Digital Lamang: Mga Young Adult
Pag-atubang og Kalisdanan Wala Magpasabot og Kasaypanan sa mga Nabuhat
Samtang akong giatubang ang usa ka pagsulay human sa sunod, imbis kuhaon ang problema, ang Dios mipanalangin kanako og kalig-on ug paglaom.
Sa dihang ako usa ka tinedyer, nasakit ako og maayo. Ang akong mga ginikanan walay igong kwarta sa pagpaospital kanako, busa kami miadto gikan sa usa ka simbahan ngadto sa lain sa pagpangita og usa ka tawo nga motabang, apan walay usa nga makahimo. Wala madugay miundang kami, ug ako mipabilin nga nag-antos sa pisikal ug emosyonal nga paagi.
Ako nahinumdom nga nangutana, “Unsa ang katuyoan sa kinabuhi? Nganong ania ako dinhi? Gani ang mga milagro tinuod ba?”
Kon ako adunay gamay nga kalig-on atol niini nga sakit, mobasa ako og relihiyosong mga basahon gikan sa lain-laing mga denominasyon, naninguha sa pagpangita og mga tubag ug kalinaw. Usa ka adlaw, sa hilom nag-ampo ako ngadto sa Dios, nagsulti Kaniya sa tinguha nga ako aduna sa pagpasakop og usa ka simbahan––apan ako wala mahibalo hain niini!
Usa ka tuig ang milabay naayo ako sa pisikal nga paagi apan sa gihapon adunay daghang mga pangutana. Usa ka adlaw nakita ko ang akong igsoong lalaki nga nakigsulti ngadto sa duha ka batan-ong mga lalaki nga nagsul-ob og puti nga mga polo. Gidapit nila ako ug ang nahibilin sa akong mga igsoon sa pag-apil sa ilang panag-istoryahanay.
Kini ang unang higayon nga ako nakadungog mahitungod sa Ang Simbahan ni Jesukristo sa mga Santos sa Ulahing mga Adlaw ug sa Basahon ni Mormon.
Nianang sama nga semana, gidapit kami sa pagtambong og usa ka tulumanon sa simbahan, ug wala madugay ako gidapit sa pagpabunyag. Gidawat nako sa walay pag-ukon-ukon. Ako nahimong miyembro sukad niana ug sa wala madugay dihay pribilehiyo sa pagserbisyo og full-time nga misyon.
Bisan pa niana, dihay mga panahon nga ako miatubang og oposisyon gikan sa mga sakop sa pamilya, mga higala, ug sa uban nga naglibot kanako. Ang uban kanila misulay sa pagwagtang sa akong kadasig, nagpakaulaw kanako, ug nag-insulto sa akong bag-ong nakaplagan nga relihiyon. Apan, bisan sa mga kalisod, mipadayon ako.
Kalisdanan Nagtugot Kanato sa Pagtubo
Ang akong kasinatian sa pagpasakop sa Simbahan mitudlo kanako nga usahay ang maayong mga tawo moagi og malisod nga mga panahon. Kalisdanan ug mga pagsulay makahimo kanato sa pagbati og walay kasigurohan mahitungod sa umaabot. Ug usahay gani kita magduhaduha sa atong potensiyal o kon kita anaa ba sa hustong dalan. Apan ako miabot nga nakakat-on nga ako wala magsinati og kalisdanan tungod kay ako nakabuhat og usa ka butang nga sayop. Sa tinuod, kini bali.
Nasinati ko ang kalisdanan tungod kay ang kalisdanan kabahin sa plano sa Dios.
Ang Ginoo miingon ngadto ni Joseph Smith: “Ug kon ikaw ihulog ngadto sa lungag, o ngadto sa kamot sa mga mamumuno, ug ang silot sa kamatayon ipahamtang nganha kanimo, … kon ang mga apapangig gayod sa impiyerno mobuka ug moabli sa ba-ba og dako diha kanimo, ikaw masayod, akong anak, nga kining tanan nga mga butang makahatag kanimo og kasinatian, ug alang sa imong kaayohan” (Doktrina ug mga Pakigsaad 122:7).
Sa panahon sa atong mortal nga panaw dinhi sa yuta, mahimo kitang magsinati og mga pagsulay, kahigawad, kaguol, sakit, o ubang mga kaguol, apan kita dili makahunong o makabiya sa dalan sa ebanghelyo. Kini nga mga kalisod mao ang unsay nagtugot kanato nga mahimong mas mahisama sa Dios.
Ang Dios Nahigugma Kanato ug Nagtubag sa Atong mga Pag-ampo
Naghulagway sa iyang kasinatian sa pag-ampo ngadto sa Dios, miingon si Enos, “Ug ang akong kalag gigutom; ug ako miluhod atubangan sa akong Magbubuhat, ug ako nangamuyo ngadto kaniya sa hilabihan nga pag-ampo ug nangamuyo alang sa akong kaugalingon nga kalag; ug sa tibuok adlaw ako nangamuyo ngadto kaniya” (Enos 1:4).
Sama ni Enos, ako miampo sa kinasingkasing sa dihang ako nakigbisog sa usa ka kondisyon sa kasingkasing ug pag-usab sa wala madugay sa dihang ako miatubang og oposisyon tungod sa pagpasakop sa Simbahan. Ang Dios mitubag sa akong mga pag-ampo pinaagi sa pagdala kanako sa gikinahanglan nga kaharuhay ug paglaom nga akong gikinahanglan atol sa matag kasinatian.
Bisan tuod Siya wala kinahanglana nga moayo sa kondisyon sa akong kasingkasing o sa pagpugong sa mga tawo gikan sa pagpanggukod kanako tungod sa pagpasakop sa Simbahan, Siya sa gihapon mipadala kanako og linain nga mga pagpasalig og usab ug paglaom nga mitabang kanako sa pagpabilin nga lig-on diha sa dalan sa pakigsaad.
Kalinaw human sa Unos
Ako nahibalo nga kita ania dinhi sa yuta sa pagkat-on, ug sa pag-andam sa pakigkita sa Dios. Ako malipayon nga ang akong kalisdanan migiya kanako sa pagdawat sa ebanghelyo, sa pag-ila sa akong tinuod nga pagkatawo, ug maanaa diha sa serbisyo sa mga anak sa Dios. Mapasalamaton ako nga wala ako mibiya sa dihang giatubang ko ang kalisdanan tungod sa pagpasakop sa Simbahan. Sukad niana, ako napanalanginan nga nadawat ngadto sa Brigham Young University–Idaho ug nakahimo sa pagserbisyo isip usa ka misyonaryo alang sa BYU–Pathway Worldwide.
Ang Dios modirekta kanato, mohapsay kanato, ug mogiya kanato ngadto sa atong balaang padulngan nga Siya sa talagsaong paagi miandam alang sa matag usa kanato. Ako nahibalo nga samtang kita magpabilin diha sa Iyang dalan sa pakigsaad, atong makaplagan ang kalipay dinhi niini nga kinabuhi ingon man usab sa kinabuhi nga umaabot.