E Faamanuiaina Aiga e le Sefuluai

Sandie Graham, Niu Ioka, ISA

Na ou ola a’e i le Ekalesia, ae na ou se ese i le taimi o lo’u talavou. Ina ua ou toe foi mai i le Ekalesia, o lo’u toalua, o Dale, na lagolagoina au, peitai sa le fia manao e feiloai i faifeautalai.

Ina ua ou toe toaga mai i le lotu, na ma feiloai ma le epikopo mo se faatalanoaga o le pepa faataga o le malumalu. Na ia fesili mai pe o a’u o se tagata e totogi atoa le sefuluai, ma sa ou fiafia e faailoa atu o lea lava. Na faateia a’u ina ua fesili mai le epikopo, “O silafia e lou toalua o loo e totogia le sefuluai? Na ou te’i—aisea e taua ai lea tulaga? Na fai mai ma le agalelei le epikopo ou te toe sau, pe a uma ona ou ta’uina ia Dale o loo totogi la’u sefuluai.

I se tasi taeao o le Aso Sa, na faapea ai ona ou mauaina le lototele e ta’u ai i lo’u toalua o loo ou totogiina le sefuluai. Na faateia au e Dale e ala i lona faapea mai, “Ua ou iloa.” O le tasi lenei o mau vavega o le sefuluai.

I se taimi puupuu mulimuli ane, na tuuina mai ai e Dale mea tautupe a le aiga ia te a’u. Ina ua ou faamalamalama atu faapea, o le a ou totogia se sefuluai atoa i a matou tupe maua uma, na ia lagolagoina aua sa ia vaaia faamanuiaga e mafai e le sefuluai ona aumaia.

O le taimi nei, o a matou kapoti ua tutumu i taimi uma, matou te faia a matou tatalo faaleaiga i aso uma, matou te fafagaina faifeautalai faatasi i le masina, ma o lo’u toalua e auai o ia i afiafi faaleaiga. Ou te talitonu o le a i ai se aso e auai ai Dale i le Ekalesia, ma o lona liua na amata i la matou faaiuga e totogi faatasi se sefuluai.