“Unsaon Nako nga Mabati ang Kalinaw Kon Bug-at ang Pamati sa Pasko?,” Liahona, Dis. 2023.
Mga Young Adult
Unsaon Nako nga Mabati ang Kalinaw Kon Bug-at ang Pamati sa Pasko?
Ang mga holiday mahimong masobrahan nga pagsaulog nga panahon, apan ang pagkaplag og gagmay nga mga paagi sa pagpunting diha kang Kristo magdala og kalinaw ug kalipay.
Mga paghulagway pinaagi ni Bill Mayer
Ang Pasko panahon gayod sa kalipay, gugma, ug kalinaw, apan ang atong mga kahimtang dili kanunay nga makapasayon niini. Misaulog ko og duha ka Pasko diha sa misyon sa Brazil, layo gikan sa akong pamilya ug diha sa dili pamilyar nga kultura. Kadto nga mga panahon sa Pasko adunay maayo nga mga higayon, apan unang mga higayon kadto nga mibati ko og mga negatibo nga mga emosyon panahon sa holiday, tungod sa pagkawalay paglaom ug kamingaw sa pamilya.
Pag-uli nako gikan sa akong misyon, ang holiday nga panahon sa gihapon dili makalingaw pareha niadtong gamay pa ko. Nagkadako nga adunay dugang pa nga mga responsibilidad, kanunay kong mobati nga daw hilabihan ka bug-at gayod tungod sa ka bisi sa panahon aron sa pagsaulog sa Pasko sa paagi nga akong gilaoman. Samtang gusto ko nga mopahuway lang sa balay, maggahin og panahon sa pagpangalagad sa uban, o malingaw sa panahon uban sa mga hinigugma, kinahanglan kong magtrabaho sa kasagaran sa Disyembre, maninguha nga makatambong sa mga kalihokan, mag-shopping alang sa mga gasa, ug magtuon alang sa mga finals sa kolehiyo.
Nasayod usab ko og daghang uban pa kinsa kasagaran maggahin sa panahon sa holiday nga nagmagul-anon sa pagkawala sa usa ka minahal, nagpuyo sa layo gikan sa panimalay, nag-atubang og lisod nga mga relasyon, o mibati og nag-inusara niining panahon sa tuig.
Apan sa akong pagkonsiderar sa daghan kaayong kalihokan niini nga panahon, naghunahuna ko—si Kristo ba gusto og holiday nga nakasentro Kaniya aron kita maugtas, mawad-an sa paglaom, ug maluya?
Nagtuo ako nga kon si Jesukristo ania karon dinhi, Iya tang pabation og kalinaw ug paglaom niini nga panahon sa holiday. Sa kataposan, natawo Siya aron sa pagtabang kanato nga mobati niadtong mga butanga. Mianhi Siya dinhi sa kalibotan aron sa pagtabang kanato sa pag-atubang ug pagbuntog sa atong mga hagit.
Sigon sa gitudlo ni Elder Neil L. Andersen sa Korum sa Napulog Duha ka Apostoles, “Ako mosaksi nga kon kita magmatarong, ang tanan natong mga luha sa kasubo, kalisdanan, ug kawalay kasegurohan pagatubagon ug pagahimoon nga eksakto diha Kaniya, ang pinalangga nga Anak sa Dios.”1
Bisan sa atong mga hagit ug mga buhatonon ug kaugtas nga nagkadaghan niining panahona sa tuig, ang atong kinabuhi mahimong mapayano ug mamaayo ang atong mga sakit sa balatian kon atong ipunting ngadto sa katuyoan alang sa Pasko—ang atong Manluluwas nga si Jesukristo.
Ang Yano nga Mensahe sa Kahayag ug Gugma
Matag tuig sukad niadtong gamay pa ko, ang akong pamilya nakabasa sa Bag-ong Tugon nga asoy sa pagkatawo ni Kristo diha sa iwag sa kandila nianang gabii sa Pasko.
Matag usa kanamo nagdawat og daghang bersikulo sa kasulatan sa mga piraso sa papel. Matag usa kanamo naggunit og taas nga kandila, apan ang una lang nga tawo nga mobasa og kusog ang modagkot sa ilang kandila. Ang ilang gamayng hayag mao lang ang nag-inusarang hayag sa lawak kon magsugod na sila og basa gikan sa Lucas kapitulo 1:
“Ug sa ikaunom ka bulan ang anghel nga si Gabriel gipadala gikan sa Dios ngadto sa usa ka lungsod sa Galilea, nga ginganlan og Nazaret,
“Ngadto sa usa ka dalagang birhen nga pangasaw-on sa usa ka lalaki nga ginganlan og Jose, nga kaliwat ni David; ug ang ngalan sa dalagang birhen mao si Maria.
