“Faatoilaloina o le Leai o se Faamoemoega Faaleagaga—O Le A Se Mea Ou Te Faia Nei?,” Liahona, Ian. 2024.
Autalavou Matutua
Faatoilaloina o le Leai o se FaamoemoegaFaaleagaga—O Le A Se Mea Ou Te Faia Nei?
Pe a tatou agai atu ia Iesu Keriso, e le mafai lava ona leai so tatou faamoemoe.
O le laa atu i le talavou matua sa matuai manaia lava ia te au. Sa ou saunia e amata fausia le olaga sa ou manao ai i taimi uma. Sa ou auauna atu i se misiona i Pasila ona ou auai lea i le iunivesite ina ua ou taunuu i le fale. Sa faauma lo’u faailoga, maua se galuega lelei, ma taumafai e ola o se soo o Keriso.
Ma o loo ou i ai pea i lenei tulaga o le olaga. Tau lava o le faia o le mea sili ou te mafaia e mulimuli ai ia te Ia.
Ou te matua faafetai lava mo avanoa ma faamanuiaga ua ou maua. Ae a o ou toe tepa i tua ma vaai ua ou osia feagaiga uma ou te mafaia e oo mai i lenei taimi (e ese mai le faaipoipoga) ma oo atu ai i le tele o mea taua sa ou fuafuaina i taimi uma, o nisi taimi ou te lagonaina sina le mautonu—le mautinoa pe faapefea ona alualu i luma, ae maise lava faaleagaga.
Sa ou matauina foi le tauiviga a le autalavou matutua o siomia au. O nisi ua tuua foi le Ekalesia ona o loo latou lagonaina le leai o se faamoemoe po o le feagai ma ni faamoemoega ua le ausia. O a latou faatinoga e masani ona faaopoopo i la’u lisi o fesili mo le olaga.
Peitai, i le taimi nei, o a’u fesili sili ona tetele mo le Tama Faalelagi o fesili nei: E mafai faapefea ona ou faatoilaloina lenei lagona o le leai o se faamoemoe faaleagaga? O le a le mea e tatau ona ou faia nei?
A o ou tauivi ma nei fesili, ua ou aoaoina ni nai upumoni taua na fesoasoani ia te au e folau i lenei taimi o le le mautonu.
Aua Nei Faatagaina Mea Faalavefau e Tata’ieseina Oe
I le taimi lea o le le iloa po o fea e toe liliu i ai po o le a foi le mea e faamoemoe i ai, ua ou matauina ai le auala e faigofie ai ona amata ona faamuamua mea faalavefau o le lalolagi i mea faaleagaga. Na saunoa Mai Sister Rebecca L. Craven, Fesoasoani Lua i le Au Peresitene Aoao o Tamaitai Talavou, “Ua tumu le lalolagi i mea faalavefau e mafai ona faaseseina ai e oo lava i e ua filifilia, ma mafua ai ona latou faasamasamanoa i le ola ai i a latou feagaiga.”1
Ua ou vaai i isi talavou matutua o tauivi ma a latou molimau ina ua toe foi mai i a latou misiona. Ua ou vaai foi i le ala ua ausia ai e nisi ia ni tulaga mata’ina e pei o le faauuina i le iunivesite po o le faaipoipo ma iu ai ina tata’ieseina mai mea e sili ona taua pe a latou le faatagaina se avanoa mo le talalelei a Iesu Keriso i a latou faiga masani fou.
Ua ou oo foi i tulaga lelei ma leaga faaleagaga. Sa faigata i nisi taimi ona maua le faamalosi’auga ma aua nei paie pe a oo mai i mausa faaleagaga, aemaise lava pe afai e le oo mai ni faamanuiaga patino i le taimi lava na ou faamoemoe ai. Ou te manao lava i taimi uma e alualu i luma ma faaleleia—ou te le manao e faaletonu faaleagaga. Ae o nisi taimi ou te lagona ai e pei ua na ona ou alu lava faasamasamanoa e aunoa ma se faamoemoega.
Peitai, pe a ou faataatia ese se taimi mo le Tama Faalelagi ma Iesu Keriso i aso taitasi, aemaise lava i auala laiti ma faatauvaa (tagai Alema 37:6), ou te lagonaina le mafanafana ma le mausali e aumaia e Lana talalelei ia te au, e tusa lava pe matua le mautu le lalolagi.
