“Sa Unsang Paagi nga ang Langitnong Amahan ug si Jesukristo Nalakip sa Atong mga Kinabuhi,” Liahona, Dis. 2023.
Mga Young Adult
Sa Unsang Paagi nga ang Langitnong Amahan ug si Jesukristo Nalakip sa Atong mga Kinabuhi
Ang pag-andam sa pagserbisyo og misyon naghatag kanako og oportunidad sa pagkat-on og dugang mahitungod kon giunsa Nila pag-impluwensya og maayo diha sa akong kinabuhi.
Background pinaagi ni Alecia Schubert
Sa nagdako ko, natandog kaayo ko sa pagsaksi sa full-time nga mga misyonaryo nga mipauli sa among isla sa Tonga ug mihatag sa ilang mga pagpamatuod. Kini nga mga higayon kanunay nga nag-aghat kanako sa pagserbisyo sa akong kaugalingon nga misyon. Sa dihang miabot ang panahon nga magsugod na ko sa pagpangandam, nakat-on ko og daghan kon unsay gibati sa atong Langitnong Amahan ug sa Manluluwas diri kanato.
Ania ang pipila lang ka kamatuoran nga akong nakat-onan mahitungod sa Ilang tahas sa atong kinabuhi.
1. Sila Nakahibalo Kanato
Sa dihang miapil ko sa klase sa pagpangandam sa misyonaryo, ang mga panghitabo adunay hagit. Nakigbisog ko sa personal nga mga panagsumpaki ug nabalaka nga dili ko makahimo og kalainan isip usa ka misyonaryo. Mas nabalaka ko kada adlaw.
Nakigbisog ko niini nga mga pagbati sa makadiyot ug nag-ampo aron makahibalo kon igo na ba gayod ako nga moserbisyo.
Usa ka adlaw, samtang nagsusi ko sa akong email, nag-abli ko og mensahe gikan sa ComeuntoChrist.org. Diha, sa dagko, gipabaga nga mga letra, mao ang mga pulong nga “Igo Ka Na!”
Kini nga mga pulong midulot sa akong kasingkasing, ug ako nahupay. Ang akong mga pag-ampo natubag! Nakaamgo ko nga ang Langitnong Amahan ug si Jesukristo hingpit nga nakahibalo sa atong mga kahimtang ug makatubag sa atong mga pag-ampo sa labing personal nga mga paagi.
2. Kon Kita Mosalig Kanila, Sila Mogiya Kanato
Bisan og gusto ko nga moserbisyo og misyon, nakigbisog gihapon ko sa paghimo sa desisyon. Daghan ko og personal nga mga tinguha nga mahunong usa kon moserbisyo ko. Nagsugod ko sa akong freshman nga tuig sa unibersidad, nagduhaduha ko sa pagbiya sa importante nga mga panaghigalaay, ug kanunay kong nagplano sa pag-apil sa Tongan Armed Forces. Ang akong igsoong lalaki bag-o lang usab namatay pinaagi sa paghikog, ug ang kaguol nga akong gibati nakapalisod sa pagpadayon.
Kanunay kong maghunahuna, “Ang pagserbisyo og misyon sakto ba alang kanako?”
Busa, akong gidala ang tanan nakong mga pangutana ngadto sa kinatibuk-ang komperensiya. Atol niana nga komperensiya, si Elder Dieter F. Uchtdorf mipahayag, “Kon kamo matinguhaon sa pagpangita sa kamatuoran—mahangtoron, walay kausaban nga kamatuoran—ang inyong mga pagpili mahimong mas klaro.”1
Gibati nako ang kamatuoran sa maong pamahayag. Usahay mahimong lisod ang pagsalig nga ang Dios mohatag og mas maayo nga butang kon kita nalambigit pag-ayo sa atong kanhing mga tinguha. Apan pinaagi sa pagpuasa, pag-ampo, ug mga mensahe gikan sa kinatibuk-ang komperensiya, personal nakong nakat-onan nga kon kita mosalig sa Dios, kanunay natong makita nga Siya nagtultol kanato ngadto sa labi pa ka maayong mga oportunidad ug mga panalangin kay sa atong naamgohan sa atong kaugalingon (tan-awa sa Mga Hebreohanon 11:40).
Sama nga gihatagan sa Diyos ang mga Israelita sa disyerto sa dihang nagbasol sila sa pagbiya sa Ehipto (tan-awa sa Exodo 16:3), ug sama sa Iyang paggiya sa banay ni Lehi tabok sa kamingawan ngadto sa gisaad nga yuta (tan-awa sa 1 Nephi 18), kanunay kitang makasalig nga Siya mogiya kanato kon asa kita kinahanglan nga mahimutang kon kita mogamit og hugot nga pagtuo.
3. Sila Mohatag Gihapon og mga Milagro
Ang pagkat-on mahitungod sa tanang talagsaong mga paagi sa pagkalakip sa Langitnong Amahan ug ni Jesukristo sa atong mga kinabuhi nagbag-o sa akong paglaom nga ang tanang butang posible pinaagi sa hugot nga pagtuo diha kang Jesukristo (tan-awa sa Mateo 19:26). Bisan kon kita nakigbisog sa mga pagbati nga dili igo, Sila mopanalangin kanato sa gikinahanglan nga tabang ug mga milagro nga atong gikinahanglan alang sa atong piho nga mga sirkumstansiya.
Bisan pa sa akong mga kahadlok, ang Dios mipanalangin kanako og milagro sa pagsalig sa pagserbisyo og misyon.
Pinaagi sa pagsunod sa ebanghelyo ni Jesukristo, kita makakita og kalinaw ug mga milagro sa atong kinabuhi samtang kita maningkamot sa pagsunod Kaniya diha sa dalan sa pakigsaad. Pinaagi sa paghimo ug pagtuman sa mga pakigsaad uban sa Langitnong Amahan, “kita mag-uban nga gihugpong,” sama sa gitudlo ni Presidente Russell M. Nelson. Ug “tungod sa atong pakigsaad sa Dios, Siya dili gayod kapoyon sa Iyang mga paningkamot sa pagtabang kanato, ug kita dili gayod makabsan sa Iyang maloloy-on nga pailob ngari kanato. Ang matag usa kanato adunay usa ka espesyal nga dapit diha sa kasingkasing sa Dios. Siya adunay taas nga pangandoy alang kanato.”2 Samtang kita mangita sa Langitnong Amahan ug ni Jesukristo, atong makita ang Ilang milagrosong impluwensya sa atong kinabuhi.
Ang pag-andam alang sa usa ka misyon mipadayag kanako kon unsa ka dako ang pagpasalamat sa atong Manluluwas ug sa Langitnong Amahan sa atong pagkaandam nga mosakripisyo alang sa Ilang kawsa. Akong nakita kon sa unsang paagi ang paghatag sa akong panahon, mga talento, ug kasingkasing ngadto Kanila nakatabang gayod kanako nga “mapadayon ang positibo nga espirituhanong paglambo”3 ug pagbuntog sa kalibotan.4 Nagtuo ko sa tibuok nakong kasingkasing nga adunay maayo nga mga panalangin nga nagpaabot kanato kon kita andam nga moalagad sa Ginoo.