Ua Na’o Tusiga Faatekinolosi: Talavou Matutua
Na Fesoasoani Talafaasolopito o Aiga ia te A’u e Maua se Lagona Sili Atu o le Auai
Sa mafai ona ou maua ni fesootaiga loloto atu e ala i vavega i la’u galuega o talafaasolopito o aiga.
Ou te manatua le faamatalaina e lo’u tina o le tala i le tulaga o lona aiga i Mekisiko. Sa ia ta’u mai ia i matou le ala na gaoia ai le laueleele o le tofi o lona tamā e se tagata o lona aiga ma le auala e lei iloa ai e lona tamā lona lava tamamatua. Ma sa faaiuina pea le tala i le tala faanoanoa i le oo mai o se kegi ma le susunuina i le eleele o le fale o lona aiga ma mea uma na i totonu—e aofia ai a latou faamaumauga o talafaasolopito o aiga.
Sa ou manatu o a matou faamatalaga uma o gafa i le itu o lo’u tina ua mou atu e le toe maua.
O taimi uma lava ou te tatalaina ai le FamilySearch, e na o ni nai augatupulaga lava e mafai ona ou alu ai i tua i lona itu. Ae ona o le maelega o galuega o talafaasolopito o aiga, ua mafai ai ona matou sueina le laina o lo’u tama e oo i tua i le 300 TLM. O le eseesega sa fa’ate’ia ai! Ae sa ou manatu ua leai se galuega e mafai ona ou faia, o lea ou te lei toe tago ai i le matou gafa o le aiga mo le silia ma le 10 tausaga. O o’u tuaa sa pei o se manatuaga ua galo e lei manaomia ona toe asiasi iai.
Ae ua ou aoaoina e i ai faamanuiaga mamana e oo mai i le iloaina o o tatou tuaa.
Mauaina o le Avea ai ma ni ō--ma le Faamalologa
Ou te fiafia i le saunoaga a Elder Gerrit W. Gong o le Korama a Aposetolo e Toasefululua e uiga i le faia o galuega o talafaasolopito o aiga:
“A tatou oti, e le muta ai lo tatou i a. …
“E pei lava o la e soifua mai, e tatau ai ona manatua pea o tatou tuaa. Tatou te manatua lo tatou tupuaga e ala i talaaga tuugutu, o faamaumauga faaleituaiga ma tala faaleaiga, o maafaamanatu po o nofoaga e manatua ai, ata o faatasiga, meataumafa, po o aitema e faamanatu mai ai a tatou pele.”1
O lenei faamanatu o le mafuaaga autu lea na ou filifili ai e taumafai e saili nisi faamatalaga o o’u tuaa. O le a le afaina le taumafai, a ea? Sa ou matauina foi ou te maua se lagona ootia i lo’u loto lea na uunaia ai au e siaki se laina patino o le aiga. (Ua ou iloa nei o le Agaga, e mautinoa lava.)
O taimi uma lava ou te mulimuli ai i nei uunaiga, ou te maua mulimuli ane ai se tuaa e manaomia ona faamaeaina ona sauniga i le malumalu. Ma a o faaauau pea ona ou mauaina i latou, sa ou lagonaina o lo’u sootaga ma o’u tuaa ua amata ona faateleina. Sa faafuasei ona ou iloaina le moni o i latou ma le moni o la matou fesootaiga. A o ou faia la’u talafaasolopito o aiga, sa ou lagonaina e pei o loo i ai o’u tuaa iina faatasi ma a’u, ma fesoasoani ia te a’u ia alualu i luma.
Sa na o tala tuugutu ma nai tala tusitusia e le tele o le aiga o lo’u tina na amata ai. Ae talu ai “o mea laiti ma faatauvaa e faataunuu ai mea tetele” (tagai i le Alema 37:6), o lena faamatalaga itiiti o le mea lea sa manaomia ona ou valaaulia ai se vavega mo lo’u aiga.
A o ou faaopoopo laititi atu i le gafa o le aiga o lo’u tina, sa ou mauaina se savali mai se tasi ou te lei iloaina i luga o le FamilySearch. O se igoa o le aiga o tina na ou auina atu i le malumalu sa faaleoleo e lenei tagata, ma sa latou fesili mai ia te au mo se fesoasoani e saili nisi faamatalaga e uiga i lo latou aiga.
O igoa o le malumalu e na o e tupuga mai i lena igoa e mafai ona faaleoleoina, o lona uiga sa ou aiga i lenei tagata o loo fesootai mai ia te a’u. Sa ou maofa! Sa talitonu lava lo’u aiga e na o i matou lava tagata o le Ekalesia i le itu o lo’u tina ma e leai se tasi mai lona itu sa nofo i le ISA. Peitai, sa sese i matou.
O lenei tagata na iloa ane o se tausoga mamao—o lo latou aiga na malaga mai i le Iunaite Setete i le toeitiiti 40 tausaga a o lei malaga mai lo’u tina ma o ni tagata toaaga O Le Ekalesia a Iesu Keriso o le Au Paia o Aso e Gata Ai. E ala i mea e na o vavega e mafai ona faamatalaina ai, sa latou faafesootaia mai a’u i le taimi tonu na la asiasi mai ai i lo’u setete, ma sa matou maua le avanoa e feiloai ai i le tasi ma le isi.
Sa maligi loimata ina ua matou vaai i le tasi ma le isi. A o matou faasoaina a matou tala, sa matou iloaina e tele atu mea e tutusa ai i matou nai lo le mea sa matou mafaufauina. E i ai se mea e uiga i le sailia o tagata ua leva ona leiloloa o le aiga lea e faatupuina ai lo’u loto i le alofa—o se alofa e i ai le mana e faamalolo ai le tuuatoatasi ma le lotovaivai ma faamanatu mai ai ia te a’u lo’u faasinomaga paia ma sootaga e faavavau.
O Le Taua o Tala a o Tatou Tuaa
Ua ou lagonaina le olioli tele e ala i lenei galuega. E pei ona saunoa Elder D. Todd Christofferson, “O soo se osigataulaga tatou te faia i le galuega a le Alii e fesoasoani e faamautu ai lo tatou nofoaga faatasi ma Ia, o lē na ofoina mai Lona soifua e sui a’i le toatele.”2
O faamanuiaga e avanoa mo i tatou pe a tatou faia galuega o talafaasolopito o aiga e “ofoofogia ona o lo latou tulaga, tulaga patino, ma taunuuga i le olaga faitino,”3 e pei ona faasoa mai e Elder Dale G. Renlund o le Korama a Aposetolo e Toasefululua. Sa faamanuiaina e le Alii lo’u aiga i tagata o aiga o e sa mafai ona fesoasoani ia i matou ia lagona sina latalata teisi atu i le aiga ma faafaigofie nisi o lagona o le tuuatoatasi sa matou lagonaina.
Ou te talitonu o lenei ituaiga o vavega e mafai ona oo i ai tagata uma pe afai latou te tuuina atu se taumafaiga i talafaasolopito o aiga.