Ua Na’o Tusiga Faaeletonika: Autalavou Matutua
O A Nisi Mea e Mafai Ona Ou Aoaoina mai le Tusi a Mamona? E tele!
Sa ou manatu sa ou iloa mea uma e uiga i le Tusi a Mamona—ae mulimuli ane na ou iloa lo‘u sese.
I le taimi o la‘u misiona i Kentucky, sa ou aoaoina ai le toatele o tagata e uiga i le Tusi a Mamona. Sa ou vaai i tagata o teenaina ma isi na taliaina atoatoa.
Sa ou maua foi se aafiaga na suia ai le olaga i lenei tusi.
Ona o le Tusi a Mamona, na ou iloa ai Iesu Keriso o, “le Alii Mamana Aoao” (Mosaea 3:5). Sa ou aoao e uiga i Lana taulaga e faavavau mo au, le mana le faatuaoia o Lona alofa tunoa, ma Lona alofa e le iu ma le Tama mo i tatou uma.
E oo mai i le taimi na ou toe foi mai ai i le fale mai la‘u misiona, sa ou talitonu sa ou iloa mea uma o iai sa tatau ona ou iloa e uiga i le Tusi a Mamona. Ou te lei tautino leotele atu lava i lena, ioe—ae i le toe tepa i tua, o lenei uiga na uunaia ai le auala na ou suesue ai i tusitusiga paia ina ua uma la‘u misiona.
Ma e le o se auala lelei.
Mai le Molimau Mumῡ i le Manatumāmā
Pe a ou suesue i tusitusiga paia, sa masani ona ou toe fo’i ma toe fo’i i fuaitau masani—o le tele lava o taimi ina ia toe manatua ma toe faamautu mea sa ou aoaoina muamua. Sa ou taumafai moni lava e mafaufau loloto pea i tusitusiga paia ina ia aoaoina se mea fou, ae ou te lei lagonaina lava sa ou mauaina ni mea fou. O le naunautaiga sa i ai muamua ia te au mo le Tusi a Mamona na amata ona faaitiitia.
E lei leva ona ou toe fo‘i i le fale, ae ou amataina fo‘i se galuega fou, ma o le taimi o a‘u suesuega i tusitusiga paia ua faaitiitia mai le itula atoa sa ou suesue ai ao iai i la‘u misiona, i le 30 minute. Ona ou maua lea o se valaauga, ma o na minute e 30 na avea ma le 15. Ona oo lea i le taumafanafana sa ou auauna atu o se faufautua a le MMA. Ma sa ou faaaogaina le tele o le taimi o a‘u suesuega e iloilo ai ni nai fuaiupu sa ou faasoa soo atu i le autalavou i lea vaiaso ma lea vaiaso.
Sa ou iloa sa fiafia le Tama Faalelagi i soo se taimi lava sa ou tuuesea e suesue ai Ana afioga. Ae, o le mea moni, sa ou lē lagonaina se tulaga o lo‘u mulimuli i le valaaulia a Nifae e “taumamafa fiafia i afioga a Keriso” (2 Nifae 32:3). Sa ou faatalitonuina au lava ia e le mafai ona i ai se isi mea fou e aoaoina. Nai lo le taumafa fiafia i le Tusi a Mamona, e o‘o lava i se tofo atu iai sa tau le mafai ona faia.
O lenei uiga faaalia o le manatumāmā sa faaauau pea i la‘u uluai semesa i le Iunivesite a Polika Iaga , lea sa ou auai ai i se vasega o le Tusi a Mamona. I le aso muamua, sa tu i luga la‘u polofesa i luma o la matou vasega. I le tulimatai mai ia i matou i se pulatoa fiafia ae ati, sa ia fai mai, “O la‘u sini i lenei vasega o le faatalitonuina lea o outou e tou te matuā le iloa lava le Tusi a Mamona.”
Sa ou tulimata‘i atu i lenei mea, ae sa foliga mai e pei lava o se ituaiga laina matuiā puupuu e tasi, e faaaoga e polofesa ina ia faagauai mai ai oe nai lo se folafolaga moni lava.
O le mea e faafetai ai, mulimuli ane sa ou iloa lo‘u matua sese lava.
O Se Vaaiga Faafouina
I le avea ai ma se vaega o le vasega, sa tofia i matou e la‘u polofesa e faitau le Tusi a Mamona. E le na o le tatalaina ma vaai faatopetope i upu po o le faitau tau ina faitau se mataupu e manatua ai le tala lava lea e tasi atonu ua matou faaaogaina i le miliona o taimi.
