Ang Pagdugang og mga Gasa sa Espiritu diha sa Imong Listahan sa Pasko
Paghulagway pinaagi ni Josh Talbot
Kanunay kong mohimo og lamiang sinugba nga cheese sandwich. Uban nianang lami kaayong pagkaon ug sa pipila ka ubang resipe, padayon kong lagsik ug lig-on sa tibuok nakong misyon ug hangtud sa akong pagkahingkod. Apan naminyo ko ug nanganak, ang tanan magkalahi og pangtilaw. Kinahanglan nakong padaghanan pa ang akong menu!
Hinoon, sa mga gabii nga akoang turno na sa pagluto, ang pagsulay og bag-ong luto siguradong usa ka hagit. Alang sa bag-ohay lang nga nagsugod, ang akong oras sa gabii limitado sa kasagaran. Bisan ganahan kong magluto og lain-laing pagkaon, kanunay akong may problema. Dili dayon nako makit-an ang mga lamas diha dayon, o makulangan kami og pipila niini. Sa kasagaran kay sa wala, usabon nako ang giplanong panihapon ug ang dali ug sayon ra maoy akong lutuon.
Ug sa gihapon padayon kong nagtinguha sa pagpausbaw niini nga dapit. Mao nga mihukom kong mohimo og butang nga wala pa gayud nako mahimo. Nag-ampo ko alang sa espiritwal nga gasa nga gilitok ang ngalan sa butang.
Usa ka Gasa, Daghang Kagamitan
Sa piho nga paagi, nag-ampo ko alang sa gasa sa pagkahan-ay. Oo, pagkahan-ay! May kabinet na kami alang sa mga pangtimpla. Duna sab mi mga kabinet alang sa mga gamit sa pangluto. Sa gihapon bisan naa kana sa saktong butanganan, daw mogahin gihapon ko’g daghang panahon sa pagpangita sa mga suplay kay sa pagluto.
Samtang padayon kong nag-ampo alang niini nga gasa, nagsugod ko sa pagkadawat og pihong mga ideya. Usa ka ipapilit sa bungbong nga gamayng patunganan sa mga pangtimpla makahan-ay sa mga pangtimpla ug makapasayon sa paggamit. Usa ka magnetic nga puthaw sa kusina (nga ipapilit usab sa bungbong) makatipig sa mga kutsilyo ug ubang metal nga mga gamit sa pangluto. Kini ug ang ubang mga ideya, kon gamiton na, makahimo og dakong diperensya sa akong mga paningkamot sa pagpangluto. Nagkinahanglan ka og mga sangig? Inasinan nga ahos? Ginaling nga ahos? Ako ray bahala dali ra na!
Apan alegring butang ang nahitabo. Ang ginagmayng mga ideya padayong milugwa sa akong hunahuna para sa ginagmayng pamaagi aron mas mahan-ay nako ang ubang mga dapit sa akong kinabuhi. Sama pananglit, ang akong hinimo nga tulo ka ang-ang nga tore sa mga labhanan dili mohatud sa akong pamilya ngadto sa gisaad nga yuta, apan bisan si Nephi makadayeg sa akong pamaagi sa pagtukod niini—pinaagi sa pagsunod sa mga pag-aghat nga miabut kanako usa ka piraso sa usa ka higayon.
Ang espiritwal nga gasa sa paghan-ay mipauswag sa akong kinabuhi ug sa kinabuhi sa akong pamilya nga lapas kay sa akong gihunahuna.
Ug ang tanan miabut tungod kay kini akong gipangayo.
Daghang Gasa, Diyutay ra ang Tigpangayo
Si Apostol Pablo mitudlo sa mga Taga-Corinto mahitungod sa pipila sa daghang espiritwal nga mga gasa nga anaa, sama sa pagtuo o pagpang-ayo (tan-awa sa 1 Mga Taga-Corinto 12:5–11). Ug dayon iya silang gitudloan nga “tinguhaa [kaibgi] hinoon ninyo pag-ayo ang labi pa ka dagkung mga hiyas” (1 Mga Taga-Corinto 12:31).
Posibling lisud sabton ang ideya nga ang pagkaibug [tinguha] usa ka maayong butang, apan niini nga sitwasyon posible kini. Gitudloan kita sa pagpangita sa pipila ka espiritwal nga mga gasa nga atong nakita sa uban ug dayon mohangyo sa Dios nga panalanginan kita nianang sama nga gasa. Ang atong paglaum sa paghimo niini mao ang mas maayong pagserbisyo ug pagtukod sa gingharian sa Dios (tan-awa sa D&P 46:26–29).
Dunay daghan kaayong mga gasa—mas daghan kay sa makit-an nimo diha sa mga kasulatan. Ang pagpailub usa ka espiritwal nga gasa. Mao usab ang pagkapositibo. Ug kaisug. Ug sa pagka-tighimo og kalinaw. Si Elder Larry R. Lawrence sa Seventy mitudlo: “Usahay ako maghanduraw og usa ka dako nga tipiganan sa taas sa langit, hingpit nga napuno sa espiritwal nga mga gasa, nga pweding maangkon sa tanang mga Santos kinsa dunay pagtuo aron makapangayo niini. Sa walay palad, dili kaayo daghan ang nangayo, mao nga kanunayng nanubra ang sulod sa tipiganan.”1
Mihulagway si Elder Lawrence og usa ka higala kinsa mihukom nga mag-ampo alang sa gasa sa gugmang putli. Iyang gisugilon ang iyang kasinatian: “Misulat siya: ‘Nag-ampo ako og kalamboan sa gugmang putli sa piho nga paagi sulod sa pipila ka bulan. … Sa hinay-hinay ang akong panan-aw ngadto sa uban nausab. … Nagsugod ko dili lang sa paghigugma sa mga tawo sa akong palibut apan malingaw kanila. Kaniadto, magpalayo ra ko, apan karon tinuoray na gyud kong interesado sa tanan.’”2
Ang Imong mga Gasa, Andam na ug Naghulat
Ang mga Gasang Espiritwal mas labaw gayud kabililhon kay sa mga pisikal! Kini, sa pagkatinuod, ang pinakamaayong mga gasa. Gisugo kita diha sa kasulatan, “Pangitaa sa matinguhaon nga paagi ang labing maayo nga mga gasa” (D&P 46:8).
Bisan unsay imong gipangandoy nga maablihan inigka-buntag sa Pasko, sulayi ug hunahunaa ang pipila sa “labing maayo nga mga gasa” nga naghulat usab kanimo. “Pinutos” na kini ug andam nang ipanalangin kanimo ug niadtong anaa sa imong palibut.
Mao nga padayon lang ug pangayo.