Aisea E Te Totogiina Ai Pea le Sefuluai?
Raquel Pedraza de Brosio, Atenitina
I nai tausaga talu ai, na faamalolo ai lo’u toalua mai lana galuega. O ona pule i le galuega, i le alolofa ai mo le mea ua tupu, na ofoina atu ia te ia se isi galuega, ae o le a manaomia ai se siitiaga faigata. Ae ui lea, na matou vaai atu i luma i le tele o faamanuiaga, e aofia ai le faaauau ai ona maua o se galuega.
E ui i lea, i le mavae ai o le siitia atu, na matou iloaina ai ua le o toe i ai le galuega. E leai se isi na mafai ona tuuina mai se faamalamalamaga tonu. Na pau le mea sa matou iloaina, ua matou i ai i se nofoaga fou, ma ua leai se galuega, ma ua toeitiiti lava leai se tupe, talu ai sa totogi uma a matou aitalafu a o le’i siitia mai, ma sa faaaluina a matou teugatupe faaiu i le faataunuuina o le malaga.
Na taumafai lo’u toalua i auala uma e mafai ai e saili se galuega tumau. Ae o le taimi lea, sa ia faia ai nai galuega laiti, a’o ou faia galuega taulima, lea na maua ai sina fesoasoani e tausia ai matou, pe a uma ona totogi a matou sefuluai i le Alii. Sa matou ola fuafua lelei i mea uma, ae sa le faigofie le totogiina o pili o aoga, faatauina o meaai ma lavalava, ma le su’eina o tupe na manaomia e lo’u toalua e alu ai e sue se galuega.
Sa tele ina matou fetagisi, ae sa lē tuua ai le faatuatua faapea o le a faamanuia lava e le Alii i matou. Ma sa matou tuuina atu le faafetai mo faamanuiaga ua uma ona matou maua: o fanau teine ola maloloina ma faatuatua, o se faaipoipoga maopoopo, ma auaiga ma tagata o le uarota lagolagosua.
O le toatele o uo e lē o ni tagata o le Ekalesia na fesiligia i matou, “Afai ua outou i ai i sea ituaiga tulaga manaomia, aisea la tou te totogia ai pea le sefuluai?” O le tali sa tumau lava: aua ua poloai mai ai le Alii, ma, matou te lē mananao e faoa mea a le Atua (tagai Malaki 3:8–9).
Sa matou iloaina i taimi uma lava faapea, afai matou te usiusitai, o le a faamanuia e le Alii i matou—atonu e le o le auala na matou faamoemoe i ai, ae mautinoa lava i le auala ua Ia silafia e sili mo lo matou aiga. Sa matou lē faaaogaina lava a matou faafitauli tautupe e avea o se sisi’o e lē auauna ai i le Alii; o le mea moni, sa faateleina lo matou naunautaiga e auauna ia te Ia.
I le asō, ua i ai le galuega a lo’u toalua lea ua fesoasoani ia i matou e amata totogi ai a matou aitalafu, ia na faatupulaia a o leai ai sana galuega. O le a umi se taimi e faapea ai, a o le’i mafai ona matou mapu i tulaga tautupe, ae ua matou iloaina afai matou te “aumaia … mea uma lava i le fale e tuu ai mea,” o le a toina mai e le Atua pupuni o le lagi “ma sasaa [mo i tatou] manuia ina seia silisili ona tele” (Malaki 3:10).