“Sa Siomia A’u e Tagata ae Sa Lagona Pea le Tuuatoatasi,” Liahona, Mat. 2024.
Autalavou Matutua
Sa Siomia A’u e Tagata ae Sa Lagona Pea le Tuuatoatasi
Ina ua ou agai mamao ese mai le aiga, o la’u sootaga i le lagi na fesoasoani ia te a’u e faatoilalo ai le tuuatoatasi.
E te iloa lena lagona lea e siomia ai oe e tagata ae o loo lagonaina pea le tuuatoatasi?
Talu mai le tuua ai o lo’u atunuu moni o Uganda ma siitia atu i Dubai mo galuega, sa ou lagonaina le tuuatoatasi i taimi uma. O lo’u pitonuu i le mea na ou malaga mai ai [Uganda], e faafeiloai e tagata le tasi ma le isi i luga o le auala. Matou te iloa le tasi ma le isi. Matou te lagolagoina le tasi ma le isi. Sa toatele a’u uo ma aiga o e sa auai i lo’u faatuatuaga.
Ae e le tutusa iinei. Ua ou nofo i se aganuu e matuā ese lava, i se aai tele ma siosiomia e tagata o loo galulue i ni galuega pisi. Ma e ui lava ina ou auai i la’u uarota ma taumafai e faamasani i isi talavou matutua ma tagata o le uarota, ae o a matou taimi faatulagaina pisi o galuega ua toetoe lava a le mafai ai ona vaai le tasi i le isi mo le sili atu nai lo le lua itula lea ma te faaaluina i le lotu i vaiaso taitasi.
E telē tele ma matagofie Dubai, ma ou te faafetai i lo’u i ai iinei. Ae e mafai ona matua lofituina, aemaise lava pe a e lagonaina le tuuatoatasi. E tamaoaiga tele tagata iinei ma e foliga mai ua faatulagaina lelei o latou olaga. Peitai, a o ou ola ai ma nei mea mananaia uma ma nei fale matagofie, ou te mafaufau ai i nisi taimi:
O le a la’u mea o fai i lo’u olaga? Pe o le nofoaga sa’o ea lenei mo a’u?
Toe Sailia o le Auai Ai
Sa faamalamalama mai e Elder D. Todd Christofferson o le Korama a Aposetolo e Toasefululua e faapea, “o se lagona o le avea ai ma ni ō e taua i lo tatou soifua manuia faaletino, faalemafaufau, ma le faaleagaga.”1 Ou te lei iloaina le taua tele o lena lagona o le avea ma ni ō seia oo ina ua ou le toe lagonaina—e lei maua i le lotu ma soo se mea, e moni lava.
O le a faapefea ona ou mauaina i le taimi nei, i le mamao ai mai tagata uma ou te alofa i ai?
I le aluga o taimi, sa amata ona ou iloaina “o le totonugalemu o Iesu Keriso i le avea ai ma ni ō.”2
E ui ina ou misia pea a’u uo ma aiga, sa amata ona ou vaai e lei tuueseeseina a’u mai tagata uma i lo’u olaga ina ua ou siitia ese—sa i ai pea ia te au se Faaola ma se Tama Faalelagi alofa o le sa manao i taimi uma e fesootai mai ia te au.
O lea sa amata ai ona ou faia le mea sa ou mafaia e fesootai lelei ai ma i Laua i aso uma. Sa amata ona ou faalogologo i leo pue o le suesueina o le Sau, Mulimuli Mai ia te A’u pe a ou tamoe. Ou te faia a’u meafaalogologo i le galuega ma faalogologo i tusitusiga paia a o faamaeaina a’u galuega.
O le mea e sili ona taua, sa ou aoaoina ai se meaalofa ofoofogia o le mafai lea ona tatalo sa’o atu i le Tama Faalelagi. Ou te talanoa soo atu ia te Ia ma mafaufau loloto atili nai lo se isi lava taimi na muamua atu. Pe a ou lagona le tuuatoatasi, ou te tatalo ma lagonaIna Lana faamafanafanaga. Pe a ou taina se imeli ma taumafai e tumau le onosai i a’u uo faigaluega, ou te tatalo ma ole atu ia te Ia mo se fesoasoani.
Ou te fiafia i le saunoaga a Peresitene Thomas S. Monson (1927–2018) e uiga i le tatalo: “Ia i latou … o e o loo tauivi ma luitau ma faigata tetele ma laiti, o le tatalo e maua ai le malosi faaleagaga; o le tusifolau lea i le filemu. O le tatalo o le auala lea tatou te faalatalata atu ai i le Tama i le Lagi, o lē e alofa ia te i tatou. Talanoa atu ia te Ia i le tatalo ona faalogo lea mo le tali. E tutupu vavega e ala i le tatalo.”3
E ala i le faaavanoaina o le taimi mo i Laua i lo’u olaga, aemaise lava i le tatalo faamaoni, sa amata ai ona ou iloa e ui lava e le o siomia a’u e o’u tagata ma la’u lava aganuu, ae e mafai lava ona siomia a’u e le Agaga ma lagonaina le alofa o le Atua.
E Mafai Ona Matou Fesootai i Taimi Uma
O loo faigata pea mea uma, ae o loo i ai lo’u faamoemoe mo le lumanai. Ma ua ou talitonu i le mea na aoao mai e Brother Milton Camargo, o le Fesoasoani Muamua i le Au Peresitene Aoao o le Aoga Sa: “O loo soifua le Alii o Iesu Keriso i le asō. E mafai ona i ai moni o Ia i o tatou olaga i aso taitasi. O Ia o le vaifofo i o tatou faafitauli, ae e tatau ona tatou vaavaai a’e o tatou mata ma si’itia la tatou vaai ia iloa atu o Ia.”4
O loo ou tuuatoatasi pea i nisi taimi, ae ou te iloa o le a ou tatalo pea i lo’u Tama Faalelagi ma maua le Togiola a Iesu Keriso.
Pe tu pe tootuli, tuuatoatasi pe i se vaega, e mafai lava ona ou tatalo.
E mafai ona ou tagi atu i le Tama Faalelagi.
E mafai ona ou avatu le faafetai.
E mafai ona ou ole atu mo le taitaiga ma le puipuiga.
Ma e ala i la’u sootaga faalefeagaiga, ou te iloa o a’u, o se afafine o se Tama Faalelagi alofa, o le a avea pea ma ni ō ia te ia. E ala i Lana taitaiga, e mafai ai ona ou lagona le mautinoa o loo ou i ai i le nofoaga sa’o, ma faia le mea e finagalo o Ia ou te faia.