Ua Fautuaina Tagata o le Ekalesia e Taitai ia Nonoa Faatasi Talafaasolopito o Aiga ma le Malumalu
I le masina o Oketopa 2012, na tuuina mai ai e le Au Peresitene Sili se tusi e valaaulia ai tagata o le au paia e faaaoga igoa o o latou lava aiga mo galuega faalemalumalu ma sa otooto mai ai ni itu taua se lima e fesoasoani ai i tagata ia maua le fiafia sili atu i le faia o talafaasolopito o aiga ma o i le malumalu.
E mafai e tagata ona tali atu i le valaau e saili, saunia, ma fefaasoaai igoa mo le malumalu i le faaaogaina lea o meafaigaluega ma punaoa ua ofoina atu i le LDS.org ma le FamilySearch.org. O itu na otooto mai i le tusi a le Au Peresitene Sili o:
1. A maua e tagata o le Ekalesia ia igoa o o latou augatuaa ma avatu na igoa i le malumalu mo galuega o sauniga, e mafai ona matua faamauoaina lava le aafiaga i le malumalu.”
Na saunoa mai Elder Richard G. Scott o le Korama a Aposetolo e Toasefululua, “Soo se galuega e te faia i le malumalu o le taimi faaaluina tatau lea, ae o le mauaina o sauniga sui mo ou lava tuaa o le a sili atu ai ona paia le taimi i le malumalu ma o le a faapea ona e maua ai faamanuiaga sili atu. Ua folafola mai e le Au Peresitene Sili e faapea, ‘O lo tatou tiutetauave tupito o le sailia lea ma faailoa o o tatou lava tuaa.’” (“O Le Olioli i le Faaolaina o E Ua Maliliu,” Liahona, Nov. 2012, 93–94).
O le LDS.org, e aoao atili ai i le mafuaaga ua poloaiina ai i tatou e saunia ia igoa mai o tatou lava aiga e ave i le malumalu, i le kilikiina lea o le Punaoa, Talafaasolopito o Aiga, ma le Aisea e tatau ai ona tatou faia galuega faalemalumalu mo o tatou augatuaa? (e maua le vitio i lalo o le Aisea Tatou Te Faia ai Galuega o Talafaasolopito o Aiga?).
2. “O tagata e tapulaa le avanoa e faia ai a latou lava sailiiliga o talafaasolopito o o latou aiga, e fautuaina ina ia faatinoina sauniga sui mo igoa e aumai e isi tagata o le au paia po o le malumalu.”
E toatele tagata o le Ekalesia e tapulaa le avanoa e o ai i le malumalu. Ua fautuaina e taitai o le Ekalesia nei tagata ina ia faia le mea latou te mafaia. O tagata e leai ni malumalu e latalata ane, e mafai ona faia sailiiliga mo talafaasolopito o aiga ona tuu lea i isi e faia sauniga o le malumalu mo i latou.
Atonu e tauivi isi tagata ma le lagona ua uma ona faia uma sailiiliga o talafaasolopito o aiga ma galuega e mafai ona fai mo o latou augatuaa. Ua fautuaina nei tagata ina ia faaauau pea ona o i le malumalu, ma ave igoa o aiga o isi tagata o le au paia.
I le lds.org/temples, Sue se Malumalu e mafai ona fesoasoani ia te oe e sauniuni ai mo le isi au malaga atu i le malumalu.
3. E faapitoa lo matou fautuaina o le autalavou ma talavou nofofua matutua “e faaaoga mo galuega i le malumalu ia igoa o o latou lava aiga, po o igoa o tuaa o tagata o a latou uarota po o siteki.”
“Outou tupulaga talavou, pe tou te mananao i se auala mautinoa e tuuitiitia ai faatosinaga a le fili i o outou olaga?” O le fesili lea a Elder Scott. “Ia faatofu oe lava i le sailia o ou tuaa, saunia igoa mo sauniga sui paia o loo maua i le malumalu, ona e alu atu lea i le malumalu e fai ma sui mo i latou ia maua sauniga o le papatisoga ma le meaalofa o le Agaga Paia. A o e faasolosolo matua, o le a mafai foi ona e auai i le mauaina o isi sauniga. E leai se isi puipuiga sili atu mai faatosinaga a le fili i lou olaga e mafai ona ou mafaufau i ai” (“Faaolaina o e ua Maliliu,” 94).
O loo i ai foi i le vaega o Talafaasolopito o Aiga o le LDS.org, i lalo o le O Le Amataina, e maua ai laasaga e lima e saunia ai igoa o aiga mo le malumalu.
4. E ao i taitai perisitua ona faamautinoa ua aoao e tagata uma o le au paia “le aoaoga faavae o le liliu atu o o latou loto i o latou matua ma faamanuiaga o le ō i le malumalu.”
Ia Liliu Atu Loto o se taiala a taitai ua tuuina atu o se faaopoopoga i le Tusitaulima 2: Taitaiina o le Ekalesia e fesoasoani ai i taitai perisitua o uarota ma siteki e lagolago ai tagata o le au paia i o latou tiutetauave e saili i e ua maliliu ma tuuina atu ia i latou sauniga faaola i le malumalu. O loo aofia ai ma vitio e faamatalaina ai auala na faaaoga e nisi siteki le galuega faalemalumalu ma talafaasolopito o aiga e faamalolosia ai tagata taitoatasi ma aiga.
Sailiili i punaoa mo taitai i luga o le LDS.org i le kilikiina o le Punaoa, Valaauga Uma, Talafaasolopito o Aiga, ma le Punaoa a Taitai.
5. O i latou e “tele igoa o o latou aiga o loo teuina, [ua fautuaina] ia faamatuu mai nei igoa i se taimi faatulagaina lelei ina ia mafai ai ona faatino ia sauniga talafeagai.”
E 12 miliona igoa o i ai nei i le FamilySearch.org o loo teuina ai e tagata o aiga ua faamoemoe e faatinoina e i latou lava ia sauniga o o latou augatuaa. Peitai, o le tele o igoa ua autausagā o teu ai lava.
Atonu e le o fiafia tele [tuaa] pe afai e faaauau pea ona latou faatalitali mo le faataunuuina o o latou sauniga,” na saunoa ai Elder Scott. “Matou te uunaia outou o e ua tele ni igoa o loo teuina ina ia faasoa atu na igoa ina ia mafai ona fesoasoani atu tagata o lou aiga lautele po o le uarota ma le siteki i le faataunuuina o lena galuega. E mafai ona faia lenei mea e ala i le tufatufaina o kata o le malumalu i tagata o le uarota ma le siteki o loo naunau e fesoasoani pe faaaoga foi le polokalama komepiuta o le FamilySearch e auina sa’o atu ai igoa i le malumalu.” (“Faaolaina o E Ua Maliliu,” 94).
I le vaega O Le Amataina na ta’ua i luga, i lalo o le Ou Te Manao e Faasoa Igoa i Isi, kiliki i le Matamata le Vitio, ona matamata lea o le vitio Faamatuu Atu o Igoa mo Galuega Faalemalumalu mo faamatalaga e uiga i le faasoa atu o igoa sa teuina.
E tele punaoa lolomi ma faaeletonika ua i ai a le Ekalesia e fesoasoani ai i tagata o le au paia ia malamalama ai i mafuaaga mo le tapenaina o igoa faaleaiga mo le malumalu ma le ala e faia ai.
Ata na saunia e David Stoker