Ua Na’o Tusiga Faaeletonika
O Fea O I Ai O’u Faamanuiaga Folafolaina mai le Totogiina o le Sefuluai?
E masani ona faaee mai e le Tama Faalelagi faamanuiaga “taua ae maaleale” nai loo ni vavega vave pe a tatou totogiina a tatou sefuluai.
Ua folafola mai e Malaki e faapea a tatou tuuina atu a tatou sefuluai i le Atua, o le a Ia tatala pupuni o le lagi ma sasa’a mai faamanuiaga, “ina seia silisili ona tele” (Malaki 3:10).
Faatasi ai ma lena folafolaga, e masani ona tatou faalogo i tala o faamanuiaga faavavega ma vave na oo mai ia i latou o e na faamamaluina le poloaiga e totogi a latou sefuluai. Ae o le a le mea e tupu pe afai tatou te le mauaina ni faamanuiaga talitutusa i o tatou taimi o le matuā manaomia faaletino? O le lē vaaia o faamanuiaga faapena e oo mai i o tatou lava olaga e mafai ona faavaivai loto. Atonu tatou te fesili ai foi faapea, “Pe ua le faamanuiaina ea a’u?”
Ua faamanatu mai e Elder Neil L. Andersen o le Korama a Aposetolo e Toasefululua ia i tatou e faapea “e tele auala e matala mai ai pupuni o le lagi. O nisi e faaletino, ae o le tele lava e faaleagaga. O nisi e ma’ale’ale ma faigofie ona sopoloa ai le vaai. Talitonu i le taimi a le Alii; e oo mai lava faamanuiaga.”1
O aoaoga mai ia Elder David A. Bednar o le Korama a Aposetolo e Toasefululua e mafai foi ona fesoasoani ia tatou iloa ai, o faamanuiaga tatou te maua e mafai ona oo mai i le anoanoai o auala atonu tatou te le mafaufauina. Na ia faapea mai, “O nisi o faamanuiaga eseese tatou te maua pe a tatou usiusitai i lenei poloaiga [le poloaiga o le sefuluai] e taua ae e le mafaamatalaina. O ia faamanuiaga e faatoa mafai lava ona tatou iloatinoina pe afai tatou te gauai atu i ai ma mataala faaleagaga (tagai i le 1 Korinito 2:14).”2
O le vaavaai mo, ma le iloaina o faamanuiaga taua ae maaleale o le totogiina o se sefuluai atoa e mafai ona fesoasoani ia i tatou e malamalama ai o le Atua e silafia i tatou ma o loo faamanuiaina i tatou.
Faamanuiaga Taua ae Maaleale
O le finagalo o le Atua e le tutusa i taimi uma ma o tatou loto (tagai i le Isaia 55:8–9). Ona o lena mea, atonu e le o taimi uma e oo mai ai faamanuiaga a le Atua ia i tatou i le ala tatou te mananao ai pe faamoemoeina. Mo se faataitaiga, na tuuina mai e Elder Bednar nisi o faataitaiga o faamanuiaga e le’i faamoemoeina e mafai ona maua mai le totogiina o le sefuluai: “O nisi taimi e mafai ona tatou ole atu i le Atua mo le manuia, ma Na te tuuina mai ia i tatou le malosi faaletino ma faalemafaufau. Atonu tatou te ole atu mo le uluola, ae tatou mauaina le vaaiga faateleina ma le faateleina o le onosai, pe tatou te faatoga atu mo le tuputupu a’e ae faamanuiaina i tatou i le meaalofa o le alofatunoa. Atonu Na te foai mai ia i tatou le talitonuga maumaututu ma le mautinoa a o tatou tauivi e ausia ni sini agavaa. Ma pe a tatou augani atu mo se toomaga mai faigata faaletino, faalemafaufau ma faaleagaga, atonu Na te faateleina lo tatou gafatia e fo’ia ai, ma le fetuutuuna’i.”3
Na fautuaina mai foi e Elder Bednar e faapea o nisi taimi “o faamanuiaga e o’o mai ia i tatou mai faamalama faalelagi atonu o le gafatia sili atu e faatino ai ma suia o tatou lava tulaga, nai loo le faamoemoe o le a suia o tatou tulaga e se isi tagata po o se isi mea.”4 Tagai, mo se faataitaiga, pe na faapefea ona lagona e se tane ma se ava mai Atenitina lenei mea i lo la’ua olaga i le la tala “Aisea e Te Totogi ai Pea le Sefuluai?”
O le Taimi a le Atua
E mafai foi ona tatou aoao e talitonu o faamanuiaga e oo mai i le taimi a le Atua lava ia ma i Lana lava ala.
Na saunoa mai Elder Michael John U. Teh o le Fitugafulu: “Pe a tatou usiusitai i le tulafono o le sefuluai, e tatou … te le tuuina atu i le Alii se aso e faagata ai. O loo i ai se lagona mo nisi e faamoemoe o le a oo mai faamanuiaga faaletino i se taimi faapitoa o o latou lava manatu. O le auala lenei ua tele i latou ua aveesea ai lo latou talitonuga i Ana folafolaga. Latou te faamaoni i le amataga ae latou te lē toe usitai pe a mavae sina taimi e lē e o ausia lava o latou faamoemoega. E manaomia ona tatou iloa e faia mea uma e tusa ai ma le finagalo ma le taimi atofaina a le Alii ae le o tatou loto.”5
O le malamalama o le taimi faatulagaina a le Atua e ese mai ia i tatou, e mafai ona fesoasoani ia i tatou e iloa lelei ai e le faapea o le le i ai o se vavega vave e oo mai, ona faapea ai lea ua le faamanuiaina i tatou.
