Mai le Misiona
Ootia i se Molimau
O Michael Harken e nofo i Iuta, ISA.
Ata na tusia e Jim Madsen
I le amataga o la’u misiona, sa ou auauna ai i se aai laitiiti i Korea i Saute. I se tasi aso timuga, sa le’i faamanuiaina tele ae sa ou manao e galue pea seia oo i le taimi e foi ai i le fale. Sa tonu ia i ma’ua ma la’u soa o le a ma tuitui i nisi faitotoa.
I se tasi o faitotoa sa tali mai ai se fafine, ma sa amata ona talatalanoa i ai la’u soa. Ona o au o se faifeautalai fou, sa faigata ai ia te au ona malamalama, ae i ni nai minute sa amata ona talanoa faa-Peretania mai. Na ma iloa ai e sau o ia mai Sikako, Ilinoi, ISA, ma ua sii mai iina ma lona aiga.
E lelei le fafine ae sa naunau o ia e ta’useseina le Tusi a Mamona ma sa faatalitonu i maua e le sa’o le tatou ekalesia. Sa ou tutu ai iina ma la’u soa a o taumafai o ia e tali ana fesili faigata. Sa taumafai la’u soa e molimau atu ia te ia e moni le Tusi a Mamona, ma e mafai ona fesoasoani ia te ia, ae sa tausisi lava o ia i lona talitonuga e sese.
Ina ua mavae le 30 minute o le talanoaga i le faitotoa, sa ia fesili mai i la’u soa, “O fea tatou te o i ai pe a mavae le olaga?” Sa mafai ona ou iloa o la sa naunau o ia e osofai ia aoaoga a la’u soa, e pei ona ia faia muamua. Sa molimau atu la’u soa i le ata o le faaolataga ma e mafai ona tatou toe ola faatasi e faavavau ma o tatou aiga i le malo selesitila. A o lei mafai ona ia faaauau, sa ia taofia o ia ma talosaga pe mafai ona ia toe fai atu lana tala e uiga i le toe faatasia o aiga. Na toe tali atu la’u soa i le tali lava lea e tasi. Sa ou lagonaina le matuai malosi o le Agaga, ma sa mafai ona ou vaaia i mata o le fafine se mea na matua ootia ai lona loto. Ina ua mavae lena molimau puupuu ma le mamana, sa uma lona faatautee mai, ae tago ave le Tusi a Mamona ma talosagaina i maua ma te toe o atu matou te talanoa faatasi ma ia ma lona toalua e uiga i le Tusi a Mamona.
Ou te manatua lo ma savavali atu i le fale ma la’u soa i lena afiafi, ma le maofa i le aafiaga o le molimau a la’u soa. Sa ou malamalama ai iina, o se molimau e o faatasi ma le Agaga o sa tatou meafaigaluega faafaiaoga aupito mamana lea ua i ai. O le a le galo lava ia te au la’u soa ma lana molimau i lena po. Ina ua mavae lena aafiaga, sa tonu ia te au, tusa lava pe utiuti lo’u tomai e tautala ai faa-Korea, ae o le a ou taumafai lava e tuuina atu la’u molimau tusa lava pe a. A o ou faia, sa amata ona ou maua pea lava pea le Agaga. Sa ou aoaoina o fesootaiga aupito sili e tupu pe a e aoao atu i le Agaga.