Mo Le Malosi o le Autalavou o loo faapea mai e aloese mai tifiga soona fai o lauulu. O a tifiga o lauulu faapea ua soona fai?
O ituaiga tifiga o lauulu ua soona fai, e eseese lava mai lea atunuu i lea atunuu ma mai lea taimi i lea taimi, o le mea lea e faigata ai ona ta’u atu patino po o a ituaiga tifiga o lauulu ua soona fai mo tagata uma. E faapefea la ona e iloaina ua soona fai se otiga o se ulu? Fesili ifo ia te oe, “Aisea ua ou faia ai lenei mea?” Afai ua e alu ese mai le tulaga masani ina ia vali lou lauulu i se lanu ese, uumi, ma le sitaili mo le faamoemoega e tasi “ina ia faailoa atu ai oe” po o le tosina mai ai o le vaaiga a isi, ona atonu lea ua e oo i le tulaga “soona fai” lea e taua i totonu o le Mo Le Malosi o le Autalavou.1
Pe ua talosaga atu ea taitai o le Ekalesia e aloese mai tifiga soona fai, ona latou te mananao ia te oe ia e foliga lava e pei ona masani ai, e aunoa ma ni tifiga po o se uiga patino? E leai lava! Ua latou tuuina atu lenei fautuaga ona o ou foliga e faailoa atu ai se mea e uiga ia te oe. “E ala i ou laei ma foliga, e mafai ona faaali atu ai e te malamalama i le taua tele o lou tino. E mafai ai ona faaalia o oe o se soo o Iesu Keriso.”2 O tifiga soona fai atonu e faapogisa ai lenei savali, ma auina atu ai se savali sili atu ona faalelalolagi e uiga ia te oe.