Digital Lamang: Mga Young Adult

Unsa ang Akong Wala Masabti mahitungod sa Manluluwas

Ni Jordan Winkle

Sa dihang ang akong sakit milungtad og dugay kay sa gidahom, akong nakat-onan nga ako dili kinahanglan nga moatubang og mga pagsulay nga mag-inusara.

usa ka masakiton nga lalaki naglingkod sa higdaanan

Sa dihang ang pandemya miigo sa 2020, usa ako sa unang mga tawo nga natakdan sa COVID-19 sa akong lugar sa Scotland. Sa una nagtuo ako nga kini usa ka yano nga sip-on. Apan sa nagpadayon ang panahon, ang akong panglawas nag-anam-anam og kagrabe, hangtod gani ang pagginhawa usa ka pakigbisog. Ang akong tutonlan ug mga sinus grabe nga nadaot, ug giantos nako ang kanunay nga kakapoy.

Ang pagkaayo nagpadayon sulod sa kapin og usa ka tuig ug tunga, nga nianang panahona ako dili makahimo sa pag-apil sa bisan unsa nga sport o pisikal nga kalihokan. Kinahanglan nga akong pahunongon ang tanan. Gani ako kinahanglang moundang sa unibersidad sulod sa usa ka tuig, ug ako nahimong naglagot og maayo––naglagot mahitungod sa akong mga kahimtang ug nasuko sa Langitnong Amahan sa dihang ang pagkaayo ingon og dili makab-ot.

Kita Mas Lig-on uban ni Jesukristo

Bisan pa sa akong panghunahuna, mipadayon ako sa pagpuyo sa ebanghelyo. Mipadayon ako sa pagsimba ug sa pagbuhat unsay akong mahimong ikatabang ug sa pagserbisyo sa uban. Sa inanay, ang akong kahimtang sa panghunahuna misugod sa paglambo.

Sa dihang ang labing grabe nga sintomas misugod sa pagkawala, nadawat nako ang wala paabota nga tawag sa pagserbisyo diha sa halangdong konseho [high council] sa akong stake. Bisan pa sa akong kabalaka, akong gidawat ang tawag uban sa paglaom nga ang Ginoo mohatag og paagi alang kanako sa pagtuman sa tawag bisan pa sa akong dili maayo nga panglawas (tan-awa sa 1 Nephi 3:7).

Usa sa akong unang mga bulohaton nga nadawat mao ang pagpamulong mahitungod sa Manluluwas ug sa Iyang Pag-ula. Uban sa matag pakigpulong nga akong gihatag ngadto sa ubang mga sumusunod ni Jesukristo, ang akong pagsabot Kaniya ug sa unsay Iyang nahimo alang kanako mitubo. Ako nakaamgo nga akong gibalewala ang usa ka importante kaayo nga bahin sa Iyang Pag-ula––nag-antos ug namatay ang Ginoo dili lamang alang sa atong mga sala apan alang sa atong mga kasakit. Nahibalo Siya kon unsaon pagbayaw kanato diha sa atong mga pagsulay (tan-awa sa Alma 7:12).

Si Presidente Camille N. Johnson, Kinatibuk-ang Presidente sa Relief Society, bag-ohay mitudlo:

“Si Jesukristo makapagaan sa atong karga.

“Si Jesukristo makaalsa sa atong mga palas-anon.

“Si Jesukristo naghatag og paagi alang kanato aron makalingkawas sa gibug-aton sa sala.

“Si Jesukristo mao ang atong kahupayan. …

“… Dili ko kini mahimo nga mag-inusara, ug wala kinahanglana nga mag-inusara ko, ug dili gayod ako. Ang pagpili nga mabugkos ngadto sa akong Manluluwas, si Jesukristo, pinaagi sa mga pakigsaad nga akong gihimo uban sa Dios, ‘Mahimo ko ang tanang butang pinaagi Kaniya nga nagpalig-on kanako.’ [Mga Taga-Filipos 4:13].”¹

Hilig usab ako sa pagsalig diha sa akong kaugalingon nga kalig-on, ug sa akong garbo ako sa tinuod naghunahuna nga ako makabuntog sa akong pagsulay nga mag-inusara. Apan miabot ako sa pagkaamgo nga ako wala mapakyas tungod kay ang pagsulay hilabihan kalisod, kini tungod kay ako wala motugot ni Jesukristo sa pagtanyag kanako sa Iyang kalig-on ug suporta.

Sa kataposan ang pagsabot kon unsa ang Iyang gitanyag kanako pinaagi sa Iyang makaayo nga gahom miusab sa tanan. Bisan tuod ang akong dalan ngadto sa pagkaayo dili mahimong sayon o dali, ako makakaplag og kalinaw, hingpit nga kalipay, ug kalig-on diha sa dalan pinaagi sa pagduol ngadto Kaniya.