Sa manao o ia ia matou faitauina moni lava.
Mo se faataitaiga, sa ia aoaoina i matou e uiga i le auala na lei aofia ai i uluai tusitusiga o le Tusi a Mamona ia faailoga—ma sa ia tuuina mai ia i matou e faaopoopo faailoga i se fuaitau umi ma le fenumiai mai le Alema 13 e aoao ai i matou e uiga i le eseesega e mafai ona faia e koma ma periota. Sa ia tuuina mai matou te faitauina se fuaiupu se tasi faatasi ma se lomifefiloi o le Webster i le 1828, ma sue upuautu sa i ai ni faauigaga eseese nai lo le mea sa ou manatu muamua i ai.
Sa lu‘iina e le vasega le tele o o‘u manatu faavae e uiga i le Tusi a Mamona. Ou te lei iloaina lava, mo se faataitaiga, na tusia e Nifae le 1 Nifae i le tele o tausaga talu ona latou malaga atu ma lona aiga i le nuu folafolaina (tagai i le 1 Nifae 9:1–5; 2 Nifae 5:28–31).
Sa ou iloaina ai foi o le tele o faaletonu loloto o le aganuu a sa Nifae e iai tulaga tutusa lelei e maofa ai ma luitau o loo feagai ma a tatou lava aganuu i aso nei.
Sa oo ina ou malamalama i savali faaeteete ma patino sa totoina e Mamona, Moronae, ma isi na faapitoa mo i tatou—ma lo latou matua naunau tele ina ia le maua i tatou i le masalosaloga matautia ma le faalotolotolua o le lalolagi.
Na molimau mai Peresitene Russell M. Nelson e faapea “o le Tusi a Mamona o le afioga moni lava a le Atua. O loo i ai tali i fesili sili ona taua o le olaga. O loo aoao mai ai le aoaoga faavae e uiga ia Keriso. O loo faalauteleina ma faamanino ai le tele o upumoni ‘manino ma pele’ [tagai i le 1 Nifae 13:29–33] ia na leiloloa i le tele o seneturi o taimi ma le anoanoai o faaliliuga o le Tusi Paia.
“Ua tuuina mai e le Tusi a Mamona le atoatoaga ma le malamalama sili ona mausali o le Togiola a Iesu Keriso e ono maua i so o se mea.”1
Sa amata ona suia la‘u vaaiga atoa ma la‘u molimau o lenei tusi a o ou mafaufau loloto i nei upumoni.
E Tele Atu Pea Isi Mea e Aoaoina
E ala i le taumamafa fiafia moni i ana afioga, na ou iloa ai o le Tusi a Mamona e faaalia mai ai po o ai Iesu Keriso—e le na o aoaoga faavae, ae faaletagata lava ia ma vavalalata. O loo tauaveina e le tusi Lana saini i luga o itulau uma. O se faamaumauga tumau lea e molimau mai i le ala Na te lei faagaloina ai Lona nuu o le feagaiga ma o le a Ia le faagaloina lava.
Na a’oa’o mai foi Peresitene Nelson: “E tupu se mea mamana pe a saili atu se atalii/afafine o le Atua ia iloa atili e uiga ia te Ia ma Lona Alo Pele. E leai se isi vaipanoa o loo manino ma mamana atili ai le aoaoina o na upumoni nai lo le Tusi a Mamona.”2
E le o ia te au tali uma o le olaga. Ae ua ou malamalama ou te le’i aoaoina mea uma e tatau ona ou iloa e uiga i le Tusi a Mamona mai la’u misiona—e tele atu pea isi mea e aoaoina ma faaopoopo i lo tatou faatuatua.
O a tatou faatulagaga pisi e mafai ona faigofie ai ona tatou manatumāmā ai i a tatou suesuega o tusitusiga paia. E mafai ona tatou faapea vave ifo ua tatou aoaoina mea uma o iai e tatau ona iloa. Ae ua ou iloa o le Tusi a Mamona e mafai ona faaauau pea ona ofoina mai ia i tatou le tele o mea. Afai e te manao e toe faafou lau vaaiga i tusitusiga paia, ia avea le suesueina o se mea e faamuamua. O le faatumauina o se loto ma se mafaufau matala ina ia faalolotoina ai lou liua ia Iesu Keriso ma faalautele ai lou malamalama, o le a fesoasoani ia te oe e “taumafa” moni ai i le afioga a le Atua. Sa faapena mo au.