Na saunoa Peresitene Russell M. Nelson: “Ou te aioi atu ia te outou ia faamuamua le Atua i lou olaga. Avatu ia te Ia se vaega talafeagai o lou taimi. A e faia lenei mea, ia matau le mea o loo tupu i lou malosiaga lelei faaleagaga.”2 Pe a ou filifili ma le mautinoa ia faatuatua ia Iesu Keriso i aso uma ma faaavanoa se taimi mo na mausa faaleagaga e fesootai ai au ma Ia, ou te manatua ou taimi musuia faaleagaga ma lagonaina se lagona faafouina o le faamoemoe, faamoemoe mo le lumanai, ma le faatuatua.
Saili Faatosinaga Lelei
O le isi taimi sa ou lagonaina ai le leai o se faamoemoe o le taimi o lo’u tausaga faaiu i le iunivesite. Sa faigata le olaga. O le taimi lea o le faama’i oti, o lea sa ou faanoanoa ai a o ou i ai i le fale i le faamaeaina o vasega. Sa matuai leai lava se taitaiga ma se fesootaiga i lo’u olaga.
Sa ou tauivi foi ma le lotu i le taimi lea. Sa masani ona ou alu ese mai le moega i o’u ofu moe e faalogologo ai i le sauniga faamanatuga i luga o le initoneti aua sa na o le pau lena o le uunaiga na mafai ona ou maua.
I lenei vaitaimi pogisa, sa ou aapa atu ai i lo’u aiga ma uo ma faamatala atu ia i latou le lē mautonu ma le faanoanoa sa ou lagonaina. Ou te lei lagonaina e pei sa i ai so’u faamoemoe mo le lumanai ma sa ou le iloa pe o le a faapefea ona lelei mea uma. Ma o le taimi lena na latou ta’u mai ai ia te au o loo latou tatalo mo au ma lagolagoina au e ui lava ina sa nonofo mamao ese i latou.
A o ou aapa atu i e pele o loo i ai le faatuatua loloto ma a o ou tatalo i le Tama Faalelagi faatasi ma sina uunaiga faaleagaga, sa ou lagonaina le lagolagosua ma le alofa.
Ua ou matauina a ou taulai atu i o’u faamoemoega le ausia, ou masalosaloga, po o o’u tauiviga, e lafoaia i le le mautonu lo’u faatuatua. Ua le mafai ona ou vaai i faamanuiaga i lo’u olaga. Ae e ala i le siomiaina o a’u lava i le lelei e ala i le faitauina o lo’u faamanuiaga faapeteriaka, faalogologo i savali o le konafesi aoao, ma faaalu le taimi faatasi ma e pele o e faatosinaina a’u mo le lelei sili atu, ou te toe taulai atu ai i le eseesega faavavega e faia e le talalelei a Iesu Keriso i lo’u olaga.
E tusa lava pe le o i ai se ala manino i ou luma atu i nisi taimi po o le le ausia foi o mea sa fuafuaina, o loo i ai pea le tele o le lelei i lou olaga ma le tele o avanoa o loo avanoa mo oe e fesoasoani ai ia te oe ia alualu i luma i luga o le ala o feagaiga. E tele atu isi mea e aoao ma faateleina le avanoa e tuputupu ae ai, ae maise lava faaleagaga. Ole atu i le Tama Faalelagi mo le taitaiga. O le a Ia fesoasoani ia te oe e saili ma maua ia tosinaga lelei ma avanoa mo le tuputupu ae ma le aoaoina o loo siomia ai oe (tagai Mataupu Faavae o le Faatuatua 1:13).
Taumafai Pea
O lo tatou faaleagaga faaletagata lava ia e mafai i nisi taimi ona o i galu—luga ma lalo. E i ai taimi atonu tatou te lagona ai le mausali i lo tatou faatuatua ma le olioli o le talalelei. Ae i nisi taimi, atonu tatou te tauivi ia iloa le mea e sosoo ai. Atonu tatou te tauivi pe a oo mai ni luitau, tulai mai ni fesili, po o ni faamanuiaga e tolopoina, aemaise lava pe a tatou faia le mea sili tatou te mafaia e ola ai i le talalelei. I nei taimi faigata, e masani ona ou vaai ai i tagata o uia se tasi o auala e lua: o se auala latou te aapa atu ai mo le Faaola, ma le tasi auala latou te le aapa atu ai.
