAitahō. Naʻe ʻikai ke u fakapapauʻi pe naʻe lelei kiate au ʻa e ako ʻi he ʻinitanetí, ka naʻe vave hono liliu ʻeku fakakaukaú ʻe he ngaahi aʻusia naʻá ku maʻú.
Naʻá ku ako ha meʻa lahi mei hoku kaungā akó ʻa ia naʻa nau ʻi ha ngaahi tūkunga kehekehe. Naʻe tokoni ʻeku akó ke kehe ʻeku fakakaukau kiate au mo e māmani ʻoku ou ʻi aí, pea naʻe kamata ke liliu e ngaahi meʻa naʻá ku fakamuʻomuʻá. Naʻe kamata ke u fiefia ʻi he akó kae ʻikai ko hono fakahokó pē, pea naʻe mahuʻinga ange ʻa e ongoongolelei ʻo Sīsū Kalaisí ʻi heʻeku moʻuí.
Ka ne taʻeʻoua ʻeku akó, he ʻikai ke u aʻu ki he tuʻunga ʻoku ou ʻi ai ʻi he ʻaho ní. ʻOku ou tui naʻe fakatupunga ʻeku fili ke ngāue fakafaifekau taimi kakató mei he ngaahi kalasi ko iá. ʻOku ou tui naʻe tataki au ʻe he ʻOtuá pea ʻe hokohoko atu ʻEne ngāue mo aú ʻi heʻeku tui kiate Iá.
Ko e Vakai ki he Fakakātoá
Neongo ʻoku kei taʻepau pē ʻa e kahaʻú, ka ʻoku ʻikai ke toe taʻefakafiemālie ia kiate au. Kuo fakamālohia ʻe heʻeku ngaahi aʻusiá hoku vā fetuʻutaki mo e ʻOtuá mo tokoniʻi au ke liliu ʻeku founga fehangahangai mo e moʻuí. Naʻá ku fakatokangaʻi ʻi he taimi ʻe niʻihi ʻoku fie maʻu pē ke u ngāue, kae ʻikai ke tōtuʻa ʻeku fakakaukau ki he meʻa kotoa pē (ko ha meʻa ʻoku ou poto taha aí). ʻOku ʻikai ko ha tōʻonga fakakaukau noaʻia ʻeni, ka ko e loto falala ʻoku ou ʻiloʻi ʻi he taimí ni ʻe tokoniʻi au ʻe he Tamai Hēvaní, ueʻi fakalaumālie au, mo fakaava ʻa e ngaahi matapā ʻo e faingamālié maʻaku ʻi heʻeku laka atu ki muʻa ʻi he tuí.
Naʻe lea ʻa Palesiteni Lāsolo M. Nalesoni ki muí ni ʻo pehē, “ʻE hokohoko atu hono ʻunuakiʻi kitautolu ki muʻa ʻe he ivi fakalaumālie leleí neongo … ʻa e tailiilí mo e taʻepaú.”3 ʻI he fakalakalaka kuó u maʻú, kuo fetongi ʻa e fakapoʻuli ʻo e taʻepaú ʻaki ha ʻamanaki lelei ki he kahaʻú. ʻI heʻeku fakakaukau atu ki aí, kuó u fakatokangaʻi kuo ʻiate au ʻa e ʻOtuá—mahalo naʻe ʻikai ʻi he ngaahi founga naʻá ku ʻamanaki atu ki aí, ka ʻokú Ne ʻi ai maʻu pē ʻi he founga naʻá ku fie maʻu lahi taha ai Iá.