O le Poto o le Atua
Na aoao mai Peresitene Dallin H. Oaks, Fesoasoani Muamua i le Au Peresitene Sili: “Na saunoa mai se tasi e faapea o le olaga o le mea lea e tupu ia i tatou a o tatou faia isi fuafuaga. Ona o mea e le mafai ona tatou puleaina, e le mafai ai ona tatou fuafuaina ma faataunuuina mea uma tatou te mananao ai i o tatou olaga. E tele mea taua o le a tutupu i o tatou olaga tatou te lei fuafuaina, ma e le o mea uma foi na o le a taliaina.”6
I la tatou malaga i le olaga nei, e oo lava ia i latou o e usiusitai i le tulafono o le sefuluai, e mafai ona oo i tauiviga tautupe o le leai o se galuega, faalavelave faafuasei e le’i faamoemoeina, o le lē puleaina lelei o mea tautupe, po o totogi e faaletonu. O le iloaina o loo pulea e le Atua, e mafai ona fesoasoani ia i tatou e tuputupu a’e ai i le faatuatua ma le onosai a o tatou saili mo faamanuiaga taua ma le maaleale o le sefuluai. Atonu o nisi o nei faigata o ni faamanuiaga moni ia o le a fesoasoani ia i tatou e tuputupu a’e ai i le tofotofoga lava ia.
Sa faasoa mai e Elder Hugh B. Brown o le Korama a Aposetolo e Toasefululua (1883–1975) i se tasi taimi se lesona sa ia aoaoina a o teuina se pupu la’au o se ituaiga vine (currant) i se faatoaga i Kanata.
A o ia faasolo e faamama ma toe faaleleia lona fanua, na ia tau atu ai i se pupu vine sa ola ai e sili atu ma le ono futu le maualuga ma e leai ni ona fua. O le mea lea, sa ia matuā ‘oti ma teuina ai i lalo, ma tuua ai na o ni tagutugutu laiti lava e foliga i se loimata o tafe ifo. O le vaaiga na foliga mai ai e peiseai o tagi le pupu vine, ma sa manatu Elder Brown sa ia faalogoina le laau o fai mai:
“’E faapefea ona e faia lenei mea ia te a’u? Sa ou i ai i se tulaga tuputupu a’e matagofie. … A o lenei ua e tipiina a’u i lalo. … Sa ou faapea o oe o le faitogalaau iinei.”
Na tali atu Elder Brown, “Vaai oe, pupu vine laititi, oa’u o le faitogalaau iinei, ma ou te iloa le mea ou te manao ia avea ai oe. Afai ou te tuuina atu oe e te alu i le ala e te manao e te alu i ai, o le a le tele se mea e te alu i ai. Ae i se aso, pe a e fua taufuifui, o le a e toe mafaufau i tua ma faapea mai, “Faafetai lava, lau Susuga. Faitogalaau, mo le tipiina o a’u i lalo, mo le lava o lou alofa ia te a’u e faatiga ai ia te a’u.”’”7
Pe a tatou tauivi i mea tautupe ma tatou le vaai i faamanuiaga folafolaina o le totogiina o le sefuluai, e mafai ona tatou ole atu ma loimata i le Atua i se tulaga talitutusa faapea, “E mafai faapefea ona e faia lenei mea ia te a’u? O loo o’u faia mea uma ua e faimai ai. A’o o lenei ua e tipiina a’u i lalo.”
I taimi nei, e mafai ona tatou faaaluina sina taimi e mafaufau ai pe o tofotofoga o loo tatou oo i ai o le a aumaia moni ai faamanuiaga silisili mai lesona tatou te aoaoina i le aluga o le faigamalaga. E mafai ona tatou aoao e faatuatua atoatoa i le Faitogalaau ma faamanuiaga ua Ia teuina mo i tatou a o tatou latalata atu ia te Ia.
Faamoemoe ma Tatalo Faifai Pea
O faamanuiaga maaleale ae taua ua tuuina mai e le Atua ia i tatou mai le totogiina o le sefuluai, e mafai ona fesoasoani ia i tatou e siitia a’e ai i luga atu o le tele o faigata o le lalolagi. O le a fetuunaia atoatoa e lo tatou Tama Faalelagi alofa nei faamanuiaga e fesoasoani ia i tatou e tuputupu a’e ai ma avea atili e faapei o Ia. A o tatou faatinoina le faatuatua i le iloaina ma le taliaina o faamanuiaga uma e oo mai, e mafai ona tatou vaaia le faataunuuina o le folafolaga a Malaki.
Pe a tulai mai masalosaloga ma faanoanoaga mai tauiviga tautupe, afai tatou te fesiligia ma loimata pe o faamanuiaina ea i tatou, tatou te lē lafoa’ia le faamoemoe! Nai loo lena, e mafai ona tatou tatalo ia vaai i faamanuiaga maaleale ma taua ua faaee mai e le Alii i o tatou luga ma maua le faatuatua i le fuafuaga a le Tama Faalelagi mo i tatou.
E pei ona molimau mai Elder Andersen, “Ou te folafola atu e faapea a o outou talitonu i le Alii, o le a mulimuli mai faamanuiaga o le lagi.”8