O nisi taimi ou te faatusatusaina ai nei taimi i le tala ia Mose ma le gata apamemea (tagai Numera 21:8–9). Ina ua matua manaomia e Isaraelu le faamaloloina ina ua uma ona utia e gata uogo, sa tuu atu e Mose ia i latou se ala faigofie e faasaoina ai: tau lava o le vaai atu i le gata apamemea e faatusa ia Ieova. Pau lava lena o le mea sa tatau ona latou faia. Na o le tasi lava le tepa atu i ai ma o le a latou ola. Ae o le toatele naua na filifili e le faia ma sa fano. (Tagai i le 1 Nifae 17:41).
O lenei tala ou te mafaufau ai i le ala tatou te tauaveina ai le mamafa oona o le le fiafia ma le le fiafia mai o tatou faamoemoega le ausia i nisi taimi, ae o loo i ai le fofo i o tatou luma!
O le ki i le lagonaina o le faamoemoe, filemu, ma le faatuatua mo lo tatou lumanai e na o le vaai atu lava ia Iesu Keriso (tagai i le Helamana 8:14–15; Ioane 3:14–17).
Sa avea lava a’u ma se tagata faitio matuia ia te a’u lava pe a ou faia ni mea sese. Ae ona sa ou taumafai moni lava e aoao ma talitonu i le Tama Faalelagi ma Iesu Keriso, ou te iloa e mafai lava ona ou faalagolago ia i Laua mo le faamagaloga, tuputupu ae, ma le faamalologa i taimi faigata. Ou te iloa a ou vaavaai atu ia i Laua e ala i le tatalo, suesueina o le Sau, Mulimuli Mai ia te A’u, faaaluina o le taimi i le malumalu, ma faalauteleina lo’u valaauga, ou te lagonaina se lagona o le lotofaafetai ma le faafouga.
A o ou saili atu ia i Laua, ou te vaai i le talalelei a Iesu Keriso i le tulaga o loo i ai: o se sulufaiga e ofoina mai ia i tatou le faamafanafanaga, saogalemu, ma le faamalologa mai gata o le lalolagi.
Sa molimau mai ma le alofa Elder Jeffrey R. Holland o le Korama a Aposetolo e Toasefululua: “’O se susulu atoatoa o le faamoemoe,’ e fanau mai i le alofa o le Atua ma tagata uma—o le mea lena matou te mananao ai mo oe. … E o faatasi ma lena faamoemoe susulu, o le musumusuga e le mafaafitia faapea e alofa le Atua ia te outou, o Keriso o lo outou Puluvaga, ma e moni le talalelei. O lona susulu o le a faamanatu atu ai ia te oe e faapea, o le talalelei e i ai pea lava pea—aso uma, itula uma—se avanoa fou, se ola fou, ma se tausaga fou. Oka se vavega! Oka se meaalofa! Ona o le meaalofa a Keriso, o mea aupito silisili i le olaga, o a tatou ia pe afai tatou te tausisia ma tumau i le talitonu ma taumafai pea ma faamoemoe pea.”3
Agai atu ia Iesu Keriso
O le tulaga matua e aumaia le tele o suiga, tele o le le mautonu, ma, ioe, e oo lava i faamoemoega e le ausia i nisi taimi. Ae o le talalelei a Iesu Keriso e mautinoa i taimi uma ma tumau i taimi uma. Ma o Ana folafolaga ma le Tama Faalelagi e mautinoa lava a o tatou tumau ai pea i luga o le ala o feagaiga. E mafai e le lalolagi ona faafaigata i nisi taimi ona tatou taulai atu ia te Ia. Ae o le faia o soo se laasaga i luma lea e aumaia ai i tatou ia te Ia i le alualu i luma. Pe a tatou agai atu ia Keriso, o le a tatou le tautevateva lava—o loo tatou agai atu i le faamoemoe, filemu, ma le olioli.
E alala le tusitala i Manchester, England.