Ua Na’o Tusiga Faaeletonika: Autalavou Matutua
Mauaina o le Uiga i le Faatalitali
Ua tuuina mai e Keriso ia i tatou le malosi ma le alofa tunoa e fiafia ai i le mea o loo tatou i ai ma ia tulimatai atu i le lumanai.
E toalima o‘u uso matutua o e na faaipoipo uma i le amataga o le luasefulu o o latou tausaga. A o tuputupu ae, sa ou faamoemoe o le a foliga lo‘u olaga e pei lava o o latou olaga—ae e leai. Sa ou faauu i le kolisi e aunoa ma se uo na faamau atu i ai po o ni faamoemoega ogaoga o se mafutaga, sa amata se galuega, toe siitia atu ma nonofo ma ou matua mo sina taimi, faimalaga, faatau se fale, iai ni uo lelei sa matou potu faatasi, ma fuafua lo‘u lava ala. Ou te lei lagonaina lava se faaesea i lo‘u aiga, ae sa i ai taimi sa ou lagona ai le nofotoatasi ma sa ou manao i se tane ma se fanau e pei ona sa i ai i o‘u uso.
Ma pe le o le mea ea lena na finagalo ai le Atua mo au foi?
Ioe, sa ou le tuuatoatasi i taimi uma. Ma sa ou iloa moni lava e lei tuulafoaiina au e le Atua—sa tele ni faamanuiaga ofoofogia sa ou maua i lou olaga. Sa mafai ona ou taulai atu i lo‘u soifua maloloina faaleagaga ma faalemafaufau, sa ou volenitia ma feiloai i tagata maoae, ma sa ou maua le taimi ma le malosi e auauna atu ai i ni auala tulaga ese. Ina ua ou lagona le lotovaivai, sa ou fai ifo pea ia te au lava ia o loo ou aoao pea ma tuputupu ae ma sa silafia au e le Atua.
Na Aoga Lava le Faatalitali
Na iu lava ina ou faaipoipo, ma sa matuai aoga lava le faatalitali. I ni nai aso talu ona uma le ma faaipoipoga, sa ou maua ai lenei manatu manino lava: “Ou te matua faafetai lava mo le faatalitali. O le a ou le faafesuiaia lava mo se isi mea.”
Sa ou ofo moni lava i lenei taimi o faaaliga. Mata ou te le’i manao ia vave ona ma feiloai ma lo‘u toalua? Ae mo au, ua avea au ma se tagata ma se toalua sili atu ona o mea uma sa ou aoaoina ma o‘o i ai a o faatalitali mo lenei faamanuiaga e faavavau. Semanu ou te misia le tele o le tuputupu ae e aunoa ma lena taimi.
Ioe, o le taimi a se tasi tagata e le sili atu pe sili foi ona leaga nai lo le isi. O le taimi o le faaipoipoga e i luga o oe ma le Atua, ma o le tuputupu ae e mafai ona tupu i soo se tulaga o le olaga—faaipoipo pe le faaipoipo, pe iai foi ni fanau pe leai, ma isi. Ma o le a faaauau pea ona ou aoao ma tuputupu ae pea; manino lava o le faaipoipoga e le o se taunuuga faaiu lea i lo tatou tuputupu ae ma le atinaega faaleagaga. Ae mo au, sa i ai ni aafiaga taua semanu e le tupu i lalo o isi tulaga, ma ou te faafetai mo le auala na latou mamanuina ai lo‘u tagata.
Avanoa mo le Faamalieina ma le Faamoemoe
I se tasi po, i ni tausaga a o lei feiloai ma lo‘u toalua i le lumanai, sa ou tau ai i lenei mau i le Filipi: “Aua ua a’oa’oina au, ia to’afilemu lo’u loto i mea ua ia te au. “Ua ou iloa le mativa, ua ou iloa foi le mauoa, o i mea uma lava ou te i ai, ma mea uma e oo ia te a‘u ua a’oa’oina ai a‘u ia ou ma’ona, ma ou fia ‘ai, ia faulai mai mea, ma ia oge mea.” (4:11–12).
Sa ou maofa i lenei mau. Sa tusia e Paulo e uiga i faigata e matua ese lava nai lo o‘u faigata, ae o le savali mo au e faapea e mafai ona maua uma le filemu ma le fiafia i o tatou tulaga o i ai nei ma le faamoemoe mo le lumanai—i le taimi lava e tasi. E mafai ona ou ma’ona ma fiaai. E mafai ona ou ola i lo‘u olaga i se tulaga atoa silisili ma faafetai mo le taimi na tatau ai ona ou nofofua, ma na mafai ona ou faamoemoe ma galue agai i le faaipoipoga. Sa iai le avanoa mo mea uma e lua.
Ma na faapefea ona mafai lenei mea? O le tali o loo i le fuaiupu e sosoo ai, “Ou te mafaia mea uma lava i le faamalosi mai o Keriso ia te a’u” (Filipi 4:13). Ua tuuina mai e Keriso ia i tatou le malosi ma le alofa tunoa e fiafia ai i le mea o loo tatou i ai ma ia tulimatai atu i le lumanai.
Le‘i Ma’imau le Faatalitali
Ua faafia ona ou faitau ma toe faitau i nei mau. E faatatau i mea e sili atu nai lo le na o le nofofua. O loo tatou i ai pea i taimi uma i vaitau eseese e faatalitali ai i o tatou olaga—o le faatalitali i faamanuiaga po o tali po o suiga tetele o le olaga. I le taimi nei o looo ma faatalitali ma lo‘u toalua i ma faamoemoe ia maua ni fanau. Sa ou maitau a o maitaga o’u uso ma uo ma maua ni fanau a o ma tatalo ma faatalitali mo lea lava faamanuiaga e tasi.
O lenei faatalitali sa faigata ma e tele lava ina nutimomoia ai le loto, ae sa tele faamanuiaga ma avanoa i le taimi lava e tasi. Ua mafai ona ou faamaeaina se tikeri faauu, tuputupu ae i totonu o la‘u galuega, fausiaina se aiga e lagona ai e aiga ma uo le alofagia ma le taliaina, faaauau pea ona auauna atu i valaauga o le Ekalesia ma volenitia, ma saili faaaliga patino ma le taitaiga. O loo ma taumafai ma lo‘u toalua e faaaoga lenei taimi e avea ai ma ituaiga o tagata (ma e faamoemoe o ni matua i le lumanai) e finagalo le Atua ia avea ai i ma‘ua. E le mafai ona tatou faapuupuuina le faatalitali, ae e mafai ona tatou taumafai e aua nei maimauina.
O nisi taimi e faigata ai ona faatumauina lenei vaaiga. E pei ona tusia e Paulo, o nisi taimi tatou te “mao’ona” ma o isi taimi tatou te “fia aai.” E ala mai ia Keriso ma Lona alofa tunoa ua mafai ai ona tatou iai i na tulagauma, ina ia maua lena paleni faaeteete i le va o le faamalieina ma le faamoemoe. I le tulaga lea o le tele naua o le olaga o loo i ai i le faatalitali, ou te taumafai e aua nei misia faamanuiaga ma lesona ia e mafai ona oo mai i le taimi lava lea e tasi.