“Ug ang manolunda miadto ug miingon kaniya, Kumusta ka, babayeng hinatagan sa grasya, ang Ginoo anaa uban kanimo: dalaygon ikaw diha sa mga kababayen-an” (Lucas 1:26–28).
Sa higayon nga ang unang tawo mobasa niini nga mga bersikulo, ilang gamiton ang nagsiga nga pabilo aron pagdagkot sa kandila sa sunod nga tawo. Ang unang mobasa motayhop sa ilang kayo, ug ang istorya mopadayon:
“Ug, tan-awa, magasamkon ikaw ug igaanak mo ang usa ka bata nga lalaki, ug siya imong paganganlan si Jesus” (Lucas 1:31).
“Ug iyang gianak ang iyang panganay nga usa ka lalaki, ug kini iyang giputos sa mga bakbak ug gipahigda sa pasongan, kay wala na may luna alang kanila sa balay nga abotanan” (Lucas 2:7).
Ang istorya sa pagkatawo ni Kristo magpadayon sa balaan nga paagi niini nga sundanan, tawo ngadto sa tawo ug kandila ngadto sa kandila. Sa kataposan niini nga pagbasa sa kasulatan, ang Espiritu ug ang kipatkipat nga hayag moiwag sa ngitngit nga lawak.
Bisan niadtong gamay pa ko ug wa pa kaayo kasabot sa pinulongan sa Bag-ong Tugon, kanunay kong ganahan sa tradisyon sa akong pamilya sa pagbasa mahitungod sa pagkatawo ni Kristo diha sa iwag sa kandila. Kining yano nga tradisyon nagpadayon sa pagpakita kanako nga wala kita magkinahanglan og maluho nga mga kalihokan niining panahona sa tuig aron paghimo og makalingaw nga mga panumdoman sa Pasko o paglig-on sa atong pagpamatuod sa Manluluwas.
Kon atong huptan si Jesukristo ug ang Iyang yano nga mga mensahe sa kahayag ug gugma sa pinakasentro sa atong kinabuhi, ang tanang mga kabalaka ug mga responsibilidad mapahimutang ra.
Nakapunting Ba Ako diha kang Kristo?
Ganahan kaayo ko og Pasko ug tanang kalingawan niini: ang mga tradisyon, ang mga dayandayan, ang pagkaon, ug ang musika. Ilabi na ganahan kaayo ko nianang Pasko nga nakapunting diha sa Manluluwas. Apan hapit matag tuig, mahinumdom ko sa mga holiday ug mobati og gamay nga kasagmuyo. Ang kinabuhi bisi ra kaayo aron matuman ang akong pangandoy nga ipahinungod ang tibuok buwan nga puro mga pagsaulog sa Pasko.
Sa akong mga paningkamot sa pagmugna og makalipay nga holiday, kasagaran nakong gipuno sa buluhaton ang akong kaugalingon ug mas magpunting diha sa dili importante nga mga detalye kaysa akong relasyon sa Manluluwas. Apan akong nakat-onan nga ang labing mahinungdanon mao ang paghimo og panahon alang sa gagmay, nakasentro ni Kristo nga mga naandang buhaton. Imbes nga mobati nga mapugos sa pagtando sa matag sosyal nga kalihokan o mangita og hingpit nga mga gasa, makapunting kita sa pagbuhat og maayo ug paghimo og panahon alang Kaniya matag adlaw. Ug atong maila ang atong mga paningkamot sa pagpakigbahin ug pagdapit sa Iyang kahayag, bisan og daw gamay kini.
Si Elder Dieter F. Uchtdorf sa Korum sa Napulog Duha ka Apostoles namulong mahitungod sa pagpayano sa atong kinabuhi sa pagpunting diha sa Manluluwas. Siya miingon: “Samtang maningkamot kita sa paglimpyo sa atong kinabuhi ug pagtan-aw ngadto ni Kristo sa matag hunahuna [tan-awa sa Doktrina ug mga Pakigsaad 6:36], ang tanan magsugod sa pagkahan-ay. Ang kinabuhi dili na sama sa usa ka taas nga lista sa managlahi nga paningkamot nga gipahigayon sa makuyaw nga pagbalanse.