Paglig-on sa Atong Relasyon ngadto ni Kristo

Kita dili kinahanglan nga mag-atubang sa bisan unsa nga mga pagsulay nga mag-inusara. Makasalig kita diha sa atong Manluluwas alang sa kalig-on. Nakaamgo ako nga ang espiritwal nga kalisod nga akong gibati atol sa akong pagkasakit miabot gikan sa akong kakulang og pagsabot sa akong relasyon ngadto sa Langitnong Amahan ug ni Jesukristo ug unsa nga kalig-on Sila makahatag kanako samtang ako mipadayon sa pagserbisyo, pagpaningkamot, ug sa pagsunod Kanila.

Si Presidente Dallin H. Oaks, Unang Magtatambag diha sa Unang Kapangulohan, mihatag og usa ka gamhanang pahinumdom sa atong relasyon ngadto sa Manluluwas sa dihang siya miingon: “Siya … nasayod sa atong mga panlimbasog, mga kasubo, mga pagtintal, ug sa atong mga pag-antos, tungod kay Siya andam nga misinati niining tanan isip mahinungdanong bahin sa Iyang Pag-ula. Ug tungod niini, ang Iyang Pag-ula naghatag Kaniya og gahom sa pagtabang kanato—sa paghatag kanato sa kalig-on aron makalahutay niining tanan.”²

Maayo gani, ang Ginoo miduso kanako nga mahimong mas aktibo diha sa paningkamot sa pagsabot Kaniya. Samtang ako miabot sa pagsabot Kaniya og mas maayo, ako nakahimo sa pagkakita sa Iyang kamot diha sa akong kinabuhi sa mas dako nga kadagaya ug nakakita og mga milagro sa pagkaayo, bisan kini nahimong mas dugay kay sa gipaabot. Ingon sa gitudlo usab ni Presidente Johnson, “Ang mga tighupot sa pakigsaad mapanalanginan sa kahopayan sa Manluluwas.”³

Ang pagtubo sa akong pagsabot sa Manluluwas ug ang paghupot sa akong mga pakigsaad nahimong dako kaayo nga panalangin sa akong kinabuhi. Nakahatag Siya kanako og daghan kaayo nga espiritwal ug temporal nga kahupayan gikan sa akong mga kalisod. Ako makasaad nga samtang kamo maningkamot sa pagbuhat sa sama, ang gugma sa Ginoo ug ang inyong balaang katuyoan mahimong tataw. Makaplagan ninyo ang kalig-on nga lapas sa inyong kaugalingon––sama nga ako aduna.

4 ka Paagi nga Ako Mipalig-on sa Akong Relasyon ngadto sa Manluluwas

Sa dihang ang akong sakit mipugong kanako kon unsay ako makahimo sa pagbuhat, nakakaplag ako og pipila ka mga lihok nga mitabang kanako nga mas maayo pagkakonekrtar ngadto sa Manluluwas. Ania ang pipila ka mga sugyot nga masulayan kon ikaw nangita alang sa usa ka lig-on nga koneksyon:

Pakigkonektar ngadto sa uban. Ang pandemya mipakita kanako kon unsa ka importante kini ang pagkonektar ngadto sa uban, ilabi na niadtong kinsa nagbayaw sa atong mga espiritu ug nagsuporta sa atong hugot nga pagtuo. Bisan og ang pagpakig-uban sa ubang mga Santos makahimo og kalisod sa pipila ka dapit, ang bunga sa maong paningkamot kanunay nga molabaw sa mga paninguha. Adunay kalig-on sa komunidad ilabi na kon ikaw makigbahin og mga pagpamatuod ug mga panabot sa Manluluwas ug sa Iyang ebanghelyo!
Ayaw kalimti ang mga kasulatan! Ang pagtuon sa mga kasulatan sa tinuod nagtabang! Ako mas napaduol ngadto sa Manluluwas ug napalig-on ang akong pagsabot samtang ako mituon, ilabi kon nagbasa sa kaagi sa kinabuhi ug sa mga pagtulon-an ni Kristo. Ang mga kasulatan mipamatuod sa Manluluwas, unsay Iyang nabuhat alang kanato, ug ang tanan nga Iyang gitagana alang kanato.
Dawata ang tanang oportunidad sa pagserbisyo. Kanunay ako nagkuha og kahopayan gikan sa 1 Nephi 3:7: “Ako moadto ug mobuhat sa mga butang nga ang Ginoo nagsugo, kay ako nasayod nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila.” Sa matag oportunidad nga akong gidawat, ang akong kapasidad sa pagdawat og responsibilidad mitubo lapas sa unsay ako sukad mihunahuna nga kini mahimo. Ang Ginoo gusto kanato nga motubo, ug kon mga oportunidad moabot, kita mainampoong modawat niini ug motugot Kaniya sa paggiya kanato.
Hinumdomi ang importansya sa panglantaw. Walay mahangturon nga panglantaw, ang pagsabot sa imo karon nga mga kahimtang ug mga pagsulay maingon og sama sa walay hinungdan nga pag-antos. Hinoon, samtang kita maghinumdom sa mahangturong mga panalangin ang Langitnong Amahan ug si Jesukristo nagtanyag kanato ug nagpadayon sa pagbalik ngadto Kanila, kita makabaton og kalig-on sa pagpas-an sa atong mga hagit.