Ua Na’o Tusiga Faaeletonika
Ausiaina o Sini e ala i le Alofa Tunoa o Keriso
O le sailia o le fesoasoani faalelagi e mafai ai ona avea atili i tatou e faapei o Iesu Keriso i o tatou olaga i aso taitasi.
O Iesu Keriso o se faataitaiga atoatoa o le tuputupua’e.
“Ma sa le’i maua e ia le atoatoaga i le amataga, ae sa faaauau pea mai lea alofa tunoa i lea alofa tunoa, seia oo ina maua e ia le atoatoaga;
“Ma sa faapea ona taʼua ai o ia o le Atalii o le Atua, ona sa le’i maua e ia le atoatoaga i le amataga” (Mataupu Faavae ma Feagaiga 93:13–14).
E mafai ona tatou maua le manuia i le mulimuli i Lana faataitaiga e ala i a tatou galuega ma le alofa tunoa o Keriso.
O le alofa tunoa e aofia ai le mana gafatia ma le malosi lea e sau mai ia Iesu Keriso ma Lana Togiola. “O le manatu autu lava o le upu, o auala faalelagi e maua ai le fesoasoani po o le malosi, lea e aumai i le alofa ma le alofa mutimutivale matamau o Iesu Keriso.”1
O se vaega o le fuafuaga a le Tama Faalelagi mo i tatou o le aoao ma tuputupu ae “mai lea alofa tunoa i lea alofa tunoa,” seia oo ina mafai ona faaatoatoaina i tatou ia Keriso (tagai Moronae 10:32).
A o tatou galulue i a tatou sini ia tuputupu ae atili e pei o Iesu Keriso, e tatau ona tatou faaaofia o Ia ma faalagolago ia te Ia e maua ai le malosi, mana, ma le olioli sili atu.
Aoao atili e uiga i le faatutuina o sini mai aoaoga talu ai nei mai perofeta ma aposetolo i luga o ala o faasalalauga faaagafesootai po o le Tusitaiala mo Tamaiti ma Talavou Autalavou.