“… Kon motan-aw kita sa atong kinabuhi ug makakita sa gatosan ka buhatonon nga butang, mobati kita nga nabug-atan. Kon kita makakita og usa ka butang—paghigugma ug pagserbisyo sa Dios ug sa Iyang mga anak, sa gatosan ka lain-laing paagi—nan kita makahimo niadtong mga butang uban sa kalipay.”2
Sa matag panahon nga mobati ko sa bug-at nga mga emosyon nga usahay mokuyog sa panahon sa Pasko, akong pahinumdoman ang akong kaugalingon nga nagpunting ko diha kang Kristo, dayon nagbuhat ako sa igo ra.
Ang mga Judeo sa Bag-ong Tugon mahimong nagpaabot sa ilang Manluluwas nga moanhi sa yuta diha sa engrande nga pasundayag, apan hinuon mianhi siya sa kalibotan sa mga panahon ug taliwala sa mga hayop. Mipahulay Siya dili dinha sa trono, apan dinha sa pasongan. Ang pagkatawo ug kinabuhi ni Jesukristo nag-una nga mga panig-ingnan sa kayano ug kamapaubsanon nga atong madapit ngari sa atong kinabuhi, ilabi na niining panahon sa tuig.
Padayon ang akong pamilya sa tradisyon sa pagbasa sa pagkatawo ni Kristo matag tuig diha sa iwag sa kandila. Usa ka Disyembre dihang mibati ko og kaugtas mahitungod sa kataposan nga mga eksamin sa eskwelahan, maghunahuna ko nga nabiyaan nako ang kahigayonan nga malingaw sa panahon sa Pasko. Apan kining yano nga tradisyon mao ang usa ka kalihokan nga nakapabati nako nga gibayaw, kontento, ug mapasalamaton. Ang paghinumdom sa pagkatawo ni Kristo nagdala og labaw nga katagbawan kay sa bisan unsang gasa nga akong nadawat o bisan unsang dayandayan nga akong ibitay nianang tuiga.
Ang Atong Labing Dakong Gasa
Kon ang kinabuhi mura og nabug-atan ra o mangitngit, ilabi na dinha sa bisi nga panahon sa holiday, hinumdomi nga si Kristo mao lamang ang tinubdan sa malungtaron nga kahayag. Sa Iyang giingon, “Ako mao ang kahayag alang sa kalibotan: siya nga magasunod kanako dili gayod magalakaw sa kangitngit, hinonoa magabaton siya sa kahayag nga magahatag og kinabuhi” (Juan 8:12).
Bag-ohay lang akong gigahin ang akong mga adlaw sa Disyembre nga naghunahuna sa sosyal nga mga kalihokan, nabalaka mahitungod sa akong pinansyal nga sitwasyon, ug nagtan-aw sa mga sakop sa akong pamilya nga gimingaw sa mga minahal nga mitaliwan na. Apan migahin usab ako og panahon sa pag-ampo agi og pasalamat alang sa akong daghang mga panalangin. Mihimo ko og sobra nga paningkamot nga moserbisyo sama sa gibuhat ni Kristo. Migahin ko og pipila ka higayon sa paghinumdom kon giunsa sa Dios pag-atiman kanako sa una, ug nasayod ko nga makasalig ko Niya bisan unsa pa ang akong mga kahimtang. Sa makausa pa, magbasa ang akong pamilya mahitungod sa pagkatawo ni Kristo diha sa iwag sa kandila, ug nahinumdoman ko sa Iyang gugma ug kalinaw.
Kon ato Siyang pangitaon labaw pa sa tanan karong panahona sa tuig—diha sa mga simbolo sa Pasko, sa mga kalingawan nga atong tambongan, sa mga gasa nga atong gipalit, ug sa serbisyo nga atong gihatag—ato Siyang makit-an (tan-awa sa Mateo 7:8). Ang Iyang impluwensya ug Espiritu anaa kanato dili lang atol sa panahon sa Pasko, apan sa kanunay.
Diha sa mga pulong ni Elder José A. Teixeira sa Seventy: “Tungod kay Siya mianhi, adunay kahulogan sa atong pagpakabuhi. Tungod kay Siya mianhi, adunay paglaom. Siya mao ang Manluluwas sa kalibotan, ug Siya mao ang atong labing dakong gasa.”3
Bisan unsa pa ang atong giatubang, makadapit kitang tanan sa atong kinabuhi sa paglaom, kalinaw, kahamugaway, ug kalipay nga gisaad sa Manluluwas.